‏1 إِسِّيوڒْ سِيذِي أَكْ-ذ مُوسَا، إِنَّا:

‏2 ”سِيوڒْ أَكْ-ذ أَيْثْ ن إِسْرَائِيل، إِنِي أَسنْ: ’خْمِي إِ غَا ثَاذْفمْ ثَامُّورْثْ مَانِي إِ غَا ثْزدّْغمْ، ثَامُّورْثْ ثنِّي ذ أَومْ إِ غَا وْشغْ، ‏3 ؤُشَا أَذْ ثسّْوجْذمْ ذِينْ إِشْثْ ن ثوْهِيبْثْ ن ثْمسِّي إِ سِيذِي، إِشْثْ ن ثْغَارْصْثْ ن وشْمَاضْ نِيغْ إِشْثْ ن ثوْهِيبْثْ إِ ثْغَارْصْثْ إِ ؤُكمّڒْ ن إِجّْ ن لْوَاعْذْ نِيغْ إِشْثْ ن ثوْهِيبْثْ س ڒْخَاضَارْ نِيغْ إِشْثْ ن ثوْهِيبْثْ إِ ڒعْيُوذَاثْ نْومْ إِتّْوَاڭّنْ، مَاحنْذْ أَذْ ثِيڒِي ذ إِشْثْ ن ڒفْوَاحثْ إِتّْفُوحنْ إِ سِيذِي، زِي ڒبْهَايمْ نِيغْ زڭْ وُودْجِي، ‏4 خنِّي ونِّي د غَا إِسّْقَارّْبنْ ثَاوْهِيبْثْ نّسْ إِ سِيذِي، أَذْ د-إِسّْقَارّبْ عَاوذْ إِشْثْ ن ثوْهِيبْثْ ن ڒْغِيدْجثْ زڭْ إِشْثْ ن ثعْشَارْثْ ن يِيجّْ ن إِفَا ن وَارنْ أَزْذَاذْ إِخدْجْضنْ س يِيجّْ ن أَرْبعْ ن إِجّْ ن ؤُهِينُو ن زّشْثْ. ^▪   ‏5 أَذْ ثسّْوجْذذْ أَكْ-ذ مَانْ أَيَا إِجّْ ن أَرْبعْ ن إِجّْ ن ؤُهِينُو ن بِينُو أَمْ ثوْهِيبْثْ ن ؤُسيّبْ إِ يِيجّْ ن إِزْمَارْ مَاحنْذْ أَذْ ثِيڒِي خْ ثْغَارْصْثْ ن وشْمَاضْ نِيغْ خْ ثوْهِيبْثْ إِ ثْغَارْصْثْ، ‏6 نِيغْ، مَاڒَا أَذْ ثِيڒِي إِ يِيجّْ ن إِشَارِّي، خنِّي إِتّْخصَّا أَذْ ثسّْوجْذذْ إِشْثْ ن ثوْهِيبْثْ ن ڒْغِيدْجثْ زِي ثْنَاينْ ن ثعْشُورَايْ ن إِجّْ ن إِفَا ن وَارنْ أَزْذَاذْ إِخدْجْضنْ س إِشْثْ ن تُّوڒُوثْ ن إِجّْ ن ؤُهِينُو ن زّشْثْ ‏7 ؤُشَا أَذْ د-ثسّْقَارّْبذْ عَاوذْ إِشْثْ ن تُّوڒُوثْ ن إِجّْ ن ؤُهِينُو ن بِينُو أَمْ ثوْهِيبْثْ ن ؤُسيّبْ، أَمْ إِشْثْ ن ڒفْوَاحثْ إِتّْفُوحنْ إِ سِيذِي.

‏8 خْمِي إِ غَا ثسّْوجْذذْ أَمژْيَانْ ن ؤُفُونَاسْ أَمْ ثْغَارْصْثْ ن وشْمَاضْ نِيغْ أَمْ ثوْهِيبْثْ إِ ثْغَارْصْثْ مَاحنْذْ أَذْ يِيڒِي إِ ؤُكمّڒْ ن إِجّْ ن لْوَاعْذْ نِيغْ أَمْ ثْغَارْصْثْ ن ڒهْنَا إِ سِيذِي، ‏9 خنِّي إِتّْخصَّا أَذْ د-إِسّْقَارّبْ أَكْ-ذ ؤُمژْيَانْ ن ؤُفُونَاسْ عَاوذْ إِشْثْ ن ثوْهِيبْثْ ن ڒْغِيدْجثْ ن ثْڒَاثَا ن ثعْشُورَايْ ن إِجّْ ن إِفَا ن وَارنْ أَزْذَاذْ إِخدْجْضنْ ذڭْ وزْينْ ن ؤُهِينُو ن زّشْثْ،

‏10 ؤُشَا إِتّْخصَّا عَاوذْ أَذْ د-ثَاوِيذْ أَزْينْ ن ؤُهِينُو ن بِينُو أَمْ ثوْهِيبْثْ ن ؤُسيّبْ، أَمْ ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي.

