لْبَارَاكَا ذ نّعْڒثْ
26
1 ”وَارْ تّڭّمْ إِ يِيخفْ نْومْ لْ-أَصْنَامْ، وَارْ سّْبدَّامْ ڒخْيَاڒْ إِنقْشنْ ؤُڒَا ذ إِجّْ ن ؤُمَايْضُو إِقدّْسنْ ؤُشَا وَارْ سّْرُوسَامْ ڒخْيَاڒْ ن وژْرُو ذِي ثمُّورْثْ نْومْ حِيمَا أَذْ أَسْ ثَاضَارمْ، مِينْزِي نشّْ ذ سِيذِي، أَربِّي نْومْ! ▪ 2 أَذْ ثحْضَامْ ؤُسَّانْ ن سّبْثْ إِنُو ؤُشَا أَذْ أَومْ إِقَارّْ إِجّْ ن ؤُوقَّارْ يُودْجْغنْ ن زَّاوشْثْ إِنُو إِقدّْسنْ، أَقَا نشّْ ذ سِيذِي! ▪
3 مَاڒَا أَذْ ثُويُورمْ ذِي ثْوصَّا إِنُو ؤُشَا أَذْ ثطّْفمْ ذِي ڒُومُورَاثْ إِنُو ؤُشَا أَذْ زَّايْسنْثْ ثڭّمْ، ▪ 4 خنِّي نشّْ أَذْ أَومْ وْشغْ أَنْژَارْ ذِي ڒْوقْثْ، ؤُشَا ثَامُّورْثْ أَذْ د-ثَاوِي صَّابثْ نّسْ، ؤُشَا ثِيشجِّيرَا ن ييَّارْ أَذْ وْشنْثْ ڒْغِيدْجثْ نْسنْثْ. 5 أَذْ يِيڒِي ؤُسَارْوثْ أَڒْ أَڒْقَاضْ ن ؤُضِيڒْ ؤُشَا أَڒْقَاضْ ن ؤُضِيڒْ أَذْ يِيڒِي أَڒْ ڒْوقْثْ ن ؤُزَارّعْ ؤُشَا أَذْ ثشّمْ أَڒْ غَا ثجِّيوْنمْ ؤُشَا أَذْ ثْزذْغمْ ذِي ڒَامَانْ ذِي ثمُّورْثْ نْومْ. ▪ 6 نشّْ أَذْ ڭّغْ ڒهْنَا ذِي ثمُّورْثْ. مَاڒَا ثطّْصمْ، وَارْ إِتِّيڒِي وِي كنِّيوْ إِ غَا إِسِّيڭّْوْذنْ. نشّْ أَذْ مْحِيغْ إِمُودَّارنْ إِعفَّاننْ زِي ثمُّورْثْ ؤُشَا سِّيفْ وَارْ د-إِژكّْوِي خْ ثمُّورْثْ نْومْ. ▪ 7 ڭُّورْ أَذْ ثضْفَارمْ ڒْعذْيَانْ نْومْ ؤُشَا نِيثْنِي أَذْ وْضَانْ س سِّيفْ نْومْ زَّاثْ إِ ثِيطَّاوِينْ نْومْ. 8 خمْسَا ن يرْيَازنْ زَّايْومْ أَذْ ضْفَارنْ مْيَا ؤُشَا مْيَا زَّايْومْ أَذْ ضْفَارنْ عشْرَا-أَڒفْ ؤُشَا ڒْعذْيَانْ نْومْ أَذْ وْضَانْ س ڒقْضعْ ن سِّيفْ زَّاثْ إِ ثِيطَّاوِينْ نْومْ. ▫ ▪ 9 مِينْزِي نشّْ أَذْ غَارْقْومْ د-ذوْڒغْ ؤُشَا أَذْ أَومْ د-جّغْ ڒْغِيدْجثْ ؤُشَا أَذْ كنِّيوْ أَرْنِيغْ ؤُشَا أَذْ سّْمثْنغْ ڒْعَاهْذْ إِنُو أَكِيذْومْ.
