1 Awarni řami inya deg uɣarrabu, iẓwa řebḥar, yiweḍ ɣar tendint nnes.    2 Uca iwyen as-dd ijj n uneɛḍab i tuɣa izzřen di tassut. Řami iẓra Yasuɛ l’iman nsen, inna i uneɛḍab: “Egg uř, a mmi, ddnub nnec ttwaɣfaren!” 3 Uca xzar, ca n imseřmaden n idlisen nnan deg yixef nsen: “Wanita ittceqqaf di AREBBI.”    4 Yasuɛ, umi issen min di tuɣa ttfekkaren, inna asen: “Mayemmi tᵉttxemmamem di min war iḥřin deg wuřawen nwem? 5 Maɣar min ihewnen ad iniɣ i wanita: ‘Ddnub nnec ttwaɣfaren!’, niɣ ad iniɣ: ‘Kkar, uyur’? 6 Maca ḥima ad tessnem belli Mmis n bnadem ɣares ṣṣulṭa di temmurt ḥima ad iɣfar ddnub, ad iniɣ i uneɛḍab-a: “Kkar, ksi tassut nnec, tarekkweḥed ɣar taddart nnec!” 7 Xenni ikkar, iruḥ ɣar taddart nnes. 8 Řami iẓra řɣaci man aya, tbehten, ssɛuǧen AREBBI wenni iwcin ṣṣulṭa am tanita i iwdan.

9 Řami ssenni ikka Yasuɛ, iẓra aryaz wenni umi qqaren Matta, iqqim ɣar taddart n ḍḍariba. Inna as: “Ḍfar ayi-dd!” Uca ikkar, iḍfar i-t.    10 Řami qqimen nitni ɣar ṭṭabřa di taddart, usin-dd waṭṭas n ayt n ḍḍariba d imednab, qqimen ɣar ṭṭabřa ak-d Yasuɛ d imeḥḍaren nnes. 11 Řami ẓrin Ifarisiyyen man aya, nnan i imeḥḍaren nnes: “Mayemmi ittett Umseřmad nwem ak-d ayt n ḍḍariba d imednab?” 12 Umi isřa Yasuɛ man aya, inna asen: “Inni iṣeḥḥen, war ḥdijen ca aḍbib, maca imehřac. 13 Ruḥem, ad třemdem min ixs ad yini wawař-a: ‘Xseɣ arreḥmet, war xseɣ ca taɣarṣt!’, minzi Necc war dd-usiɣ, ḥima ad řaɣiɣ x imseggaden, maca x imednab.”   

14 Xenni usin-dd ɣares imeḥḍaren n Yuḥanna, nnan as: “Mayemmi nettẓumma neccin d Ifarisiyyen aṭṭas, maca imeḥḍaren nnec war ttẓummin ca?”    15 Yasuɛ inna asen: “Ma izemmar ad ceḍnen řeḥbab n umuřay umi amuřay ɛad akidsen? Ad dd-asen wussan ad xasen immeksi Umuřay, xenni ad ẓummen.   

16 Uřa d ijj war ittegg taneqqič n tcuqqet n jdid x warruḍ aqdim, ḥima war tqeǧiɛ tneqqič zeg warruḍ uca ad iqqarṣ warruḍ ktar. 17 Uřa d binu n jdid war ittwagg ca di txuncay tibuřay, ḥima war dduqquzent txuncay, ad izeǧeɛ binu uca tixuncay ad ḍeyyɛent. Ittxeṣṣa ad tteggen binu n jdid di txuncay n jdid, ḥima ad ttwaxemmřen nitni s tnayen.”   

18 Am tuɣa issawař akidsen x tmesřayin-a, yusa-dd ijj n umeqqran, isjed as, inna: “Řexxu yeǧi bḥřa temmut, maca as-dd, sars xas afus nnec uca ad teddar ɛawed.”    19 Yasuɛ ikkar, iḍfar i-t ak-d imeḥḍaren nnes.

20 Uca xzar, ict n temɣart, tuɣa ttazzřen zzayes idammen řmijař n tenɛac n iseggʷusa, tekka as-dd ɣar ḍeffar uca tḥada abeḥřuř n ujeǧab nnes,    21 minzi nettat tuɣa tenna deg ixef nnes: “Icfa mɣir ad ḥadiɣ ajeǧab nnes, ad ggenfiɣ!” 22 Maca inneqřeb-dd Yasuɛ, iẓra i-tt, inna: “Egg uř, a yeǧi, aqa l’iman nnem i cem issnejmen!” Uca tᵉttwassggenfa temɣart nni di tsaɛɛet nni.   

23 Xenni yusa-dd Yasuɛ ɣar taddart n umeqqran, iẓra iɣeyyaḍen d řɣaci sɣuyyun.    24 Inna asen: “Ffɣem ssa! Taḥenjirt war temmut ca, aqa tᵉṭṭeṣ!” Nitni ḍeḥcen dayes.    25 Ařami issuffeɣ řɣaci, yudef ɣar daxeř uca iṭṭef i-tt zeg ufus nnes, xenni tekkar tḥenjirt. 26 Uca iffeɣ řexbar ɣar temmurt nni marra.

27 Řami ssenni ikka Yasuɛ, ḍfaren t tnayen n idarɣařen, ttřaɣan, qqaren: “Arḥem aneɣ, a Mmis n Dawud!” 28 Ařami yudef ɣar taddart, usin-dd ɣares idarɣařen nni. Yasuɛ inna asen: “Ma tumnem belli zemmareɣ ad ggeɣ man aya?” Nnan as: “Wah, a Siditneɣ!” 29 Řexdenni iḥada tiṭṭawin nsen, inna: “Ad ɣarwem yiři ɛlaḥsab l’iman nwem!” 30 Řexdenni ttwarezment tiṭṭawin nsen. Xenni iḥarrem i-ten Yasuɛ, inna: “Ɣarwem, war ssargabem ḥed!”    31 Maca nitni, ařami ruḥen, ssuffɣen xas řexbar di marra tammurt!   

32 Řami dd-ffɣen nitni, iwyen as-dd ijj n weryaz aynaw, dayes ijj n cciṭan.    33 Řami zzayes iffeɣ cciṭan nni, issiweř weynaw. Tuɣa ittebhet řɣaci, nnan: “Ɛemmarṣ war neẓri am wanita di Israil!” 34 Maca Ifarisiyyen nnan: “S umeqqran n ccwaṭen issuffuɣ ccwaṭen!”   

35 Yeccu tuɣa ittenneḍ x marra tineddam d dcurat, isseřmad i-ten di temzidawin nsen. Tuɣa ittbarreḥ s Řexbar Aṣebḥan n Tgeldit uca issgenfa marra řehřacat d řeɛyub n řgens.    36 Řami iẓra Yasuɛ řɣaci, iḥinn xasen, minzi uḥřen nnhewřen am wuǧi i war ɣar iǧi umeksaw.    37 Xenni inna i imeḥḍaren nnes: “Tameyra temɣar aṭṭas, maca aqa din drus n icewwařen.    38 S uyenni ttarem i Bab n tmeyra, ad dd-issekk icewwařen i tmeyra nnes.”