‏1 إِسِّيوڒْ سِيذِي أَكْ-ذ مُوسَا، إِنَّا:

‏2 ”سكّْ إِرْيَازنْ زَّاثكْ حِيمَا أَذْ برْڭّنْ ثَامُّورْثْ ن كنْعَانْ، ثنِّي إِ غَا وْشغْ إِ أَيْثْ ن إِسْرَائِيل. زِي كُوڒْ ثَاقْبِيتْشْ ن إِبَابَاثنْ أَذْ ثسّكّمْ إِجّْ ن ورْيَازْ، كُوڒْ إِجّْ أَذْ يِيڒِي ذ أَمْغَارْ جَارْ أَسنْ. ^▫   ‏3 مُوسَا إِسّكّْ إِ-ثنْ ذِي ڒخْڒَا ن فَارَانْ، خْ ڒُومُورْ ن سِيذِي. ثُوغَا مَارَّا إِرْيَازنْ ذ إِزدْجِيفنْ ن أَيْثْ ن إِسْرَائِيل. ‏4 أَقَا ذ إِنَا ذ إِسْمَاونْ نْسنْ:

زِي ثقْبِيتْشْ ن رُوبِينْ، شَامُّوعْ، مِّيسْ ن زَاكُّورْ.

‏5 زِي ثقْبِيتْشْ ن شِيمْعُونْ، شَافَاثْ، مِّيسْ ن حُورِي.

‏6 زِي ثقْبِيتْشْ ن يَاهُوذَا، كَالِيبْ، مِّيسْ ن يَافُونِّي.

‏7 زِي ثقْبِيتْشْ ن إِسَّاكَارْ، يِيجْعَالْ، مِّيسْ ن يُوسُوفْ.

‏8 زِي ثقْبِيتْشْ ن إِفْرَايِيمْ، هُوشَاعْ، مِّيسْ ن نُونْ. ^▫  

‏9 زِي ثقْبِيتْشْ ن بِينْيَامِينْ، فَالْطِي، مِّيسْ ن رَافُو.

‏10 زِي ثقْبِيتْشْ ن زَاپُولُونْ، جَاذِّييِيلْ، مِّيسْ ن سُوذِي.

‏11 زِي ثقْبِيتْشْ ن يُوسُوفْ، إِ ثقْبِيتْشْ ن مَانَاسَّا، جَاذِّي، مِّيسْ ن سُوسِي.

‏12 زِي ثقْبِيتْشْ ن ذَانْ، عَامِّييِيلْ، مِّيسْ ن جَامَالِّي.

‏13 زِي ثقْبِيتْشْ ن أَشِيرْ، سَاثُورْ، مِّيسْ ن مِيخَايِيلْ.

‏14 زِي ثقْبِيتْشْ ن نَافْثَالِي، نَاهْبِي، مِّيسْ ن وَافْسِي.

‏15 زِي ثقْبِيتْشْ جَاذْ، جَا‘ؤُيِيلْ، مِّيسْ ن مَاكِي.

‏16 أَقَا إِنَا ذ إِسْمَاونْ ن يرْيَازنْ نِّي إِسّكّْ مُوسَا حِيمَا أَذْ برْڭَاڭنْ ثَامُّورْثْ ؤُشَا مُوسَا إِڒَاغَا إِ هُوشِيعَا، مِّيسْ ن نُونْ، س يِيسمْ ن يَاشُووَا.

‏17 إِسّكّْ إِ-ثنْ مُوسَا حِيمَا أَذْ برْڭَاڭنْ ثَامُّورْثْ ن كنْعَانْ، إِنَّا أَسنْ: ”أَڒْيمْ سِّيهَا أَڒْ ثَامُّورْثْ ن لْجَانُوبْ ؤُشَا أَڒْيمْ خنِّي غَارْ إِذُورَارْ

‏18 ؤُشَا خْزَارمْ مَامّشْ ثدْجْ ثمُّورْثْ ذ ڒْڭنْسْ إِ ذَايسْ إِزدّْغنْ، مَا إِجْهذْ نِيغْ إِضْعفْ إِ يدْجْ، مَا أَقَا ذِينْ ذْرُوسْ نِيغْ أَطَّاسْ.

