1 Bulus, amsexxar n AREBBI d rrasul n Yasuɛ Lmasiḥ, di l’iman n yinni ittwafarzen zi AREBBI u di tussna n tidett, tenni iǧan di tiggʷudi zi AREBBI, ^□   2 x usitem n Tudart ittduman, tenni zi tuɣa iwaɛd AREBBI d tidett, qbeř zzmanat n řweqt-a.    3 Netta aqa issargeb Awař nnes di řweqt nnes s tbarreḥt nneɣ i d ayi ittwawekkřen ɛlaḥsab řumur n AREBBI, wenni d aneɣ itticen Tudart.   

4 I Titus, mmi d tidett ɛlaḥsab l’iman nneɣ icarcen: arḍa d řehna zi AREBBI, Babatneɣ, u zi Siditneɣ Yasuɛ Lmasiḥ, wenni d aneɣ itticen Tudart.   

5 S uyenni jjiɣ cek di Krita, ḥima ad tɛedřed min tuɣa ɛad ittxeṣṣa, u ḥima ad tessgeɛɛded imɣaren di kuř tandint, am mammec cek umureɣ.    6 Amɣar d ijjen nni war di iǧi řɛib, aqa-t d aryaz i ɣares mɣir ict n temɣart, ɣares iḥenjiren ttamnen, war ttᵉkkwaren, war ttwaṭṭfen zeg ufucceḥ.    7 Minzi ittxeṣṣa i umɣar ad yiři břa řɛib am wewkiř n AREBBI. Ittxeṣṣa war dayes ittiři uɛeffar niɣ zzɛaf, war isess ccrab sennej i řqedd, war iccit s ufus nnes deɣya u war ittexs arbeḥ war iḥřin.    8 Ejj i-t ad yareḥḥeb s inewjiwen, ad ixs min iṣebḥen, ittxeṣṣa ad yiři d asexxay, d amseggad, d amezdag, ad iḥkem x ixef nnes.    9 Ittxeṣṣa as ad iḥḍa tɣuri n ṣṣaḥ n wawař n l’iman, ḥima iqedd ad igg wuř deg yinni yumnen s tɣuri nnes n ṣṣaḥ u ad iseggem tarwa n bu-tɣennant.

10 Minzi aqa din aṭṭas n iwdan inni war ixsen ad sswaḍḍɛen ixef nsen, ssawařen awařen ixwan. Nitni ssxarwaḍen ixarriṣen n iwdan, ɣar umezwaru nsen d inni iǧan zeg wextan.    11 Ittxeṣṣa ad asen ittwaqqen uqemmum, minzi nitni qeřɛen x waṭṭas n řaǧat, sseřmaden min war icuwwaren maḥend ad ṭṭfen arbeḥ war iḥřin.    12 Ijjen zzaysen, aqa-t d anabi nsen, tuɣa inna: “Ikritiyyen ssxariqqen řebda, aqa-ten d řewḥuc iɛeffanen, imeɛgazen i daysen aɛeddis waha.” 13 Cchadet-a d tidett. S uyenni webbex asen s jjehd, ḥima ad iřin d iṣḥaḥen di l’iman, 14 war tticen ca taynit i tḥuja n Wudayen d tiweṣṣa n iwdan nni iwcin s weɛrur i tidett.    15 I umezdag marra d tazdugi, maca i yinni ittwaxemjen d yinni war yuminen, i nitni uřa d ict n řḥajjet war tizdig, minzi ixarriṣen nsen d tnefsect nsen xemjen.    16 Nitni cehhden aqa ssnen AREBBI, maca nḍaren t s řexdayem nsen. Yaɛɛut min tteggen, aqa war ttᵉṭṭiɛen ca, war neffɛen uřa i yict n řxedmet iṣebḥen.