1 Wi iḍeɛfen di l’iman, wcem as afus, war ttemsebḍam deg ixarriṣen nwem jar awem. 2 Aqa din ḥed yumen izemmar ad icc kuřci, maca wenni iḍeɛfen ad icc tibbi waha.    3 Wenni ittetten, war isseḥqari wenni war ittetten, d wenni war ittetten, war iḥekkem x wenni ittetten, minzi AREBBI iqbeř i-t. 4 Min teɛnid cek wenni iḥekkmen x umsexxar n wenneɣni? Minzi mařa ibedd, d man aya i bab nnes, u mařa iwḍa, d man aya i bab nnes. Sides izemmar ad t issbedd d abeddi.   

5 Aqa din ḥed ittɣiř as aqa din ass sennej i wass nneɣni, u wenneɣni ittɣiř as aqa kuř ass kifkif. Ejj kuř ijjen ad iqneɛ di řbař nnes nican.    6 Wenni iweqqaren ijj n wass, i Sides i t ɣa iweqqar. Wenni war iweqqaren ass, i Sides i war t iweqqar. Wenni ittetten, ittett i Sides, minzi ad icekkar AREBBI. Wenni war ittetten ca, i Sides war ittett ca uca netta ad icekkar AREBBI ɛawed.    7 Minzi uřa d ijj zzayneɣ aqa iddar i yixef nnes, uca uřa d ijjen immut i yixef nnes.    8 Minzi mařa neddar, ad neddar i Siditneɣ, niɣ mařa nemmut ad nemmet i Siditneɣ. S uya, ma neddar niɣ nemmut, aqa neccin i Siditneɣ. 9 Minzi i uya i immut Lmasiḥ, uca idweř iddar ɛawed uca ikkar-dd, ḥima ad yiři d SIDI i yinni immuten uřa i yinni iddaren. 10 Maca cek, mayemmi ɣa tḥekmed x umac? Niɣ mayemmi ɛawed cek tesseḥqarad umac? Minzi neccin marra ad nbedd qibač i řkursi n ccreɛ n Lmasiḥ.   

11 Am mammec tura:

“S tidett, am ddareɣ Necc, iqqar SIDI,

ad ayi aḍaren marra ifadden

u kuř iřes ad xafi iched.”   

12 Xenni ejj kuř ijjen zzayneɣ ad igg řeḥsab x yixef nnes qibač i AREBBI.    13 Zi řexxu d tsawent war ḥekkmem ijjen x wenneɣni, maca ḥsen ad teksed awař maḥend war tessarsed ca ijj n weẓru maḥend ad dayes inqarḍ umac.    14 Minzi necc ssneɣ, aqa ttwassqenɛeɣ di SIDI Yasuɛ, belli uřa d ict n řḥajjet texmej i Netta, mɣir i wenni tt iḥesben d řexmej, aqa i netta waha umi texmej.    15 Mařa ixeyyeq umac x ssibbet n macca i teccid, aqa cek war tuyured di tayri. War tteḥḥi ca s macca nnec wenni i xef immut Lmasiḥ.    16 Min nḥesseb d řxar i neccin, war ttejji ḥed ad xas issiweř s řɣar. 17 Minzi Tageldit n AREBBI war teǧi di macca d tissit, maca di tsegda d řehna d řefraḥet s Arruḥ Iqeddsen.    18 Minzi wenni isexxaren i Lmasiḥ di man aya, aqa yarḍa AREBBI uca netta d ameqbuř ɣar iwdan.

19 Ad neḍfar xenni min iǧan i řehna d řebni n ijjen i wenneɣni. 20 War ttareddeǧ ca řxedmet n AREBBI x ssibbet n macca. Marra timesřayin aqa atent d timezdag, maca uct x bnadem wenni i ɣa igg aẓru i unedref s macca nnes.    21 Mliḥ umi war nᵉttett ca aysum u war nsess ca binu niɣ war nᵉttegg uřa d ict n řḥajjet i di i ɣa inderf umac.    22 Ma tᵉttwassqenɛed i yixef nnec? Ad ac yiři man aya i yixef nnec zzat i AREBBI. Sseɛd n wenni war ittikkwiḍ ccreɛ x yixef nnes di min d as ittɣiř mliḥ. 23 Maca wenni ittcekkan xmi ittett, ittwaḥaseb, minzi man aya war iǧi zi l’iman. Qaɛ min war iǧin zi l’iman, aqa-t d ddenb.