10 أَمْ إِ غَا ثشّمْ عَاذْ زِي زَّاذْ نِّي ثْخزْنمْ، أَذْ ثكّْسمْ ذغْيَا زَّاذْ أَقْذِيمْ مَاحنْذْ أَذْ ثجّمْ أَمْشَانْ إِ جْذِيذْ.
11 نشّْ أَذْ ڭّغْ ثَازذِّيغْثْ إِنُو ذِي ڒْوسْثْ نْومْ ؤُشَا ڒعْمَارْ إِنُو وَارْ زَّايْومْ إِتّْعِيفِّي شَا. ▪
12 أَذْ ؤُيُورغْ جَارْ أَومْ، نشّْ أَذْ إِڒِيغْ ذ أَربِّي نْومْ ؤُشَا كنِّيوْ أَذْ أَيِي ثِيڒِيمْ ذ ڒْڭنْسْ إِنُو.
13 نشّْ ذ سِيذِي، أَربِّي نْومْ، ونِّي كنِّيوْ د-إِسُّوفّْغنْ زِي ثمُّورْثْ ن مِيصْرَا حِيمَا وَارْ تِّيڒِيمْ عَاذْ ذ إِسمْغَانْ نْسنْ. نشّْ أَرْژِيغْ إِمْقدْجَاضنْ ن ؤُزَايْڒُو نْومْ ؤُشَا نذْهغْ كنِّيوْ س وُوذمْ يُوڒِي.
14 مَاشَا مَاڒَا وَارْ ذ أَيِي ثسْڒِيمْ نِيغْ وَارْ تّڭِّيمْ مَارَّا مِينْ زِي كنِّيوْ ؤُمُورغْ ▪
15 ؤُشَا مَاڒَا ثسّحْقَارمْ ثِيوصَّا إِنُو ؤُشَا ڒعْمَارْ نْومْ أَذْ إِعِيفّْ زِي لْفَارَايِيضْ إِنُو، أَڒْ غَا ثَاوْضمْ وَارْ ثتّڭّمْ عَاذْ مَارَّا ڒُومُورَاثْ إِنُو أَڒْ غَا ثَارْژمْ ڒْعَاهْذْ إِنُو،
16 خنِّي نشّْ أَذْ أَومْ ڭّغْ أَيَا: أَذْ خَاومْ-د سّهْوِيغْ أَرْجفْ ذ بُو-ذدْجِيسْ ذ ثْمسِّي ن أَرْوَاحْ نِّي إِ غَا إِثحَّانْ ثِيطَّاوِينْ ؤُشَا أَذْ تّْوَاعدّْبنْ ڒعْمَارْ. أَذْ ثْزَارْعمْ زَّارِيعثْ نْومْ بَاطڒْ، مِينْزِي ڒْعذْيَانْ نْومْ ڭُّورْ أَذْ ت شّنْ.
17 أَذْ ڭّغْ ؤُذمْ إِنُو ضِيدّْ نْومْ ؤُشَا أَذْ ثخْصَارمْ زَّاثْ إِ وُوذمْ ن ڒْعذْيَانْ نْومْ ؤُشَا إِنِّي كنِّيوْ إِشَارّْهنْ أَذْ خَاومْ صلّْطنْ ؤُشَا كنِّيوْ أَذْ ثَاروْڒمْ بْڒَا مَا إِضْفَارْ إِ كنِّيوْ-د حذْ. ▪
18 ؤُ مَاڒَا أَوَارْنِي مَانْ أَيَا عَاذْ وَارْ غَارِي ثسْڒِيمْ، نشّْ أَذْ غَارسْ أَرْنِيغْ سبْعَا ن ثْوَاڒَاوِينْ مَاحنْذْ أَذْ كنِّيوْ وبّْخغْ خْ دّْنُوبْ نْومْ.
19 نشّْ أَذْ أَرْژغْ أَعفَّارْ ن جّهْذْ نْومْ ؤُشَا أَذْ أَرّغْ أَجنَّا نْومْ أَمْ وُوزَّاڒْ ذ ثمُّورْثْ نْومْ أَمْ نّْحَاصْ. 20 أَذْ إِتّْوَاڭّْ جّهْذْ نْومْ بَاطڒْ ؤُشَا ثَامُّورْثْ نْومْ وَارْ ثتِّيشْ صَّابثْ نّسْ ؤُ ثِيشجِّيرَا ن ثمُّورْثْ وَارْ تِّيشنْثْ ڒْغِيدْجثْ.
