1 Iṭṭef Yasuɛ ɛawed deg wawař uca issiweř akidsen ɛawed s imedya, inna:    2 “Tageldit n ijenwan am yijj n weryaz, ijj n ujeǧid, igga urar i mmis.    3 Issekk-dd imsexxaren nnes ḥima ad řaɣan x yinni ittwaɛarḍen ɣar wurar, maca ugin ad dd-asen.

4 Ɛawed issekk-dd imsexxaren nneɣni, inna: ‘Inim i yinni ittwaɛarḍen: Aqa sswejdeɣ awem amecři, ɣarṣeɣ i iyenduzen inu d řmař inu iṣeḥḥen, aqa marra iwjed, asem-dd ɣar wurar!’ ” 5 Nitni maca war wcin ca taynit i man aya, ruḥen, ijjen ɣar řeɛraṣi nnes u wenneɣni ɣar ttijara nnes. 6 Inni iqqimen ṭṭfen imsexxaren nnes, ɣezzan daysen uca nɣin ten.

7 Řami isřa ujeǧid man aya, ixeyyeq aṭṭas, issekk-dd řɛeskar nnes uca yareyyeb iqettařen nni uca issecmeḍ tandint nsen. 8 Xenni inna i imsexxaren nnes: ‘Aqa urar iwjed maca inni tuɣa ittwaɛarḍen war t sdihiǧen ca. 9 S uya uyurem ɣar mani ttemsebḍan ibriden, řaɣam-dd x marra inni i ɣa tafem din ɣar wurar.’

10 Xenni ffɣen-dd imsexxaren nni ɣar ibriden uca ssmunen marra inni ufin, am yiṣebḥanen am yiɛeffanen, uca taddart n wurar tedweř teccur s inewjiwen i iqqimen dinni. 11 Řami dd-yudef ujeǧid, maḥend ad iẓar inewjiwen nni iqqimen dinni, iḥekkar i yijj n bnadem war yarḍ ca arruḍ n wurar. 12 Inna as: ‘A ameddukkeř inu, mammec dd-tudfed danita břa arruḍ n wurar?’ Maca netta idweř ignu. 13 Xenni inna ujeǧid i imsexxaren: ‘Carfem t s ifassen d iḍaren uca nḍarem t barra ɣar uneggar n taǧest mani ɣa iřin imeṭṭawen d uɣezzi n teɣmas.’    14 Minzi aqa din aṭṭas inni ittwařaɣan maca drus inni ittwafarzen.”   

15 Xenni ruḥen Ifarisiyyen, mcawaren mammec ad as ggen ijj n řfex di ssibbet n wawařen nnes.    16 Ssekken ɣares imeḥḍaren nsen ak-d inni zi taddart n Hirudus, nnan: “A Amseɣɣar, aqa nessen belli Cek d tidett, tesseřmaded abrid n AREBBI s tidett, nhřa ma tesseřqid uřa x yijj, minzi Cek war tᵉttegged s wudmawen.

17 Iwa ini aneɣ mammec i twařid Cek: Ma iḥeqq ɛlaḥsab Ccariɛa ad tᵉttwaxeǧeṣ ḍḍariba i qayṣar niɣ lla?” 18 Maca Yasuɛ issen taḥraymect nsen uca inna: “Mayemmi d ayi tᵉttjarrabem, kenniw, a imnafqen? 19 Seccnem ayi ijj n uqiyya n dinar n ḍḍariba x kuř azeǧif!” Iwyen as-dd ijj n dinar. 20 Xenni inna asen: “Wi yiřan taṣwirt-a d tira-ya?”    21 Nnan as: “N qayṣar!” Xenni inna asen: “Wcem i qayṣar min iǧan i qayṣar u i AREBBI min iǧan i AREBBI.”    22 Řami sřin man aya, tbehten, semḥen dayes uca ruḥen.

23 Deg wass nni usin-dd ɣares Iṣaduqiyyen, qqaren as: ‘Aqa war din bu tudart i imettinen!’, uca sseqsan t,    24 nnan as: “A Amseɣɣar, Musa aqa inna: ‘Mařa immut ḥed war dd-yejji bu tarwa, ittxeṣṣa i umas ad imřec ak-d temɣart nnes ad kides dd-yejj aḥenjir i umas.’    25 Tuɣa ɣarneɣ sebɛa n wawmaten. Amezwaru imřec, immut. Umi war dd-yejji ca tarwa, aqa ijja tamɣart nnes i umas. 26 Ammu i immut uřa d wenni wiss tnayen d wiss třata ař wenni wiss sebɛa. 27 Ɣar uneggaru nsen marra temmut temɣart. 28 I man wen zzaysen i ɣa tiři temɣart di tnukra, minzi nitni marra iwyen tt d tamɣart?”

29 Yasuɛ yarra-dd, inna asen: “Aqa kenniw tweddarem, minzi war tessinem ca Tira Iqeddsen uřa d jjehd n AREBBI. 30 Minzi di tnukra war ttiwyen nitni timɣarin, u timɣarin war ttiřint i yeryazen, maca ad iřin am lmalakat n AREBBI deg ujenna. 31 Maca zi jjihet n tnukra jar imettinen, ma war teɣrim ca min d awem inna AREBBI i iqqaren: 32 ‘Aqa Necc d AREBBI n Ibrahim, AREBBI n Isḥaq, AREBBI n Yaɛqub!’ AREBBI war iǧi d AREBBI n imettinen maca n yinni iddaren.”    33 Řami sřin řɣaci man aya, tbehten deg useřmed nnes.   

34 Řami sřin Ifarisiyyen belli Netta ibelleɛ aqemmum n Iṣaduqiyyen, munen jar asen.    35 Ijjen zzaysen, ijjen wenni issnen Ccariɛa mliḥ, isseqsa t ḥima ad t ijarreb:    36 “A Amseɣɣar, man tawṣeyyet i iǧan d tameqqrant di Ccariɛa?” 37 Inna as Yasuɛ: “Ad texsed SIDI, AREBBI nnec, s marra wuř nnec, s marra řeɛmar nnec, s marra jjehd nnec u s marra řeɛqeř nnec.    38 D ta d tawṣeyyet tameqqrant d tamezwarut. 39 Tenni wiss tnayen tarwes dayes, aqa nettat: ‘Ad texsed jjar nnec amecnaw ixef nnec’.    40 X tnayen n tweṣṣa-ya tᵉttwabna marra Ccariɛa d Inabiyyen.”

41 Am tuɣa munen Ifarisiyyen, isseqsa ten Yasuɛ,    42 inna: “Min teqqarem x Lmasiḥ? Umi igga mmis?” Nnan as: “Mmis n Dawud!” 43 Inna asen: “Mammec i ɣa yegg Dawud ad as isemma zi Arruḥ ‘SIDI’, am iqqar: 44 ‘SIDI inna i Sidi inu: Qqim-dd x ufusi inu ař ɣa ggeɣ řɛedyan nnec sadu iḍaren nnec.’    45 Mařa Dawud iřaɣa as ‘SIDI’, mammec ɣa yiři d mmis?” 46 Uřa d ijjen war izemmar ad xas dd-yarr u uřa d ijj war iqqim izeɛɛem ittseqsa t ca ɛad zeg wass nni.