ثِيوصَّا خْ ؤُوقَّارْ ذِي ثُوذَارْثْ
19
1 إِسِّيوڒْ سِيذِي غَارْ مُوسَا، إِنَّا: 2 ”سِيوڒْ أَكْ-ذ مَارَّا ثَامسْمُونْثْ ن أَيْثْ ن إِسْرَائِيل ؤُشَا إِنِي أَسنْ: ’إِتّْخصَّا أَذْ ثِيڒِيمْ ذ إِمْقدَّاسنْ، مِينْزِي نشّْ ذ سِيذِي، أَربِّي نْومْ، أَقَا أَيِي ذ أَمْقدَّاسْ! ▪ 3 كُوڒْ إِجّْ أَذْ إِوقَّارْ يمَّاسْ ذ بَابَاسْ ؤُشَا ؤُسَّانْ إِنُو ن سّبْثْ أَذْ ثنْ ثحْضَامْ، نشّْ ذ سِيذِي، أَربِّي نْومْ!▪ 4 وَارْ ڭُّورْ أَذْ ثْذوْڒمْ غَارْ لْ-أَصْنَامْ ؤُ وَارْ تّڭّمْ إِ يِيخفْ نْومْ ڒخْيَاڒَاثْ إِفسْينْ ذ إِربِّيثنْ. نشّْ ذ سِيذِي، أَربِّي نْومْ! ▪ 5 خْمِي غَا ثْقدّْمنْ ثَاغَارْصْثْ ن ڒهْنَا إِ سِيذِي، خنِّي أَذْ ت ثْقدّْممْ س إِجّْ ن وبْرِيذْ إِ زِي غَا ثتّْوَاقبْڒمْ س أَرْضَا. 6 إِتّْخصَّا أَذْ ثتّْوَاشّْ ذڭْ وَاسّْ ن ثْغَارْصْثْ نّكْ ؤُڒَا ذِي ثِيوشَّا أَوَارْنِي أَسْ. مِينْ إِقِّيمنْ أَڒْ وَاسّْ وِيسّْ ثْڒَاثَا أَذْ إِتّْوَاسشْمضْ س ثْمسِّي. ▪ 7 مَاڒَا ثتّْوَاشّْ عَاذْ ذڭْ وَاسّْ وِيسّْ ثْڒَاثَا، أَذْ ثِيڒِي ذ جّْعِيفشْثْ، وَارْ ذَايسْ إِتّْوِيفْ أَرْضَا. 8 وِي زَّايسْ غَا إِشّنْ أَذْ يَارْپُو ڒْمُوعْصِييّثْ نّسْ، مِينْزِي إِسّْعِيدْجْ مِينْ إِدْجَانْ ذ أَمْقدَّاسْ ن سِيذِي ؤُشَا خنِّي أَذْ إِتّْوَاقسّْ بْنَاذمْ نِّي زِي ڒْڭنْسْ نّسْ.
9 مَاڒَا ثمْجَارمْ صَّابثْ ن ثمُّورْثْ نْومْ، وَارْ مجَّارْ شكْ إِيَّارْ نّكْ أَڒْ أَغزْذِيسْ أَنڭَّارْ نِيغْ أَذْ ثْجمْعذْ مِينْ إِقِّيمنْ أَوَارْنِي ثَاميْرَا نّكْ. ▪
10 وَارْ ثْڒقّْضذْ ؤُضِيڒْ ن ؤُمَارْجُوعْ نّكْ كُوڒْشِي، وَارْ ثسّْمُونِيذْ مَارَّا مِينْ ذِينْ إِقِّيمنْ ذِي ثمُّورْثْ ذڭْ ؤُمَارْجُوعْ نّكْ ن ؤُضِيڒْ. أَذْ ثنْ ثجّذْ إِ ؤُمزْڒُوضْ ؤُ إِ ؤُبَارَّانِي، نشّْ ذ سِيذِي، أَربِّي نْومْ!
11 وَارْ تَّاشَارْ ؤُ وَارْ سّْخَارِّيقْ ؤُ ؤُڒَا ذ إِجّْ مَا أَذْ إِشْمثْ أَمْقَارّبْ نّسْ. ▪
12 وَارْ تّْجَادْجَامْ ژُورْ س يِيسمْ إِنُو. وَارْ ثسّْعِيدْجِيذْ إِسمْ ن أَربِّي نّكْ. نشّْ ذ سِيذِي.▪
13 وَارْ سّْحِيسِّيفْ أَمْقَارّبْ نّكْ نِيغْ أَذْ ث ثَاشَارذْ. وَارْ تّطّفْ ڒْمُونثْ ن إِشوَّاڒنْ زِي دْجِيڒثْ أَڒْ ثِيوشَّا. ▫ ▪
14 وَارْ تّكّْوَارْ أَذهْشُورْ ؤُ وَارْ تّڭّْ شَا مِينْ ذِي غَا إِنْقَارضْ ؤُذَارْغَاڒْ، مَاشَا إِتّْخصَّا شكْ أَذْ ثڭّْوذذْ أَربِّي، نشّْ ذ سِيذِي!
