‏1 ”مَاڒَا حذْ إِسّْقَارّبْ-د ثَاوْهِيبْثْ ن ڒْغِيدْجثْ غَارْ سِيذِي، أَذْ ثِيڒِي ثوْهِيبْثْ نّسْ ن وَارنْ أَزْذَاذْ ؤُشَا أَذْ خَاسْ إِسيّبْ زّشْثْ ؤُشَا أَذْ خَاسْ إِسَّارْسْ جَّاوِي. ^▪   ‏2 أَذْ ت يَاوِي غَارْ إِحنْجِيرنْ ن هَارُونْ، إِكهَّاننْ، ؤُشَا أَذْ زَّايسْ إِكْسِي إِجّْ ن وُورُو إِشُّورْ زڭْ وَارنْ أَزْذَاذْ نِّي ؤُ زِي زّشْثْ نِّي أَكْ-ذ مَارَّا جَّاوِي، ؤُشَا أَكهَّانْ أَذْ إِسّْبخَّارْ أَيَا خْ ؤُعَالْطَارْ إِ ڒِيذَارثْ إِ ثوْهِيبْثْ نِّي، ذ ثَاوْهِيبْثْ ن ثْمسِّي، ذ ڒفْوَاحثْ إِتّْفُوحنْ إِ سِيذِي. ^▪   ‏3 مِينْ إِقِّيمنْ ن ثوْهِيبْثْ ن ڒْغِيدْجثْ أَذْ يِيڒِي إِ هَارُونْ ؤُ إِ إِحنْجِيرنْ نّسْ. أَقَا ذ أَمْقدَّاسْ قَاعْ زِي مَارَّا ثِيوْهِيبِينْ ن ثْمسِّي ن سِيذِي. ^▪  

‏4 مَاڒَا ثسْقَارّْبذْ ثَاوْهِيبْثْ إِ إِدْجَانْ ذ ثَاوْهِيبْثْ ن ڒْغِيدْجثْ ذَارْحنْ ت ذِي ثفْقُونْثْ، خنِّي أَذْ ثِيڒِي ذ ڒمْسمْنَاثْ بْڒَا أَنْثُونْ، إِخدْجْضنْ س زّشْثْ، ؤُڒَا ذ ثِيڒْفَافْ بْڒَا أَنْثُونْ تّْوَاذهْننْثْ س زّشْثْ، مَارَّا زڭْ وَارنْ أَزْذَاذْ.

‏5 مَاڒَا ثَاوْهِيبْثْ نّكْ ذ ثَاوْهِيبْثْ ن ڒْغِيدْجثْ ڭّْوِينْ ت خْ وخْذِيمْ، أَذْ ثِيڒِي ن وَارنْ ن أَزْذَاذْ بْڒَا أَنْثُونْ، خدْجْضنْ ت س زّشْثْ. ‏6 أَذْ ثنْ ثَارْژذْ ذ إِفثْوِيثنْ ؤُشَا أَذْ خَاسْ ثْسيّْبذْ زّشْثْ. أَقَا-ت ذ إِشْثْ ن ثوْهِيبْثْ ن ڒْغِيدْجثْ.

‏7 مَاڒَا ثَاوْهِيبْثْ نّكْ ذ ثَاوْهِيبْثْ ن ڒْغِيدْجثْ ڭّْوِينْ ت ذِي طَّاجِّينْ، أَذْ ثِيڒِي ثوْجذْ س وَارنْ أَزْذَاذْ أَكْ-ذ زّشْثْ. ‏8 ثَاوْهِيبْثْ ن ڒْغِيدْجثْ إِ زَّايْسنْ إِوجْذنْ، أَذْ ت ثَاوْيذْ غَارْ سِيذِي. بْنَاذمْ أَذْ زَّايسْ د-إِقَارّبْ غَارْ ؤُكهَّانْ ؤُشَا وَانِيثَا أَذْ ت يَاوِي غَارْ ؤُعَالْطَارْ. ‏9 أَذْ إِكْسِي ؤُكهَّانْ زِي ثوْهِيبْثْ ن ڒْغِيدْجثْ إِ ڒِيذَارثْ ؤُشَا أَذْ ت إِسّْبخَّارْ خْ ؤُعَالْطَارْ، أَقَا ذ ثَاوْهِيبْثْ ن ثْمسِّي، ذ ڒفْوَاحثْ إِتّْفُوحنْ إِ سِيذِي.

