أَمزْوَارُو
ثَاخڒْقِيثْ ن ؤُجنَّا ذ ثمُّورْثْ
1
‏1 ذڭْ ؤُمزْوَارُو إِخْڒقْ-د أَربِّي إِجنْوَانْ ذ ثمُّورْثْ.
‏2 ثُوغَا ثَامُّورْثْ ثخْڒَا ؤُ ثخْوَا ؤُ خْ وُوذمْ ن وَامَانْ يُودْجْغنْ ثَادْجسْثْ ؤُ أَرُّوحْ ن أَربِّي ثُوغَا إِتّْرَاحْ إِتَّاسْ-د خْ وُوذمْ ن وَامَانْ.
 
‏3 ؤُشَا إِنَّا أَربِّي: ”أَذْ ثِيڒِي ثْفَاوْثْ“، ؤُشَا ثُوسَا-د ثْفَاوْثْ!    ‏4 إِژْرَا أَربِّي بلِّي ثَافَاوْثْ ثصْبحْ ؤُشَا إِبْضَا أَربِّي جَارْ ثْفَاوْثْ ذ ثَادْجسْثْ. ‏5 إِڒَاغَا أَربِّي ثَافَاوْثْ ’أَزِيڒْ‘ ؤُ ’ثَادْجسْثْ‘ إِڒَاغَا أَسْ ’دْجِيڒثْ‘. ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ أَمزْوَارُو.
 
‏6 ؤُشَا إِنَّا أَربِّي: ”أَذْ ثِيڒِي إِشْثْ ن ڒْْقُوبّثْ ذِي ڒْْوسْثْ ن وَامَانْ، أَذْ ثبْضَا أَمَانْ خْ وَامَانْ!“ ‏7 أَربِّي إِڭَّا ڒْْقُوبّثْ ن ؤُجنَّا ؤُشَا إِبْضَا أَمَانْ إِ إِدْجَانْ سْوَادَّايْ إِ ڒْْقُوبّثْ خْ وَامَانْ إِ إِدْجَانْ سنّجْ إِ ڒْْقُوبّثْ. ؤُشَا أَمُّو إِ ثمْسَارْ. ‏8 إِڒَاغَا أَربِّي إِ ڒْْقُوبّثْ ’أَجنَّا‘. ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ثْنَاينْ.
 
‏9 ؤُشَا إِنَّا أَربِّي: ”أَذْ مُوننْ وَامَانْ إِ إِدْجَانْ سْوَادَّايْ إِ ؤُجنَّا غَارْ إِجّنْ ومْشَانْ مَاحنْذْ أَذْ د-إِبَانْ ڒْْبَارّْ!“ ؤُشَا أَمُّو إِ ثمْسَارْ.
‏10 إِڒَاغَا أَربِّي إِ ڒْْبَارّْ ’ثَامُّورْثْ‘ ؤُ أَمُونِي ن وَامَانْ إِڒَاغَا أَسْ ’ڒبْحُورْ‘. ؤُشَا إِژْرَا أَربِّي بلِّي مَانْ أَيَا إِصْبحْ.   
‏11 ؤُشَا إِنَّا أَربِّي: ”أَذْ د-ثسّغْمِي ثمُّورْثْ أَغمُّويْ أَزِيزَا: أَفْسُو أَزِيزَا إِ إِزَارّْعنْ زَّارِيعثْ ذ ثْشجِّيرَا س فْرُوثَا إِ ذ إِتِّيشنْ فْرُوثَاثْ أَمشْنَاوْ مَارْكَا نْسنْثْ س زَّارِيعثْ نْسنْثْ ذَايسْ خْ وُوذمْ ن ثمُّورْثْ!“ ؤُشَا أَمُّو إِ ثمْسَارْ.
‏12 ثسّغْمِي-د ثمُّورْثْ أَغمُّويْ أَزِيزَا: أَفْسُو أَزِيزَا إِ إِزَارّْعنْ زَّارِيعثْ أَمشْنَاوْ مَارْكَا نّسْ ذ ثْشجِّيرَا إِ د إِتِّيشنْ ڒْْغِيدْجثْ أَمشْنَاوْ مَارْكَا نْسنْثْ س زَّارِيعثْ نْسنْثْ ذَايسْ. ؤُشَا إِژْرَا أَربِّي بلِّي مَانْ أَيَا إِصْبحْ.
‏13 ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ثْڒَاثَا.
 
