دّنْبْ أَمزْوَارُو
3
1 ثُوغَا أَفِيغَارْ ذ أَحْرَايْمِي خْ مَارَّا ڒْمَاڒْ ن ڒخْڒَا إِ إِڭَّا سِيذِي أَربِّي. إِنَّا إِ ثمْغَارْثْ: ”مَا ذ ثِيذتّْ إِنَّا أَربِّي: ’غَارْومْ وَارْ تّتّمْ شَا زِي مَارَّا ثِيشجِّيرَا ن جّنّثْ!‘؟“ 2 ثنَّا ثمْغَارْثْ إِ ؤُفِيغَارْ ”زِي ڒْغِيدْجثْ ن ثْشجِّيرَا ذِي جّنّثْ نْزمَّارْ أَذْ نشّْ، 3 مَاشَا زِي ڒْغِيدْجثْ ن ثْشجَّارْثْ نِّي ذِي ڒْوسْثْ ن جّنّثْ، إِنَّا أَربِّي: ’وَارْ زَّايسْ تّتّمْ، وَارْ ت تّْحَاذَامْ، حِيمَا وَارْ تّْمتِّيمْ.‘ “ 4 إِنَّا ؤُفِيغَارْ إِ ثمْغَارْثْ: ”كنِّيوْ وَارْ ثتّْمتِّيمْ شَا س ڒْموْثْ قَاعْ، ▪ 5 مَاشَا أَربِّي إِسّنْ بلِّي أَسّْ نِّي ذِي زَّايسْ إِ غَا ثشّمْ، أَذْ أَرْزْمنْثْ ثِيطَّاوِينْ نْومْ ؤُشَا أَذْ ثِيڒِيمْ أَمشْنَاوْ أَربِّي، أَذْ ثسّْنمْ ڒْخَارْ زِي ڒْغَارْ.“ ▪ 6 ثژْرَا ثمْغَارْثْ بلِّي ثَاشجَّارْثْ ثصْبحْ إِ مَاشَّا ؤُشَا ثعْجبْ أَسنْثْ إِ ثِيطَّاوِينْ، أَقَا ثَاشجَّارْثْ ثڭَّا ذَايسْ مژْرِي مَاحنْذْ أَذْ زَّايسْ ثذْوڒْ ذ ثَامِيغِيسْثْ. خنِّي ثكْسِي زِي ڒْغِيدْجثْ نّسْ، ثشَّا ؤُشَا ثوْشَا عَاوذْ إِ ورْيَازْ نّسْ إِ ثُوغَا أَكِيذسْ، ؤُشَا نتَّا إِشَّا. ▪ 7 نَّارْزْمنْثْ ثِيطَّاوِينْ نْسنْ ؤُشَا ؤُفِينْ إِخفْ نْسنْ ذ إِعَارْيَاننْ. خنِّي خيّْضنْ ثِيفْرَايْ ن وَارْثُو، ؤُشَا ڭِّينْ زَّايْسنْثْ ثِيبَانْثِيوِينْ إِ يِيخفْ نْسنْ. 8 خنِّي سْڒِينْ نِيثْنِي ڒْحسّْ ن سِيذِي أَربِّي إِڭُّورْ ذِي جّنّثْ زڭْ ؤُصُوضِي ن ؤُسمِّيضْ ن وَاسّْ، ؤُشَا إِفَّارْ أَذَامْ ذ ثمْغَارْثْ نّسْ زڭْ وُوذمْ ن سِيذِي أَربِّي جَارْ ثْشجِّيرَا ن جّنّثْ.
9 ؤُشَا إِڒَاغَا سِيذِي أَربِّي أَذَامْ، إِنَّا أَسْ: ”مَانِي ثدْجِيذْ؟“
10 نتَّا إِنَّا: ”سْڒِيغْ إِ ثْمِيجَّا نّكْ ذِي جّنّثْ ؤُشَا ڭّْوذغْ مِينْزِي نشّْ ذ أَعَارْيَانْ، خنِّي فَّارغْ.“ ▫
11 إِنَّا أَسْ نتَّا: ”وِي ذ أَشْ إِنَّانْ بلِّي شكْ ذ أَعَارْيَانْ؟ مَا ثشِّيذْ زِي ثْشجَّارْثْ نِّي خْ شكْ وصِّيغْ ’أَقَا أَذْ زَّايسْ ثشّذْ!‘؟“
12 إِنَّا أَذَامْ: ”ثَامْغَارْثْ نِّي ذ أَيِي ثوْشِيذْ، نتَّاثْ ثوْشَا أَيِي زِي ثْشجَّارْثْ ؤُشَا شِّيغْ.“
13 إِنَّا أَسْ سِيذِي أَربِّي إِ ثمْغَارْثْ: ”مَانَاوْيَا إِ ثڭِّيذْ؟“ ثنَّا أَسْ ثمْغَارْثْ: ”إِغَارَّا أَيِي ؤُفِيغَارْ ؤُشَا شِّيغْ.“ ▪
14 إِنَّا سِيذِي أَربِّي إِ ؤُفِيغَارْ:
”ڒَامِي ثڭِّيذْ أَيَا، أَقَا أَشْ ذ أَمنْعُوڒْ جَارْ مَارَّا ڒبْهَايمْ
ؤُ جَارْ مَارَّا ڒْمَاڒْ ن ڒخْڒَا.
