أَڒقّمْ ن هَارُونْ ذ ثَارْوَا نّسْ
8
1 إِسِّيوڒْ سِيذِي أَكْ-ذ مُوسَا، إِنَّا: 2 ”كْسِي هَارُونْ جْمِيعْ أَكْ-ذ إِحنْجِيرنْ نّسْ ذ وَارُّوضْ ذ زّشْثْ إِ وذْهَانْ ذ ؤُينْذُوزْ ن ثْغَارْصْثْ ن دّنْبْ ذ ثْنَاينْ ن إِشَارِّييّنْ ذ ثْسُودْجثْ س وغْرُومْ بْڒَا أَنْثُونْ، ▪ 3 ؤُ ڒَاغَا إِ مَارَّا ثَامسْمُونْثْ غَارْ وَاذَافْ ن ؤُقِيضُونْ ن ؤُمْسَاڭَارْ.“
4 إِڭَّا مُوسَا أَمْ مَامّشْ ذ أَسْ يُومُورْ سِيذِي ؤُشَا ثسّْمُونْ ثْمسْمُونْثْ غَارْ وَاذَافْ ن ؤُقِيضُونْ ن ؤُمْسَاڭَارْ. 5 إِنَّا مُوسَا إِ ثْمسْمُونْثْ: ”وَا ذ مِينْ إِوصَّا سِيذِي أَذْ إِتّْوَاڭّْ.“ ▪
6 مُوسَا إِسّْقَارّبْ-د هَارُونْ ذ إِحنْجِيرنْ نّسْ ؤُشَا إِسِّيرْذْ إِ-ثنْ س وَامَانْ. 7 إِسَّارْسْ خَاسْ أَرُّوضْ ن ثڒْمشْثْ، إِبْيسْ أَسْ س ثْحزَّامْثْ، إِسّْيَارْضْ أَسْ أَسڒْهَامْ. إِڭَّا خَاسْ أَبَالْطُو ؤُشَا إِبْيسْ أَسْ س ثْحزَّامْثْ إِزوّْقنْ ن ؤُبَالْطُو ؤُشَا إِقّنْ أَسْ زَّايسْ أَبَالْثُو. ▪ 8 خنِّي إِمْثنْ خَاسْ ثَاجْمشْثْ ؤُشَا إِڭَّا إِژْرَا ن ’ؤُرِيمْ‘ ذ ’ثُومِيمْ‘ ذِي ثَاجْمشْثْ. ▪ 9 إِڭَّا أَرژّثْ خْ ؤُزدْجِيفْ نّسْ ؤُشَا خْ أَرژّثْ، غَارْ زَّاثْ، إِڭَّا ثَاڒْوِيحْثْ س نُّووَّارْ ن وُورغْ ن ثمْرِيسْثْ ثَامْقدَّاسْثْ، أَمْ مَامّشْ ث إِوصَّا سِيذِي إِ مُوسَا. ▪
10 خنِّي إِكْسِي مُوسَا زّشْثْ إِ وذْهَانْ ؤُشَا إِذْهنْ ثَازذِّيغْثْ ذ مَارَّا مِينْ ذَايسْ إِدْجَانْ ؤُشَا إِسّْقدّسْ مَارَّا أَيَا.
11 إِرُوشّْ زَّايسْ خْ ؤُعَالْطَارْ سبْعَا ن ثْوَاڒَاوِينْ ؤُشَا إِذْهنْ عَاوذْ أَعَالْطَارْ ذ مَارَّا ڒقْشُوعْ نّسْ ؤُڒَا ذ ثَابَانْيُوثْ أَكْ-ذ ؤُضَارْ نّسْ مَاحنْذْ أَذْ ثنْ إِسّْقدّسْ.
