‏1 إِسِّيوڒْ سِيذِي أَكْ-ذ مُوسَا، إِنَّا:

‏2 ”ؤُمُورْ أَيْثْ ن إِسْرَائِيل ؤُشَا إِنِي أَسنْ: ’إِتّْخصَّا كنِّيوْ أَذْ ثحْضَامْ خْ ثْغَارْصْطْ إِنُو، مَاشَّا إِنُو إِ ثوْهِيبِينْ ن ثْمسِّي، إِشْثْ ن ڒفْوَاحثْ إِتّْفُوحنْ إِ نشّْ، مَاحنْذْ أَذْ أَيِي ث-إِ-د ثسّْقَارّْبمْ ذِي ڒْوقْثْ نّسْ إِتّْوَاڭّنْ.‘ ‏3 أَذْ أَسنْ ثِينِيذْ: ’أَقَا ثَا ذ ثَاوْهِيبْثْ ن ثْمسِّي إِ إِتّْخصَّانْ أَذْ د-ثسّْقَارّْبمْ: ثْنَاينْ ن إِزْمَارنْ إِشْنَانْ ن إِجّْ ن ؤُسڭّْوَاسْ، أَمْ إِشْثْ ن ثْغَارْصْثْ ن وشْمَاضْ ڒبْذَا. ^▪   ‏4 إِجّْ ن إِزْمَارْ أَذْ ث-إِ-د-ثسّْوجْذذْ ذِي ضّْبحْ ؤُشَا إِزْمَارْ نّغْنِي أَذْ ث-إِ-د-ثسّْوجْذذْ جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ ‏5 ؤُشَا أَكْ-ذ مَانْ أَيَا أَمْ ثوْهِيبْثْ ن ڒْغِيدْجثْ إِشْثْ ن ثعْشَارْثْ ن يِيجّْ ن إِفَا ن وَارنْ أَزْذَاذْ إِخدْجْضنْ س يِيجّْ ن أَرْبعْ ن إِجّْ ن ؤُهِينُو ن زّشْثْ تّْوَادّْزنْ ث-إِ-د زِي زِّيثُونْ. ^▪   ‏6 أَقَا-ت ذ ثَاغَارْصْطْ ن وشْمَاضْ ن ڒبْذَا، ثنِّي ثُوغَا إِتّْوَاڭّنْ ذڭْ وذْرَارْ ن سِينَا أَمْ إِشْثْ ن ڒفْوَاحثْ إِتّْفُوحنْ، أَقَا-ت ذ إِشْثْ ن ثوْهِيبْثْ ن ثْمسِّي إِ سِيذِي. ‏7 ثَاوْهِيبْثْ نّسْ ن ؤُسيّبْ أَذْ ثِيڒِي ذ إِجّْ ن أَرْبعْ ن إِجّْ ن ؤُهِينُو إِ يِيجّْ ن إِزْمَارْ. سيّبْ ثَاوْهِيبْثْ ن ؤُسيّبْ ن شّْرَابْ ذِي زَّاوشْثْ إِقدّْسنْ زَّاثْ إِ سِيذِي. ‏8 أَذْ ثسّْوجْذذْ إِزْمَارْ نّغْنِي جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ. أَذْ ت ثسّْوجْذذْ أَمْ مَامّشْ ثسّْوجْذذْ ثَاوْهِيبْثْ ن ڒْغِيدْجثْ ذِي ضّْبحْ ؤُ أَمْ مَامّشْ ثسّْوجْذذْ ثَاوْهِيبْثْ ن ؤُسيّبْ نّسْ، أَمْ إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي.

‏9 ذڭْ وَاسّْ ن سّبْثْ أَذْ ثسّْوجْذذْ ثْنَاينْ ن إِزْمَارنْ إِشْنَانْ ن إِجّْ ن ؤُسڭّْوَاسْ ذ ثْنَاينْ ن ثعْشُورِينْ ن يِيجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْغِيدْجثْ إِخدْجْضنْ س زّشْثْ أَكْ-ذ ثوْهِيبْثْ نّسْ ن ؤُسيّبْ.

‏10 أَقَا-ت ذ ثَاغَارْصْطْ ن وشْمَاضْ ن سّبْثْ إِ مْكُوڒْ سّبْثْ، أَذْ ت ثَارْنِيذْ إِ ثْغَارْصْثْ ن وشْمَاضْ ن ڒبْذَا ذ ثوْهِيبْثْ نّسْ ن ؤُسيّبْ.