خْ ؤُعذِّيسْ نّكْ أَذْ ثْمُورْذذْ،
ؤُشَا أَذْ ثشّذْ ؤُشَاڒْ مَارَّا ؤُسَّانْ ن ثُوذَارْثْ نّكْ. ▫
15 أَذْ ڭّغْ ڒعْذَاوَاثْ جَارْ أَشْ ذ ثمْغَارْثْ،
جَارْ زَّارِيعثْ نّكْ ذ زَّارِيعثْ نّسْ.
ذ ثنِّي نّسْ أَذْ ثڒْبزْ أَزدْجِيفْ نّكْ،
ؤُ شكْ أَذْ أَسْ ثْڒبْزذْ أَنِيرْزْ نّسْ.“ ▪
16 إِنَّا إِ ثمْغَارْثْ:
”أَطَّاسْ إِ غَا أَرْنِيغْ ڒحْرِيقْ ذ ڒوْجعْ ن ثَارْوَا نّمْ.
س ڒحْرِيقْ أَذْ د-ثَارْوذْ إِحنْجِيرنْ،
ؤُشَا غَارْ ورْيَازْ نّمْ أَذْ ثمّژْرذْ
مَاشَا نتَّا أَذْ خَامْ إِحْكمْ.“ ▪
17 ؤُشَا إِنَّا إِ أَذَامْ:
”مِينْزِي ثسْڒِيذْ غَارْ ثْمِيجَّا ن ثمْغَارْثْ نّكْ
ؤُ ثشِّيذْ زِي ثْشجَّارْثْ ثنِّي خْ شكْ وصِّيغْ: ’أَقَا أَذْ زَّايسْ ثشّذْ!‘،
أَذْ ثِيڒِي ثمُّورْثْ ذ نّعْڒثْ خْ سِّيبّثْ نّكْ.
س ثَامَارَا أَذْ زَّايسْ ثشّذْ مَارَّا ؤُسَّانْ ن ثُوذَارْثْ نّكْ.
18 إِسنَّاننْ ذ ثْزڭّْوَارْثْ إِ ذ أَشْ د غَا ثسّغْمِي،
ؤُشَا أَذْ ثشّذْ أَفْسُو ن ثمُّورْثْ.
19 س ثِيذِي ن ؤُغمْپُوبْ نّكْ أَذْ ثشّذْ أَغْرُومْ
أَڒْ د غَا ثْذوْڒذْ غَارْ ثمُّورْثْ إِ زِي ثمّكْسِيذْ،
مِينْزِي شكْ ذ أَشَاڒْ ؤُشَا غَارْ ؤُشَاڒْ إِ غَا د-ثْذوْڒذْ.“
20 إِڒَاغَا أَذَامْ إِسمْ ن ثمْغَارْثْ نّسْ حَاوَّا مِينْزِي نتَّاثْ ذ يمَّاسْ ن مَارَّا إِنِّي إِدَّارنْ. ▫
21 إِڭَّا سِيذِي أَربِّي إِ أَذَامْ ذ ثمْغَارْثْ نّسْ أَرُّوضْ س يِيڒمْ ؤُشَا يَارْضْ أَسنْ ث. ▪ 22 إِنَّا سِيذِي أَربِّي: ”خْزَارْ، أَذَامْ وَا أَقَا إِذْوڒْ أَمْ إِجّنْ زَّايْنغْ، إِسّنْ ڒْخَارْ ذ ڒْغَارْ. ڒخُّو، أجّْ إِ-ث وَارْ إِسّْوَاژَّاضْ أَفُوسْ نّسْ مَاحنْذْ أَذْ إِكْسِي زِي ثْشجَّارْثْ ن ثُوذَارْثْ عَاوذْ، أَذْ يشّْ ؤُ خنِّي أَذْ إِدَّارْ إِ ڒبْذَا.“ 23 ؤُشَا إِسُّوفُّوغْ إِ-ث سِيذِي أَربِّي زِي جّنّثْ ن عَاذْنْ حِيمَا أَذْ إِخْذمْ ثَامُّورْثْ إِ زِي ثُوغَا إِمّكْسِي. 24 يُوژّڒْ خْ أَذَامْ ؤُشَا إِڭَّا إِكِيرُوبنْ شَّارْقْ إِ جّنّثْ ن عَاذْنْ ذ يِيجّْ ن سِّيفْ إِتّحْذُوذُوقْ، إِتّشْضِيضِيحْ سَّا ذ سَّا إِ ؤُعسِّي خْ وبْرِيذْ غَارْ ثْشجَّارْثْ ن ثُوذَارْثْ. ▫