‏19 خْزَارمْ مَامّشْ ثدْجْ ثَامُّورْثْ إِ ذِي إِزدّغْ ڒْڭنْسْ، مَا ثَامُّورْثْ ذ ثَاصبْحَانْثْ نِيغْ ذ ثَاعفَّانْثْ إِ ثدْجْ، ؤُ مَامّشْ دْجَانْثْ ثْندَّامْ إِ ذِي إِزدّغْ ڒْڭنْسْ، مَا زدّْغنْ ذِي ڒمْرَاڭحْ ن إِقِيضَانْ نِيغْ ذِي ثْندَّامْ إِفَارْينْ س إِغبْڒَاونْ. ‏20 ؤُ عَاوذْ مَامّشْ ثدْجْ ثمُّورْثْ، مَا ثسّْغمِّي نِيغْ ثُوژغْ، مَا أَقَا ذِينْ ثِيشجِّيرَا نِيغْ لَّا. ڭّمْ ثَارْيَاسْثْ ؤُشَا كْسِيمْ شَا زِي ڒْغِيدْجثْ ن ثمُّورْثْ. ؤُسَّانْ نِّي ثُوغَا أَثنْ ذ ؤُسَّانْ ن ثْمنْزُوثْ ن ؤُضِيڒْ. ‏21 ؤُشَا نِيثْنِي ڭعّْذنْ ؤُشَا برْڭَاڭنْ ثَامُّورْثْ زِي ڒخْڒَا ن صِينْ أَڒْ رَاحُوبْ، مَانِي إِ غَا ثِيوْضذْ غَارْ حَامَاثْ. ‏22 ڭَاعّْذنْ عَاذْ كْثَارْ غَارْ ثمُّورْثْ ن لْجَانُوبْ ؤُشَا إِوْضنْ غَارْ حَابْرُونْ. ذِينِّي إِ ثُوغَا أَخِيمَانْ، شِيشَايْ ذ ثَالْمَايْ، نِيثْنِي ذ إِحنْجِيرنْ ن عَانَاقْ. حَابْرُونْ ثُوغَا ثتّْوَابْنَا سبْعَا ن إِسڭّْوُوسَا قْبڒْ صُوعَانْ ذِي مِيصْرَا. ‏23 خنِّي إِوْضنْ أَڒْ ثَاغْزُورْثْ ن أَشْكُولْ ؤُشَا سّنِّي كّْسنْ إِشْثْ ن ثزْرمْثْ س يِيجّْ ن ؤُزكُّونْ ن ؤُضِيڒْ ونِّي د-إِوْينْ س ثْنَاينْ س يِيجّْ ن ؤُزدْجَاضْ ن ثْربُّوثْ. كّْسنْ عَاوذْ زڭْ أَرمَّامْ ؤُ زِي ثَازَارْثْ. ^▫   ‏24 قَّارنْ أَسْ إِ ومْشَانْ نِّي ’ثَاغْزُورْثْ ن ثغْزَارْثْ ن إِشْكُولْ‘، إِسمْ وَانِيثَا إِخْسْ أَذْ يِينِي ’ثَاغْزُورْثْ ن ؤُزكُّونْ‘، ذِي سِّيبّثْ ن ؤُزكُّونْ ن ؤُضِيڒْ نِّي قسّنْ أَيْثْ ن إِسْرَائِيل ذِينْ.

