1 Xenni iffeɣ Yasuɛ zi Zzawect Tameqqrant maḥend ad yuyur, maca usin-dd ɣares imeḥḍaren nnes, ssecnen as řebniyyat n Zzawect Tameqqrant.   

2 Netta inna asen: “Ma war teẓrim marra man aya? S tidett, Necc ad awem iniɣ: War da ittɣimi uřa d ijj n weẓru x weẓru nneɣni i war ittnehdim.”   

3 Umi tuɣa Yasuɛ iqqim x wedrar n Zzitun, usin-dd imeḥḍaren nnes, tuɣa ttemsawařan, nnan as: “Ini aneɣ, meřmi i ɣa imsar aya u man řeɛřamet n twasit nnec u n qeṭṭu n ddunect?”    4 Yasuɛ yarra-dd, inna asen: “Ḥḍam ixef nwem, war kenniw ixeddeɛ ḥed.    5 Minzi aṭṭas ad dd-asen s Yisem inu, ad inin: ‘Aqa Necc d Lmasiḥ!’, uca ad xedɛen aṭṭas.    6 Uca ad tesřem x garrat u x řexburat n imenɣan. Ɣarwem aqa ad teggʷedem, minzi s uɣiř ad yiři man aya, maca war ittiři ɛad d aneggar. 7 Minzi řgens ad iɣewweɣ x ijj n řgens nneɣni u tageldit x tgeldit nneɣni, ad yiři řaẓ d řehřacat yewɛaren d inhezzan n temmurt da d diha.    8 Marra man aya d beddu n řewjeɛ n tarut. 9 Xenni ad kenniw dd-awyen ɣar řmeḥnet uca ad kenniw nɣen, u marra řegnus ad kenniw carhen zi ssibbet n Yisem inu.    10 Řexdenni ad nqarḍen waṭṭas, ad carhen ijjen wenneɣni uca ad sellmen ijjen wenneɣni. 11 Ad kkaren waṭṭas n inabiyyen issxarriqen uca ad ɣwan aṭṭas.    12 S waṭṭas n řmuɛṣiyyet ad tudrus tayri n waṭṭas n iwdan, ^□     13 maca wi ɣa iṣbaren ɣar uneggar, aqa netta ad iddar.    14 Řexbar-a Aṣebḥan n Tgeldit ad zzayes barrḥen di ddunect marra d cchadet i marra řegnus uca řexdenni ad dd-yas uneggar.”

15 “Xmi ɣa tẓarem řeɛřamet n nnɛi n wareyyeb, min xef issiweř unabi Daniyal, deg wemcan iqeddsen - ejj wenni t i ɣa iɣaren ad iften -    16 řexdenni jjem inni iǧan di Yahudiyya ad arewřen ɣar idurar.    17 Wenni iǧan x tzeqqa war dd-ihekkwi ca ḥima ad iksi ca zi taddart nnes, 18 u wenni iǧan deg iyyar, war dd-iddikkʷiř ca ḥima ad dd-yawi arruḍ nnes. 19 Uct x tinni iǧan s ddeyset d tinni issuṭṭuḍen deg wussan nni! 20 Ẓaǧem, ḥima war tᵉttiři tarewřa nwem di řmecta niɣ di ssebt,    21 minzi řexdenni ad tiři řmeḥnet tameqqrant i war imsaren ɛemmarṣ zeg wami teǧa ddunect ař i řexxu u ɛemmarṣ war tᵉttiři ɛad.    22 Mři ussan nni war ttwassmeẓyen, xenni war ittwassenjem uřa d ijj n bnadem, maca ussan nni ad ttwassmeẓyen di ṭṭweɛ n yinni ittwafarzen. 23 Mařa inna awem ḥed: ‘Xzarem, aqa da Lmasiḥ!’ niɣ: ‘Aqa-t diha!’ war t ttimnem.    24 Minzi ad iřin imasiḥen ifalsuten d inabiyyen issxarriqen, ad ggen řeɛřamat mɣarent, ḥima, mři zemmaren, ad xedɛen ɛawed inni ittwafarzen.    25 Xzarem, aqa nniɣ awem t qbeř. 26 Mařa nnan awem: ‘Xzarem, Netta aqa-t di řexřa!’, war ttriḥem ca din, niɣ: ‘Xzarem, Netta aqa-t daxeř i wexxam!’, war tt ttimnem.    27 Minzi am wajjaj i dd-itteffɣen zi ccarq uca ittegg tafawt ař řɣarb, ammu i ɣa tiři twasit n Mmis n bnadem. 28 Mani ɣa tiři arrimet diha ad munen igidaren.”   

