1 Issiweř AREBBI marra awařen-a, inna:

2 “Necc d SIDI, AREBBI nnec, wenni cek dd-issuffɣen zi temmurt n Miṣra, zi taddart n tesmuɣi.   

3 War ɣarek ttiřin irebbiten nneɣni zzat i wudem inu.

4 War ttegg i yixef nnec řexyař ineqcen niɣ ca n řḥajjet tarwes di min iǧan sennej deg ujenna niɣ di ca da swadday di temmurt niɣ di ca deg waman i iǧan sadu temmurt.    5 War d asen ttbendiq uřa ad xasen tsexxared, minzi Necc, SIDI, AREBBI nnec, d ijj n Arebbi ittasmen, wenni dd-yarezfen řmuɛṣiyyet n ibabaten di tarwa ař jjiř wiss třata d wiss arebɛa n yinni d ayi icarrhen, 6 d wenni isscanen tamexsiwt nnes icewwaren i řuřuf n yinni d ayi ittexsen u ḥeṭṭan řumurat inu.

7 War neṭṭeq s Yisem n SIDI, AREBBI nnec, di řbaṭeř, minzi war ittbarri SIDI i wenni i ɣa ineṭqen s Yisem nnes di řbaṭeř.   

8 Idar ass n ssebt, ḥima ad t tessqeddsed.    9 Setta n wussan i ɣa txedmed, ad tegged marra řxedmet nnec.    10 Ass wiss sebɛa d wass n ssebt n SIDI, AREBBI nnec. War dayes ttegg uřa d ict n řxedmet, cek lla, uřa d mmic lla, d yeǧic lla, d ismeɣ nnec lla, d tayya nnec lla, d řebhimet nnec lla, uřa d abarrani nni akidek iǧan daxeř i tewwura nnec lla. 11 Minzi di setta n wussan igga SIDI ijenwan d temmurt, řebḥar d marra min dayes uca yareyyeḥ deg wass wiss sebɛa. X uya ibarek SIDI ass n ssebt uca issqeddes i-t.   

12 Weqqar babac d yemmac, maḥend ussan n tudart nnec zemmaren ad zzuggarten di temmurt i d ac ɣa yewc SIDI, AREBBI nnec.   

13 War neqq.   

14 War zenna.   

15 War ttacar.

16 War cehhed s ẓur ḍidd i jjar nnec.

17 War meẓri di ca, taddart n jjar nnec war dayes meẓri. War meẓri di tamɣart n jjar nnec, niɣ deg yismeɣ nnes, niɣ di tayya nnes, niɣ deg ufunas nnes, niɣ deg weɣyuř nnes uřa deg ict n řḥajjet i iǧan n jjar nnec.”   

18 Marra řgens iẓra u isřa i wajjajen d wassamen d ddriz n usuḍi deg uyicc n icarri d wedrar idduxxunen. Umi iẓra řgens man aya, xenni arjijen uca beɛɛden nitni ɣar řaggʷaj.    19 Nnan i Musa: “Siweř cek akidneɣ uca ad nseř. Maca ittxeṣṣa AREBBI war kidneɣ issiwiř, ḥima war nettmetti!”    20 Inna Musa i řgens: “War teggʷedem ca, aqa yusa-dd AREBBI, ḥima ad kenniw iqeǧeb u ḥima ad zzayes teggʷedem maḥend war txeṭṭim ca.” 21 Ibedd řgens zi řaggʷaj, maca Musa iqarreb-dd ɣar useynu ibbumbsen mani tuɣa AREBBI.   

22 Inna SIDI i Musa: “Ammu ittxeṣṣa ad tinid i ayt n Israil: ‘Kenniw teẓrim belli ssiwřeɣ-dd akidwem zeg ujenna. 23 War kidi tteggem irebbiten n nnuqart u war tteggem irebbiten n wureɣ i yixef nwem. 24 Egg ayi ijj n uɛalṭar s ucař, qeddem xas tiɣarṣa nnec n wecmaḍ d tiɣarṣa nnec n řehna, uǧi nnec d ifunasen d tfunasin nnec. Di kuř amcan mani ɣa ggeɣ řidaret n Yisem inu, ad ɣarek dd-aseɣ uca ad ac barkeɣ.    25 Mařa teggid ayi ijj n uɛalṭar n iẓra, war t tbennid s tṣuḍar ittwassuydan, minzi mařa teddzed s uřeyzim nnec, iři ad t tessɛiǧted.    26 War ttgiɛɛid ɣar uɛalṭar inu s yijj n ddruj, ḥima war ittbin useḍḥi nnec.”