‏1 أَوَارْنِي ڒَامِي عْذُونْ ثْنَاينْ ن إِسڭّْوُوسَا يُورْجَا فِيرْعُونْ أَقَا نتَّا زعْمَا إِبدّْ خْ يغْزَارْ ن نِيلْ. ‏2 خْزَارْ، ڭعّْذنْثْ-إِ-د سبْعَا ن ثْينْذُوزِينْ زڭْ يغْزَارْ، صبْحنْثْ إِ ڒْخزْرَاثْ ؤُ عمَّارنْثْ س ويْسُومْ، هدَّانْثْ جَارْ وحْثِيشْ ن ؤُغَانِيمْ. ‏3 ؤُ خْزَارْ، سبْعَا ن ثْينْذُوزِينْ نّغْنِي ڭعّْذنْثْ-إِ-د أَوَارْنِي أَسنْثْ زڭْ يغْزَارْ. نِيثنْثِي وَارْ حْڒِينْثْ إِ ڒْخزْرَاثْ، أَقَا كُّوشّْضنْثْ ؤُشَا بدّنْثْ زَّاثْ إِ ثْينْذُوزِينْ نّغْنِي غَارْ ثْمَا ن يغْزَارْ. ‏4 ثِيفُونَاسِينْ إِ وَارْ إِحْڒِينْ إِ ڒْخژْرَاثْ، ثِينِّي إِكُوشّْضنْ، صَارْضنْثْ سبْعَا ن ثْينْذُوزِينْ إِصبْحنْ إِ ڒْخزْرَاثْ ثِينِّي صحّنْثْ. ؤُشَا إِفَاقْ-د فِيرْعُونْ.

‏5 إِطّصْ عَاوذْ ؤُشَا يُورْجَا ثْوَاڒَا نّغْنِي، ؤُ خْزَارْ، زڭْ إِشْثْ ن ثْسطَّا ڭعّْذنْثْ سبْعَا ن ثذْرِينْ شُّورنْثْ، شْنَانْثْ. ‏6 ؤُ خْزَارْ، أَوَارْنِي أَسنْثْ غمْينْثْ-إِ-د سبْعَا ن ثِيذْرِينْ قُّوسْبَارنْثْ، إِسّْشمْضْ إِ-ثنْثْ ؤُسمِّيضْ أَشَارْقِي. ‏7 سبْعَا ن ثذْرِينْ ثِيزْذَاذِينْ صَارْضنْثْ سبْعَا ن ثذْرِينْ نِّي إِيْمَانْ إِشُّورنْ. ؤُشَا إِفَاقْ-د فِيرْعُونْ، ؤُ خْزَارْ، أَقَا ذ إِشْثْ ن ثرْجِيثْ.

‏8 غَارْ ضّْبحْ إِبَانْ-د بلِّي بُوحْبڒْ نّسْ إِنّهْوڒْ ؤُشَا إِسّكّْ مَاحنْذْ أَذْ د-ڒَاغَانْ إِ مَارَّا ثَارْوَا ن ثْسحَّارْثْ ن مِيصْرَا ؤُ إِ مَارَّا إِمِيغِيسنْ. إِعَاوْذْ أَسنْ فِيرْعُونْ ثَارْجِيثْ نّسْ، مَاشَا وَارْ ذِينْ ثُوغِي حذْ إِزمَّارْ أَذْ ت إِفسَّارْ إِ فِيرْعُونْ. ‏9 إِسِّيوڒْ  ؤُمقّْرَانْ ن إِوَارَّاذنْ أَكْ-ذ فِيرْعُونْ، إِنَّا: ”ذڭْ وَاسّْ-أَ أَذْ تّْوَاسْعقّْڒغْ خْ دّْنُوبْ إِنُو.

