1 Deg wussan nni yusa-dd Yuḥanna Amseɣḍaṣ, tuɣa ittbarreḥ di řexřa n Yahudiyya,    2 inna:

“Tubem, minzi Tageldit n ijenwan.

aqa tudes-dd.”

3 Minzi netta d wenni xef ittwannan zeg unabi Icaɛya am inna:

“Tmijja i ittřaɣan di řexřa:

‘Swejdem abrid n SIDI,

seggem imesraq nnes.’ ”   

4 Yuḥanna wanita tuɣa yarreḍ arruḍ n taḍuft n iřeɣman, ibekkes ijj n webyas n yiřem. Uca macca nnes tuɣa d iburexsen d tamment taḥurrect.    5 Řexdenni teffeɣ-dd ɣares Urcalim d qaɛ Yahudiyya d marra jjwayeh i d as dd-innḍen i L’Urdun, 6 uca ttwassɣeḍṣen zzayes deg iɣzar n L’Urdun, neɛmen s ddnub nsen.   

7 Řami iẓra aṭṭas n Ifarisiyyen d Iṣaduqiyyen ttasen-dd maḥend ad ttwassɣeḍṣen, inna asen: “A tarwa n ifiɣran, wi d awem imřen, aqa tzemmarem ad tarewřem zeg weɣḍab i dd ɣa yasen?    8 Ggem řɣiǧet i ɣa iřiqqen i ttubet.    9 War ttɣiřem ca ad tinim deg ixef nwem: ‘Ibrahim d jedditneɣ!’, minzi Necc ad awem iniɣ belli AREBBI izemmar ad issnekkar zeg iẓra-ya tarwa i Ibrahim.    10 Xzar, tacaqurt tᵉttwassars ɣar iẓewran n tcejjura. S uya kuř tacejjart i war itticen řɣiǧet tecna, ad tᵉttwaqess uca ad tewḍa di tmessi. ^□     11 Necc ad kenniw ssɣeḍṣeɣ deg waman i ttubet, maca wenni i dd ɣa yasen awarni ayi, Netta ijhed xafi, necc war sdihiǧeɣ ad ksiɣ sandaliyat nnes. Aqa Netta ad kenniw isseɣḍeṣ di Arruḥ Iqeddsen d tmessi.    12 Tazzart nnes deg ufus nnes, ad izzuzar andrar nnes qaɛ, ad iyru irden ɣar řemrasi nnes, maca icarfa ad ten issecmeḍ s tmessi i war ixessyen.”

13 Řexdenni yusa-dd Yasuɛ zi Ljalil ɣar L’Urdun, ɣar Yuḥanna, ḥima ad ittwaseɣḍeṣ zzayes. ^□     14 Maca Yuḥanna yugi as, inna: “Necc ḥdajeɣ ad ttwassɣeḍṣeɣ zzayek. Ma aqa d Cek i ɣari i dd ɣa yasen?”

15 Maca Yasuɛ yarra-dd, inna as: “Ewc řexxu ttesriḥ, minzi ammu i d aneɣ ittřiq ḥima ad nkemmeř marra tasegda.” Řexdenni isamḥ as. 16 Awarni řami ittwasseɣḍeṣ Yasuɛ, yuři-dd zeg waman deɣya, u ttwarzmen as ijenwan, uca iẓra Arruḥ n AREBBI ihwa-dd am tadbirt, tarsa xas.    17 Xzar, tusa-dd ict n tmijja zeg ijenwan, tenna: “D Wa d Mmi iɛizzen, dayes ufiɣ arḍa inu.”