‏1 ؤُڒَا ذ كنِّيوْ ثُوغَا ثمُّوثمْ س دّْنُوبْ نْومْ ؤُ س ثُوبُّوهڒْيَا نْومْ ^▪   ‏2 مِينْ ذِي ثُوغَا ثُويُورمْ عْلَاحْسَابْ ثُوذَارْثْ ن كُوڒْ أَسّْ ن دُّونشْثْ-أَ، عْلَاحْسَابْ ڒْخَاضَارْ ن ؤُزدْجِيفْ ن صُّولْطَا خْ وَازَّايْ ن ڒعْوِينْ، ؤُ عْلَاحْسَابْ ڒْخَاضَارْ ن أَرُّوحْ نِّي إِخدّْمنْ ذِي ثَارْوَا ن ڒْمُوعْصِييّثْ. ^▪   ‏3 ؤُڒَا ذ نشِّينْ ثُوغَا نْرُوحْ قْبڒْ ذِي شّْغُوڒَاثْ نِّي، ؤُمِي نضْفَارْ نّشْوَاثْ ن ويْسُومْ نّغْ، نڭَّا مِينْ إِخْسْ ويْسُومْ نّغْ ذ نّيّثْ نّغْ، ؤُ ثُوغَا أَنغْ ذ ثَارْوَا ن وغْضَابْ قَاعْ أَمْ إِنّغْنِي.

‏4 مَاشَا أَربِّي إِشُّورْ س أَرّحْمثْ س ثَايْرِي نّسْ ثَامقّْرَانْثْ إِ زِي خَانغْ إِعِيزّْ. ‏5 ڒَامِي ثُوغَا أَنغْ عَاذْ ذ إِمتِّيننْ ذِي دّْنُوبْ نّغْ، أَقَا يَارّْ أَنغْ-د غَارْ ثُوذَارْثْ أَكْ-ذ لْمَاسِيحْ، ؤُ س أَرْضَا نّسْ إِسّنْجمْ أَنغْ ^▪   ‏6 ؤُ إِسّْنكَّارْ أَنغْ-د أَكِيذسْ ؤُشَا إِسّْغِيمَا أَنغْ أَكِيذسْ ذڭْ إِجنْوَانْ ذِي يَاسُوع لْمَاسِيحْ، ‏7 حِيمَا أَذْ إِسّْشنْ أَفيّضْ ن وَاڭْڒَا ن أَرْضَا نّسْ ذ ثْشُونِي نّسْ ذِي زّْمَانَاثْ إِ د غَا يَاسنْ، ونِّي خَانغْ د-يُوسِينْ س يَاسُوع لْمَاسِيحْ. ‏8 مِينْزِي س أَرْضَا نّسْ نتّْوَاسّنْجمْ، س لْ-إِيمَانْ، وَارْ إِدْجِي زَّايْومْ، أَقَا-ت ذ ثَاوْهِيبْثْ ن أَربِّي، ^▪   ‏9 وَارْ ثدْجِي س ڒْخذْمثْ، مَاحنْذْ وَارْ إِتُّوفّْ ؤُڒَا ذ إِجّْ. ^▪   ‏10 مَاغَارْ نشِّينْ ذ أَخڒْقِي نّسْ، نتّْوَاخْڒقْ-د ذِي يَاسُوع لْمَاسِيحْ حِيمَا أَذْ نڭّْ ڒخْذَايمْ ثِيصبْحَانِينْ نِّي ذ أَنغْ إِسّوْجذْ أَربِّي قْبڒْ، مَاحنْذْ أَذْ نُويُورْ ذَايْسنْثْ. ^▪  