15 غَارْ وحْكَامْ وَارْ ڭُّورْ أَذْ ثْغشّمْ. وَارْ سْعِيزِّي أَمزْڒُوضْ ؤُ وَارْ سْعدُّو غَارْ بُو-ثْخُوبَا. إِتّْخصَّا أَذْ ثْحكْمذْ خْ ؤُمْقَارّبْ نّكْ س ؤُسڭّذْ. ▪
16 وَارْ ڭُّورْ جَارْ ڒْڭنْسْ نّكْ س ؤُنمّمْ، وَارْ ثْبذِّيذْ خْ إِذَامّنْ ن ؤُمْقَارّبْ نّكْ، نشّْ ذ سِيذِي! ▪
17 وَارْ شَارّهْ ؤُمَاشْ ذڭْ وُوڒْ نّكْ. أَذْ ثْعڒْمذْ أَعْڒَامْ إِ ؤُمْقَارّبْ نّكْ ؤُ وَارْ ثْكسِّيذْ دّنْبْ نّسْ خَاكْ. ▪
18 وَارْ تّنْثِيقِيمْ نِيغْ أَذْ ثْخمّْڒذْ أَنْثَاقمْ خْ ثَارْوَا ن ڒْڭنْسْ نّكْ. أَذْ ثخْسذْ أَمْقَارّبْ نّكْ أَمشْنَاوْ إِخفْ نّكْ، نشّْ ذ سِيذِي.▪
19 أَذْ ثحْضَامْ ثِيوصَّا إِنُو. وَارْ تّْڒقَّامْ شَا ڒبْهِيمثْ نّكْ أَكْ-ذ إِجّْ ن مَارْكَا نّغْنِي. وَارْ زَارّعْ ثْنَاينْ ن مَارْكَاثْ ن زَّارِيعثْ ذڭْ إِيَّارْ نّكْ ؤُ وَارْ يَارّضْ أَرُّوضْ إِتّْوَاڭّنْ س ثْنَاينْ ن مَارْكَاثْ ن ؤُكتَّانْ. ▪
20 مَاڒَا أَرْيَازْ إِنْضَارْ أَمْ إِطّصْ أَكْ-ذ إِشْثْ ن ثمْغَارْثْ، إِشْثْ ن ثَايَّا إِخْضبْ إِ-ت يِيجّْ ن ورْيَازْ نّغْنِي، مَاشَا وَارْ إِتّْوَاخدْجصْ عَاذْ ڒخْڒَاصْ نّسْ نِيغْ ثمّوْشْ أَسْ ثْڒلِّي، خنِّي أَذْ يِيڒِي ڒحْسَابْ، مَاشَا وَارْ ثتّْوَانقّنْ شَا، مِينْزِي نتَّاثْ ثُوغَا عَاذْ وَارْ ثتّْوَاحَارْ شَا. 21 نتَّا أَذْ يَاوِي ثَاغَارْصْثْ ن ؤُمَارْوَاسْ نّسْ إِ سِيذِي غَارْ وَاذَافْ ن ؤُقِيضُونْ ن ؤُمْسَاڭَارْ، إِجّْ ن إِشَارِّي أَمْ ثَاغَارْصْثْ ن ؤُمَارْوَاسْ. 22 أَذْ خَاسْ إِفْذِي ؤُكهَّانْ س إِشَارِّي ن ثْغَارْصْثْ ن ؤُمَارْوَاسْ زَّاثْ إِ وُوذمْ ن سِيذِي إِ دّنْبْ نّسْ إِ إِڭَّا ؤُشَا دّنْبْ نّسْ إِ إِڭَّا أَذْ أَسْ إِتّْوَاغْفَارْ. ▫
23 خْمِي غَا ثَاوْضمْ ذِي ثمُّورْثْ ؤُشَا ثژُّومْ عْڒَامْ كُوڒْ ثِيشجِّيرَا مَاحنْذْ أَذْ زَّايْسنْثْ ثشّمْ، خنِّي أَذْ ثجّمْ وَارْ ثْخثْنمْ ’ڒعْذَاڒْيثْ نّسْ‘، ثنِّي ذ ڒْغِيدْجثْ نّسْ. ثْڒَاثَا ن إِسڭّْوُوسَا أَذْ ثنْثْ ثجّمْ وَارْ ثنْثْ ثْخثْنمْ. وَارْ زَّايْسنْثْ تّتّمْ شَا. 24 ذڭْ ؤُسڭّْوَاسْ وِيسّْ أَربْعَا أَذْ ثِيڒِي مَارَّا ڒْغِيدْجثْ نّسْ ثْقدّسْ، إِ ؤُسمْغَارْ إِ سِيذِي. 25 ذڭْ ؤُسڭّْوَاسْ وِيسّْ خمْسَا أَذْ ثشّمْ ڒْغِيدْجثْ نّسْ ؤُشَا صَّابثْ نّسْ أَذْ ت ثوْشمْ إِ يِيخفْ نْومْ. نشّْ ذ سِيذِي، أَربِّي نْومْ!
