1 A aytma, necc war zemmareɣ ad kiwem ssiwřeɣ am iwdan inni iddaren ɛlaḥsab Arruḥ, maca am yinni iddaren ɛlaḥsab aysum n bnadem waha, amecnaw iseyman di Lmasiḥ. 2 Aqa wciɣ awem ad teswem aɣi, war iǧi d ařeqqim imten, minzi tuɣa war d as tzemmarem, ař i řexxu u war d as tzemmarem ɛad,    3 s minzi kenniw ɛad deg weysum. Maɣar mařa din ɛad jar awem řeḥsed d imenɣan d umsebḍi, ma war teǧim ɛad n ddat niɣ teggurem ɛad deg weysum?    4 Minzi mařa ijjen zzaywem iqqar: ‘Necc aqa ayi zi Bulus!’ u wenneɣni iqqar: ‘Necc aqa ayi zi Apullus!’, ma xenni kenniw war teǧim ca ddat?    5 Maɣar min iɛna Apullus u min iɛna Bulus? Aqa aten mɣir d imsexxaren i zi tdewřem tumnem, uca kuř ijjen am mammec d as iwca SIDI.    6 Aqa necc ẓẓuɣ, Apullus issu, maca AREBBI isseɣmi.    7 Xenni wenni itteẓẓun war iǧi d ca uřa d wenni ittessun, maca AREBBI wenni issɣemmayen. 8 Maca wenni itteẓẓun d wenni ittessun d ijjen, waxxa kuř ijj tekkar as-dd řmunet nnes am mammec řxedmet nnes.    9 Minzi neccin d imsexxaren ak-d AREBBI uca kenniw d tafeǧaḥt d řebni n AREBBI i teǧam.   

10 Ɛlaḥsab arḍa n AREBBI i d ayi immewcen, necc, am řemɛeǧem abennay amiɣis, ggiɣ dsas u wenneɣni ad xas ibna. Ejj kuř ijj ad iḥḍa mammec xas i ɣa ibna. 11 Minzi uřa d ijjen war izemmar ad igg dsas nneɣni x wenni immarsen, aqa-t d Yasuɛ Lmasiḥ.    12 Uca mařa ibna ḥed x dsas nni s wureɣ, nnuqart, iẓra iɣřan, tefřawt. řum niɣ s uxecxuc, 13 řxedmet n kuř ijjen ad tban, minzi ass ad tt isscen. Minzi s timessi ad ittwasseḍhar mammec teǧa řxedmet n kuř ijj, timessi ad tt tfarz.    14 Mařa teqqim řxedmet n řebni i xas tuɣa ibna ca n ijjen, aqa netta ad iṭṭef řmunet nnes, 15 u mařa tecmeḍ řxedmet n ca n ijjen, aqa netta ad yarbu taxessart nnes, maca netta simant nnes ad injem axmi ikka timessi.

16 Ma war tessinem ca belli teǧam d zzawect n AREBBI uca belli Arruḥ n AREBBI izeddeɣ daywem?    17 Mařa yareyyeb ḥed zzawect n AREBBI, AREBBI ad t yareyyeb, minzi zzawect n AREBBI, tenni teǧam kenniw, tqeddes i teǧa.

18 War ttejji ḥed ad ixeddeɛ ixef nnes! Mařa din ḥed jar awem ittɣiř as ixef nnes d amiɣis di ddunect-a, ejj i-t ad idweř d abuhaři maḥend ad yiři d amiɣis.    19 Minzi tiɣit n ddunect-a teǧa d tubbuheřya ɣar AREBBI, minzi tura:

“Iṭṭef imiɣisen s teḥraymect nsen!”,   

20 uca ɛawed:

“SIDI issnen aqa ixarriṣen n imiɣisen d řbaṭeř.”   

21 S uya, uřa d ijjen war issemɣari ca zeg iwdan, minzi marra nwem, 22 ma d Bulus, niɣ d Apullus, niɣ d Kifa, niɣ d ddunect, niɣ d tudart, niɣ d řmewt, niɣ d iḍa niɣ d tiwecca, aqa marra nwem, 23 maca kenniw n Lmasiḥ uca Lmasiḥ n AREBBI.