‏1 أَكنْعَانِي، أَجدْجِيذْ ن عَارَاذْ نِّي إِزدّْغنْ ذِي ثمُّورْثْ ن لْجَانُوبْ، إِسْڒَا بلِّي يُوسَا-د إِسْرَائِيل خْ وبْرِيذْ ن أَثَارِيمْ، إِمْنغْ ضِيدّْ إِ إِسْرَائِيل ؤُشَا إِطّفْ شَا زَّايْسنْ ذ إِمحْبَاسْ.

‏2 خنِّي إِوْشَا إِسْرَائِيل إِجّْ ن وَاوَاڒْ إِ سِيذِي ؤُشَا إِنَّا: ”مَاڒَا ذ ثِيذتّْ ثْعَارّْنذْ ڒْڭنْسْ-أَ ذڭْ ؤُفُوسْ إِنُو، نشّْ أَذْ حَارّْمغْ ثِيندَّامْ نْسنْ إِ ؤُثحِّي.“ ‏3 سِيذِي إِسْثَاجبْ إِ إِسْرَائِيل ؤُشَا إِسلّمْ أَسْ إِكنْعَانِييّنْ ؤُشَا إِحَارّمْ إِ-ثنْ إِ ؤُثحِّي ؤُڒَا ذ مَارَّا ثِيندَّامْ نْسنْ ؤُشَا إِڒَاغَا أَمْشَانْ نِّي س يِيسمْ ن حُورْمَا. ^▫  

‏4 خنِّي فسّْينْ إِقِيضَانْ نْسنْ زڭْ وذْرَارْ ن هُورْ رُوحنْ خْ وبْرِيذْ غَارْ ڒبْحَارْ ن ثلْڭَا ؤُشَا س مَانْ أَيَا ثُوغَا إِتّْخصَّا أَذْ نّْضنْ إِ ثمُّورْثْ ن إِذُومْ. ؤُشَا ڒْڭنْسْ وَارْ إِسْبِيرْ ذڭْ وبْرِيذْ. ‏5 أَقَا إِقَاشحْ ڒْڭنْسْ ضِيدّْ إِ أَربِّي ذ مُوسَا: ”مَايمِّي ذ أَنغْ د-ثسُّوفّْغمْ زِي مِيصْرَا مَاحنْذْ أَذْ نمّثْ ذِي ڒخْڒَا-يَا؟ وَارْ ذَا إِدْجِي وغْرُومْ ؤُڒَا ذ أَمَانْ. ڒعْمَارْ نّغْ إِعِيفّْ زڭْ وغْرُومْ-أَ إِ وَارْ إِسكّْوِينْ!“

‏6 خنِّي إِضْڒقْ سِيذِي إِفِيغْرَانْ يَارقّنْ جَارْ ڒْڭنْسْ إِنِّي إِزعْفنْ ڒْڭنْسْ ؤُشَا إِمُّوثْ وَاطَّاسْ ن ڒْڭنْسْ ن إِسْرَائِيل. ^▪   ‏7 يُوسَا-د ڒْڭنْسْ غَارْ مُوسَا، نَّانْ: ”أَقَا نخْضَا، مِينْزِي نْقَاشحْ أَكْ-ذ سِيذِي ؤُ أَكِيذكْ. ژَتدْجْ إِ سِيذِي مَاحنْذْ أَذْ خَانغْ إِكّسْ إِفِيغْرَانْ-أَ.“ خنِّي إِژُودْجْ مُوسَا ذِي طّْوعْ ن ڒْڭنْسْ. ^▫  

