‏1 إِسِّيوڒْ سِيذِي أَكْ-ذ مُوسَا، إِنَّا:

‏2 ”ؤُمُورْ أَيْثْ ن إِسْرَائِيل ؤُشَا إِنِي أَسنْ: ’خْمِي إِ غَا ثَاذْفمْ ثَامُّورْثْ ن كنْعَانْ، خنِّي ثَا ذ ثَامُّورْثْ إِ ذ أَومْ غَا يِيڒِينْ ذ ڒْوَارْثْ، ثَامُّورْثْ ن كنْعَانْ أَكْ-ذ إِيْمِيرنْ نّسْ أَذْ ثِيڒِي أَمُّو:

‏3 جِّيهثْ ن لْجَانُوبْ أَذْ غَارْومْ ثِيڒِي زِي ڒخْڒَا ن صِينْ أَڒْ أَيْمِيرْ ن إِذُومْ ؤُشَا أَيْمِيرْ ن لْجَانُوبْ أَذْ غَارْومْ يِيڒِي زِي طَّارْفْ أَنڭَّارُو ن ڒبْحَارْ أَمدْجَاحْ ذِي شَّارْقْ ^▪   ‏4 ؤُشَا أَيْمِيرْ أَذْ إِميّڒْ زِي لْجَانُوبْ غَارْ ثْسُونْثَا ن ثْغَارْضْمِيوِينْ ؤُشَا أَذْ إِعْذُو غَارْ صِينْ ؤُشَا طّْرُوفَا نّسْ أَذْ د-أَوْضنْ جِّيهثْ ن لْجَانُوبْ ن قَاذَاشْ-بَارْنِيعْ ؤُشَا أَذْ إِعْذُو غَارْ حَاصَارْ-أَدَّارْ ؤُشَا أَذْ إِژْوَا غَارْ أَصْمُونْ. ‏5 أَذْ إِنّضْ ويْمِيرْ زِي أَصْمُونْ غَارْ ثغْزَارْثْ ن مِيصْرَا ؤُشَا طّْرُوفَا نّسْ أَذْ أَوْضنْ أَڒْ ڒبْحَارْ.

‏6 ؤُشَا أَيْمِيرْ ن ڒْغَارْبْ أَذْ أَومْ يِيڒِي ڒبْحَارْ أَمقّْرَانْ. وَا أَذْ أَومْ يِيڒِي ذ أَيْمِيرْ ن ڒْغَارْبْ. ^▫  

‏7 وَا أَذْ أَومْ يِيڒِي ذ أَيْمِيرْ ن شَّامَالْ: أَذْ ث ثَارْشْممْ إِ يِيخفْ نْومْ زڭْ إِلّْ أَڭْرَاكَالْ أَڒْ أَذْرَارْ ن هُورْ. ‏8 زڭْ وذْرَارْ ن هُورْ أَذْ ث ثَارْشْممْ أَڒْ مَانِي إِ غَا ثَاوْضذْ غَارْ حَامَاثْ ؤُشَا طّْرُوفَا ن ويْمِيرْ أَذْ أَوْضنْ أَڒْ صَاذَاذْ. ‏9 أَذْ يعْذُو ويْمِيرْ أَڒْ زِيفْرُونْ ؤُشَا طّْرُوفَا نّسْ أَذْ أَوْضنْ أَڒْ حَاصَارْ-عِينَانْ. وَا أَذْ أَومْ يِيڒِي ذ أَيْمِيرْ ن شَّامَالْ.

‏10 أَذْ ثَارْشْممْ أَيْمِيرْ نْومْ ن شَّارْقْ زِي حَاصَارْ-عِينَانْ غَارْ شَافَامْ

‏11 ؤُشَا أَذْ د-إِهْوَا ويْمِيرْ زِي شْفَامْ أَڒْ رِيبْلَا، شَّارْقْ ن عَايْنْ. خنِّي أَذْ د-إِهْوَا ويْمِيرْ عَاذْ كْثَارْ ؤُشَا أَذْ يَاوضْ غَارْ ثْمَا ن شَّارْقْ ن ڒبْحَارْ ن كِينَّارَاثْ.

‏12 ؤُشَا أَذْ د-إِهْوَا ويْمِيرْ غَارْ لْ'ؤُرْذُونْ ؤُشَا طّْرُوفَا نّسْ أَذْ أَوْضنْ أَڒْ ڒبْحَارْ أَمدْجَاحْ. ثَا أَذْ أَومْ ثِيڒِي ذ ثَامُّورْثْ أَكْ-ذ إِيْمِيرنْ نّسْ إِ ذ أَسْ د-إِنّْضنْ.‘ “

‏13 ؤُشَا مُوسَا يُومُورْ أَيْثْ ن إِسْرَائِيل، إِنَّا: ”ثَا ذ ثَامُّورْثْ نِّي إِ غَا ثبْضَامْ جَارْ أَومْ س ثْقدُّوحْثْ، ثنِّي خْ يُومُورْ سِيذِي أَذْ ثمّوْشْ إِ ثسْعَا ن ثْقبَّاڒْ ؤُ عَاذْ إِ وزْينْ ن ثقْبِيتْشْ ن مَانَاسَّا.

