1 Řḥasuř, ittwanna belli aqa din jar awem farq-ccɣeř, u anect n farq-ccɣeř nni war iǧin qaɛ jar lkuffar, aqa ijj n mmis ɣares tamɣart n babas.    2 Kenniw tessuffam ixef nwem, waxxa ittxeṣṣa awem di tidett ad tceḍnem, ḥima ad tḥeyyḍem wenni iggin man aya zi řwesṭ nwem. 3 Waxxa necc aggʷejeɣ ɛlaḥsab arrimet, aqa ayi ḥḍareɣ di Arruḥ, uca aqa ḥekmeɣ axmi ḥḍareɣ x wenni iggin man aya. 4 Ittxeṣṣa ad tmunem marra deg Yisem n Siditneɣ Yasuɛ Lmasiḥ, u necc akidwem di Arruḥ, s jjehd n Siditneɣ Yasuɛ Lmasiḥ, 5 uca kenniw ad t tsellmem i cciṭan i txessart n arrimet nnes, ḥima ad iddar di Arruḥ deg wass n Siditneɣ Yasuɛ Lmasiḥ.   

6 War dd xawem yusi ufeyyec! Ma war tessinem ca belli cwayt n wentun issmemm marra taɛebbuzt n warecti?    7 Sizedgem ixef nwem xenni zeg wentun aqdim, ḥima ad tiřim d ict n řɛejnet n warecti n jdid. Aqa kenniw d aɣrum břa antun, minzi Taɣarṣt nneɣ n Useɛdu aqa tᵉttwaɣarṣ i neccin, aqa Netta d Lmasiḥ.    8 S uyenni ejj aneɣ ad nɛeyyed, war iǧi s wentun aqdim niɣ s wentun n tuɛeffna d řɣar, maca s wentun n řeṣfayet d tqeddast.   

9 Aqa uriɣ awem-dd di tebrat, ittxeṣṣa war ttɛacarem ayt n farq-ccɣeř    10 War ssiwřeɣ x ayt n farq-ccɣeř nni iǧan di ddunect-a, niɣ x iḍemmaɛen niɣ x ibeɛɛaj niɣ x yinni iɛebbden l’aṣnam, mařa ammu, iři ad teffɣem zi ddunect-a. 11 Maca uriɣ awem-dd řexxu, ḥima war tᵉttɛacarem ca ḥed, waxxa qqaren as uma, maca aqa-t d bu-farq-ccɣeř, niɣ d aḍemmaɛ, niɣ d wenni iɛebbden l’aṣnam, niɣ d amceqqaf, niɣ d askarji, niɣ d aceffar. Ak-d ḥed am wanita war kis tᵉttettem ɛad aɣrum!    12 Minzi man řḥeqq ɣari, ḥima ad ḥekmeɣ x yinni iǧan barra? Ḥekkmem kenniw x yinni iǧan daxeř! 13 Maca inni iǧan barra, AREBBI ad xasen iḥkem. Sḥeyydem xawem aɛeffan!