‏1 ”مَاڒَا إِخْضَا حذْ ؤُمِي إِسْڒَا أَهجِّي ن إِشْثْ ن نّعْڒثْ ؤُشَا نتَّا ذ أَشهَّاذْ خَاسْ، نِيغْ إِژْرَا إِ-ث نِيغْ إِسّنْ إِ-ث: مَاڒَا وَارْ خَاسْ إِقَّارْ وَالُو، خنِّي أَذْ يَارْپُو ڒْمُوعْصِييّثْ نّسْ. ^▫  

‏2 نِيغْ مَاڒَا حذْ إِحَاذَا مِينْ مَا زِي ثْمسْڒَاشْثْ إِخمْجنْ، ڒْخشْبثْ ن ڒْمَاڒْ إِخْمجْ، نِيغْ ڒْخشْبثْ ن ڒبْحِيمثْ إِخمْجنْ، نِيغْ ڒْخشْبثْ ن ؤُمُودَّارْ إِخْمجْ إِتّْپُوعنْ، ؤُشَا نتَّا وَارْ إِسِّينْ أَيَا ، أَقَا إِخْمجْ ؤُ ذَايسْ أَمَارْوَاسْ. ^▪  

‏3 نِيغْ مَاڒَا إِحَاذَا شَا ن ڒخْمجْ ن بْنَاذمْ، مِينْ مَا زِي ڒخْمجْ نّسْ إِ زِي إِذْوڒْ نتَّا إِخْمجْ، مَاڒَا ثنُّوفَّارْ خَاسْ ؤُشَا خنِّي إِسّنْ إِثْ، أَقَا ذَايسْ أَمَارْوَاسْ.

‏4 نِيغْ مَاڒَا حذْ إِژُّودْجْ س ثْشَارْفَايحْ نّسْ مَاحنْذْ أَذْ إِڭّْ ڒْغَارْ نِيغْ أَذْ إِڭّْ ڒْخَارْ، نِيغْ مِينْ مَا إِزمَّارْ بْنَاذمْ أَذْ إِنْطقْ أَمنِّي وَاهَا س إِشْثْ ن ثْجَادْجِيثْ، ؤُشَا ثْنُوفَّارْ ثْمسْڒَاشْثْ خَاسْ، مَاشَا إِسّنْ إِ-ث أَوَارْنِي مَانْ أَيَا، أَقَا نتَّا إِخْمجْ ؤُ ذَايسْ أَمَارْوَاسْ خْ سِّيبّثْ ن شَا ن إِجّْ ن زَّايْسنْ.

‏5 خنِّي أَذْ إِمْسَارْ، مَاڒَا ذَايسْ أَمَارْوَاسْ ذِي سِّيبّثْ ن إِشْثنْ زِي ثْمسْڒَايِينْ-أَ، أَذْ إِنْعمْ خْ مِينْ ثُوغَا إِخْضَا، ^▫   ‏6 ؤُشَا خْ دّنْبْ إِ إِڭَّا، أَذْ إِقدّمْ إِشْثْ ن ثوْثمْثْ ن وُودْجِي ذ ثَاغَارْصْثْ ن ؤُمَارْوَاسْ، إِشْثْ ن ثخْسِي نِيغْ إِشْثْ ن ثْغَايْضثْ، ذ ثَاغَارْصْثْ ن دّنْبْ إِ سِيذِي، ؤُشَا أَمُّو إِ خَاسْ غَا إِفْذِي ؤُكهَّانْ دّنْبْ نّسْ. ^▫  

‏7 مَاشَا مَاڒَا أَفُوسْ نّسْ وَارْ غَارسْ مِينْ إِقدّنْ إِ يِيجّْ زڭْ وُودْجِي، خنِّي أَذْ يَاوِي إِ سِيذِي إِ ثْغَارْصْثْ ن ؤُمَارْوَاسْ خْ دّنْبْ إِ إِڭَّا، ثْنَاينْ ن ثجْلِيلِّيحِينْ نِيغْ ثْنَاينْ ن إِذْبِيرنْ إِمژْيَاننْ، إِجّنْ إِ ثْغَارْصْثْ ن دّنْبْ ؤُ إِجّنْ إِ ثْغَارْصْثْ ن وشْمَاضْ. ^▪  

‏8 أَذْ ثنْ يَاوِي غَارْ ؤُكهَّانْ، ونِّي د غَا إِسّْقَارّْبنْ ذ أَمزْوَارُو ونِّي إِدْجَانْ إِ ثْغَارْصْثْ ن دّنْبْ ؤُشَا أَذْ إِكّسْ أَزدْجِيفْ نّسْ زِي شْوَايْثْ أَوَارْنِي يِيرِي نّسْ، مَاشَا وَارْ ث إِبطِّي مَارَّا. ^▪   ‏9 أَذْ إِرُوشّْ شْوَايْثْ ن إِذَامّنْ غَارْ ؤُغزْذِيسْ ن ؤُعَالْطَارْ ؤُشَا مِينْ إِشطّنْ زڭْ إِذَامّنْ، أَذْ ث إِژمّْ غَارْ ؤُضَارْ ن ؤُعَالْطَارْ. أَقَا-ت ذ ثَاغَارْصْثْ ن دّنْبْ.