‏10 ؤُمِي إِفُّوڭمْ فِيرْعُونْ خْ إِمْسخَّارنْ نّسْ، إِڭَّا أَيِي ذِي ڒحْبسْ ذِي ثَادَّارْثْ ن ڒْقبْطَانْ ن إِعسَّاسنْ ن أَرِّيمثْ، أَمْ نشّْ أَمْ ؤُمقّْرَانْ ن إِخبَّازنْ.

‏11 نشّْ ذ نتَّا نُورْجَا إِشْثْ ن ثَارْجِيثْ ذِي دْجِيرثْ ذ إِشْثْ. كُوڒْ إِجّْ زَّايْنغْ يُورْجَا ثَارْجِيثْ نّسْ س ڒْمعْنَا نّسْ. ^▪  

‏12 ثُوغَا ذِينْ أَكِيذْنغْ إِجّْ ن ؤُبْڒِيغْ ذ أَعِيبْرَانِي. ثُوغَا-ث ذ أَمْسخَّارْ ن ڒْقبْطَانْ ن إِعسَّاسنْ ن أَرِّيمثْ. نْحَاجَا أَسْ ثِيرْجَا نّغْ ؤُشَا إِفسَّارْ أَنغْ ثنْثْ. إِ كُوڒْ إِجّْ زَّايْنغْ إِفسَّارْ أَسْ ثَارْجِيثْ نّسْ.

‏13 أَمْ مَامّشْ ثنْثْ إِفسَّارْ، أَمنِّي إِ إِمْسَارْ. أَقَا فِيرْعُونْ يَارَّا أَيِي نشّْ غَارْ ڒْخذْمثْ إِنُو ؤُ ونّغْنِي يُويڒْ إِ-ث.“

‏14 إِسّكّْ فِيرْعُونْ حِيمَا أَذْ د-ڒَاغَانْ خْ يُوسُوفْ ؤُشَا سُّوفّْغنْ ث-إِ-د ذغْيَا زڭْ وحْفُورْ ن إِمحْبَاسْ. إِحفّْ أَشوَّافْ، إِبدّڒْ أَرُّوضْ ؤُشَا أَمُّو إِ يُوذفْ غَارْ فِيرْعُونْ. ^▪  

‏15 إِنَّا فِيرْعُونْ إِ يُوسُوفْ: ”نشّْ ؤُرْجِيغْ إِشْثْ ن ثَارْجِيثْ، وَارْ إِدْجِي وِي ت غَا إِفسَّارنْ. مَاشَا أَقَا سْڒِيغْ خَاكْ بلِّي شكْ، خْمِي إِ غَا ثسْڒِيذْ إِ ثَارْجِيثْ، ثْزمَّارذْ أَذْ ت ثْفسَّارذْ.“

‏16 يَارَّا يُوسُوفْ خْ فِيرْعُونْ، إِنَّا: ”وَارْ إِدْجِي شَا زَّايِي، مَاشَا أَربِّي أَذْ يَارّْ خْ مَامّشْ إِ غَا إِذْوڒْ ؤُمدُّورْ ن فِيرْعُونْ.“

‏17 إِنَّا فِيرْعُونْ إِ يُوسُوفْ: ”ذِي ثَارْجِيثْ إِنُو ژْرِيغْ إِخفْ إِنُو بدّغْ خْ ثْمَا ن إِغْزَارْ.

‏18 أَقَا ڭعّْذنْثْ-إِ-د سبْعَا ن ثْينْذُوزِينْ زڭْ يغْزَارْ، عمَّارنْثْ س ويْسُومْ ؤُ صبْحنْثْ إِ ڒْخزْرَاثْ، هدَّانْثْ جَارْ وحْثِيشْ ن ؤُغَانِيمْ.