12 إِسيّبْ زّشْثْ إِ وذْهَانْ خْ ؤُزدْجِيفْ ن هَارُونْ ؤُشَا إِذْهنْ إِ-ث حِيمَا أَذْ ث إِسّْقدّسْ. ▪
13 إِسّْقَارّبْ-د مُوسَا أَيْثْ ن هَارُونْ ؤُشَا يَارْضْ أَسنْ أَرُّوضْ ن ثڒْمشْثْ ؤُشَا إِبْيسْ أَسنْ س ثْحزَّامِينْ ؤُشَا إِنّضْ أَسنْ ثِيشُوشَّايْ أَمْ مَامّشْ ث إِوصَّا سِيذِي إِ مُوسَا. ▪
14 إِسّْقَارّبْ-د أَينْذُوزْ ن ثْغَارْصْثْ ن دّنْبْ ؤُشَا هَارُونْ ذ إِحنْجِيرنْ نّسْ سَّارْسنْ إِفَاسّنْ نْسنْ خْ ؤُزدْجِيفْ ن ؤُينْذُوزْ ن ثْغَارْصْثْ ن دّنْبْ. ▪
15 إِغَارْصْ أَسْ ؤُشَا إِكْسِي مُوسَا إِذَامّنْ ؤُشَا إِڭَّا شْوَايْثْ زَّايْسنْ س ؤُضَاضْ نّسْ خْ وَاشَّاونْ ن ؤُعَالْطَارْ إِ إِدْجَانْ غَارْ مَارَّا إِغزْذِيسنْ نّسْ ؤُشَا أَمُّو إِ إِسِّيزْذڭْ أَعَالْطَارْ. خنِّي إِسيّبْ إِذَامّنْ غَارْ ؤُضَارْ ن ؤُعَالْطَارْ ؤُشَا إِسّْقدّسْ إِ-ث مَاحنْذْ أَذْ خَاسْ إِڭّْ أَصْڒَاحْ. ▫
16 إِكْسِي مَارَّا ثَاذُونْثْ نِّي إِدْجَانْ خْ وَاذَانْ ذ مِينْ يُويْڒنْ غَارْ ثْسَا ذ ثْنَاينْ ن ثِيژَّاڒْ ذ ثْذُونْثْ نْسنْثْ ؤُشَا مُوسَا إِسّْبخَّارْ أَيَا خْ ؤُعَالْطَارْ. ▫
17 مَاشَا أَينْذُوزْ ذ يِيڒمْ نّسْ ذ ويْسُومْ نّسْ ذ أَمسَّاڒْ نّسْ، إِسَّارْغْ إِ-ثنْ بَارَّا إِ ڒْمَارْڭحْ ن ڒْعسْكَارْ، أَمْ مَامّشْ ث إِوصَّا سِيذِي إِ مُوسَا. ▪
18 إِسّْقَارّبْ-د مُوسَا إِشَارِّي ن ثْغَارْصْثْ ن وشْمَاضْ ؤُشَا هَارُونْ ذ إِحنْجِيرنْ نّسْ سَّارْسنْ إِفَاسّنْ نْسنْ خْ ؤُزدْجِيفْ ن إِشَارِّي.