‏11 ذڭْ ؤُمزْوَارْ ن كُوڒْ إِجّْ ن إِيُورنْ نْومْ إِتّْخصَّا أَذْ د-ثسّْقَارّْبمْ إِشْثْ ن ثْغَارْصْثْ ن وشْمَاضْ إِ سِيذِي: ثْنَاينْ ن إِينْذُوزنْ، إِجّْ ن إِشَارِّي، سبْعَا ن إِزْمَارنْ إِشْنَانْ ن إِجّْ ن ؤُسڭّْوَاسْ

‏12 ؤُشَا أَكْ-ذ مَانْ أَيَا ثْڒَاثَا ن ثعْشُورِينْ ن إِجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْغِيدْجثْ إِخدْجْضنْ س زّشْثْ إِ يِيجّْ ن ؤُينْذُوزْ ؤُ ثْنَاينْ ن ثعْشُورِينْ ن يِيجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْغِيدْجثْ إِخدْجْضنْ س زّشْثْ إِ يِيجّْ ن إِشَارِّي

‏13 ؤُشَا أَرْنِي إِشْثْ ن ثعْشَارْثْ ن يِيجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْغِيدْجثْ إِخدْجْضنْ س إِجّْ نْ ڒْقدّْ ن زّشْثْ إِ يِيجّْ ن إِزْمَارْ. أَقَا-ت ذ ثَاغَارْصْثْ ن وشْمَاضْ س إِشْثْ ن ڒفْوَاحثْ إِتّْفُوحنْ، أَقَا-ت ذ إِشْثْ ن ثوْهِيبْثْ ن ثْمسِّي إِ سِيذِي.

‏14 ثِيوْهِيبِينْ نْسنْ ن ؤُسيّبْ أَذْ إِڒِينْثْ ذ أَزْينْ ن ؤُهِينُو ن بِينُو أَكْ-ذ ؤُينْذُوزْ ذ إِشْثْ ن تُّوڒُوثْ ن إِجّْ ن ؤُهِينُو أَكْ-ذ إِشَارِّي ذ يِيجّْ ن أَرْبعْ ن إِجّْ ن ؤُهِينُو أَكْ-ذ إِزْمَارْ. ثَا ذ ثَاغَارْصْثْ ن وشْمَاضْ ن كُوڒْ أَيُورْ، إِ كُوڒْ أَيُورْ زڭْ إِيُورنْ ن ؤُسڭّْوَاسْ.

‏15 إِتّْخصَّا أَذْ ثسّْوجْذذْ إِجّْ ن إِغَايْضْ ذ أَمژْيَانْ ذ ثَاغَارْصْثْ ن دّنْبْ إِ سِيذِي، أَذْ ت ثَارْنِيذْ إِ ثْغَارْصْثْ ن وشْمَاضْ نْ ڒبْذَا أَكْ-ذ ثوْهِيبْثْ نّسْ ن ؤُسيّبْ.

‏16 ذڭْ ؤُيُورْ أَمزْوَارُو، ذڭْ وَاسّْ وِيسّْ أَرْبعْطَاشْ ن ؤُيُورْ، أَذْ ثِيڒِي ثْغَارْصْثْ ن ؤُسعْذُو ن سِيذِي. ^▪  

‏17 ذڭْ وَاسّْ وِيسّْ خمّسْطَاشْ ن سِيمَانْثْ ن ؤُيُورْ أَذْ يِيڒِي ڒْعِيذْ. سبْعَا ن وُوسَّانْ أَذْ شّنْ أَغْرُومْ بْڒَا أَنْثُونْ.

‏18 ذڭْ وَاسّْ أَمزْوَارُو ن ڒْعِيذْ أَذْ يِيڒِي يِيجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ڒْخذْمثْ إِ إِتّْخصَّانْ أَذْ ثتّْوَاڭّْ. ^▪  

