‏1 ڒَامِي بْذَانْ إِوْذَانْ أَذْ كْثَارنْ ذِي ثمُّورْثْ ؤُشَا ؤُرْونْثْ أَسنْ-د يسِّيثْسنْ، ^▫   ‏2 أَقَا ژْرِينْ أَرَّاونْ ن أَربِّي بلِّي يسِّيسْ ن بْنَاذمْ شْنَانْثْ ؤُشَا كْسِينْ ثِيمْغَارِينْ إِ يِيخفْ نْسنْ زِي مَارَّا ثِينِّي إِخْضَارنْ نِيثْنِي. ^▫   ‏3 خنِّي إِنَّا سِيذِي: ”وَارْ إِتّْغِيمِي أَرُّوحْ إِنُو إِتّْمنْغَا ڒبْذَا أَكْ-ذ بْنَاذمْ، أَقَا-ث ذ دَّاثْ زِي سِّيبّثْ ن ؤُودَّارْ نّسْ. أَذْ إِڒِينْ وُوسَّانْ ن ثُوذَارْثْ نّسْ مْيَا ؤُ-عِيشْرِينْ ن إِسڭّْوُوسَا.“ ^▫  

‏4 ذڭْ وُوسَّانْ نِّي ثُوغَا ’نِيفِيلِيمْ‘، ’إِنِّي إِوْضَانْ‘، ذِي ثمُّورْثْ ؤُشَا أَوَارْنِي مَانْ أَيَا عَاوذْ، ؤُمِي د-ؤُذْفنْ أَرَّاوْ ن أَربِّي غَارْ يسِّيسْ ن إِوْذَانْ ؤُشَا ؤُرْونْثْ أَسنْ-د. نِيثْنِي ذ ’جّْوَاهڒْ‘ ن زْمَانْ نِّي، ذ إِرْيَازنْ س يِيسمْ. ^▫   ‏5 إِژْرَا سِيذِي بلِّي ڒْغَارْ ن بْنَاذمْ ذ أَطَّاسْ خْ ثمُّورْثْ ؤُشَا مَارَّا ڒمْوَايَاڒْ ن ؤُخَارّصْ ن وُوڒْ نّسْ ذ أَعفَّانْ كُوڒْ أَسّْ. ^▪   ‏6 ؤُشَا إِنْذمْ سِيذِي ؤُمِي إِڭَّا بْنَاذمْ ذِي ثمُّورْثْ ؤُشَا إِقّسْ أَسْ وُوڒْ نّسْ. ‏7 إِنَّا سِيذِي: ”أَذْ مْحِيغْ خْ وُوذمْ ن ثمُّورْثْ بْنَاذمْ إِ د-خڒْقغْ، بْنَاذمْ أَكْ-ذ ڒبْهَايمْ ذ إِمُودَّارنْ إِتّْپُوعنْ ؤُڒَا ذ إِجْضَاضْ ن ؤُجنَّا، مِينْزِي نذْمغْ ؤُمِي ثنْ ڭِّيغْ.“ ‏8 مَاشَا نُوحْ يُوفَا أَرْضَا ذِي ثِيطَّاوِينْ ن سِيذِي.

‏9 إِنَا ذ إِمزْرُوينْ ن يِينِّي د-إِتّْوَاخڒْقنْ زِي نُوحْ. ثُوغَا نُوحْ ذ أَرْيَازْ ذ أَمْسڭّذْ إِكْمڒْ جَارْ مَارَّا جِّيڒَاثْ نِّي إِدَّارنْ أَكِيذسْ. يُويُورْ نُوحْ أَكْ-ذ أَربِّي. ^▪  

‏10 ؤُشَا إِجَّا-د نُوحْ ثْڒَاثَا ن إِحنْجِيرنْ: شَامْ ذ حَامْ ذ يَافَاثْ. ^▫  

‏11 ثُوغَا ثَامُّورْثْ ذ إِشْثْ ن ڒْخَارْبثْ ذِي ثِيطَّاوِينْ ن أَربِّي ؤُ ثُوغَا ثمُّورْثْ ثشُّورْ س لْعُونْفْ.

‏12 إِخْزَارْ أَربِّي غَارْ ثمُّورْثْ، ؤُ خْزَارْ، أَقَا-ت ذ ڒْخَارْبثْ، مَاغَارْ مَارَّا دَّاثْ ثُوغَا ثْخَارّبْ أَبْرِيذْ نّسْ خْ ثمُّورْثْ. ^▫  

‏13 إِنَّا أَربِّي إِ نُوحْ: ”أَنڭَّارْ ن مَارَّا دَّاثْ أَقَا-ث زَّاثْ إِ وُوذمْ إِنُو، مِينْزِي ثَامُّورْثْ ثشُّورْ س لْعُونْفْ زَّايْسنْ. أَقَا أَذْ ثنْ ثحِّيغْ أَكْ-ذ ثمُّورْثْ.