‏11 س ؤُينِّيعقْڒمْ، أَقَا زِيشْ ثُوغَا كنِّيوْ ذ ڒڭْنُوسْ عْلَاحْسَابْ جَّاذِيرَا ن أَرِّيمثْ، ثتّْوَاسمَّامْ ’نْبْڒَا أَخْثَانْ‘ زڭْ إِنِّي ثُوغَا س وخْثَانْ نِّي إِدْجَانْ ذ ڒْخذْمثْ ن إِفَاسّنْ ذڭْ ويْسُومْ. ‏12 ذِي ڒْوقْثْ نِّي ثُوغَا كنِّيوْ بْڒَا لْمَاسِيحْ، ذ إِغْرِيبنْ زِي جِّيهثْ ن ڒحْكَامثْ ن إِسْرَائِيل، أَقَا ثِيڭّْوْجمْ أَمْ إِبَارَّانِييّنْ خْ ڒْعَاهْذْ ن لْوَاعْذْ. ثُوغَا كنِّيوْ بْڒَا أَسِيثمْ ؤُ بْڒَا أَربِّي ذِي دُّونشْثْ. ^▪   ‏13 مَاشَا ڒخُّو، ذِي يَاسُوع لْمَاسِيحْ، أَقَا كنِّيوْ إِنِّي ثُوغَا إِڭّْوجنْ، أَقَا ڒخُّو ثُوذْسمْ-د س إِذَامّنْ ن لْمَاسِيحْ.

‏14 مَاغَارْ نتَّا ذ ڒهْنَا نّغْ أَمْ ذ يَارَّا ثْنَاينْ نِّي غَارْ يِيجّْ، أَقَا نتَّا إِهْذمْ أَغْبَارْ ن ڒقْوَارْ ونِّي ثُوغَا ثنْ إِبْضَانْ. ^▪   ‏15 ذڭْ ويْسُومْ ن أَرِّيمثْ نّسْ إِبْضڒْ نتَّا ڒعْذَاوثْ ذ شَّارِيعَا ن ثْوصَّا أَكْ-ذ ثْوصَّا إِ-د-إِضْفَارنْ، حِيمَا أَذْ د-إِخْڒقْ ذِي طّْبِيعثْ ن يِيخفْ نّسْ ثْنَاينْ نِّي غَارْ إِجّْ ن بْنَاذمْ ن جْذِيذْ أَمْ إِتّڭّْ ڒهْنَا. ‏16 أَقَا نتَّا إِسّصْڒحْ ثْنَاينْ نِّي أَكْ-ذ أَربِّي ذڭْ إِشْثْ ن أَرِّيمثْ ؤُ إِنْغَا ڒعْذَاوثْ س صَّالِيبْ نّسْ. ‏17 يُوسَا-د حِيمَا أَذْ إِبَارّحْ س ڒخْبَارْ أَصبْحَانْ ن ڒهْنَا نِّي، إِ يِينِّي ثُوغَا إِڭّْوجنْ ؤُ إِ يِينِّي ثُوغَا يُوذْسنْ، ^▪   ‏18 مِينْزِي زَّايسْ نْزمَّارْ أَذْ نَاذفْ س ثْنَاينْ إِذْنغْ س يِيجّْ ن أَرُّوحْ غَارْ بَابَاثْنغْ. ^▪   ‏19 س ؤُيَا كنِّيوْ وَارْ ثدْجِيمْ ذ إِبَارَّانِييّنْ ؤُڒَا ذ إِمعْزَابْ، مَاشَا كنِّيوْ ذ إِمزْذَاغْ ن ثنْذِينْثْ ن إِمْقدَّاسنْ ذ ثَارْوَا ن ثَادَّارْثْ ن أَربِّي. ^▪   ‏20 ثتّْوَابْنَامْ خْ ذْسَاسْ ن رُّوسُولْ ذ إِنَابِييّنْ، ؤُشَا نتَّا ذ أَژْرُو أَزدْجِيفْ ن ثغْمَارْثْ، أَقَا-ث ذ يَاسُوع لْمَاسِيحْ. ^▫  ▪   ‏21 زَّايسْ إِ غَا إِتّْوَابْنَا ڒبْنِي مَارَّا، أَذْ إِيْمَا ؤُشَا أَذْ إِذْوڒْ ذ إِشْثْ ن زَّاوشْثْ ثَامقّْرَانْثْ إِقدّْسنْ ذِي سِيذِي، ^▪   ‏22 أَمْ زَّايسْ إِ غَا ثتّْوَابْنَامْ ؤُڒَا ذ كنِّيوْ، أَذْ ثِيڒِيمْ ذ ثَازذِّيغْثْ ن أَربِّي ذِي أَرُّوحْ.