1 Ẓwan x Amfipulis d Apulluniya, iwḍen ɣar Tissalunika mani tuɣa ict n temzida n Wudayen. 2 Bulus yudef-dd din ɣarsen, am tuɣa d lqaɛida nnes. Di třata n wussan n ssebt issiweř akidsen zi Tira Iqeddsen. 3 Iffessar u issbeyyen asen ammu: “Tuɣa ittxeṣṣa i Lmasiḥ ad ittwaweddeb u ad dd-ikkar zi taddart n imettinen. Aqa Netta d Yasuɛ, Lmasiḥ min xef d awem barrḥeɣ.”    4 Ca zzaysen umnen, munen ak-d Bulus d Sila, uřa d aṭṭas n Iyunaniyyen inni itteggʷeden AREBBI, uřa d timɣarin icennɛen, war iǧi drust zzaysent,   

5 Maca Udayen dewřen ttasmen, nedhen ca n yeryazen iɛeffanen zeg ibriden n tendint, ssgeɛɛden ijj n řɣaci d ameqqran ɣarsen, sshajan tandint uca ssekkaran ten ḍidd n taddart n Yasun, arzun ad ten sellmen i řɣaci. 6 Umi war ten ufin din, jarren Yasun d wawmaten i din iǧan ɣar izeǧifen n tendint, sɣuyyun: “Xzar, ina, inni issɣewwɣen tammurt marra, aqa usin-dd ɛawed da!    7 Yasun issidef i-ten ɣares d inewjiwen, waxxa nitni marra ttɛekksen tiwṣeyyat n qayṣar, qqaren aqa da ajeǧid nneɣni, aqa-t d Yasuɛ.”    8 Ssarejfen izeǧifen n tendint d řgens umi sřin aya. 9 Maca awarni řami ṭṭfen řɛarbunat zi Yasun d yinneɣni, arxun asen.

10 Řexdenni ssekken tawmat Bulus d Sila ɣar Biriya s ǧiřet. Umi din iwḍen, ruḥen ɣar temzida n Wudayen,    11 minzi Udayen dinni tuɣa aten xar zeg inni i yeǧan di Tissalunika, minzi tuɣa xsen ad sřen i Wawař kuř ass, arezzun ad ssnen zi Tira Iqeddsen, ma timesřayin-a aqa tent amenni.    12 Aṭṭas zzaysen umnen, uřa d aṭṭas n temɣarin d yeryazen zeg Iyunaniyyen.

13 Maca, umi Udayen n Tissalunika ssnen belli Bulus tuɣa ittbarreḥ Awař n AREBBI di Biriya, usin-dd nitni ɛawed din, war ssbedden zeg usɣewweɣ u zeg usxarweḍ jar imezdaɣ n tendint.    14 Xas uca jjin wawmaten ad ihwa Bulus řexdenni ɣar řebḥar, maca Sila d Timutiyu qqimen din. 15 Inni issqebḍen Bulus, iwyen t ɣar tendint n Atina. Xenni, umi t jjin, ṭṭfen zzayes ict n tebrat i Sila d Timutiyu maḥend nitni ad ɣares dd-asen deɣya.   

16 Am ten tuɣa ittraja Bulus di Atina, tuɣa arruḥ nnes ixeyyeq umi iẓra tandint teccur s řexyařat n l’aṣnam. 17 S uyenni tuɣa issawař di temzida ak-d Wudayen u ak-d yinni itteggʷeden AREBBI, u di ssuq uřa ak-d inni i tuɣa ittmunen dinni kuř ass. 18 Ɛad ca n ifaylasufen zi temzida n Ipikurus u ca nneɣni, qqaren as Istuwakiyyen, mnaqacen akides. Ca zzaysen nnan: “Min ixs ad yini wanita s řhard-a qaɛ?” Maca inneɣni nnan: “Iḍhar-dd aqa-t d ambarreḥ n irebbiten iɣriben, minzi tuɣa ittbarreḥ asen s Yasuɛ d tnukra nnes zeg imettinen. 19 Uca iwyen t, nedhen t ɣar řebni n taddart n ccreɛ umi qqaren Ariyupagus, nnan as: “Ma iɛeddeř ad nessen man taɣuri n jdid i tᵉttbarrḥed?”, 20 minzi cek tiwyed ca n tmesřayin tiɣribin i imezzuɣen nneɣ, u neccin nexs ad nessen min ixs ad yini man aya.” 21 Marra inni zi Atina d marra ibarraniyyen inni din iqqimen, sseɛdun řweqt mɣir ḥima ad xebbaren u ḥima ad sřen ict n řḥajjet n jdid.