‏10 مِينْ إِقِّيمنْ ن ثوْهِيبْثْ ن ڒْغِيدْجثْ أَذْ يِيڒِي إِ هَارُونْ ؤُ إِ إِحنْجِيرنْ نّسْ. أَقَا-ث ذ أَمْقدَّاسْ قَاعْ زِي ثوْهِيبِينْ ن ثْمسِّي ن سِيذِي.

‏11 ؤُڒَا ذ إِشْثْ ن ثوْهِيبْثْن ڒْغِيدْجثْ أَذْ زَّايسْ د-ثْقَارّْبمْ غَارْ سِيذِي وَارْ ثتِّيڒِي ثوْجذْ س ونْثُونْ، مَاغَارْ زِي مِينْ مَا ن ونْثُونْ ذ زِي مِينْ مَا ثَامّنْثْ، وَارْ زَّايسْ ثسّْبخَّارَامْ شَا ؤُڒَا ذ إِشْثْ ن ثوْهِيبْثْ ن ثْمسِّي إِ سِيذِي.

‏12 أَذْ د-ثسّْقَارّْبمْ ثَاوْهِيبْثْ ن ؤُسُوفّغْ أَمزْوَارُو ن صَّابثْ غَارْ سِيذِي، مَاشَا نِيثْنِي وَارْ زمَّارنْ أَذْ سّْبخَّارنْ ثَاوْهِيبْثْ-أَ خْ ؤُعَالْطَارْ أَمْ ڒفْوَاحثْ إِتّْفُوحنْ إِ سِيذِي. ^▪  

‏13 كُوڒْ ثَاوْهِيبْثْ ن ثوْهِيبْثْ ن ڒْغِيدْجثْ نّكْ أَذْ ثِيڒِي ثْمدْجْحذْ س ثْمدْجَاحْطْ. ثَامدْجَاحْثْ ن ڒْعَاهْذْ ن أَربِّي نّكْ وَارْ ثْزمَّارْ أَذْ ثنْقسْ غَارْ ثوْهِيبْثْ ن ڒْغِيدْجثْ نّكْ. أَذْ ثْقدّْمذْ ثَامدْجَاحْثْ غَارْ كُوڒْ ثَاوْهِيبْثْ نّكْ. ^▪  

‏14 مَاڒَا ثْقَارّْبذْ-د غَارْ سِيذِي س ثوْهِيبْثْ ن ثْمنْزُوثْ ن ڒْغِيدْجثْ، أَذْ د-ثْقَارّْبذْ س ثوْهِيبْثْ ن ڒْغِيدْجثْ زِي ثْمنْزُوثْ نّكْ زِي ثِيذْرِينْ يِيوْضنْ، ثِينِّي إِتّْوَافَارنْ خْ ثْمسِّي، ڒْحبّْ أَزِيزَا إِبَارْينْ.

‏15 أَذْ خَاسْ ثْسيّْبذْ زّشْثْ ؤُ أَذْ خَاسْ ثسَّارْسذْ جَّاوِي، أَقَا-ث ذ ثَاوْهِيبْثْ ن ڒْغِيدْجثْ.

‏16 خنِّي أَذْ إِسّْبخَّارْ ؤُكهَّانْ إِشْثْ ن ڒِيذَارثْ زِي ڒْحبّْ إِبَارْينْ ؤُ زِي زّشْثْ نّسْ أَكْ-ذ مَارَّا جَّاوِي نّسْ. أَقَا-ت ذ ثَاوْهِيبْثْ ن ثْمسِّي إِ سِيذِي.“