‏8 إِنَّا سِيذِي إِ مُوسَا: ”أڭّْ إِجّْ ن ؤُفِيغَارْ يَارقّنْ ؤُشَا سَارْسْ إِ-ث خْ إِشْثْ ن ثحْنَاشْثْ ؤُشَا مَانْ ونْ مَا إِتّْوَازعْفنْ زَّايسْ ؤُ إِخْزَارْ ذَايسْ، أَذْ إِدَّارْ.“ ^▪   ‏9 ؤُشَا إِڭَّا مُوسَا إِجّْ ن ؤُفِيغَارْ ن نّْحَاسْ ؤُشَا إِسَّارْسْ إِ-ث خْ ثحْنَاشْثْ ؤُشَا إِمْسَارْ مڒْمِي إِزعّفْ شَا ن ؤُفِيغَارْ شَا ن يِيجّنْ، أَقَا إِخْزَارْ غَارْ ؤُفِيغَارْ ن نّْحَاسْ ؤُشَا خنِّي إِقِّيمْ إِدَّارْ. ^▪  

‏10 خنِّي فسْينْ أَيْثْ ن إِسْرَائِيل إِقِيضَانْ نْسنْ ؤُشَا وْثِينْ إِقِيضَانْ نْسنْ ذِي ؤُپُوثْ. ^▪  

‏11 خنِّي كّْسنْ إِقِيضَانْ نْسنْ زِي ؤُپُوثْ، وْثِينْ إِقِيضَانْ نْسنْ غَارْ أَرْوِينَاثْ ن عَابَارِيمْ ذِي ڒخْڒَا إِ إِدْجَانْ زَّاثْ إِ وُوذمْ ن مُوآبَ مَانِيسْ د-ثْنقَّارْ ثْفُوشْثْ.

‏12 سّنِّي كّْسنْ إِقِيضَانْ نْسنْ ؤُشَا وْثِينْ إِقِيضَانْ نْسنْ ذِي ثغْزُورْثْ ن ثغْزَارْثْ ن زَارَاذْ.

‏13 سّنِّي كّْسنْ إِقِيضَانْ نْسنْ ؤُشَا وْثِينْ إِقِيضَانْ نْسنْ خْ ؤُجمَّاضْ ن يغْزَارْ ن أَرْنُونْ، ونِّي إِسِّيزْڒنْ ذِي ڒخْڒَا ؤُشَا إِفّغْ زِي جِّيهثْ ن ويْمِيرْ ن إِمُورِييّنْ، مِينْزِي أَقَا أَرْنُونْ ذ أَيْمِيرْ أَكْ-ذ مُوآبَ، جَارْ مُوآبَ ذ إِمُورِييّنْ. ^▪  

‏14 س ؤُيَا قَّارنْ ذڭْ وذْلِيسْ إِتّْوَانّْضنْ ن ڭَارَّاثْ ن سِيذِي:

”وَاهِيبْ ذِي سُوفَا ذ ثْغزْرَاثِينْ ن أَرْنُونْ،

‏15 ؤُ ثِيغزْرَاثِينْ إِ د-إِهكّْوَانْ،

أَڒَامِي ميّْڒنْثْ غَارْ ثْزذِّيغْثْ ن عَارْ،

ذ ثنِّي إِسنّْذنْ خْ ويْمِيرْ ن مُوآبَ.“

‏16 سّنِّي رُوحنْ غَارْ بِي‘رْ. وَا أَقَا ذ أَنُو خْ مِينْ خفْ إِنَّا سِيذِي إِ مُوسَا: ”سْمُونْ ڒْڭنْسْ، خنِّي أَذْ أَسنْ وْشغْ أَمَانْ.“

‏17 خنِّي إِغنّجْ إِسْرَائِيل إِزْڒِي أَيَا:

”نْڭزْ، أَ أَنُو،

أَرِّيمْ-د خَاسْ س إِجّْ ن إِزْڒِي:

‏18 شكْ أَنُو، ونِّي غْزِينْ ڒْحُوكَّامْ،

ونِّي إِنقْشنْ ثَارْوَا ن ثَاصِيڒثْ ن ڒْڭنْسْ أَكْ-ذ ؤُمْڭوَّاذْ نْسنْ

س إِقطَّابنْ نْسنْ.“

زِي ڒخْڒَا \qt*رُوحنْ\qt غَارْ مَاتَّانَا

‏19 ؤُشَا زِي مَاتَّانَا غَارْ نَاحْلِييِيلْ، زِي نَاحْلِييِيلْ غَارْ بَامُوثْ، ‏20 ؤُشَا زِي بَامُوثْ غَارْ ثغْزُورْثْ نِّي إِدْجَانْ ذڭْ إِيَّارْ ن مُوآبَ، خْ ثْقِيشَّاثْ ن فِيسْجَا نِّي إِتّْسِيجَّانْ غَارْ ثْنزْرُوفْثْ.

‏21 خنِّي إِسّكّْ إِسْرَائِيل إِرقَّاسنْ غَارْ سِيحُونْ، أَجدْجِيذْ ن إِمُورِييّنْ، إِنَّا: ^▪  

‏22 ”أجّْ أَيِي أَذْ شُوقغْ ذِي ثمُّورْثْ نّكْ. وَارْ نتّْميِّيڒْ شَا غَارْ إِيَّارنْ نِيغْ غَارْ إِمَارْجَاعنْ ن ؤُضِيڒْ نّكْ ؤُ وَارْ نْسسّْ أَمَانْ زڭْ وَانُوثنْ. خْ وبْرِيذْ إِڭلّْذنْ إِ خفْ إِ غَا نعْذُو، أَڒْ غَا نعْذُو خْ ثمُّورْثْ نّكْ.“ ^▪   ‏23 مَاشَا سِيحُونْ وَارْ يجِّي أَذْ إِژْوَا إِسْرَائِيل خْ جّْوَايهْ نّسْ. إِسّْمُونْ سِيحُونْ مَارَّا ڒْڭنْسْ نّسْ ؤُشَا إِفّغْ حِيمَا أَذْ إِمْسَاڭَارْ أَكْ-ذ إِسْرَائِيل، غَارْ ڒخْڒَا، ؤُشَا يُوسَا-د ذِي يَاهَاصْ ؤُشَا إِمْنغْ أَكْ-ذ إِسْرَائِيل. ^▪   ‏24 ؤُشَا إِسْرَائِيل إِوْثَا إِ-ث س ڒقْضعْ ن سِّيفْ ؤُشَا إِكْسِي ثمُّورْثْ نّسْ ذ ڒْوَارْثْ، زِي أَرْنُونْ أَڒْ يَابُّوقْ، أَڒْ أَيْثْ ن عَامُّونْ، مِينْزِي جِّيهثْ ن أَيْثْ ن عَامُّونْ أَقَا-ث ذ إِجّْ ن لْبَارَاجْ إِجهْذنْ. ^▪   ‏25 إِكْسِي إِسْرَائِيل مَارَّا ثِيندَّامْ-أَ ؤُشَا إِزْذغْ إِسْرَائِيل ذِي مَارَّا ثِيندَّامْ ن إِمُورِييّنْ، ذِي حَاشْپُونْ ؤُ ذِي مَارَّا ثْندَّامْ إِ غَارسْ د-إِقّْننْ. ^▪   ‏26 مِينْزِي حَاشْپُونْ ثُوغَا ذ ثَانْذِينْثْ ن سِيحُونْ، أَجدْجِيذْ ن إِمُورِييّنْ، ؤُشَا نتَّا ثُوغَا إِمْنغْ أَكْ-ذ ؤُجدْجِيذْ إِ ذ أَسْ د-إِزْوَارنْ ن مُوآبَ ؤُشَا إِكْسِي زَّايسْ مَارَّا ثَامُّورْثْ نّسْ أَڒْ أَرْنُونْ. ‏27 س ؤُينِّي قَّارنْ إِنِّي إِسَّاوَاڒنْ س وَاوَاڒنْ إِوزْننْ:

”أَسمْ-د غَارْ حَاشْپُونْ،

أَذْ ثتّْوَابْنَا ؤُ أَذْ ثتّْوَاعْذڒْ ثنْذِينْثْ ن سِيحُونْ!

