1 Xenni isuḍ wenni d wiss xemsa di řbuq nnes uca ẓriɣ ijj n yetri iwḍa-dd zeg ujenna x temmurt, temmewc as tasarut n uqemmum n tesraft yuǧɣen.    2 Uca igeɛɛed-dd ddexxan zeg uqemmum n tesraft, am ddexxan n tefqunt tameqqrant iḥman, uca tfuct d řeɛwin bbarcnen s ddexxan n tesraft. 3 Zi ddexxan ffɣen-dd zzayes iburexsen ɣar temmurt, temmewc asen ṣṣulṭa am tenni iǧan ɣar tɣarḍmiwin n temmurt. 4 Ittwanna asen, maḥend war jeyyḥen arbiɛ n temmurt uřa d qaɛ aɣemmuy aziza uřa d ticejjura, mɣir iwdan waha inni war ɣar iǧi ucemmiɛ n AREBBI x tenyart nsen. ^□     5 Temmewc asen tzemmar maḥend war ten neqqen, maca ad ten ɛeddben řqedd n xemsa n iyuren, uca aɛeddeb nsen am uɛeddeb n tɣarḍent xmi tᵉtteqqes i bnadem.

6 Deg wussan nni ad arzun iwdan x řmewt, maca war tt ttᵉṭṭifen, uca ad ttaren ad mmten, maca řmewt ad zzaysen tarweř.    7 Iburexsen ggin am yiysan iwejden i umenɣi, u ɣarsen x izeǧifen nsen ca am ttijan axmi tent ggin s wureɣ, u iɣembab nsen am iɣembab n iwdan,    8 u acuwwaf nsen am ucuwwaf n temɣarin u tiɣmas nsen am tinni n wayraden,    9 u tuɣa ɣarsen tcappat x idmaren nsen am tcappat n wuzzař i useřqi, u ddriz n wafriwen nsen am ddriz n ikarruten ak-d waṭṭas n iysan itteqnunnuyen ɣar umenɣi, 10 u ɣarsen ikennasen am yinni n tɣarḍmiwin u tuɣa din isennanen deg ikennasen nsen. Nitni ɣarsen ṣṣulṭa ḥima ad ssehwan druct x iwdan, řmijař n xemsa n iyuren. 11 Nitni ɣarsen lmalak n tesraft d ajeǧid xasen, qqaren as s Tɛibranit ‘Abaddu’ u s Tramit qqaren as ‘Cara’. ^□  

12 Uct tamezwarut teɛdu, awarni man aya ad dd-asent ɛad tnayen n wuctat.   

13 Awarni man aya isuḍ lmalak wiss setta di řbuq nnes uca sřiɣ tmijja i dd-yusin zi arebɛa n waccawen n uɛalṭar n wureɣ i ibedden qibač i AREBBI, 14 tenna i lmalak wiss setta i ɣar iǧa uyicc n icarri: “Fsiy i arebɛa n lmalakat nni icarfen ṭṭarf n iɣzar ameqqran, Lfuraṭ.” 15 Uca arxun asen i arebɛa n lmalakat nni tuɣa iwejden dinni ɣar wass d uyur d useggʷas, ḥima ad nɣent ict n ttuřut n iwdan. 16 Tuɣa řqedd n řɛeskarat n yinni ineddhen iysan tyuya n ɛecra-ařaf s ɛecra n řuřuf, uca sřiɣ mecḥař di ǧan. ^□   17 Ammu i ẓriɣ iysan di řewḥiy, aqa inni xasen inyin tuɣa ssdurruyen idmaren nsen s tcappat n wuzzař i useřqi d tizeggʷaɣin am tmessi, cabent, d tiwraɣin am řecbareyyet. Izeǧifen n iysan nni am yizeǧifen n wayraden uca zeg iqemmumen nsen teffeɣ-dd zzaysen tmessi d ddexxan d řecbareyyet. 18 Aqa ict n ttuřut n iwdan tᵉttwaneɣ s třata-ya n jjrayeḥ: s tmessi d řecbareyyet d ddexxan i dd-itteffɣen zeg iqemmumen nsen. 19 Minzi ṣṣulṭa nsen aqa-tt deg iqemmumen d ikennasen nsen, minzi ikennasen nsen ggin am ifiɣran nni ɣar iǧa izeǧifen, uca ttjeyyḥen zzaysen iwdan.

20 Iwdan iqqimen, inni war ittwanɣen ca s jjrayeḥ-a, war tuben ca zi řxedmet n ifassen nsen ařami war ɛebbden ɛad ccwaṭen d l’aṣnam n wureɣ d nnuqart d nnḥas d weẓru d ukeccuḍ, inni war ittwiřin, war ittesřin, war igguren,    21 uca nitni war tuben ca zeg wenɣay nsen, řa zi tseḥḥart nsen uřa zi farq-ccɣeř nsen.