‏14 ؤُشَا إِنَّا أَربِّي: ”أَذْ ذِينْ إِڒِينْثْ ثْفَاوِينْ ذِي ڒْْقُوبّثْ ن ؤُجنَّا حِيمَا أَذْ بْضَانْثْ جَارْ وَاسّْ ذ دْجِيڒثْ، أَذْ إِڒِينْثْ ذ ڒِْيمَارَاثْ ذ وُوسَّانْ إِتّْوَاڭّنْ ذ وُوسَّانْ ذ إِسڭّْوُوسَا
‏15 ؤُشَا أَذْ إِڒِينْثْ ذ ثِيفَاوِينْ ذِي ڒْْقُوبّثْ ن ؤُجنَّا حِيمَا أَذْ وْشنْثْ ثَافَاوْثْ خْ ثمُّورْثْ!“ ؤُشَا أَمُّو إِ ثمْسَارْ.
‏16 إِڭَّا أَربِّي ثْنَاينْ ن ثْفَاوِينْ مْغَارنْثْ: ثَافَاوْثْ ثَامقّْرَانْثْ حِيمَا أَذْ ثحْكمْ خْ وَاسّْ ؤُ ثَافَاوْثْ ثَامژْيَانْثْ حِيمَا أَذْ ثحْكمْ خْ دْجِيڒثْ، ؤُڒَا ذ إِثْرَانْ.
‏17 إِسَّارْسْ إِ-ثنْثْ أَربِّي ذِي ڒْْقُوبّثْ ن ؤُجنَّا حِيمَا أَذْ وْشنْثْ ثَافَاوْثْ خْ ثمُّورْثْ
‏18 ؤُ حِيمَا أَذْ حكْمنْثْ خْ وَاسّْ ذ دْجِيڒثْ ؤُ حِيمَا أَذْ بْضَانْثْ جَارْ ثْفَاوْثْ ذ ثَادْجسْثْ. ؤُشَا إِژْرَا أَربِّي بلِّي مَانْ أَيَا إِصْبحْ.
‏19 ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ أَربْعَا.
 
‏20 ؤُشَا إِنَّا أَربِّي: ”أجّْ أَذْ د-سّفْينْ وَامَانْ س وَاطَّاسْ ن مَارَّا مِينْ ذِي إِدْجْ بُوحْبڒْ إِدَّارنْ ؤُشَا أَذْ ضْونْ إِجْضَاضْ سنّجْ إِ ثمُّورْثْ غَارْ مَانِي ثدْجْ ڒْْقُوبّثْ ن ؤُجنَّا!“    ‏21 إِخْڒقْ-د أَربِّي إِمُودَّارنْ إِمقّْرَاننْ ذِي ڒبْحَارْ ؤُ مَارَّا بُوحْبڒْ إِدَّارنْ إِتّنْهزَّانْ ثنِّي إِ زِي د-سّفْينْ وَامَانْ أَمشْنَاوْ مَارْكَاثْ نْسنْ ؤُشَا مَارَّا إِجْضَاضْ س وَافْرِيونْ أَمشْنَاوْ مَارْكَاثْ نْسنْ. ؤُشَا إِژْرَا أَربِّي بلِّي مَانْ أَيَا إِصْبحْ. ‏22 إِبَارْكْ إِ-ثنْ أَربِّي، إِنَّا: ”جّمْ-د ڒْْغِيدْجثْ، كْثَارمْ،عمَّارمْ أَمَانْ ن ڒبْحُورْ ؤُشَا أَذْ كْثَارنْ إِجْضَاضْ ذِي ثمُّورْثْ.“ ‏23 ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ خمْسَا.
 
