أَمْشَانْ إِقدّْسنْ
12
1 ”ذ ثِينَا ذ ثِيوصَّا ذ لْفَارَايِيضْ نِّي إِ غَا ثحْضَامْ مَاحنْذْ أَذْ ثنْثْ ثڭّمْ ذِي ثمُّورْثْ، نِّي ذ أَشْ إِوْشَا سِيذِي، أَربِّي ن إِبَابَاثنْ نّكْ، حِيمَا أَذْ ت ثكْسِيذْ ذ ڒْوَارْثْ، مَارَّا ؤُسَّانْ نِّي إِ غَا ثدَّارمْ كنِّيوْ خْ وُوذمْ ن ثمُّورْثْ. 2 أَذْ ثَاردّْدْجمْ قَاعْ مَارَّا إِمُوشَانْ مَانِي ڒڭْنُوسْ ثُوغَا سخَّارنْ إِ إِربِّيثنْ نْسنْ، مَارَّا إِمُوشَانْ نِّي إِ غَا ثطّْفمْ ذ ڒْوَارْثْ: خْ إِذُورَارْ يُوعْڒَانْ، خْ ثوْرِيرِينْ ؤُ سَاذُو كُوڒْ ثَاشجَّارْثْ ثَازِيزَاوْثْ. ▫ ▪ 3 أَذْ ثنْضَارمْ إِعَالْطَارنْ نْسنْ، أَذْ ثَارْژمْ إِمَايْضُوثنْ نْسنْ إِقدّْسنْ ؤُ ثِيربِّينْ نْسنْ ن شْوَارْثِي أَذْ ثنْثْ ثسّْشمْضمْ س ثْمسِّي ؤُشَا أَذْ ثْهذْممْ ڒخْيَاڒَاثْ إِنقْشنْ ن إِربِّيثنْ نْسنْ ؤُشَا أَذْ ثمْحَامْ إِسمْ نْسنْ زڭْ ومْشَانْ نِّي. ▪ 4 وَارْ تّڭّمْ إِ سِيذِي، أَربِّي نْومْ أَمْ تّڭّنْ نِيثْنِي، 5 مَاشَا أَذْ ثَارْزُومْ خْ ومْشَانْ نِّي إِ غَا إِخْضَارْ سِيذِي، أَربِّي نْومْ، زِي جَارْ مَارَّا ثِيقبَّاڒْ نْومْ، حِيمَا أَذْ ذِينْ إِڭّْ إِسمْ نّسْ، وَاهْ غَارْ ثْزذِّيغْثْ نّسْ إِ غَا ثَارْزُومْ ؤُ ذِينْ إِ غَا ثَاوْضذْ ▪ 6 ؤُشَا ذِينِّي إِ غَا ثَاوْيمْ ثِيغَارْصَا نْومْ ن وشْمَاضْ ذ ثْغَارْصَا نْومْ ذ ڒعْشُورْ نْومْ ذ ثوْهِيبْثْ نِّي إِسّْڭعّذْ ؤُفُوسْ نْومْ ذ ثوْهِيبِينْ نْومْ س ڒْخَاضَارْ ذ إِمنْزَا ن إِفُونَاسنْ ذ ثْفُونَاسِينْ نْومْ ذ إِمنْزَا ن وُودْجِي نْومْ، 7 ؤُشَا ذِينِّي إِ غَا ثشّمْ زَّاثْ إِ وُوذمْ ن سِيذِي، أَربِّي نْومْ، أَذْ ثْفَارْحمْ، كنِّيوْ ذ ڒَادْجْ ن ثُوذْرِينْ نْومْ، زِي مَارَّا مِينْ إِڭَّا ؤُفُوسْ نْومْ ؤُ زِي مِينْ ذِي كنِّيوْ إِبَاركْ سِيذِي، أَربِّي نّكْ. 8 وَارْ تّڭّمْ أَمشْنَاوْ مَارَّا مِينْ نتّڭّْ نشِّينْ ذَا أَسّْ-أَ: كُوڒْ أَرْيَازْ إِتّڭّنْ مِينْ ذ أَسْ إِتّْوَاڒَا نِيشَانْ إِ إِخفْ نّسْ. 9 مِينْزِي أَقَا عَاذْ ڒخُّو وَارْ ثُوذِيفمْ شَا غَارْ أَرَّاحثْ ؤُ غَارْ ڒْوَارْثْ نِّي ذ أَومْ إِوْشَا سِيذِي، أَربِّي نّكْ.
