1 Bulus, rrasul - war iǧi zeg iwdan uřa s řxaḍar n ijj n bnadem, maca s Yasuɛ Lmasiḥ, u s AREBBI, Babas, wenni i-t-i-dd-issnekkaren zi taddart n imettinen - ^□   2 u marra awmaten inni iǧan akidi, i tmesmunin n Galaṭiya: 3 Arḍa d řehna ad xawem iřin zi AREBBI, Babatneɣ, u zi Siditneɣ Yasuɛ Lmasiḥ,    4 wenni iwcin Ixef nnes x ddnub nneɣ, ḥima ad aneɣ ifekk zi ddunect-a taɛeffant am mammec tt ixs AREBBI, Babatneɣ.    5 I Netta umi i ɣar iǧa uɛuǧi i řebda qaɛ. Amin.

6 Ttbehteɣ umi tsemḥem ammu deɣya di Lmasiḥ, wenni d awem dd-iřaɣan s arḍa nnes. Tᵉttexsem ad tdewřen ɣar ijj n řexbar aṣebḥan nneɣni, ^□   7 nni war din iǧi, maca din ca n yinni kenniw iḥeyyaren uca xsen ad ssɛewwjen Řexbar Aṣebḥan n Lmasiḥ.    8 Maca mařa neccin niɣ ijj n lmalak zeg ujenna ad awem ibarreḥ s yijj n řexbar aṣebḥan nneɣni x Řexbar Aṣebḥan i zi nbarreḥ i kenniw, ad yiři d amenɛuř.    9 Am izzareɣ nniɣ, qqareɣ t ɛawed řexxu ijj n umur nneɣni: mařa ibeccar ḥed i kenniw s ijj ‘řexbar aṣebḥan’ nneɣni x wenni tqebřem, ad taf ad ittwanɛeř.

10 Ma arezzuɣ řexxu ad ssqennɛeɣ iwdan niɣ AREBBI? Niɣ arezzuɣ ad arḍiɣ iwdan? Mařa arezzuɣ ad arḍiɣ iwdan, war ttiřiɣ d amsexxar n Lmasiḥ.   

11 Maca ad awem mřeɣ, a aytma, belli Řexbar Aṣebḥan i d ittwabarrḥen zzayi, war iǧi zi bnadem,    12 maɣar necc war t ttᵉṭṭfeɣ niɣ war t řmideɣ zi bnadem, maca s usargeb n Yasuɛ Lmasiḥ.    13 Aqa tesřim mammec tuɣa ggureɣ qbeř di ddin n Wudayen, tuɣa darrceɣ x tmesmunt n AREBBI aṭṭas, arezzuɣ ad tt areddǧeɣ.    14 Tuɣa izzareɣ di ddin n Wudayen x waṭṭas n iqrinen zi řgens inu, minzi tuɣa meḥḍeɣ aṭṭas x tɣuri n řejdud inu.

15 Maca řami tuɣa yarḍa Netta, Wenni d ayi iḥuzen umi d ayi tuɣa ɛad deg uɛeddis n yemma, uca iřaɣa ayi s arḍa nnes,    16 maḥend ad dayi dd-isseḍhar Mmis ḥima ad zzayes barrḥeɣ jar řegnus, xenni war ssargibeɣ man aya deɣya i yenni ɣarsen iǧa ddat d idammen.    17 Ɛawed war ruḥeɣ ca ɣar Urcalim, ɣar yinni i tuɣa d rrusul qbeř inu, maca ruḥeɣ ɣar Ɛarabiyya, uca dewřeɣ-dd xenni ɛawed ɣar Dimacq.

18 Třata n iseggʷusa awarni as, ruḥeɣ ɣar Urcalim ḥima ad mmeřqiɣ ak-d Kifa uca zedɣeɣ akides xemmesṭac n wussan. 19 War ẓriɣ ḥed nneɣni zi rrusul mɣir Yaɛqub, umas n Siditneɣ. 20 Min d awem ttariɣ řexxu, aqa da cehhdeɣ zzat i AREBBI: War ssxarriqeɣ ca!    21 Awarni man aya ruḥeɣ ɣar jjwayeh n Suriya d Kilikiya. 22 Timesmunin n Yahudiyya i iǧan di Lmasiḥ, war ssinen aɣembub inu. 23 Nitni tuɣa sřin xafi ammu waha: “Aqa wenni tuɣa xaneɣ idarrcen qbeř, řexxu ittbarreḥ s l’iman i tuɣa yareddeǧ zic!”, 24 uca ssemɣaren di AREBBI zi ssibbet inu.