‏14 مِينْزِي ثَاقْبِيتْشْ ن رُوبِينْ ثتّْوَاستّفْ عْلَاحْسَابْ ثَادَّارْثْ ن إِبَابَاثنْ نْسنْ ؤُ ثَاقْبِيتْشْ ن جَاذْ ثتّْوَاستّفْ عْلَاحْصَابْ ثَادَّارْثْ ن إِبَابَاثنْ نْسنْ، أَقَا طّْفنْ ثَاسْغَارْثْ نْسنْ، ؤُ أَزْينْ ن ثقْبِيتْشْ ن مَانَاسَّا ثطّفْ ؤُڒَا ذ نتَّاثْ ثَاسْغَارْثْ نّسْ ن ڒْوَارْثْ.

‏15 ثْنَاينْ ن ثْقبَّاڒْ ذ وزْينْ أَقَا طّْفنْثْ ڒْوَارْثْ نْسنْثْ غَارْ ثْمَا أَيَا ن لْ'ؤُرْذُونْ، زِي أَرِيحَا غَارْ شَّارْقْ غَارْ مَانِيسْ د-ثْنقَّارْ ثْفُوشْثْ.“

‏16 إِسِّيوڒْ سِيذِي أَكْ-ذ مُوسَا، إِنَّا:

‏17 ”إِنَا ذ إِسْمَاونْ ن يرْيَازنْ إِنِّي إِ غَا إِبْضَانْ ثَامُّورْثْ جَارْ أَومْ:

أَكهَّانْ أَلِيعَازَارْ ذ يَاشُووَا، مِّيسْ ن نُونْ. ^▪  

‏18 أَذْ ثكْسِيمْ عَاوذْ إِجّْ ن ؤُمقّْرَانْ زِي كُوڒْ ثَاقْبِيتْشْ مَاحنْذْ أَذْ ثبْضَامْ ثَامُّورْثْ.

‏19 إِنَا ذ إِسْمَاونْ ن يرْيَازنْ:

إِ ثقْبِيتْشْ ن يَاهُوذَا، كَالِيبْ، مِّيسْ ن يَافُونِّي

‏20 إِ ثقْبِيتْشْ ن أَيْثْ ن شِيمْعُونْ، شِيمُووِيلْ، مِّيسْ ن عَامِّيهُوذْ،

‏21 إِ ثقْبِيتْشْ ن بِينْيَامِينْ، إِلِيذَاذْ، مِّيسْ ن كَاسْلُونْ،

‏22 إِ ثقْبِيتْشْ ن أَيْثْ ن ذَانْ، أَمقّْرَانْ بُوقِّي، مِّيسْ ن يُوجْلِي،

‏23 إِ ثقْبِيتْشْ ن أَيْثْ ن يُوسُوفْ:

إِ ثقْبِيتْشْ ن أَيْثْ ن مَانَاسَّا، أَمقّْرَانْ حَانِّييِيلْ، مِّيسْ ن إِفُوذْ،

‏24 إِ ثقْبِيتْشْ ن أَيْثْ ن إِفْرَايِيمْ، أَمقّْرَانْ قِيمُويِيلْ، مِّيسْ ن شِيفْطَانْ،

‏25 إِ ثقْبِيتْشْ ن أَيْثْ ن زَاپُولُونْ، أَمقّْرَانْ إِلِيصَافَانْ، مِّيسْ ن فَارْنَاخْ،

‏26 إِ ثقْبِيتْشْ ن أَيْثْ ن إِسَّاكَارْ، أَمقّْرَانْ فَالْطِييِيلْ، مِّيسْ ن عَازَّانْ،

‏27 إِ ثقْبِيتْشْ ن أَيْثْ ن أَشِيرْ، أَمقّْرَانْ أَخِيهُوذْ، مِّيسْ ن شَالُومِي،

‏28 إِ ثقْبِيتْشْ ن أَيْثْ ن نَافْثَالِي، أَمقّْرَانْ فَاذَاهْيِيلْ، مِّيسْ ن عَامِّيهُوذْ.“

‏29 إِنَا ذ إِنِّي خْ يُومُورْ سِيذِي أَذْ بْضَانْ ڒْوَارْثْ إِ أَيْثْ ن إِسْرَائِيل ذِي ثمُّورْثْ ن كنْعَانْ.