‏19 أَوَارْنِي أَسنْثْ سبْعَا ن ثْينْذُوزِينْ نّغْنِي ڭعّْذنْثْ-إِ-د. ثُوغَا كُّوشّْضنْثْ ؤُ وَارْ حْڒِينْثْ ذڭْ وُوذمْ، ؤُژْغنْثْ. أَمُّو وَارْ حْڒِينْثْ عمَّارْصْ وَارْ ثنْثْ ژْرِيغْ ذِي ثمُّورْثْ ن مِيصْرَا أَمْ ثكْمڒْ. ‏20 ثِيينْذُوزِينْ نِّي يُوژْغنْ، وَارْ إِحْڒِينْ سَارْضنْثْ سبْعَا ن ثْينْذُوزِينْ ثِيمزْوُورَا إِصحّنْ. ‏21 ؤُمِي ؤُذْفنْثْ ثِينَا ذڭْ ؤُعذِّيسْ نْسنْثْ، وَارْ د أَسْ أَرِّينْ ڒْبَاڒْ، بلِّي أَقَا ؤُذْفنْثْ ذڭْ ؤُعذِّيسْ نْسنْثْ، أَقَا قِّيمنْثْ وَارْ حْڒِينْثْ إِ ڒْخزْرَاثْ أَمْ قْبڒْ. خنِّي فَاقغْ. ‏22 عَاوذْ ژْرِيغْ ذِي ثَارْجِيثْ إِنُو، ؤُ خْزَارْ، زڭْ إِشْثْ ن ثْسطَّا فّْغنْثْ-إِ-د سبْعَا ن ثِيذْرِينْ شُّورنْثْ ؤُ شْنَانْثْ. ‏23 خْزَارْ، ژْرِيغْ، ڭعّْذنْثْ-إِ-د سبْعَا ن ثِيذْرِينْ قُّوسْبَارنْثْ، ؤُژْغنْثْ، إِسّْشمْضْ إِ-ثنْثْ ؤُسمِّيضْ أَشَارْقِي. ‏24 ؤُ سبْعَا ن ثِيذْرِينْ يُوژْغنْ، صَارْضنْثْ سبْعَا ن ثِيذْرِينْ نِّي إِشْنَانْ. نِّيغْ ث إِ ثَارْوَا ن ثْسحَّارْثْ، مَاشَا وَارْ ذِينْ ثُوغِي حذْ إِ إِزمَّارنْ أَذْ إِفسَّارْ ثَارْجِيثْ-أَ.“