‏11 أَمُّو إِ غَا إِتّْوَاڭّْ إِ كُوڒْ أَفُونَاسْ، نِيغْ إِ كُوڒْ إِشَارِّي، نِيغْ إِ كُوڒْ إِجّْ زڭْ وُودْجِي، زڭْ إِحُوڒِييّنْ نِيغْ زڭْ إِغَايْضنْ.

‏12 عْلَاحْسَابْ ڒْقدّْ ن إِمُودَّارنْ إِ ثْغَارْصْثْ إِ غَا ثسّْوجْذمْ، أَذْ ثڭّمْ أَمُّو إِ كُوڒْ إِجّْ ن ؤُمُودَّارْ، عْلَاحْسَابْ ڒْقدّْ ن إِمُودَّارنْ.

‏13 مَارَّا إِنِّي د-إِتّْوَاخڒْقنْ ذِي ثمُّورْثْ أَذْ ڭّنْ ثِيمسْڒَايِينْ-أَ أَمُّو خْمِي د غَا سّْقَارّْبنْ نِيثْنِي إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي.

‏14 خْمِي إِ غَا ثَافذْ جَارْ مَارَّا جِّيڒَاثْ نْومْ إِجّْ ن ؤُبَارَّانِي إِقِّيمنْ أَكِيذْومْ، نِيغْ إِجّنْ ونِّي إِزدّْغنْ ذِي ڒْوسْثْ نْومْ، أَقَا نتَّا أَذْ إِسّوْجذْ إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي، خنِّي أَذْ ت إِڭّْ أَمْ مَامّشْ ت ثتّڭّمْ كنِّيوْ.

‏15 أَ أَڭْرَاوْ ن ڒْڭنْسْ، أَذْ ذِينْ ثِيڒِي ذ إِشْثْ ن ثوْصيّثْ، إِشْثْ ن ثوْصيّثْ إِ ڒبْذَا إِ كنِّيوْ ؤُ إِ ؤُبَارَّانِي نِّي إِقِّيمنْ أَكِيذْومْ إِ مَارَّا جِّيڒَاثْ نْومْ. أَذْ يِيڒِي ؤُبَارَّانِي أَمشْنَاوْ مَامّشْ ثدْجَامْ كنِّيوْ زَّاثْ إِ وُوذمْ ن سِيذِي. ^▪  

‏16 أَذْ يِيڒِي إِجّْ ن ؤُزرْفْ ذ إِشْثْ ن لْفَارِيضَا إِ كنِّيوْ ؤُ إِ ؤُبَارَّانِي ونِّي أَكِيذْومْ إِقِّيمنْ.“

‏17 إِسِّيوڒْ سِيذِي أَكْ-ذ مُوسَا، إِنَّا:

‏18 ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ: ’خْمِي إِ غَا ثَاذْفمْ ثَامُّورْثْ مَانِي كنِّيوْ إِ غَا يْ أَوْيغْ،

‏19 خنِّي أَذْ إِمْسَارْ، ؤُمِي غَا ثشّمْ أَغْرُومْ ن ثمُّورْثْ، أَقَا كنِّيوْ أَذْ ثسّْڭعّْذمْ إِشْثْ ن ثوْهِيبْثْ ن ؤُسْڭعّذْ إِ سِيذِي. ‏20 زِي ثْمزْوَارُوثْ ن وَارشْثِي نْومْ أَذْ ثسّْڭعّْذمْ إِشْثْ ن ثمْسمّنْثْ أَمْ ثوْهِيبْثْ ن ؤُسْڭعّذْ. أَذْ ت ثسّْڭعّْذمْ أَمشْنَاوْ مَامّشْ ثسّْڭعّْذمْ ثَاوْهِيبْثْ ن ؤُسْڭعّذْ ن ؤُنذْرَارْ. ‏21 زِي ثْمزْوَارُوثْ ن وَارشْثِي نْومْ أَذْ ثْقدّْممْ إِشْثْ ن ثوْهِيبْثْ ن ؤُسْڭعّذْ إِ سِيذِي ذِي مَارَّا جِّيڒَاثْ نْومْ.