10 خْمِي إِ غَا ثژْوَامْ لْ'ؤُرْذُونْ ؤُشَا أَذْ ثْزذْغمْ ذِي ثمُّورْثْ نِّي ذ أَومْ إِ غَا إِوْشْ سِيذِي، أَربِّي نْومْ، ذ ڒْوَارْثْ، نتَّا أَذْ أَومْ إِوْشْ أَرَّاحثْ زِي مَارَّا ڒْعذْيَانْ نْومْ إِ ذ أَومْ د-إِنّْضنْ ؤُشَا أَذْ ثْزذْغمْ ذِي ڒَامَانْ.
11 ذِينْ إِ غَا يِيڒِي ومْشَانْ نِّي إِ غَا إِخْضَارْ سِيذِي، أَربِّي نْومْ، حِيمَا أَذْ إِسّزْذغْ ذِينْ إِسمْ نّسْ ؤُشَا ذِينِّي إِ غَا ثَاوْيمْ مَارَّا مِينْ خْ شكْ ؤُمُورغْ: ثِيغَارْصَا ن وشْمَاضْ نْومْ، ثِيغَارْصَا نْومْ، ڒعْشُورْ نْومْ، ثِيوْهِيبِينْ ن ؤُسْڭعّذْ ن ؤُفُوسْ نْومْ ذ مَارَّا ثِيوْهِيبِينْ ن لْوَاعْذْ نِّي إِ غَا ثْوعْذمْ إِ سِيذِي. ▪
12 أَذْ ثْفَارْحمْ زَّاثْ إِ وُوذمْ ن سِيذِي، أَربِّي نْومْ، كنِّيوْ ذ إِحنْجِيرنْ نْومْ ذ ثْحنْجِيرِينْ نْومْ ذ إِسمْغَانْ نْومْ ذ ثِييَّا نْومْ ذ ؤُلَاوِي نِّي إِزدّْغنْ ذَاخڒْ إِ ثِيوُّورَا نْومْ، مِينْزِي وَارْ غَارسْ ثَاسْغَارْثْ نِيغْ ڒْوَارْثْ أَكِيذْومْ. ▪
13 حْضَا وَارْ تّڭّْ أَذْ ثسّْبخَّارذْ ثِيغَارْصَا نّكْ ن وشْمَاضْ ذِي مِينْ مَا أَمْشَانْ نِّي ثْوَاڒِيذْ،
14 مَاشَا ذڭْ ومْشَانْ، نِّي إِ غَا إِخْضَارْ سِيذِي ذڭْ إِشْثنْ زِي ثْقبَّاڒْ نّكْ، ذِينِّي إِ غَا ثسّْبخَّارذْ ثِيغَارْصَا ن وشْمَاضْ ؤُشَا ذِينِّي إِ غَا ثڭّذْ مَارَّا مِينْ ذ أَشْ ؤُمُورغْ.
تَّاوْصيّثْ خْ إِذَامّنْ ذ ثْوصَّا نّغْنِي
15 س مَارَّا، ثْزمَّارذْ أَذْ ثْغَارْصذْ ذَاخڒْ إِ ثوُّورَا نّكْ مَارَّا مِينْ إِمّژْرِي وُوڒْ نّكْ ؤُشَا أَذْ زَّايسْ ثشّذْ عْلَاحْسَابْ لْبَارَاكَا نِّي ذ أَشْ إِ غَا إِوْشْ سِيذِي، أَربِّي نّكْ، ذَاخڒْ إِ ثوُّورَا نّكْ. أَمخْمُوجْ ذ ؤُمزْذَاڭْ زمَّارنْ أَذْ زَّايسْ شّنْ، أَخْمِي تّتّنْ زڭْ إِغَايْضْ ن وزْغَارْ ؤُ زڭْ ؤُذَاذْ.