‏25 يَارَّا يُوسُوفْ خْ فِيرْعُونْ: ”ثَارْجِيثْ ن فِيرْعُونْ ذ إِشْثْ. أَربِّي إِبيّنْ إِ فِيرْعُونْ مِينْ إِڭُّورْ أَذْ إِڭّْ. ‏26 سبْعَا ن ثْينْذُوزِينْ نِّي إِشْنَانْ أَقَا أَثنْثْ ذ سبْعَا ن إِسڭّْوُوسَا. ؤُشَا ثِيذْرِينْ إِشْنَانْ ذ سبْعَا ن إِسڭّْوُوسَا. ذ ثَارْجِيثْ ذ إِشْثْ. ‏27 سبْعَا ن ثْينْذُوزِينْ نِّي يُوژْغنْ وَارْ إِحْڒِينْ ثِينِّي د-يُوڒْينْ أَوَارْنِي أَسنْثْ ذ سبْعَا ن إِسڭّْوُوسَا، ؤُ سبْعَا ن ثِيذْرِينْ قُّوسْبَارنْثْ، ثِينِّي إِسّشْمْضْ ؤُسمِّيضْ أَشَارْقِي، أَقَا أَثنْثْ ذ سبْعَا ن إِسڭّْوُوسَا إِ ذِي غَا يِيڒِي ڒَاژْ. ‏28 ذ وَا ذ أَوَاڒْ إِ نِّيغْ إِ فِيرْعُونْ. مِينْ إِ غَا يڭّْ أَربِّي، أَقَا إِسّْشنْ إِ-ث إِ فِيرْعُونْ. ‏29 خْزَارْ، ذِي سبْعَا ن إِسڭّْوُوسَا إِ د-إِڭُّورنْ أَذْ ثِيڒِي ثْيَاوَانْثْ ثَامقّْرَانْثْ خْ مَارَّا ثَامُّورْثْ ن مِيصْرَا. ‏30 أَوَارْنِي أَسنْ أَذْ د-أَسنْ سبْعَا ن إِسڭّْوُوسَا ن ڒَاژْ. ذِي مَارَّا ثَامُّورْثْ ن مِيصْرَا أَذْ تُّونْ مَارَّا ثْيَاوَانْثْ ؤُشَا ڒَاژْ أَذْ إِثحَّا ثَامُّورْثْ. ‏31 ؤُشَا ثْيَاوَانْثْ وَارْ ثتِّيڒِي ثتّْوَاسّنْ عَاذْ زِي سِّيبّثْ ن ڒَاژْ إِ ث-إِ-د-إِضْفَارنْ، مَاغَارْ ڒْحَاڒْ أَذْ يِيڒِي إِقْسحْ أَطَّاسْ. ‏32 عْلَاحْسَابْ طّْبِيعثْ ن ثْنَاينْ ن وُوذْمَاونْ ن ثُورْجَا ن فِيرْعُونْ، أَقَا ثْنَاينْ ن ثْسقَّارْ، أَقَا مَانْ أَيَا س مِينْزِي يُورَا ث أَربِّي نِيشَانْ ؤُ أَربِّي أَقَا أَذْ ت يڭّْ ذغْيَا. ‏33 أجّْ فِيرْعُونْ ڒخُّو أَذْ يَارْزُو خْ ورْيَازْ س ڒفْهَامثْ ذ ثِيغِيثْ مَاحنْذْ أَذْ ث إِڭّْ خْ ثمُّورْثْ ن مِيصْرَا. ‏34 أجّْ فِيرْعُونْ أَذْ إِڭّْ أَمُّو: أجّْ إِ-ث أَذْ إِڭّْ إِمحْضَاينْ خْ ثمُّورْثْ مَاحنْذْ أَذْ كْسِينْ ڒخْمُوسْ ن ڒْغِيدْجثْ ن ثمُّورْثْ ن مِيصْرَا ذِي سبْعَا ن إِسڭّْوُوسَا ن ثْيَاوَانْثْ. ^▫   ‏35 أجّْ إِ-ثنْ أَذْ سّْمُوننْ مَارَّا ڒعْوتْشْ ذڭْ إِسڭّْوُوسَا إِصبْحنْ إِ د غَا يَاسنْ ؤُشَا أَذْ خمّْڒنْ إِمنْذِي سَاذُو ؤُفُوسْ ن فِيرْعُونْ مَاحنْذْ أَذْ ث خمّْڒنْ ذ مَاشَّا ذِي ثْندَّامْ. ‏36 أَذْ يِيڒِي ذ ڒخْزنْ ن مَاشَّا إِ ثمُّورْثْ إِ سبْعَا ن إِسڭّْوُوسَا ن ڒَاژْ نِّي د غَا إِوْضَانْ خْ ثمُّورْثْ ن مِيصْرَا حِيمَا ثَامُّورْثْ وَارْ ثتّْمتِّي شَا س ڒَاژْ.“

‏37 أَوَاڒنْ-أَ بَاننْ-د ذ لمْلِيحْ إِ فِيرْعُونْ ذ مَارَّا إِمْسخَّارنْ نّسْ. ^▪  