21 مَاڒَا ثمّْعَاڒَامْ كِيذِي ؤُشَا وَارْ ثتّخْسمْ أَذْ أَيِي ثسْڒِيمْ، خنِّي نشّْ أَذْ خَاومْ د-سّهْوِيغْ عَاذْ سبْعَا ن جّْرَايحْ أَنشْثْ ن دّْنُوبْ نْومْ. 22 أَذْ غَارْومْ د-سّكّغْ ڒوْحُوشْ مَاحنْذْ أَذْ أَومْ خضْفنْ ثَارْوَا نْومْ، أَذْ سّْهلّْكنْ ڒبْهَايمْ نْومْ، ؤُشَا أَذْ سّْنقْصنْ لْعَاذَاذْ نْومْ ؤُ إِبْرِيذنْ نْومْ أَذْ ذوْڒنْ ذ دّْمَانِي.
23 مَاڒَا س مَانَا أَيَا كنِّيوْ وَارْ غَارِي د-تّسْڒِيمْ، مَاشَا ثقِّيممْ ثتّمْعَاڒَامْ أَكِيذِي، 24 خنِّي ؤُڒَا ذ نشّْ أَذْ كِيذْومْ مّْعَاڒِيغْ ؤُشَا أَذْ خَاومْ د-سّهْوِيغْ عَاذْ سبْعَا ن جّْرَايحْ خْ دّْنُوبْ نْومْ. ▪ 25 أَذْ خَاومْ سّكّغْ إِجّْ ن سِّيفْ نِّي إِ غَا إِسّكَّارنْ أَنْثَاقمْ ن ڒْعَاهْذْ إِنُو أَڒْ غَا ثتّْوَاسْمُونمْ ذِي ثْندَّامْ نْومْ. خنِّي نشّْ أَذْ سّكّغْ طَّاعُونْ ذِي ڒْوسْثْ نْومْ ؤُشَا كنِّيوْ أَذْ ثتّْوَاسلّْممْ ذڭْ ؤُفُوسْ ن ڒعْذُو نْومْ. 26 خْمِي إِ غَا أَرْژغْ ڒعْوتْشْ ن وغْرُومْ نْومْ، خنِّي عشْرَا ن ثمْغَارِينْ أَذْ سّنْڭّْونْثْ أَغْرُومْ نْومْ ذِي ثفْقُونْثْ ذ إِشْثْ، ؤُشَا أَوَارْنِي إِ غَا وزْننْثْ أَغْرُومْ أَذْ ث إِ-د-أَرّنْثْ ؤُشَا كنِّيوْ أَذْ ث ثشّمْ، مَاشَا وَارْ ثتّْجِيوِينمْ. ▫ 27 مَاڒَا عَاذْ س مَانْ أَيَا وَارْ غَارِي-د ثتّسْڒِيمْ، مَاشَا أَذْ ثقِّيممْ أَذْ ثمْعَاڒَامْ أَكِيذِي، 28 خنِّي نشّْ أَذْ خَاومْ سْعَارغْ ؤُ أَذْ كنِّيوْ أَربِّيغْ، وَاهْ سبْعَا ن إِمُورنْ نشّْ أَذْ كنِّيوْ أَربِّيغْ ذِي سِّيبّثْ ن دّْنُوبْ نْومْ. 29 أَذْ ثشّمْ أَيْسُومْ ن إِحنْجِيرنْ نْونْ ؤُڒَا ذ أَيْسُومْ ن ثْحنْجِيرِينْ نْومْ أَذْ ث ثشّمْ. ▪ 30 أَذْ أَردّْدْجغْ ڒڭْعُوذِي مَانِي ثتّْوهَّابمْ دّْبَايحْ نْومْ، أَذْ نْضَارغْ إِبِيلَارنْ نْومْ ن أَربِّي ن ثْفُوشْثْ، أَذْ أَرّغْ ڒْخشْبَاثْ نْومْ خْ ڒْخشْبَاثْ ن إِميْضَا ن لْ-أَصْنَامْ نْومْ ؤُشَا ڒعْمَارْ إِنُو أَذْ كنِّيوْ إِعِيفّْ. ▪ 31 أَذْ أَرّغْ ثِيندَّامْ نْومْ ذ ڒْخَارْبثْ ؤُشَا أَذْ أَرّغْ ثِيزَاوِييِّينْ إِقدّْسنْ نْومْ أَذْ ذهْشنْثْ ؤُشَا وَارْ تّخْسغْ أَذْ شْمغْ عَاذْ ڒفْوَاحثْ إِتّْفُوحنْ نْومْ. 32 وَاهْ نشّْ أَذْ أَردّْدْجغْ ثَامُّورْثْ ؤُشَا ڒْعذْيَانْ نْومْ نِّي ذَايسْ إِزدّْغنْ أَذْ زَّايسْ نّْخڒْعنْ.
