‏1 خنِّي إِبَاركْ أَربِّي نُوحْ ذ إِحنْجِيرنْ نّسْ ؤُشَا إِنَّا أَسنْ: ”جّمْ-د ڒْغِيدْجثْ، مَارنْيمْ ؤُ عمَّارمْ ثَامُّورْثْ! ^▪   ‏2 ثِيڭّْوُوذِي ذ ڒْعُورّثْ زِي كنِّيوْ أَذْ إِڒِينْثْ خْ مَارَّا ڒْمَاڒْ ن ڒخْڒَا، خْ مَارَّا إِجْضَاضْ ن ؤُجنَّا ؤُ خْ مَارَّا مِينْ إِتّْپُوعنْ خْ ثمُّورْثْ ؤُ خْ مَارَّا إِسڒْمَانْ ن ڒبْحَارْ: أَقَا مّوْشنْ ذڭْ ؤُفُوسْ نْومْ. ‏3 مَارَّا مِينْ إِتّْپُوعنْ، مِينْ إِدَّارنْ، أَذْ أَومْ يِيڒِي ذ مَاشَّا. نشّْ أَذْ أَومْ ث وْشغْ مَارَّا، أَمْ ذ أَومْ وْشِيغْ ؤُڒَا ذ أَفْسُو أَزِيزَا، ^▪   ‏4 مَاشَا دَّاثْ أَكْ-ذ بُوحْبڒْ نّسْ إِ إِدْجَانْ ذ إِذَامّنْ نّسْ، وَارْ ث تّتّمْ. ^▪   ‏5 ذ ثِيذتّْ أَذْ تَّارغْ إِذَامّنْ نْومْ ن ڒعْمُورْ نْومْ، أَذْ ثنْ تَّارغْ زڭْ إِفَاسّنْ ن مَارَّا إِمُودَّارنْ، ؤُڒَا زڭْ إِفَاسّنْ ن بْنَاذمْ، ؤُ زڭْ إِفَاسّنْ ن ؤُمَاسْ ن كُوڒْ بْنَاذمْ أَذْ تَّارغْ ڒعْمَارْ ن بْنَاذمْ. ^▪   ‏6 وِي إِ غَا إِسِّيزّْڒنْ إِذَامّنْ ن بْنَاذمْ، إِذَامّنْ نّسْ أَذْ ثنْ سِّيزّْڒنْ س ؤُفُوسْ ن بْنَاذمْ، مِينْزِي أَربِّي إِڭَّا بْنَاذمْ ذِي صِّيفثْ نّسْ. ^▪   ‏7 ؤُ كنِّيوْ، جّمْ-د ڒْغِيدْجثْ، إِڒِيمْ ذ وَاطَّاسْ، مْطَارّْشمْ ذِي ثمُّورْثْ ؤُشَا إِڒِيمْ ذڭْ وَاطَّاسْ خَاسْ.“ ^▪  

‏8 ؤُشَا إِسِّيوڒْ أَربِّي أَكْ-ذ نُوحْ ذ إِحنْجِيرنْ نّسْ نِّي غَارسْ، إِنَّا: ‏9 ”نشّْ، خْزَارْ نشّْ تّڭّغْ ڒْعَاهْذْ إِنُو أَكِيذْومْ ؤُ أَكْ-ذ زَّارِيعثْ نْومْ أَوَارْنِي أَومْ ^▪  

‏10 ؤُ أَكْ-ذ مَارَّا بُوحْبڒْ إِدَّارنْ نِّي إِدْجَانْ أَكِيذْومْ، أَكْ-ذ إِجْضَاضْ، أَكْ-ذ ڒْمَاڒْ ؤُشَا أَكْ-ذ مَارَّا ڒْمَاڒْ ن ڒخْڒَا خْ ثمُّورْثْ إِنِّي أَكِيذْومْ، وَاهْ زِي مَارَّا مِينْ د-إِفّْغنْ زڭْ ؤُغَارَّاپُو أَڒْ مَارَّا مِينْ إِدَّارنْ خْ ثمُّورْثْ.

‏11 أَذْ ڭّغْ ڒْعَاهْذْ إِنُو أَكِيذْومْ، أَقَا مَارَّا أَرَّايمْ س ڒعْمَارْ وَارْ ڭُّورْ أَذْ إِتّْوَاكّسْ عَاذْ س وَامَانْ ن سّحْڒثْ ؤُ وَارْ ڭُّورْ أَذْ ذِينْ ثِيڒِي عَاذْ سّحْڒثْ إِ غَا يَاردّْدْجنْ ثَامُّورْثْ.“

‏12 خنِّي إِنَّا أَربِّي: ”ذ ثَا أَذْ ثِيڒِي ذ ڒعْڒَامثْ ن ڒْعَاهْذْ ثنِّي إِ غَا ڭّغْ جَارْ أَيِي ذ كنِّيوْ ذ مَارَّا ڒعْمَارْ إِدَّارنْ أَكِيذْومْ، إِ مَارَّا جِّيڒَاثْ إِ ڒبْذَا.

‏13 أَذْ ڭّغْ ڒْقوْسْ إِنُو ذڭْ إِسيْنُوثنْ ؤُ وَانِيثَا أَذْ يِيڒِي ذ ڒعْڒَامثْ ن ڒْعَاهْذْ جَارْ أَيِي ذ ثمُّورْثْ.