‏38 خنِّي إِنَّا فِيرْعُونْ إِ إِمْسخَّارنْ نّسْ: ”مَا إِزمَّارْ أَذْ إِتّْوَافْ شَا ن ورْيَازْ أَمشْنَاوْ وَا إِ ذِي إِزدّغْ أَرُّوحْ ن أَربِّي؟“ ^▪   ‏39 ؤُشَا إِنَّا فِيرْعُونْ إِ يُوسُوفْ: ”ؤُمِي أَربِّي إِمّڒْ أَشْ-د مَارَّا أَيَا، خْ ؤُيَا وَارْ ذِينْ يدْجِي ونِّي غَارْ إِدْجْ ڒفْهَامثْ ذ ثِيغِيثْ أَمشْنَاوْ شكْ. ‏40 شكْ أَذْ ثِيڒِيذْ خْ ثَادَّارْثْ إِنُو ؤُ إِ وَاوَاڒْ نّكْ أَذْ إِطَاعْ ڒْڭنْسْ إِنُو مَارَّا. مْغِيرْ خْ ڒْعَارْشْ وَاهَا أَذْ إِڒِيغْ نشّْ ذ أَمقّْرَانْ خَاكْ.“ ^▪   ‏41 يَارْنِي إِنَّا فِيرْعُونْ إِ يُوسُوفْ: ”خْزَارْ، ڭِّيغْ شكْ خْ مَارَّا ثَامُّورْثْ ن مِيصْرَا.“ ‏42 ؤُشَا إِكّسْ فِيرْعُونْ ثَاخَاذنْثْ نّسْ زڭْ ؤُفُوسْ نّسْ، إِڭَّا إِ-ت ذڭْ ؤُفُوسْ ن يُوسُوفْ ؤُشَا إِسّْيَارْضْ أَسْ أَرُّوضْ ن ڒقْطنْ أَزْذَاذْ ؤُشَا إِڭَّا أَسْ ثَاسدّشْثْ ن وُورغْ ذڭْ يِيرِي نّسْ. ‏43 إِسّنْيَا إِ-ث ذِي ثْكَارُّوسْثْ وِيسّْ ثْنَاينْ إِ ثُوغَا غَارسْ ؤُشَا ڒَاغَانْ أَمْ ڭُّورنْ زَّاثسْ: ”قوْسمْ!“ أَمُّو إِ ث إِقدّمْ مَارَّا إِ ثْمُّورْثْ ن مِيصْرَا. ‏44 إِنَّا فِيرْعُونْ إِ يُوسُوفْ: ”نشّْ ذ فِيرْعُونْ، بْڒَا شكْ ؤُڒَا ذ إِجّْ مَا أَذْ إِڭعّذْ أَفُوسْ نّسْ نِيغْ أَضَارْ نّسْ ذِي مَارَّا ثمُّورْثْ ن مِيصْرَا.“ ‏45 إِڒَاغَا فِيرْعُونْ إِ يُوسُوفْ س يِيسمْ ن صَافْنَاثْ-فَاعْنِيحْ ؤُشَا إِوْشَا أَسْ أَسْنَاثْ ذ ثَامْغَارْثْ، ثنِّي ذ يدْجِيسْ ن فُوثِي-فَارَاعْ، أَكهَّانْ ن ؤُنْ. ؤُشَا إِجُوڒْ يُوسُوفْ ذِي ثمُّورْثْ ن مِيصْرَا. ‏46 ثُوغَا يُوسُوفْ ذ مِّيسْ ن ثْڒَاثِينْ ن إِسڭّْوُوسَا ڒَامِي إِبدّْ نتَّا زَّاثْ إِ فِيرْعُونْ، أَجدْجِيذْ ن مِيصْرَا، ؤُشَا إِفّغْ يُوسُوفْ زَّاثْ إِ فِيرْعُونْ ؤُشَا إِجُوڒْ خْ مَارَّا ثمُّورْثْ ن مِيصْرَا.

‏47 ؤُشَا ثسّغْمِي-د ثمُّورْثْ ذِي سبْعَا ن إِسڭّْوُوسَا س ثْيَاوَانْثْ. ^▫   ‏48 إِسّْمُونْ مَارَّا مَاشَّا ن سبْعَا ن إِسڭّْوُوسَا ن ثْيَاوَانْثْ، إِنِّي ثُوغَا ذِي ثمُّورْثْ ن مِيصْرَا ؤُشَا إِخمّڒْ مَاشَّا ذِي ثْندَّامْ. مَاشَّا ن إِيَّارنْ إِ ذ أَسْ د-إِنّْضنْ إِ كُوڒْ ثَانْذِينْثْ، إِخمّڒْ إِ-ث ذَايسْ ذَاخڒْ ذِي ثنْذِينْثْ. ‏49 يُوسُوفْ إِخمّڒْ أَطَّاسْ ن إِمنْذِي، أَنشْثْ ن إِجْذِي ن ڒبْحَارْ، أَڒَامِي وَارْ إِزمَّارْ أَذْ إِتّْوَاحْسبْ، مِينْزِي ثُوغَا-ث بْڒَا ڒحْسَابْ.