‏10 أَذْ إِسّوْجذْ ونّغْنِي أَمْ ثْغَارْصْثْ ن وشْمَاضْ عْلَاحْسَابْ لْفَارِيضَا ؤُشَا أَكهَّانْ أَذْ خَاسْ إِفْذِي خْ دّنْبْ نّسْ إِ إِڭَّا ؤُشَا أَذْ أَسْ إِتّْوَاغْفَارْ.^▪  

‏11 مَاڒَا أَفُوسْ نّسْ وَارْ غَارسْ مِينْ إِكْفَا إِ ثْنَاينْ ن ثجْلِيلِّيحِينْ نِيغْ إِ ثْنَاينْ ن إِذْبِيرنْ إِمژْيَاننْ، خنِّي ونِّي إِخْضَانْ، أَذْ يَاوِي أَمْ ثوْهِيبْثْ نّسْ ثَاعْشَارْثْ ن إِجّْ ن إِفَا ن وَارنْ أَزْذَاذْ ذ ثَاوْهِيبْثْ ن دّنْبْ. وَارْ خَاسْ إِتّڭّْ زّشْثْ ؤُڒَا وَارْ خَاسْ إِسّْرُوسِي ڒبْخُورْ، مِينْزِي أَقَا-ت ذ ثَاغَارْصْثْ ن دّنْبْ.

‏12 أَذْ ت يَاوِي غَارْ ؤُكهَّانْ ؤُشَا أَكهَّانْ أَذْ زَّايسْ إِكْسِي إِجّْ ن وُورُو إِشُّورْ ؤُشَا أَذْ إِسّْبخَّارْ أَيَا أَمْ ڒِيذَارثْ ذَايسْ خْ ؤُعَالْطَارْ، خْ ثوْهِيبِينْ ن ثْمسِّي إِ سِيذِي. أَقَا-ت ذ ثَاغَارْصْثْ ن دّنْبْ. ^▪  

‏13 أَمُّو إِ خَاسْ إِ غَا إِفْذِي ؤُكهَّانْ خْ دّنْبْ نّسْ نِّي إِڭَّا زِي جِّيهثْ ن إِشْثنْ زِي ثْمسْڒَايِينْ-أَ ؤُشَا أَذْ أَسْ إِتّْوَاغْفَارْ. مِينْ إِشطّنْ أَذْ يِيڒِي إِ إِكهَّاننْ أَمْ مَامّشْ ث إِڭَّا ؤُكهَّانْ أَكْ-ذ ثوْهِيبْثْ ن ڒْغِيدْجثْ.“ ^▪  

‏14 إِسِّيوڒْ سِيذِي أَكْ-ذ مُوسَا، إِنَّا:

‏15 ”مَاڒَا حذْ إِڭَّا س ڒغْذَارْ ؤُشَا إِخْضَا س ؤُودَّارْ ذِي ثْمسْڒَايِينْ إِقدّْسنْ ن سِيذِي، إِتّْخصَّا أَذْ يَاوِي إِشَارِّي إِشْنَانْ قَاعْ زڭْ وُودْجِي ذ ثَاغَارْصْثْ ن ؤُمَارْوَاسْ إِ سِيذِي. أَذْ ثِيڒِي ڒْقِيمثْ نّسْ عْلَاحْسَابْ ڒْقِيمثْ إِ ثْقدَّارذْ شكْ ذڭْ إِشِيقْلنْ ن نُّوقَارْثْ عْلَاحْسَابْ أَشِيقْلْ ن زَّاوشْثْ إِقدّْسنْ. أَقَا-ث ذ ثَاغَارْصْثْ ن ؤُمَارْوَاسْ. ^▪  

‏16 زِي ثْمسْڒَايِينْ إِقدّْسنْ أَذْ يَارّْ ذِي مِينْ ذِي إِخْضَا قْبڒْ، ؤُشَا أَذْ ذَايسْ يَارْنِي ڒْخُومُوسْ. ؤُشَا أَذْ إِوْشْ مَانْ أَيَا إِ ؤُكهَّانْ ؤُشَا أَكهَّانْ أَذْ خَاسْ إِفْذِي س إِشَارِّي ن ثْغَارْصْثْ ن ؤُمَارْوَاسْ ؤُشَا أَذْ أَسْ إِتّْوَاغْفَارْ.

‏17 مَاڒَا إِخْضَا حذْ ؤُشَا إِڭَّا مِينْ إِفّْغنْ زِي مِينْ مَا زِي ثْوصَّا ن سِيذِي، مِينْ وَارْ إِتّْخصَّا أَذْ يڭّْ، ؤُشَا ثُوغَا ثْنُوفَّارْ خَاسْ، أَذْ ذَايسْ يِيڒِي ؤُمَارْوَاسْ ؤُشَا أَذْ يَارْپُو ڒْمُوعْصِييّثْ نّسْ.