‏14 خْمِي إِ غَا بْضِيغْ إِسيْنُوثنْ خْ ثمُّورْثْ، خنِّي ڭُّورْ أَذْ إِمْسَارْ بلِّي ڒْقوْسْ-أَ أَذْ د-إِضْهَارْ ذڭْ إِسيْنُوثنْ.

‏15 خنِّي أَذْ إِذَارغْ ڒْعَاهْذْ إِنُو جَارْ أَيِي ذ كنِّيوْ ذ مَارَّا ڒعْمَارْ إِدَّارنْ ن مَارَّا أَرَّايمْ. وَارْ د-دِّيكّْوِيڒنْ وَامَانْ ذ سّحْڒثْ عَاوذْ مَاحنْذْ أَذْ سّْغَارْقنْ مَارَّا أَرَّايمْ.

‏16 أَذْ د-إِضْهَارْ ڒْقوْسْ-أَ ذڭْ إِسيْنُوثنْ، أَذْ ث ژَترغْ أَذْ إِذَارغْ ڒْعَاهْذْ إِ ڒبْذَا جَارْ أَربِّي ذ مَارَّا ڒعْمَارْ إِدَّارنْ جَارْ مَارَّا أَرَّايمْ إِ إِدْجَانْ خْ ثمُّورْثْ.“

‏17 ؤُشَا إِنَّا أَربِّي إِ نُوحْ: ”ذ ثَا ذ ڒعْڒَامثْ ن ڒْعَاهْذْ إِنُو ونِّي إِ غَا ڭّغْ جَارْ أَيِي ذ مَارَّا أَرَّايمْ إِ إِدْجَانْ خْ ثمُّورْثْ.“

‏18 ثَارْوَا ن نُوحْ إِنِّي د-إِفّْغنْ زڭْ ؤُغَارَّاپُو ثُوغَا أَثنْ ذ شَامْ ذ حَامْ ذ يَافَاثْ. حَامْ ثُوغَا ذ بَابَاسْ ن كنْعَانْ. ^▫  ▪  

‏19 إِنَا ذ ثْڒَاثَا ن إِحنْجِيرنْ ن نُوحْ. زَّايْسنْ تّْوَابزّْعنْ إِوْذَانْ ذِي مَارَّا ثَامُّورْثْ. ‏20 إِبْذَا نُوحْ إِخدّمْ أَمْ ؤُفدْجَاحْ، إِڭَّا إِجّْ ن ؤُمَارْجُوعْ ن ؤُضِيڒْ إِژُّو ذَايسْ ثِيزَايَارِينْ. ‏21 ؤُمِي إِسْوَا بِينُو، إِسْشَارْ ؤُشَا إِعَارَّا إِخفْ نّسْ ذِي ڒْوسْثْ ن ؤُقِيضُونْ نّسْ. ‏22 إِژْرَا حَامْ، بَابَاسْ ن كنْعَانْ، ثُوعَّارْينْثْ ن بَابَاسْ ؤُشَا إِنَّا ث إِ ثْنَاينْ ن أَيْثْمَاسْ ذِي بَارَّا. ‏23 كْسِينْ شَامْ ذ يَافَاثْ شَا ن ورُّوضْ، سَّارْسنْ ث خْ ثْغَارْضِينْ نْسنْ ؤُشَا ؤُيُورنْ غَارْ ضفَّارْ، ذْڒِينْ ثُوعَّارْينْثْ ن بَابَاثْسنْ. أَرِّينْ أَغمْپُوبْ نْسنْ غَارْ ضفَّارْ، وَارْ ژْرِينْ شَا ثُوعَّارْينْثْ ن بَابَاثْسنْ. ‏24 إِفَاقْ-د نُوحْ زِي سّكْرَا نّسْ ؤُشَا إِذْوڒْ يَارْڭبْ خْ مِينْ ذ أَسْ إِڭَّا مِّيسْ أَمَاژُوژْ. ‏25 إِنَّا: ”ذ أَمنْعُوڒْ إِ يدْجْ كنْعَانْ! أَذْ يِيڒِي ذ أَمْسخَّارْ قَاعْ ن إِمْسخَّارنْ إِ أَيْثْمَاسْ!“ ‏26 ؤُشَا إِنَّا: ”أَذْ إِتّْوَابَاركْ سِيذِي، أَربِّي ن شَامْ. كنْعَانْ أَذْ يِيڒِي ذ أَمْسخَّارْ إِ نِيثْنِي. ‏27 زعْمَا أَذْ إِوسّعْ أَربِّي ثَازذِّيغْثْ إِ يَافَاثْ، إِڒِي أَذْ إِزْذغْ ذڭْ إِقِيضَانْ ن شَامْ ؤُ كنْعَانْ أَذْ أَسنْ يِيڒِي ذ أَمْسخَّارْ.“ ‏28 أَوَارْنِي إِ سّحْڒثْ إِدَّارْ نُوحْ عَاذْ ثڒْثْ-مْيَا ؤُ-خمْسِينْ ن إِسڭّْوُوسَا. ‏29 أَمُّو إِ إِدَّارْ نُوحْ ثسْعَا-مْيَا ؤُ-خمْسِينْ ن إِسڭّْوُوسَا، خنِّي إِمُّوثْ.