‏22 مَاڒَا ثْودَّارمْ ؤُ وَارْ ثتّڭّمْ مَارَّا ڒُومُورَاثْ-أَ نِّي ثُوغَا إِسَّاوَاڒْ سِيذِي أَكْ-ذ مُوسَا، ‏23 مَارَّا مِينْ ذ أَومْ يُومُورْ سِيذِي س ؤُفُوسْ ن مُوسَا، زڭْ وَاسّْ مِينْ زِي ث يُومُورْ سِيذِي، سّنِّي ذ ثْسَاونْثْ ذِي مَارَّا رجْيُوڒْ نْومْ، ‏24 خنِّي أَذْ إِمْسَارْ، مَاڒَا إِتّْوَاڭّْ س ؤُودَّارْ بَارَّا إِ ثِيطَّاوِينْ ن ثْمسْمُونْثْ، أَقَا ثَامسْمُونْثْ مَارَّا أَذْ ثسّوْجذْ إِجّْ ن ؤُينْذُوزْ، أَمژْيَانْ ن ؤُفُونَاسْ، أَمْ ثْغَارْصْثْ ن وشْمَاضْ أَمْ إِشْثْ ن ڒفْوَاحثْ إِتّْفُوحنْ إِ سِيذِي أَكْ-ذ ثوْهِيبْثْ نّسْ ن ڒْغِيدْجثْ ذ ثوْهِيبْثْ نّسْ ن ؤُسيّبْ عْلَاحْسَابْ لْفَارِيضَا ؤُ أَكْ-ذ يِيجّْ ن إِغَايْضْ ذ أَمژْيَانْ أَمْ ثْغَارْصْثْ ن دّنْبْ. ‏25 خنِّي أَذْ إِفْذِي ؤُكهَّانْ خْ مَارَّا ثَامسْمُونْثْ ن أَيْثْ ن إِسْرَائِيل ؤُشَا أَذْ أَسنْ إِتّْوَاغْفَارْ، مِينْزِي مَانْ أَيَا إِمْسَارْ زڭْ ؤُودَّارْ، ؤُشَا نِيثْنِي قدّْمنْ ثَاوْهِيبْثْ نْسنْ، إِشْثْ ن ثوْهِيبْثْ ن ثْمسِّي إِ سِيذِي، ؤُڒَا ذ ثَاغَارْصْثْ نْسنْ ن دّنْبْ، زَّاثْ إِ وُوذمْ ن سِيذِي. ^▫   ‏26 مَارَّا ثَامسْمُونْثْ ن أَيْثْ ن إِسْرَائِيل أَذْ ثتّْوَاغْفَارْ، ؤُڒَا ذ أَبَارَّانِي ونِّي إِزدّْغنْ ذِي ڒْوسْثْ نْومْ، خْ ؤُمِي إِمْسَارْ أَمْ إِودَّارْ مَارَّا ڒْڭنْسْ.

‏27 مَاڒَا شَا ن بْنَاذمْ إِخْضَا أَمْ نتَّا إِودَّارْ، خنِّي أَذْ د-إِسّْقَارّبْ إِشْثْ ن ثْغَايْضثْ ن إِجّْ ن ؤُسڭّْوَاسْ أَمْ ثْغَارْصْثْ ن دّنْبْ. ^▫  ▪   ‏28 أَذْ إِفْذِي ؤُكهَّانْ زَّاثْ إِ وُوذمْ ن سِيذِي خْ بْنَاذمْ نِّي ثُوغَا إِودَّارْ، أَمْ ثُوغَا إِخْضَا س ؤُودَّارْ زَّاثْ إِ وُوذمْ ن سِيذِي، حِيمَا أَذْ خَاسْ إِفْذِي ؤُشَا أَذْ أَسْ إِتّْوَاغْفَارْ.

‏29 أَذْ ذِينْ يِيڒِي إِجّْ ن ؤُزرْفْ إِ ونِّي إِڭِّينْ شَا س ؤُودَّارْ، إِ ونِّي د-إِخڒْقنْ ذِي ثمُّورْثْ ؤُڒَا إِ ؤُبَارَّانِي ونِّي إِزدّْغنْ ذِي ڒْوسْثْ نْومْ.