‏25 ؤُمِي كمّْڒنْ أَربْعِينْ ن وُوسَّانْ، ذوْڒنْ-د زڭْ ؤُبرْڭَاڭْ ن ثمُّورْثْ. ‏26 عقْبنْ نِيثْنِي ؤُشَا ؤُسِينْ-د غَارْ مُوسَا ذ هَارُونْ ؤُ غَارْ مَارَّا ثَامسْمُونْثْ ن أَيْثْ ن إِسْرَائِيل ذِي ڒخْڒَا ن فَارَانْ، غَارْ قَاذَاشْ، ؤُشَا وْشِينْ ڒخْبَارْ إِ مَارَّا ثَامسْمُونْثْ ؤُشَا سّشْننْ أَسنْ ڒْغِيدْجثْ ن ثمُّورْثْ. ^▫   ‏27 حَاجَانْ أَسْ ؤُشَا نَّانْ: ”أَقَا نُوذفْ غَارْ ثمُّورْثْ نِّي مَانِي د أَنغْ ثسّكّذْ. س ثِيذتّْ ثْفيّضْ س ؤُغِي ذ ثَامّنْثْ ؤُ ثَانِيثَا ذ ڒْغِيدْجثْ نّسْ. ^▪   ‏28 مَاشَا ڒْڭنْسْ، نِّي إِزدّْغنْ ذِي ثمُّورْثْ، إِجْهذْ ؤُ ثِيندَّامْ غَارْسنْثْ إِغبْرَاونْ ؤُ مْغَارنْثْ أَطَّاسْ ؤُ نژْرَا عَاوذْ ذِينْ أَرَّاوْ ن عَانَاقْ. ‏29 إِعَامَالِيقِييّنْ زدّْغنْ ذِي ثمُّورْثْ ن لْجَانُوبْ ن ثمُّورْثْ ؤُ إِحِيتِّييّنْ ذ إِيَاپُوسِييّنْ ذ إِمُورِييّنْ زدّْغنْ ذڭْ إِذُورَارْ ؤُ إِكنْعَانِييّنْ زدّْغنْ غَارْ ڒبْحَارْ ؤُ خْ ثْمَا ن لْ'ؤُرْذُونْ. ‏30 خنِّي إِسّسْقَارْ كَالِيبْ ڒْڭنْسْ زَّاثْ إِ مُوسَا، إِنَّا: ”أجّْ أَنغْ أَذْ نْڭعّذْ س جّهْذْ ؤُشَا أَذْ ت نطّفْ ذ ڒْوَارْثْ، مِينْزِي نْزمَّارْ أَسْ نشِّينْ!“ ‏31 إِرْيَازنْ نِّي ڭعّْذنْ أَكِيذسْ، نَّانْ: ”وَارْ نْزمَّارْ أَذْ نْڭعّذْ ضِيدّْ إِ ڒْڭنْسْ نِّي، مِينْزِي أَقَا إِجْهذْ خَانغْ أَطَّاسْ.“ ‏32 أَمُّو إِ د-إِوْينْ إِجّْ ن ڒخْبَارْ وَارْ إِحْڒِينْ إِ أَيْثْ ن إِسْرَائِيل خْ ثمُّورْثْ نِّي خْ ثُوغَا تّْبرْڭَاڭنْ، نَّانْ: ”ثَامُّورْثْ خْ مَانِيسْ نكَّا حِيمَا أَذْ ت نْبرْڭڭْ، أَقَا ذ إِشْثْ ن ثمُّورْثْ نِّي ثْسَارّضْ إِمزْذَاغْ نّسْ ؤُشَا مَارَّا إِوْذَانْ نِّي نژْرَا، أَقَا أَثنْ ذ إِرْيَازنْ ن وَادَّاذْ إِمْغَارْ. ‏33 أَقَا نژْرَا ذِينْ ’نِيفِيلِيمْ‘، إِخْسْ أَذْ يِينِي ’جّْوَاهڒْ إِوْضَانْ‘، أَيْثْ ن عَانَاقْ، أَرَّاسَا ن جّْوَاهڒْ إِوْضَانْ، ؤُشَا ثُوغَا نشِّينْ ذِي ثِيطَّاوِينْ نّغْ أَمشْنَاوْ ثَامُورْغِي، ؤُشَا أَمُّو إِ د أَسنْ نتّْبَانْ ذِي ثِيطَّاوِينْ نْسنْ.“ ^▫