‏24 ؤُشَا إِنَّا أَربِّي: ”أجّْ ثمُّورْثْ أَذْ ثسُّوفّغْ مَارَّا مِينْ غَارسْ ذ بُوحْبڒْ إِدَّارنْ أَمشْنَاوْ مَارْكَا نّسْ: ڒبْهَايمْ ذ إِمُودَّارنْ نِّي إِتّْپُوعنْ ذ ڒْْمَاڒْ نْ ڒخْڒَا أَمشْنَاوْ مَارْكَا نْسنْ!“ ؤُشَا أَمُّو إِ ثمْسَارْ.    ‏25 إِڭَّا أَربِّي ڒْْمَاڒْ ن ڒخْڒَا ن ثمُّورْثْ أَمشْنَاوْ مَارْكَا نْسنْ، ؤُ ڒبْهَايمْ أَمشْنَاوْ مَارْكَا نْسنْثْ ؤُ مَارَّا إِمُودَّارنْ نِّي إِتّْپُوعنْ خْ وُوذمْ ن ثمُّورْثْ أَمشْنَاوْ مَارْكَاثْ نْسنْ. ؤُشَا إِژْرَا أَربِّي بلِّي مَانْ أَيَا إِصْبحْ.
‏26 ؤُشَا إِنَّا أَربِّي: ”أجّْ أَنغْ أَذْ نڭّْ أَذَامْ، بْنَاذمْ، ذِي صِّيفثْ نّغْ، ذڭْ وَارْوَاسْ نّغْ، ؤُشَا أَذْ غَارسْ يِيڒِي جّهْذْ خْ إِسڒْمَانْ ن ڒبْحَارْ ؤُ خْ إِجْضَاضْ ن ؤُجنَّا ؤُ خْ ڒبْهَايمْ ؤُ خْ مَارَّا ثَامُّورْثْ ؤُ خْ مَارَّا إِمُودَّارنْ إِنِّي إِتّْپُوعنْ خْ ثمُّورْثْ!“    ‏27 إِخْڒقْ-د أَربِّي أَذَامْ ذِي صِّيفثْ نّسْ. إِخْڒقْ إِ-ث-إِ-د ذِي صِّيفثْ ن أَربِّي، إِخْڒقْ إِ-ثنْ-د أَوْثمْ ذ ثوْثمْثْ. ‏28 إِبَارْكْ إِ-ثنْ أَربِّي ؤُشَا إِنَّا أَسنْ أَربِّي: ”جّمْ-د ڒْْغِيدْجثْ، كْثَارمْ،عمَّارمْ ثَامُّورْثْ ؤُشَا أَرّمْ ت سَاذُو ؤُفُوسْ نْومْ، حكْممْ خْ إِسڒْمَانْ ن ڒبْحَارْ ؤُ خْ إِجْضَاضْ ن ؤُجنَّا ؤُ خْ مَارَّا إِمُودَّارنْ إِنِّي إِتّْپُوعنْ خْ ثمُّورْثْ!“ ‏29 إِنَّا أَربِّي: ”خْزَارمْ، أَذْ أَومْ وْشغْ مَارَّا أَفْسُو أَزِيزَا إِ إِزَارّْعنْ زَّارِيعثْ خْ مَارَّا وُوذمْ ن ثمُّورْثْ ؤُڒَا مَارَّا ثِيشجِّيرَا س ڒْْغِيدْجثْ غَارْ ثْشجَّارْثْ نِّي إِزَارّْعنْ زَّارِيعثْ. ذ مَانْ أَيَا أَذْ أَومْ يِيڒِي ذ مَاشَّا.    ‏30 ؤُ إِ مَارَّا ڒْْمَاڒْ ن ڒخْڒَا ن ثمُّورْثْ ؤُ إِ مَارَّا إِجْضَاضْ ن ؤُجنَّا ؤُ إِ مَارَّا مِينْ إِتّْپُوعنْ خْ ثمُّورْثْ إِ ذِي إِدْجْ بُوحْبڒْ إِدَّارنْ، أَذْ أَسنْ يِيڒِي مَارَّا أَفْسُو أَزِيزَا ذ مَاشَّا إِ نِيثْنِي.“ ؤُشَا أَمُّو إِ ثمْسَارْ. ‏31 ؤُشَا إِژْرَا أَربِّي مَارَّا مِينْ إِڭَّا، ؤُ خْزَارْ، ثُوغَا إِصْبحْ أَطَّاسْ. ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ستَّا.