‏50 قْبڒْ مَا أَذْ د-يَاسْ ؤُسڭّْوَاسْ أَمزْوَارُو ن ڒَاژْ، مَّارنْينْ-د غَارْ يُوسُوفْ ثْنَاينْ ن إِحنْجِيرنْ إِنِّي ذ أَسْ د-ثُورُووْ أَسْنَاثْ، يدْجِيسْ ن فُوثِي-فَارَاعْ، أَكهَّانْ ن ؤُنْ. ^▪   ‏51 إِسمَّا يُوسُوفْ أَمنْزُو مَانَاسَّا، مِينْزِي إِنَّا: ”أَربِّي أَقَا إِسّتُّو أَيِي مَارَّا ثَامَارَا إِنُو ذ مَارَّا ثَادَّارْثْ ن بَابَا.“ ^▫   ‏52 وِيسّْ ثْنَاينْ إِسمَّا ث إِفْرَايِيمْ، مِينْزِي، إِنَّا: ”أَربِّي إِڭَّا أَيِي س ڒْغِيدْجثْ ذِي ثمُّورْثْ ن ڒحْصَارثْ إِنُو.“ ^▫  

‏53 خنِّي كمّْڒنْ سبْعَا ن إِسڭّْوُوسَا ن ؤُفيّضْ ن ڒْغِيدْجثْ نِّي إِكِّينْ خْ ثمُّورْثْ ن مِيصْرَا. ‏54 ؤُشَا بْذَانْ أَذْ د-أَسنْ سبْعَا ن إِسڭّْوُوسَا ن ڒَاژْ، أَمْ مَامّشْ خَاسْ إِسِّيوڒْ يُوسُوفْ. ثُوغَا ڒَاژْ ذِي مَارَّا ثِيمُّورَا، مَاشَا ذِي مَارَّا ثَامُّورْثْ ن مِيصْرَا ثُوغَا ذَايسْ عَاذْ أَغْرُومْ. ^▪   ‏55 أَڒَامِي ثُوغَا ڒَاژْ ذِي مَارَّا ثَامُّورْثْ ن مِيصْرَا، إِسْغُويّْ ڒْڭنْسْ غَارْ فِيرْعُونْ خْ وغْرُومْ. ؤُشَا إِنَّا فِيرْعُونْ إِ مَارَّا إِمِيصْرِييّنْ: ”رُوحمْ غَارْ يُوسُوفْ، ڭّمْ مِينْ ذ أَومْ غَا يِينِي!“ ‏56 أَڒَامِي ثُوغَا ڒَاژْ إِزدْجعْ خْ مَارَّا ثَامُّورْثْ، يَارْزمْ يُوسُوفْ خْ مَارَّا مِينْ ثُوغَا إِخمّڒْ ؤُشَا إِزّنْزْ إِ-ث إِ إِمِيصْرِييّنْ، مِينْزِي ثُوغَا ڒَاژْ إِذْوڒْ إِمْغَارْ ذِي ثمُّورْثْ ن مِيصْرَا. ‏57 زِي مَارَّا ثِيمُّورَا ؤُسِينْ-د إِوْذَانْ غَارْ مِيصْرَا غَارْ يُوسُوفْ حِيمَا أَذْ سْغنْ، مِينْزِي ذِي مَارَّا ثِيمُّورَا ثُوغَا ڒَاژْ إِمْغَارْ أَطَّاسْ.