‏14 أڭّْ إِ يِيخفْ نّكْ إِجّْ ن ؤُغَارَّاپُو س ؤُكشُّوضْ ن ؤُمرْزِي ؤُشَا أڭّْ إِخَّامنْ أَمْ ڒعْشُوشْ ذڭْ ؤُغَارَّاپُو. غدْجفْ أَغَارَّاپُو زِي ذَاخڒْ ؤُ زِي بَارَّا س ثِيزفْثْ. ^▫  

‏15 أَمُّو إِتّْخصَّا أَذْ ث ثڭّذْ: ثُوزّڭَّارْثْ ن ؤُغَارَّاپُو أَذْ ثِيڒِي ثڒْثْ-مْيَا ن إِغَادْجنْ ؤُ ثِيرُو ن ؤُغَارَّاپُو أَذْ ثِيڒِي خمْسِينْ ن إِغَادْجنْ ؤُ ڒُوعْڒَا نّسْ أَذْ يِيڒِي ثْڒَاثِينْ ن إِغَادْجنْ. ^▫  

‏16 إِتّْخصَّا أَذْ ثڭّذْ إِشْثْ ن ثْپُورْجثْ إِ ثْفَاوْثْ سنّجْ إِ ؤُغَارَّاپُو ؤُشَا أَذْ ت ثْكمّْڒذْ أَنشْثْ ن إِجّْ ن ؤُغِيڒْ زِي سنّجْ. أَذْ ثڭّذْ ثَاوَّارْثْ ن ؤُغَارَّاپُو ذڭْ ؤُغزْذِيسْ نّسْ. أَذْ ثڭّذْ ثِيزدَّاغْ ن وَادَّايْ ذ ثِينِّي ن وِيسّْ ثْنَاينْ ذِي ڒْوسْثْ ذ ثِينِّي ن وِيسّْ ثْڒَاثَا سنّجْ.

‏17 أَقَا نشّْ أَذْ سّكّغْ سّحْڒثْ ن وَامَانْ خْ ثمُّورْثْ حِيمَا أَذْ ثحِّيغْ سَاذُو ؤُجنَّا مَارَّا دَّاثْ إِ ذِي إِدْجْ أَرُّوحْ ن ثُوذَارْثْ. مَارَّا مِينْ إِدْجَانْ ذِي ثمُّورْثْ أَذْ إِضْڒقْ إِ بُوحْبڒْ.

‏18 مَاشَا أَذْ سّْبدّغْ ڒْعَاهْذْ إِنُو أَكِيذكْ ؤُشَا شكْ أَذْ ثَاذْفذْ غَارْ ؤُغَارَّاپُو، شكْ ذ إِحنْجِيرنْ نّكْ ذ ثمْغَارْثْ نّكْ ذ ثمْغَارِينْ ن إِحنْجِيرنْ نّكْ أَكِيذكْ. ^▪  

‏19 ؤُشَا زِي مَارَّا مِينْ إِدَّارنْ، زِي كُوڒْ دَّاثْ، أَذْ ثسِّيذْفذْ غَارْ ؤُغَارَّاپُو ثْيُويَا، حِيمَا أَذْ دَّارنْ أَكِيذكْ: إِتّْخصَّا أَذْ يِيڒِي ذ أَوْثمْ ذ ثوْثمْثْ. ‏20 أَذْ غَاركْ د-ثَاسْ ثْيُويَا زِي مَارَّا حِيمَا أَذْ ثحْضِيذْ ثُوذَارْثْ نْسنْ: زڭْ إِجْضَاضْ عْلَاحْسَابْ مَارْكَاثْ نْسنْ، زِي ڒبْهَايمْ عْلَاحْسَابْ مَارْكَاثْ نْسنْثْ ؤُ زِي مَارَّا إِمُودَّارنْ نِّي إِتّْپُوعنْ خْ ثمُّورْثْ عْلَاحْسَابْ مَارْكَاثْ نْسنْ. ‏21 ؤُشَا شكْ، كْسِي إِ يِيخفْ نّكْ زِي مَارَّا مَاشَّا إِ إِتّْوَاشَّانْ ؤُشَا سْمُونْ إِ-ث غَاركْ، حِيمَا أَذْ أَشْ يِيڒِي ذ مَاشَّا ؤُشَا ؤُڒَا إِ نِيثْنِي.“ ‏22 ؤُشَا إِڭَّا نُوحْ أَمْ مَامّشْ مَارَّا إِ خفْ ث إِوصَّا أَربِّي، أَمُّو إِ ث إِڭَّا. ^▪