19 إِغَارْصْ أَسْ ؤُشَا إِزدْجعْ مُوسَا إِذَامّنْ خْ ؤُعَالْطَارْ غَارْ مَارَّا إِغزْذِيسنْ نّسْ. 20 إِبْضَا إِشَارِّي ذ إِشدْجِيقنْ نّسْ ؤُشَا إِسّْبخَّارْ مُوسَا أَزدْجِيفْ ذ إِشدْجِيقنْ ذ ثْذُونْثْ. 21 إِسِّيرْذْ أَذَانْ ذ إِضَارنْ س وَامَانْ ؤُشَا إِسّْبخَّارْ مُوسَا مَارَّا إِشَارِّي خْ ؤُعَالْطَارْ، أَقَا-ت ذ ثَاغَارْصْثْ ن وشْمَاضْ س يِيشْثْ ن ڒفْوَاحثْ إِتّْفُوحنْ، أَقَا-ت ذ ثَاوْهِيبْثْ ن ثْمسِّي إِ سِيذِي، أَمْ مَامّشْ ث إِوصَّا سِيذِي إِ مُوسَا. ▪
22 إِسّْقَارّبْ-د خنِّي إِشَارِّي نّغْنِي، إِشَارِّي إِ ؤُذشّنْ، ؤُشَا هَارُونْ ذ إِحنْجِيرنْ نّسْ سَّارْسنْ إِفَاسّنْ نْسنْ خْ ؤُزدْجِيفْ ن إِشَارِّي. 23 ؤُشَا إِغَارْصْ أَسْ ؤُشَا إِكْسِي مُوسَا شْوَايْثْ زڭْ إِذَامّنْ ؤُشَا إِڭَّا إِ-ثنْ خْ إِغسْ ن ؤُمزُّوغْ أَفُوسِي ن هَارُونْ ؤُ خْ ؤُضَاضْ ن يِيمزْ ن ؤُفُوسْ نّسْ أَفُوسِي ؤُ خْ ؤُضَاضْ ن يِيمزْ ن ؤُضَارْ نّسْ أَفُوسِي. 24 إِسّْقَارّبْ-د عَاوذْ إِحنْجِيرنْ ن هَارُونْ ؤُشَا إِڭَّا مُوسَا شْوَايْثْ زڭْ إِذَامّنْ خْ إِغسْ ن ؤُمزُّوغْ نْسنْ أَفُوسِي ؤُ خْ ؤُضَاضْ ن يِيمزْ ن ؤُفُوسْ نْسنْ أَفُوسِي ؤُ خْ ؤُضَاضْ ن يِيمزْ ن ؤُضَارْ نْسنْ أَفُوسِي ؤُشَا إِزدْجعْ مُوسَا إِذَامّنْ إِقِّيمنْ خْ ؤُعَالْطَارْ غَارْ مَارَّا إِغزْذِيسنْ نّسْ. 25 إِكْسِي ثَاذُونْثْ ذ ؤُنوَّارْ س ثَاذُونْثْ ذ مَارَّا ثَاذُونْثْ ثنِّي إِدْجَانْ خْ وَاذَانْ ذ مِينْ يُويْڒنْ غَارْ ثْسَا ذ ثْنَاينْ ن ثِيژَّاڒْ أَكْ-ذ ثْذُونْثْ نْسنْثْ ؤُڒَا ذ أَشكْرُوذْ أَفُوسِي. ▪ 26 زِي ثْسُودْجثْ س وغْرُومْ بْڒَا أَنْثُونْ، ثنِّي ثُوغَا زَّاثْ إِ وُوذمْ ن سِيذِي، إِكْسِي إِجّْ ن ڒمْسمّمْ بْڒَا أَنْثُونْ ذ يِيشْثْ ن ثمْسمّمْثْ إِسّْوجْذنْ س زّشْثْ ذ إِشْثْ ن ثڒْففْثْ ؤُشَا إِسَّارْسْ إِ-ثنْ خْ ثَاذُونْثْ ؤُ خْ ؤُشكْرُوذْ أَفُوسِي. 27 إِڭَّا مَارَّا مَانْ أَيَا ذڭْ إِفَاسّنْ ن هَارُونْ ؤُ ذڭْ إِفَاسّنْ ن إِحنْجِيرنْ نّسْ ؤُشَا إِسّنْهزّْ أَيَا أَمْ يِيشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي. ▪ 28 