‏18 أَذْ يَاوِي إِشَارِّي إِشْنَانْ قَاعْ زڭْ وُودْجِي غَارْ ؤُكهَّانْ إِ ثْغَارْصْثْ ن ؤُمَارْوَاسْ، أَذْ ثِيڒِي ڒْقِيمثْ نّسْ عْلَاحْسَابْ ڒْقِيمثْ إِ ثْقدَّارذْ شكْ ؤُشَا أَذْ خَاسْ إِفْذِي ؤُكهَّانْ إِ ؤُودَّارْ إِ ذِي إِودَّارْ أَمْ وَارْ ث إِسِّينْ ؤُشَا أَذْ أَسْ إِتّْوَاغْفَارْ.

‏19 أَقَا-ث ذ ثَاغَارْصْثْ ن ؤُمَارْوَاسْ. س ثِيذتّْ ثُوغَا ذَايسْ أَمَارْوَاسْ زَّاثْ إِ سِيذِي.“

‏20 إِسِّيوڒْ سِيذِي أَكْ-ذ مُوسَا، إِنَّا:

‏21 ”مَاڒَا إِخْضَا حذْ ؤُشَا إِغْذَارْ سِيذِي أَمْ إِسّْخَارِّيقْ خْ ؤُمْقَارّبْ نّسْ خْ مِينْ ذ أَسْ إِمّوْشنْ مَاحنْذْ أَذْ ث إِحْضَا، نِيغْ خْ مِينْ جِّينْ ذڭْ ؤُفُوسْ نّسْ، نِيغْ خْ مِينْ خَاسْ يُوشَارنْ، نِيغْ إِڭَّا شَا ن ؤُبعّجْ إِ ؤُمْقَارّبْ نّسْ، ‏22 نِيغْ ثُوغَا إِسّْخَارِّيقْ خْ شَا مِينْ إِودَّارنْ إِ شَا ن يِيجّنْ ؤُ إِتّْوَافْ زَّايسْ، ؤُشَا خنِّي نتَّا إِجِّيدْجْ ژُورْ خْ إِشْثنْ زِي مَارَّا ثِيمسْڒَايِينْ نِّي إِتّڭّْ بْنَاذمْ أَڒَامِي إِخطَّا س مَانْ أَيَا، ^▪   ‏23 خنِّي أَذْ إِمْسَارْ، ؤُمِي إِخْضَا ؤُشَا إِذْوڒْ ذَايسْ ؤُمَارْوَاسْ، أَقَا نتَّا أَذْ د-يَارّْ ثُوشفَّارْثْ نِّي يُوشَارْ، نِيغْ مِينْ إِتّْوَاكّْسنْ س ؤُغِيڒْ نِّي إِكْسِي نتَّا س ؤُغِيڒْ، نِيغْ مِينْ ثُوغَا إِحْضَا نِّي ذ أَسْ إِمّوْشنْ مَاحنْذْ أَذْ ت إِحْضَا، نِيغْ مِينْ إِودَّارنْ نِّي إِ غَا يَافْ نتَّا، ‏24 نِيغْ مَارَّا مِينْ خفْ إِجِّيدْجْ ژُورْ أَذْ د-يَارّْ ڒْقِيمثْ نّسْ ثْمُونْ ؤُشَا أَذْ يَارْنِي ڒْخُومُوسْ ؤُشَا أَذْ ث إِوْشْ إِ ونِّي ؤُمِي د-ثُوسَا ذڭْ وَاسّْ ن ثْغَارْصْثْ نّسْ ن ؤُمَارْوَاسْ.

‏25 نتَّا أَذْ يَاوِي ثَاغَارْصْثْ نّسْ ن ؤُمَارْوَاسْ غَارْ سِيذِي، إِجّْ ن إِشَارِّي إِشْنَانْ قَاعْ زڭْ وُودْجِي، ونِّي ڒْقِيمثْ نّسْ أَذْ ثِيڒِي عْلَاحْسَابْ ڒْقِيمثْ إِ ثْقدَّارذْ شكْ ؤُشَا أَذْ ثِيڒِي ذ ثَاغَارْصْثْ ن ؤُمَارْوَاسْ، ؤُشَا أَذْ ث يَاوِي غَارْ ؤُكهَّانْ. ‏26 خنِّي أَذْ خَاسْ إِفْذِي ؤُكهَّانْ زَّاثْ إِ وُوذمْ ن سِيذِي ؤُشَا ڭُّورْ أَذْ أَسْ إِتّْوَاغْفَارْ خْ مِينْ إِڭَّا، مَاڒَا إِذْوڒْ ذَايسْ أَمَارْوَاسْ س إِشْثْ ن ثْمسْڒَاشْثْ زِي مَارَّا ثِيمسْڒَايِينْ-أَ.“