‏30 مَاشَا بْنَاذمْ نِّي إِڭِّينْ شَا س ؤُفُوسْ إِڭعّْذنْ، مَا نتَّا إِتّْوَاخْڒقْ-د ذِي ثمُّورْثْ نِيغْ نتَّا ذ أَبَارَّانِي، أَقَا نتَّا إِشقّفْ ذِي سِيذِي ؤُشَا بْنَاذمْ نِّي أَذْ إِتّْوَاقسّْ زِي ڒْوسْثْ ن ڒْڭنْسْ نّسْ، ^▫   ‏31 ؤُمِي إِسّحْقَارْ أَوَاڒْ ن سِيذِي ؤُ يَارْژَا ڒُومُورْ نّسْ. بْنَاذمْ نِّي أَذْ إِتّْوَاقسّْ قَاعْ. ڒْمُوعْصِييّثْ نّسْ أَذْ ثِيڒِي خَاسْ.

‏32 ڒَامِي ثُوغَا أَيْثْ ن إِسْرَائِيل ذِي ڒخْڒَا، ؤُفِينْ إِجّْ ن ورْيَازْ إِتّْحَارْوَاشْ أَكشُّوضْ ذڭْ وَاسّْ ن سّبْثْ. ‏33 إِنِّي ث يُوفِينْ أَمْ ثُوغَا إِتّْحَارْوَاشْ أَكشُّوضْ، إِوْينْ ث غَارْ مُوسَا ذ هَارُونْ ذ مَارَّا ثَامسْمُونْثْ. ‏34 ڭِّينْ ث ذِي ثْحطُّوثْ، مِينْزِي ثُوغَا وَارْ د-إِبِينْ مِينْ زَّايسْ غَا ڭّنْ. ^▪   ‏35 خنِّي إِنَّا سِيذِي إِ مُوسَا: ”أَرْيَازْ نِّي أَذْ إِتّْوَانغْ نِيشَانْ. مَارَّا ثَامسْمُونْثْ أَذْ ث ثَارْجمْ بَارَّا إِ ڒْمَارْڭحْ ن ڒْعسْكَارْ.“ ‏36 خنِّي ثسُّوفّغْ إِ-ث مَارَّا ثْمسْمُونْثْ بَارَّا إِ ڒْمَارْڭحْ ن ڒْعسْكَارْ ؤُشَا نِيثْنِي أَرجْمنْ ث أَڒَامِي إِمُّوثْ، أَمْ مَامّشْ ث يُومُورْ سِيذِي إِ مُوسَا.

‏37 إِسِّيوڒْ سِيذِي أَكْ-ذ مُوسَا، إِنَّا:

‏38 ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ، أَذْ ڭّنْ إِ يِيخفْ نْسنْ ثِيشَارْشِيفَا غَارْ ثْمُووَّا ن وَارُّوضْ نْسنْ ذِي مَارَّا جِّيڒَاثْ نْسنْ ؤُشَا أَذْ ڭّنْ إِجّْ ن ؤُفِيڒُو ذ أَذحْمِي غَارْ ثْشَارْشِيفَا نِّي غَارْ ثْمُووَّا. ^▪   ‏39 أَذْ يِيڒِي ؤُفِيڒُو غَارْ ثْشَارْشِيفْثْ حِيمَا أَذْ ث ثتّْوَاڒَامْ ؤُشَا أَذْ ثِيذَارمْ ذِي مَارَّا ڒُومُورَاثْ ن سِيذِي ؤُشَا أَذْ ثنْثْ ثڭّمْ ؤُ وَارْ ثْضفَّارمْ ؤُڒَاونْ نْومْ ذ ثِيطَّاوِينْ نْومْ إِنِّي أَوَارْنِي أَسنْ ثنُّوممْ أَذْ ثسّفْسذمْ إِخفْ نْومْ، ‏40 ؤُشَا أَذْ يِيڒِي حِيمَا أَذْ ثْخَارّْصمْ ذِي ڒُومُورَاثْ إِنُو، أَذْ زَّايْسنْثْ ثڭّمْ، مَاحنْذْ أَذْ ثِيڒِيمْ ثتّْوَاقدّْسمْ زَّاثْ إِ أَربِّي نْومْ. ‏41 نشّْ ذ سِيذِي، أَربِّي نْومْ ونِّي كنِّيوْ د-إِسُّوفّْغنْ زِي ثمُّورْثْ ن مِيصْرَا حِيمَا أَذْ إِڒِيغْ ذ أَربِّي نْومْ. نشّْ ذ سِيذِي، أَربِّي نْومْ!“