‏28 مِينْزِي ثِيمسِّي ثفّغْ-د زِي حَاشْپُونْ

ؤُشَا إِجّْ ن ؤُعشَّاڒْ زِي ثنْذِينْثْ ن سِيحُونْ

إِجّْ ن ؤُشعَّاڒْ نِّي إِشَّا عَارْ ن إِمُوآبِييّنْ،

ڒْحُوكَّامْ ن ڒُوعْڒَاثْ ن أَرْنُونْ. ^▪  

‏29 ؤُشْثْ خَاكْ، مُوآبَ! أَقَا إِتّْوَاهلّكْ ڒْڭنْسْ ن كَامُوشْ.

إِحنْجِيرنْ نّسْ إِ ثُوغَا يَاروْڒنْ ذ ثْحنْجِيرِينْ نّسْ

أَقَا إِسلّمْ إِ-ثنْ ذ إِمحْبَاسْ إِ سِيحُونْ،

أَجدْجِيذْ ن إِمُورِييّنْ. ^▪  

‏30 أَقَا نوّثْ إِ-ثنْ س فْڒِيثْشَاثْ.

حَاشْپُونْ إِتّْوَاهلّكْ أَڒْ ذِيپُونْ.

نَاردّدْجْ إِ-ثنْ أَڒْ نُوفَاحْ

ثنِّي إِدْجَانْ أَڒْ مِيذَابَا.“

‏31 أَمُّو إِ إِذْوڒْ إِسْرَائِيل أَذْ إِزْذغْ ذِي ثمُّورْثْ ن إِمُورِييّنْ. ‏32 ؤُشَا إِسّكّْ مُوسَا إِبرْڭَاڭنْ غَارْ يَاعْزِيرْ ؤُشَا كْسِينْ ثِيندَّامْ إِ غَارسْ د-إِقّْننْ ؤُشَا كّْسنْ ثَاسْغَارْثْ ن إِمُورِييّمْ نِّي ثُوغَا ذِينْ إِزدّْغنْ.

‏33 خنِّي ميّْڒنْ زڭْ وبْرِيذْ نْسنْ، ؤُڒْينْ أَبْرِيذْ غَارْ بَاشَانْ. خنِّي إِفّغْ-د عُوجْ، أَجدْجِيذْ ن بَاشَانْ، مَاحنْذْ أَذْ كِيذْسنْ إِمْسَاڭَارْ، نتَّا ذ مَارَّا ڒْڭنْسْ نّسْ، إِ ؤُمنْغِي ذِي إِذْرَاعِي. ^▪   ‏34 إِنَّا سِيذِي إِ مُوسَا: ”وَارْ زَّايسْ تّڭّْوذْ شَا، مِينْزِي نشّْ ڭِّيغْ ث ذڭْ ؤُفُوسْ نّكْ، أَكْ-ذ مَارَّا ڒْڭنْسْ نّسْ ذ ثمُّورْثْ نّسْ ؤُشَا أَذْ زَّايسْ ثڭّذْ أَمشْنَاوْ مِينْ ثڭِّيذْ زِي سِيحُونْ أَجدْجِيذْ ن إِمُورِييّنْ ونِّي ثُوغَا إِزدّْغنْ ذِي حَاشْپُونْ.“ ^▪   ‏35 ؤُشَا أَردّْدْجنْ ث، نتَّا ذ إِحنْجِيرنْ نّسْ ذ مَارَّا ڒْڭنْسْ نّسْ، أَڒْ وَارْ إِقِّيمْ ؤُڒَا ذ إِجّْ ن ؤُمَاڒْوَارْ ؤُشَا كْسِينْ ثَامُّورْثْ نّسْ ذ ڒْوَارْثْ. ^▪