1 Deg useggʷas wiss xemmesṭac zi řeḥkamet n qayṣar Tibaryus, řami tuɣa Punṭiyus Pilaṭus d řḥakem x Yahudiyya, u Hirudus d řḥakem x Ljalil, ijj n arbeɛ n temmurt, u Filippus, umas, d řḥakem x Ituriya d jjihet n Traxunitis, ijj n arbeɛ nneɣni n temmurt, u Lisanyus d řḥakem x jjihet n Abilini, tenni ɛawed d ijj n arbeɛ nneɣni n temmurt,   

2 umi tuɣa Ḥannan d Qayafa d arruyas n ikehhanen, aqa yusa-dd wawař n AREBBI x Yuḥanna, mmis n Zakariyya, di řexřa.    3 Yiweḍ-dd ɣar marra jjwayeh i d as dd-innḍen i L’Urdun, ittbarreḥ s useɣḍeṣ n ttubet i weɣfar n ddnub,    4 am mammec tura deg wedlis n wawařen n unabi Icaɛya i innan:

“Tmijja n wenni isɣuyyun di řexřa:

Swejdem abrid n SIDI,

seggmem amesraq i AREBBI nneɣ di řewḍa.   

5 Marra tiddaɣin ad ttwaccurent,

marra idurar d tewririn

ad dd-ttwassehwan,

ddmani ad ttwaseggment,

u imucan iwɛaren ad dewřen d řewḍa.

6 Kuř ddat s idammen d weysum

ad tẓar Tudart n AREBBI.”   

7 Tuɣa iqqar i řɣaci i dd-itteffɣen ḥima ad ttwassɣeḍṣen: “A tarwa n iřefsawen, wi d awem imřen maḥend ad tarzum ad tarewřem zeg weɣḍab i dd ɣa yasen?    8 S uya ggem řɣiǧet i ɣa iřiqqen i ttubet. War ttbeddam ad tinim deg ixef nwem: ‘Aqa ɣarneɣ Ibrahim d jedditneɣ!’, minzi Necc ad awem iniɣ, belli AREBBI izemmar ad issnekkar zeg iẓra-ya tarwa i Ibrahim.    9 Xzar, aqa tᵉttwassars tcaqurt ɣar iẓewran n tcejjura. S uya kuř tacejjart i war itticen řɣiǧet tecna ad tᵉttwaqess uca ad tewḍa di tmessi.” ^□    

10 Isseqsa t řɣaci, inna: “Min ɣa negg?”    11 Yarra-dd, inna asen: “Ejj wenni ɣar iǧa tyuya n tcamirat, ad iwc i wenni war ɣar iǧi ca, u ejj wenni ɣar iǧa macca, ad igg amenni.”    12 Usin-dd ɛawed ayt n ḍḍariba, ḥima ad ttwassɣeḍṣen, nnan as: “A Amseɣɣar, min ɣa negg?” 13 Inna asen: “War ttᵉṭṭfem ḍḍariba ktar zi min d awem weṣṣan maḥend ad tt tᵉṭṭfem.” 14 Sseqsan t ɛawed iɛeskariyyen, nnan as: “Min ɣa negg neccin?” Inna asen: “War tteggem řɣar uřa deg ijj, war deǧmem ḥed, qennɛem s řmunet nwem.”

15 Am ibda řgens ad ittceř x Yuḥanna, u xarrṣen deg wuřawen nsen ma Yuḥanna netta d Lmasiḥ, 16 xenni iṭṭef Yuḥanna deg wawař, inna asen: “Necc sseɣḍaṣeɣ kenniw deg waman, maca awarni ayi ad dd-yas wi ijehden xafi, wenni umi necc war sdihiǧeɣ uřa ad as fesyeɣ ifiřan n sandaliyat nnes. Aqa Netta ad kenniw isseɣḍeṣ di Arruḥ Iqeddsen u di tmessi.    17 Netta ɣares tazzart deg ufus nnes uca ad issizdeg andrar nnes. Ad issmun irden ɣar řmarsi nnes, maca icarfa ad ten issecmeḍ s tmessi war ixsin ɛemmarṣ.”   

18 S tmesřayin nneɣni ɛad aṭṭas tuɣa isseřmad iwdan uca ittbarreḥ s Řexbar Aṣebḥan i řgens. 19 Maca umi iɛayar Yuḥanna Hirudus, řḥakem x ijj n arbeɛ n temmurt, zi ssibbet n Hirudiyya tamɣart n Filippus umas, u zi ssibbet n marra tuɛeffna i igga,    20 aqa yarni Hirudus ɛawed di man aya marra, řami tuɣa iḥebbes Yuḥanna Amseɣḍaṣ.

21 Awarni řami isseɣḍeṣ Yuḥanna marra řgens, isseɣḍeṣ ɛawed Yasuɛ, uca am tuɣa Wanita ittẓaǧa, innurzem ujenna,    22 uca ihwa-dd xas Arruḥ Iqeddsen s ṣṣifet n ddat n tedbirt. Uca ict n tmijja zeg ujenna tuɣa teqqar: “Cek d Mmi iɛizzen, dayek ufiɣ arḍa inu.”   

23 Tuɣa Yasuɛ ɣares ɛřaḥař třatin n iseggʷusa u ittɣiř asen aqa Netta d mmis n Yusuf, mmis n Hayli,    24 mmis n Mattat, mmis n Lawi, mmis n Malki, mmis n Yanna, mmis n Yusuf, 25 mmis n Mattata, mmis n Ɛamus, mmis n Naḥum, mmis n Ḥasli, mmis n Najjay, 26 mmis n Maɛat, mmis n Mattat, mmis n Cimɛi, mmis n Yusuf, mmis n Yahuda, 27 mmis n Yuḥanna, mmis n Risa, mmis n Zarubbabil, mmis n Caɛaltiyil, mmis n Niri, 28 mmis n Malki, mmis n Addi, mmis n Quṣam, mmis n Almudam, mmis n Ɛir, 29 mmis n Yusi, mmis n Aliɛazar, mmis n Yuram, mmis n Matita, mmis n Lawi, 30 mmis n Cimɛun, mmis n Yahuda, mmis n Yusuf, mmis n Yunam, mmis n Alyaqim, 31 mmis n Maliya, mmis n Miynan, mmis n Mattata, mmis n Natan, mmis n Dawud, 32 mmis n Yassa, mmis n Ɛubid, mmis n Buɛaz, mmis n Salmun, mmis n Naḥcun, 33 mmis n Ɛamminadab, mmis n Aram, mmis n Ḥaṣrun, mmis n Fariṣ, mmis n Yahuda, 34 mmis n Yaɛqub, mmis n Isḥaq, mmis n Ibrahim, mmis n Taraḥ, mmis n Naḥur,    35 mmis n Saruj, mmis n Raɛuw, mmis n Falaj, mmis n Ɛabir, mmis n Calaḥ, 36 mmis n Qinan, mmis n Arfakcad, mmis n Cam, mmis n Nuḥ, mmis n Lamak, 37 mmis n Matucalaḥ, mmis n Ḥanux, mmis n Yarad, mmis n Mahalal-Il, mmis n Qinan, 38 mmis n Anuc, mmis n Cit, mmis n Adam, mmis n AREBBI.