33 أَذْ كنِّيوْ زُوزَّارغْ جَارْ ڒڭْنُوسْ ؤُشَا أَذْ كْسغْ سِّيفْ أَوَارْنِي أَومْ ؤُشَا ثَامُّورْثْ نْومْ أَذْ ثذْوڒْ ذ ڒخْڒَا ؤُشَا ثِيندَّامْ نْومْ أَذْ إِڒِينْثْ ذ ڒْخَارْبثْ. 34 خنِّي ثَامُّورْثْ أَذْ خَاسْ أَرْضَانْ وُوسَّانْ ن سّبْثْ نّسْ، مَارَّا ؤُسَّانْ ن وَاردّدْجْ، أَمْ إِ غَا ثِيڒِيمْ ذِي ثمُّورْثْ ن ڒْعذْيَانْ نْومْ. خنِّي أَذْ ثَاريّحْ ثمُّورْثْ ؤُ أَذْ ثڭّْ ثْشُونِي خْ وُوسَّانْ ن سّبْثْ نّسْ. ▪ 35 مَاڒَا ؤُسَّانْ ن وَاردّدْجْ أَذْ غَارسْ يِيڒِي وَاريّحْ، مِينْزِي ثَامُّورْثْ وَارْ ثَاريِّيحْ شَا ذڭْ وُوسَّانْ ن سّبْثْ نْومْ ڒَامِي ثُوغَا كنِّيوْ ثْزدّْغمْ ذِينِّي.
36 أَذْ ڭّغْ ثِيڭّْوُوذِي ذڭْ وُوڒَاونْ ن يِينِّي زَّايْومْ إِ غَا إِقِّيمنْ ذِي ثمُّورَا ن ڒْعذْيَانْ نْسنْ، أَڒْ ڒْحسّْ ن إِشْثْ ن ثْفَارشْثْ إِ يِيوِي ؤُصمِّيضْ أَذْ خَاسنْ يَاژّڒْ ؤُ أَذْ ثنْ يَارّْ أَذْ أَروْڒنْ أَمْ مَامّشْ يَاركّْوڒْ بْنَاذمْ زِي سِّيفْ. نِيثْنِي ڭُّورْ أَذْ وْضَانْ، وَاخَّا وَارْ خَاسنْ إِتِّيژّڒْ حذْ. 37 أَذْ نْقَارْضنْ إِجّنْ ذڭْ ونّغْنِي أَمْ خْمِي ژْرِينْ ڒقْذعْ ن يِيجّْ ن سِّيفْ، وَاخَّا وَارْ خَاومْ إِتِّيژّڒْ حذْ. كنِّيوْ وَارْ ثْزمَّارنْ أَذْ ثقِّيممْ ثْبدّمْ زَّاثْ إِ ثِيطَّاوِينْ ن ڒْعذْيَانْ نْومْ، 38 مَاشَا كنِّيوْ أَذْ ثتّْوَاهلّْكمْ جَارْ ڒڭْنُوسْ ؤُشَا ثَامُّورْثْ ن ڒْعذْيَانْ نْومْ أَذْ كنِّيوْ ثشّْ.
39 إِنِّي زَّايْومْ إِ غَا إِقِّيمنْ أَذْ إِسّْڒَاونْ ذِي ثمُّورَا ن ڒْعذْيَانْ نْومْ ذِي سِّيبّثْ ن ڒْمُوعْصِييّثْ نْسنْ، ؤُشَا ؤُڒَا ذِي سِّيبّثْ ن ڒْمُوعْصِييّثْ ن ڒجْذُوذْ نْومْ أَذْ إِسّْڒَاونْ أَكِيذْسنْ.