29 “Řexdenni awarni řmeḥnet n wussan nni, ad tbarcen tfuct u taziri war tᵉttic ɛad ṭṭya nnes u itran ad dd-wḍan zeg ujenna u ṣṣulaṭat n ijenwan ad ttwanhezzent.    30 Xenni ad dd-teḍhar řeɛřamet n Mmis n bnadem deg ujenna u marra tiqebbař n temmurt ad wtent agejdur uca ad ẓarent Mmis n bnadem yusa-dd x iseynuten n ujenna s jjehd u s uɛuǧi aṭṭas.    31 Netta ad issekk lmalakat nnes s řḥess ijehden n usuḍi deg uyicc n icarri, uca ad dd-ssmunent inni ittwafarzen zi arebɛa n iɣezdisen n usemmiḍ, zi ṭṭarf aneggaru n ijenwan ař wenneɣni.”   

32 “Řemdem zeg umedya n wartu: xmi ɣa dewřen řefruɛ nnes d iřeqqaɣen, ad dd-ssuffɣen tifray, ad tessnem aqa anebdu yudes-dd.    33 Ammu ɛawed kenniw, xmi ɣa tẓarem marra man aya, ad tessnem aqa yudes-dd, ɣar tewwart.”

34 “S tidett, Necc ad awem iniɣ: Jjiř-a war iɛeddu ař ɣa imsar man aya marra. 35 Ajenna d temmurt ad ɛdun, maca awařen inu war ɛeddun ɛemmarṣ.   

36 Maca x wass nni niɣ x tsaɛɛet nni war xas issin uřa d ijj, uřa d lmalakat n ijenwan, mɣir Baba weḥḥdes.    37 Am mammec tuɣa iǧa deg wussan n Nuḥ ammu i ɣa tiři ɣar twasit n Mmis n bnadem.    38 Minzi am mammec ten tuɣa deg wussan qbeř ṭṭufan, ttᵉtten, sessen, meǧcen u ssmeǧacen ař ass i di yudef Nuḥ ɣar uɣarrabu, ^□     39 uca war ucin walu ařami dd-yusa ṭṭufan, imḥa i-ten marra, ammu i ɣa tiři ɣar twasit n Mmis n bnadem. 40 Di řweqt nni ad iřin tnayen deg iyyar, ijjen ad t ksin u wenneɣni ad t jjen.    41 Tnayen n temɣarin ad ḥaryent s tsirt, icten ad tt ksin u tenneɣni ad tt jjen. 42 S uya ḥḍam, minzi war tessinem ca di man tasaɛɛet i dd ɣa yas Siditwem.    43 Maca ssnem aya: mařa bab n taddart issen di man ḥeṭṭu n ǧiřet i dd ɣa yas uceffar, iři iqqim iḥeṭṭa, war t ittejji ad yadef ɣar taddart nnes.    44 S uya, iřim twejdem, minzi Mmis n bnadem ad dd-yas deg ict n tsaɛɛet war tt tᵉttrijim.”

45 “Wi iǧan xenni d amsexxar amtiqqi d amiɣis i igga bab nnes, ḥima ad ibḍa x aytbab n taddart nnes min ɣa ccen di řweqt nnes?    46 Sseɛd n umsexxar wenni i ɣa yafen sidis iřha ammu xmi dd ɣa yas. 47 S tidett, Necc ad awem iniɣ, ad t igg x marra agřa nnes. 48 Maca mařa amsexxar aɛeffan nni ad yini deg wuř nnes: ‘Sidi inu iɛeṭṭař maḥend ad dd-yas!’, 49 uca ibda iccat imsexxaren imɛacaren nnes, ad icc ad isu ak-d imeskaren, 50 xenni ad dd-yas sidis n umsexxar nni deg ijj n wass i di war t ittriji u deg ict n tsaɛɛet war tt issin, 51 ad t iqess d iwetwiten uca ad tiři tesɣart nnes ak-d imnafqen. Din i ɣa yiřin imeṭṭawen d uɣezzi n teɣmas.”