22 Ikkar-dd Bulus, ibedd di taddart n ccreɛ qqaren as ‘Ariyupagus’, inna: “A iryazen n Atina, ufiɣ belli kenniw tᵉttɛemmarem sennej i ṭṭarf s tiggʷudi n ccwaṭen zi kuř aɣezdis. 23 Minzi umi nnḍeɣ di tendint nwem, ẓriɣ timzidawin nwem, ufiɣ ɛawed ijj n uɛalṭar zemmen xas: ‘I AREBBI i war ittwassnen’. S uyenni wenni tɛebbdem kenniw, am war t tessinem, d Wa i zi d awem ttbeccareɣ. 24 Minzi AREBBI wenni dd-yejjin ddunect d marra min dayes, wenni iǧan d Sidi n ujenna d temmurt, war izeddeɣ ca di tzawiyyin i ittwaggen s ifassen n iwdan,    25 uřa war xas ittwasexxar s ifassen n iwdan axmi Netta iḥwaj ca, minzi Netta simant nnes iwca i mkuř bnadem tudart d twarrit n nnefs.    26 Zeg idammen n yijjen igga marra řegnus n bnadem ḥima ad zedɣen x wudem n temmurt marra, u s řumur nnes ifarz asen řmijařat n řweqt uca igga iymiren n tzeddiɣt n iwdan,    27 ḥima ad arzun x AREBBI u ad zzayes ttaren, ad taɣ ad t afen s marra min zzayes ittwaggen, maɣar Netta war iggʷij ca aṭṭas x kuř ijjen zzayneɣ. 28 Minzi neccin dayes i neddar u dayes i nᵉttenhezza u dayes i neǧa, am mammec nnan ca n imiɣisen nwem: ‘Aqa neqqarṣ zzayes Netta!’ 29 S uyenni, am dd-iqqarṣ bnadem zi AREBBI, ittxeṣṣa war nḥesseb ca belli ureɣ niɣ nnuqart niɣ aẓru i ittwaggen s lfenn u s tzemmar n bnadem, aqa aten am AREBBI i ǧan.    30 AREBBI ijja ad ɛdunt zzmanat n uweddar, maca řexxu, di zzman-a ittamar i marra iwdan, aqa ittxeṣṣa i kuř bnadem di kuř amcan ad dd-idweř ɣar AREBBI!    31 Minzi Netta igga ijj n wass i di i ɣa iḥkem x marra tammurt s řḥeqq s ijj n Bnadem i ifarz. Netta igga kuř ijjen ittxeṣṣa as maḥend ad zzayes yamen, řami t-i-dd-issnekkar zi taddart n imettinen.”

32 Umi sřin x tnukra zi taddart n imettinen, bdan sthezzan s man aya, maca inneɣni nnan: “Ict n twařa nneɣni nexs ad zzayek nseř ktar x man aya.” 33 Ammu iffeɣ Bulus zi řwesṭ nsen. 34 Ca zzaysen ḍfaren t, umnen. Tuɣa Diyunisiyus d ijjen zzaysen, aqa-t jar řquḍat n Ariyupagus, uřa d ict n temɣart qqaren as Damaris u inneɣni akidsen.