40 مَاشَا مَاڒَا نعْمنْ س ڒْمُوعْصِييّثْ نْسنْ ذ ڒْمُوعْصِييّثْ ن ڒجْذُوذْ نْسنْ زِي سِّيبّثْ ن ڒغْذَارْ نْسنْ إِ زِي ذ أَيِي غْذَارنْ ؤُشَا عَاوذْ مّْعَاڒَانْ أَكِيذِي، 41 ؤُشَا خنِّي ؤُڒَا ذ نشّْ مّْعَاڒِيغْ أَكِيذْسنْ ؤُ إِوْيغْ ثنْ غَارْ ثمُّورْثْ ن ڒْعذْيَانْ نْسنْ، مَاحنْذْ أَذْ ثَاغْ ؤُڒْ نْسنْ وَارْ إِخْثِيننْ أَذْ يَاضَارْ ؤُشَا أَذْ قبْڒنْ ڒخْڒَاصْ إِ ڒْمُوعْصِييّثْ نْسنْ، 42 ؤُ خنِّي نشّْ أَذْ خَارّْصغْ ذِي ڒْعَاهْذْ إِنُو أَكْ-ذ يَاعْقُوبْ ؤُشَا عَاوذْ ذِي ڒْعَاهْذْ إِنُو أَكْ-ذ إِسْحَاقْ ؤُشَا أَذْ خَارّْصغْ ذِي ڒْعَاهْذْ إِنُو أَكْ-ذ إِبْرَاهِيمْ ؤُشَا خنِّي أَذْ خَارّْصغْ ذِي ثمُّورْثْ.
43 ثَامُّورْثْ أَذْ ثتّْوَاجْ زَّايْسنْ ؤُشَا أَذْ خَاسْ أَرْضَانْ وُوسَّانْ ن سّبْثْ نّسْ ؤُمِي غَا ثقِّيمْ ذ إِشْثْ ن ڒْخَارْبثْ ذِي سِّيبّثْ نْسنْ ؤُشَا نِيثْنِي أَذْ ڒمْذنْ أَذْ قبْڒنْ لْعِيقَابْ ن ڒْمُوعْصِييّثْ نْسنْ، وَاهْ مِينْزِي نْضَارنْ لْفَارَايِيضْ إِنُو ؤُ مِينْزِي ڒعْمَارْ نْسنْ إِعِيفّْ زِي ثْوصَّا إِنُو.
44 سنّجْ إِ ؤُيَا أَقَا ذ مَانْ أَيَا: مَاڒَا أَقَا أَثنْ ذِي ثمُّورْثْ نْ ڒعْذْيَانْ نْسنْ، نشّْ وَارْ ثنْ نطَّارغْ شَا ؤُ وَارْ ثنْ تّْعِيفِّيغْ أَڒْ ثنْ غَا ثحِّيغْ ؤُ أَذْ مْحِيغْ ڒْعَاهْذْ إِنُو أَكِيذْسنْ مِينْزِي نشّْ ذ سِيذِي، أَربِّي نْسنْ! ▪ 45 مَاشَا ذِي طّْوعْ نْسنْ أَذْ عقْڒغْ ذِي ڒْعَاهْذْ إِنُو أَكْ-ذ ڒجْذُوذْ نِّي نذْهغْ زِي ثمُّورْثْ ن مِيصْرَا زَّاثْ إِ ثِيطَّاوِينْ ن ڒڭْنُوسْ مَاحنْذْ أَذْ إِڒِيغْ ذ أَربِّي إِ نِيثْنِي، نشّْ ذ سِيذِي!“
46 ثِينَا ذ ثِيوصَّا ذ لْفَارَايِيضْ ذ إِزرْفَانْ نِّي إِڭَّا سِيذِي جَارْ أَسْ ذ جَارْ أَيْثْ ن إِسْرَائِيل ذڭْ وذْرَارْ ن سِينَا س ؤُفُوسْ ن مُوسَا.