‏19 أَذْ د-ثسّْقَارّْبمْ إِشْثْ ن ثوْهِيبْثْ ن ثْمسِّي أَمْ ثْغَارْصْثْ ن وشْمَاضْ إِ سِيذِي: ثْنَاينْ ن إِينْذُوزنْ، إِجّْ ن إِشَارِّي ذ سبْعَا ن إِزْمَارنْ ن إِجّْ ن ؤُسڭّْوَاسْ. إِتّْخصَّا أَذْ إِڒِينْ شْنَانْ قَاعْ. ‏20 أَذْ ثِيڒِي ثوْهِيبْثْ ن ڒْغِيدْجثْ ن وَارنْ أَزْذَاذْ إِخدْجْضنْ س زّشْثْ. أَذْ زَّايسْ ثسّْوجْذمْ ثْڒَاثَا ن ثعْشُورِينْ ن يِيجّْ ن إِفَا إِ يِيجّْ ن ؤُينْذُوزْ ذ ثْنَاينْ ن ثعْشُورِينْ ن يِيجّْ ن إِفَا إِ يِيجّْ ن إِشَارِّي. ‏21 أَذْ ثسّْوجْذذْ إِشْثْ ن ثعْشَارْثْ ن يِيجّْ ن إِفَا إِ يِيجّْ ن إِزْمَارْ، ؤُشَا أَمُّو إِ مَارَّا سبْعَا ن إِزْمَارنْ نِّي. ‏22 سوْجذْ عَاوذْ إِجّْ ن ؤُمْيَانْ ذ ثَاغَارْصْثْ ن دّنْبْ مَاحنْذْ أَذْ خَاومْ إِتّْوَاڭّْ وصْڒَاحْ. ‏23 أَذْ ثسّْوجْذمْ مَانْ أَيَا سنّجْ إِ ؤُسوْجذْ ن ثْغَارْصْثْ ن وشْمَاضْ ذِي ضّْبحْ نِّي إِدْجَانْ ذ إِشْثْ ن ثْغَارْصْثْ ن وشْمَاضْ إِ ڒبْذَا. ‏24 أَمْ مَامّشْ ؤُيَا أَذْ ثسّْوجْذمْ سبْعَا ن وُوسَّانْ، ذِي كُوڒْ أَسّْ زَّايْسنْ، مَاشَّا ن ثوْهِيبِينْ ن ثْمسِّي أَمْ إِشْثْ ن ڒفْوَاحثْ إِتّْفُوحنْ إِ سِيذِي. أَذْ إِتّْوَاسّوْجذْ سنّجْ إِ ؤُسوْجذْ ن ثْغَارْصْثْ ن وشْمَاضْ ن ڒبْذَا أَكْ-ذ ثوْهِيبْثْ نّسْ ن ؤُسيّبْ. ‏25 ذڭْ وَاسّْ وِيسّْ سبْعَا أَذْ ثڭّمْ إِجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ڒْخذْمثْ إِ إِتّْخصَّانْ أَذْ ثتّْوَاڭّْ.

‏26 ذڭْ وَاسّْ ن ثْمنْزُوثْ ن صَّابثْ ذِي ڒْعِيذْ ن سِّيمَانَاثْ، خْمِي إِ-د غَا ثسّْقَارّْبمْ إِشْثْ ن ثوْهِيبْثْ ن ڒْغِيدْجثْ ن جْذِيذْ غَارْ سِيذِي، أَذْ ثڭّمْ إِجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ن ڒْخذْمثْ إِ إِتّْخصَّانْ أَذْ ثتّْوَاڭّْ. ‏27 أَذْ د-ثسّْقَارّْبمْ إِشْثْ ن ثْغَارْصْثْ ن وشْمَاضْ أَمْ إِشْثْ ن ڒفْوَاحثْ إِتّْفُوحنْ إِ سِيذِي: ثْنَاينْ ن إِينْذُوزنْ، إِجّْ ن إِشَارِّي ذ سبْعَا ن إِزْمَارنْ ن إِجّْ ن ؤُسڭّْوَاسْ ‏28 أَكْ-ذ ثوْهِيبْثْ نّسْ ن ڒْغِيدْجثْ ن وَارنْ أَزْذَاذْ إِخدْجْضنْ س زّشْثْ: ثْڒَاثَا ن ثعْشُورِينْ ن يِيجّْ ن إِفَا إِ يِيجّْ ن ؤُينْذُوزْ، ثْنَاينْ ن ثعْشُورِينْ ن يِيجّْ ن إِفَا إِ يِيجّْ ن إِشَارِّي ‏29 ؤُڒَا ذ إِشْثْ ن ثعْشَارْثْ ن يِيجّْ ن إِفَا إِ يِيجّْ ن إِزْمَارْ، ؤُشَا أَمُّو إِ مَارَّا سبْعَا ن إِزْمَارنْ نِّي. ‏30 سْوجْذمْ عَاوذْ إِجّْ ن إِغَايْضْ ذ أَمژْيَانْ أَمْ ثْغَارْصْثْ ن دّنْبْ مَاحنْذْ أَذْ خَاومْ إِتّْوَاڭّْ وصْڒَاحْ. ‏31 أَذْ ثنْ ثسّْوجْذمْ سنّجْ إِ ؤُسوْجذْ ن ثْغَارْصْثْ ن وشْمَاضْ ن ڒبْذَا ذ ثوْهِيبْثْ نّسْ ن ڒْغِيدْجثْ. أَذْ إِڒِينْ شْنَانْ قَاعْ إِ كنِّيوْ أَكْ-ذ ثوْهِيبِينْ نّسْ ن ؤُسيّبْ.‘ “