26 وَارْ ڭُّورْ أَذْ ثشّمْ شَا ذَايسْ إِذَامّنْ. وَارْ إِعدّڒْ أَذْ ثْڭزّْنمْ نِيغْ أَذْ ثسّْخذْممْ ثَابزْڭِيوْثْ. 27 إِتّْخصَّا كنِّيوْ وَارْ ثْحفِّيمْ أَشوَّافْ ن ؤُزدْجِيفْ خْ إِغزْذِيسنْ ؤُ وَارْ ڭُّورْ أَذْ ثْضيّْعمْ أَحفِّي ن ثْمَا ن ثْمَارْثْ نْومْ. ▪ 28 وَارْ ثْشَارَّاضمْ أَرِّيمَاثْ نْومْ إِ يِيجّْ ن ؤُمتِّينْ نِيغْ أَذْ ثَارشْممْ ثِيڭَّازْ ذِي أَرِّيمَاثْ نْومْ. نشّْ ذ سِيذِي!▪ 29 وَارْ سْذدْجِي يدْجِيشْ، أَذْ ت ثَارّذْ ذ ثَامْغَارْثْ ن فَارْقْ-شّْغڒْ، حِيمَا وَارْ ثْوطِّي ثمُّورْثْ ذِي فَارْقْ-شّْغڒْ ؤُشَا خنِّي أَذْ ثشُّورْ ثمُّورْثْ س ڒفْضِيحثْ. 30 أَذْ ثحْضَامْ ؤُسَّانْ إِنُو ن سّبْثْ ؤُشَا أَذْ ثْوقَّارمْ زَّاوشْثْ إِنُو إِقدّْسنْ إِنُو. نشّْ ذ سِيذِي! 31 وَارْ تّْذِيكّْوِيڒمْ غَارْ ينِّي إِسَّاوَاڒَانْ أَكْ-ذ إِمتَّانْ ؤُ غَارْ إِڭزَّاننْ ؤُ وَارْ غَارْسنْ أَرزْفمْ حِيمَا أَذْ زَّايْسنْ تّْوَاخمْجنْ. نشّْ ذ سِيذِي، أَربِّي نْومْ! ▪
32 أَذْ ثكَّارذْ إِ ونِّي غَارْ إِدْجْ ؤُشوَّافْ إِشَابْ ؤُشَا أَذْ ثْوقَّارذْ ؤُذمْ ن إِوسُّورَا ؤُشَا أَذْ ثڭّْوذذْ زِي أَربِّي نّكْ. نشّْ ذ سِيذِي! 33 خْمِي كِيذكْ غَا إِزْذغْ إِجّْ ن ؤُبَارَّانِي ذِي ثمُّورْثْ نْومْ، وَارْ ث تّْضدْجْممْ. ▪ 34 أَبَارَّانِي، ونِّي غَارْومْ إِزدّْغنْ، أَذْ أَومْ يِيڒِي أَمشْنَاوْ إِجّنْ زِي ثَارْوَا ن ثمُّورْثْ نْومْ. أَذْ ث ثخْسذْ أَمْ يِيخفْ نّكْ، مِينْزِي ثُوغَا كنِّيوْ ذ إِبَارَّانِييّنْ ذِي ثمُّورْثْ ن مِيصْرَا. نشّْ ذ سِيذِي، أَربِّي نْومْ!
35 خْمِي إِ غَا ثِيڒِيمْ غَارْ وحْكَامْ وَارْ ثْغشّمْ شَا س ڒعْبَارْ ن ثُوزّڭَّارْثْ نِيغْ ن ضْقڒْ نِيغْ ن ڒعْبَارْ ن مِينْ ذَايسْ. 36 أَذْ غَارْومْ يِيڒِي ذ إِجّْ ن ڒْمِيزَانْ نِيشَانْ ذ إِژْرَا ن ڒْمِيزَانْ نِيشَانْ ؤُڒَا ذ إِجّْ ن إِفَا نِيشَانْ ذ إِجّْ ن ؤُهِينُو نِيشَانْ، نشّْ ذ سِيذِي، أَربِّي نْومْ، ونِّي إِ كنِّيوْ د-إِنذْهنْ زِي ثمُّورْثْ ن مِيصْرَا. ▪
37 أَذْ ثحْضَامْ مَارَّا ثِيوصَّا ذ ڒُومُورْ إِنُو ؤُشَا أَذْ ثنْ ثڭّمْ. نشّْ ذ سِيذِي!“