16 مْغِيرْ إِذَامّنْ وَارْ ثنْ ثتّتّذْ. أَذْ ثنْ ثْنغْڒذْ خْ ثمُّورْثْ، أَمشْنَاوْ أَمَانْ. ▪
17 وَارْ إِعدّڒْ أَذْ ثشّذْ ذَاخڒْ إِ ثوُّورَا نّكْ زِي ڒعْشُورْ ن إِرْذنْ ذ بِينُو نّكْ ن جْذِيذْ ذ زّشْثْ نّكْ ن طّْرِي ؤُڒَا زڭْ إِمنْزَا ن إِفُونَاسنْ ذ ثْفُونَاسِينْ ذ وُودْجِي نّكْ نِيغْ زِي ثوْهِيبِينْ ن لْوَاعْذْ نّكْ إِنِّي زِي ثْوَاعْذذْ نِيغْ زِي ثوْهِيبِينْ س ڒْخَاضَارْ نِيغْ زِي ثوْهِيبْثْ نِّي إِسّْڭعّذْ ؤُفُوسْ نّكْ.
18 مِينْزِي أَذْ ثنْ ثشّذْ زَّاثْ إِ وُوذمْ ن سِيذِي، أَربِّي نّكْ، ذڭْ ومْشَانْ نِّي إِ غَا إِخْضَارْ سِيذِي، أَربِّي نّكْ، شكْ، مِّيشْ، يدْجِيشْ، إِسْمغْ نّكْ، ثَايَّا نّكْ ذ ؤُلَاوِي نِّي إِزدّْغنْ ذَاخڒْ إِ ثوُّورَا نّكْ ؤُشَا أَذْ ثْفَارْحذْ زَّاثْ إِ وُوذمْ ن سِيذِي، أَربِّي نّكْ، ذِي مَارَّا مِينْ غَارْ إِ غَا إِسّْوِيژّذْ ؤُفُوسْ نّكْ.
19 حْضَا، وَارْ سمّحْ غَارْ ؤُزدْجِيفْ نّسْ أَلَاوِي ذِي مَارَّا ؤُسَّانْ نّكْ خْ ثمُّورْثْ نّكْ.
20 خْمِي سِيذِي، أَربِّي نّكْ، أَذْ إِسِّييْرُو أَيْمِيرْ ن ثمُّورْثْ نّكْ، أَمْ مَامّشْ شكْ إِوَاعْذْ ؤُشَا أَذْ ثِينِيذْ: ’خْسغْ أَذْ شّغْ أَيْسُومْ‘، مِينْزِي إِمّژْرِي ڒعْمَارْ نّكْ أَذْ يشّْ أَيْسُومْ، خنِّي أَذْ ثشّذْ أَيْسُومْ أَنشْثْ ن مَارَّا مِينْ إِمژْرِي ڒعْمَارْ نّكْ. ▫ ▪ 21 مَاڒَا ثُوغَا شكْ ثِيڭّْوجذْ خْ ومْشَانْ نِّي إِ غَا إِخْضَارْ سِيذِي، أَربِّي نّكْ، حِيمَا أَذْ ذِينْ إِسّمْثنْ إِسمْ نّسْ، خنِّي ثْزمَّارذْ أَذْ ثْغَارْصذْ زڭْ إِفُونَاسنْ ذ ثْفُونَاسِينْ نّكْ ؤُ زڭْ وُودْجِي نّكْ نِّي ذ أَشْ إِوْشَا سِيذِي، أَمْ مَامّشْ شكْ ؤُمُورغْ، ؤُشَا أَذْ زَّايسْ ثشّذْ ذَاخڒْ إِ ثوُّورَا نّكْ أَنشْثْ ن مَارَّا مِينْ ذَايسْ إِمّژْرِي ڒعْمَارْ نّكْ. 22 أَمْ مَامّشْ إِتّْوَاشّْ إِغَايْضْ ن وزْغَارْ ذ ؤُذَاذْ، أَمنِّي زَّايسْ إِ غَا ثشّذْ. أَمخْمُوجْ ذ ؤُمزْذَاڭْ زمَّارنْ أَذْ زَّايسْ شّنْ.