أَوَارْنِي أَسْ إِكْسِي ثنْ مُوسَا عَاوذْ زڭْ إِفَاسّنْ نْسنْ ؤُشَا إِسّْبخَّارْ إِ-ثنْ خْ ؤُعَالْطَارْ، خْ ثْغَارْصْثْ ن وشْمَاضْ. أَقَا ذ ثِيغَارْصَا إِ ؤُذشّنْ س يِيشْثْ ن ڒفْوَاحثْ إِتّْفُوحنْ، أَقَا ذ ثَاوْهِيبْثْ ن ثْمسِّي إِ سِيذِي. 29 إِكْسِي مُوسَا إِذْمَارنْ ؤُشَا إِسّنْهزّْ إِ-ت أَمشْنَاوْ إِشْثْ ن ثوْهِيبْثْ ن ونْهزِّي زَّاثْ إِ وُوذمْ ن سِيذِي. مَانْ أَيَا ذ ثَاسْغَارْثْ ن ؤُشَارِّي إِ ؤُذشّنْ نِّي إِدْجَانْ إِ مُوسَا، أَمْ مَامّشْ ث إِوصَّا سِيذِي إِ مُوسَا. ▪
30 إِكْسِي مُوسَا شْوَايْثْ ن زّشْثْ إِ وذْهَانْ ؤُ ن إِذَامّنْ إِ إِدْجَانْ خْ ؤُعَالْطَارْ ؤُشَا إِرُوشّْ إِ-ثنْ خْ هَارُونْ ؤُ خْ وَارُّوضْ نّسْ، خْ إِحنْجِيرنْ نّسْ ؤُ خْ وَارُّوضْ ن إِحنْجِيرنْ نّسْ، إِنِّي أَكِيذسْ إِدْجَانْ. أَمُّو إِ إِسّْقدّسْ هَارُونْ ذ وَارُّوضْ نّسْ ذ إِحنْجِيرنْ نّسْ ذ وَارُّوضْ ن إِحنْجِيرنْ نّسْ، إِنِّي أَكِيذسْ إِدْجَانْ. ▪
31 إِنَّا مُوسَا إِ هَارُونْ ؤُ إِ إِحنْجِيرنْ نّسْ: ”ڭّْومْ أَيْسُومْ نِّي غَارْ وَاذَافْ ن ؤُقِيضُونْ ن ؤُمْسَاڭَارْ ؤُشَا ثشّمْ ث ذِينِّي س وغْرُومْ نِّي إِدْجَانْ ذِي ثْسُودْجثْ ن ثْغَارْصَا إِ ؤُذشّنْ، أَمْ مَامّشْ وصِّيغْ نشّْ، نِّيغْ: ’هَارُونْ ذ إِحنْجِيرنْ نّسْ أَذْ ث شّنْ.‘ ▪ 32 مِينْ إِشطّنْ ن ويْسُومْ ذ وغْرُومْ، أَذْ ث ثسّْشمْضنْ س ثْمسِّي. 33 زڭْ وَاذَافْ ن ؤُقِيضُونْ ن ؤُمْسَاڭَارْ وَارْ زَّايسْ-د ثتّفّْغمْ شَا سبْعَا ن وُوسَّانْ، أَڒْ أَسّْ مِينْ ذِي إِ غَا كمّْڒنْ وُوسَّانْ ن ؤُڒقّمْ نْونْ، مِينْزِي نتَّا أَذْ كنِّيوْ يَاڒقّمْ سبْعَا ن وُوسَّانْ. 34 أَمْ مَامّشْ إِڭَّا ذڭْ وَاسّْ-أَ، أَمُّو إِوصَّا سِيذِي مَاحنْذْ أَذْ خَاومْ إِتّْوَافْذِي. 35 أَذْ ثقِّيممْ غَارْ وَاذَافْ ن ؤُقِيضُونْ ن ؤُمْسَاڭَارْ، أَسّْ ذ دْجِيڒثْ، سبْعَا ن وُوسَّانْ ؤُشَا أَذْ ثطّْفمْ حطُّو إِ سِيذِي، حِيمَا وَارْ ثْمتِّيمْ شَا، مِينْزِي أَمُّو إِ ث تّْوصِّيغْ نشّْ.“ 36 هَارُونْ ذ إِحنْجِيرنْ نّسْ ڭِّينْ مَارَّا مِينْ ذ أَسنْ إِوصَّا سِيذِي س ؤُفُوسْ ن مُوسَا.