23 مْغِيرْ وَارْ تّتّْ عمَّارْصْ زڭْ إِذَامّنْ، مِينْزِي إِذَامّنْ ذ ڒعْمَارْ. وَارْ تّتّْ ڒعْمَارْ أَكْ-ذ ويْسُومْ. 24 وَارْ ثنْ ثتّتّذْ، مَاشَا أَذْ ثنْ ثْنغْڒذْ خْ ثمُّورْثْ أَمشْنَاوْ أَمَانْ. 25 وَارْ ڭُّورْ أَذْ ثنْ ثشّذْ، حِيمَا أَذْ ثِيڒِيذْ شكْ مْلِيحْ ذ إِحنْجِيرنْ نّكْ أَوَارْنِي أَشْ، خْمِي إِ غَا ثڭّذْ مِينْ إِسڭّْذنْ زَّاثْ إِ ثِيطَّاوِينْ ن سِيذِي. 26 أَذْ ثَاوْيذْ مْغِيرْ ثِيمسْڒَايِينْ نِّي غَاركْ قدّْسنْثْ ذ ثْغَارْصَا ن لْوَاعْذْ نّكْ ؤُشَا أَذْ كِيذْسنْثْ د-ثَاسذْ غَارْ ومْشَانْ إِ غَا إِخْضَارْ سِيذِي 27 ؤُشَا أَذْ ثسّْوجْذذْ ثِيغَارْصَا ن وشْمَاضْ، أَيْسُومْ نّسْ ذ إِذَامّنْ نّسْ، خْ ؤُعَالْطَارْ ن سِيذِي، أَربِّي نّكْ، ؤُشَا إِذَامّنْ ن ثْغَارْصَا أَذْ تّْوَازدْجْعنْ خْ ؤُعَالْطَارْ ن سِيذِي، أَربِّي نّكْ، مَاشَا إِعدّڒْ أَذْ ثشّذْ أَيْسُومْ. 28 حْضَا ؤُ سڒْ إِ مَارَّا أَوَاڒنْ-أَ نِّي ذ أَشْ ؤُمُورغْ، حِيمَا أَذْ ثِيڒِيذْ مْلِيحْ، شكْ ذ إِحنْجِيرنْ نّكْ أَوَارْنِي أَشْ إِ ڒبْذَا، ؤُمِي غَا ثڭّذْ مِينْ إِشْنَانْ ذ مِينْ إِسڭّْذنْ ذِي ثِيطَّاوِينْ ن سِيذِي، أَربِّي نّكْ.
29 خْمِي إِ غَا إِثحَّا سِيذِي، أَربِّي نّكْ، ڒڭْنُوسْ مَانِي إِ غَا ثْرَاحذْ حِيمَا أَذْ ثنْ ثكْسِيذْ ذ ڒْوَارْثْ ؤُشَا خنِّي شكْ أَذْ ثنْ ثكْسِيذْ ذ ڒْوَارْثْ ؤُشَا أَذْ ثْزذْغذْ ذِي ثمُّورْثْ نْسنْ، 30 حْضَا مَاحنْذْ وَارْ ثْضفَّارذْ أَوَارْنِي أَسنْ ذِي ثخْشفْثْ ذ إِشْثْ، أَوَارْنِي مَا أَذْ تّْوَاثحَّانْ زَّاثْ إِ وُوذمْ نّكْ، ؤُشَا أَذْ ثَارْزُوذْ خْ إِربِّيثنْ نْسنْ، أَذْ ثِينِيذْ: ’أَمْ مَامّشْ سخَّارنْ نِيثْنِي إِ إِربِّيثنْ نْسنْ، أَمُّو إِ غَا ڭّغْ ؤُڒَا ذ نشّْ.‘ 31 وَارْ تّڭّْ أَمنِّي إِ سِيذِي، أَربِّي نّكْ، مِينْزِي مَارَّا مِينْ إِدْجَانْ ذ جّْعِيفشْثْ إِ سِيذِي ذ مِينْ إِشَارّهْ نتَّا، أَقَا ڭِّينْ ث نِيثْنِي إِ إِربِّيثنْ نْسنْ. عَاذْ سّْشمْضنْ إِحنْجِيرنْ نْسنْ ذ يسِّيثْسنْ ذِي ثْمسِّي إِ إِربِّيثنْ نْسنْ.“