أَيُوبْ إِشفّعْ بلِّي وَارْ ذَايسْ بُو ڒْعِيبْ
1 نشّْ ڭِّيغْ ڒْعَاهْذْ
أَكْ-ذ ثِيطَّاوِينْ إِنُو،
مَامّشْ إِ غَا خْزَارغْ خنِّي ذِي ثعْزَارشْثْ؟ ▪
2 مَاغَارْ مِينْ إِدْجَانْ خنِّي ثَاسْغَارْثْ
ن أَربِّي زِي سنّجْ،
نِيغْ ثَاسْغَارْثْ ن ڒْوَارْثْ ن ؤُمْزمَّارْ خْ كُوڒْشِي
زڭْ إِجنْوَانْ يُوعْڒَانْ؟
3 مَا وَارْ إِدْجِي أَضيّعْ إِكَّارْ-د إِ ؤُعفَّانْ،
أَرْژِييّثْ إِ يِينِّي إِتّڭّنْ ڒْمُوعْصِييّثْ؟
4 مَا وَارْ إِتّْوِيڒِي نتَّا إِبْرِيذنْ إِنُو،
مَا وَارْ إِحسّبْ نتَّا ڒْقدّْ
ن مَارَّا إِصُورَافْ إِنُو؟ ▪
5 مَاڒَا ثُوغَا ؤُيُورغْ ذِي ڒخْذعْ،
نِيغْ إِقدْجقْ ؤُضَارْ إِنُو غَارْ ڒْغشّْ،
6 أجّْ سِيذِي أَذْ أَيِي إِوْزنْ خنِّي
ذِي ڒْمِيزَانَاثْ إِسڭّْذنْ،
أَڒَامِي إِ غَا إِسّنْ أَربِّي ڒصْفَايثْ إِنُو.
7 مَاڒَا إِصُورَافْ إِنُو فّْغنْ زڭْ وبْرِيذْ،
ؤُڒْ إِنُو إِضْفَارْ ثِيطَّاوِينْ إِنُو
ؤُشَا خنِّي إِڒْصقْ ڒْعِيبْ ذڭْ إِفَاسّنْ إِنُو،
8 خنِّي أَذْ زَارْعغْ نشّْ،
مَاشَا إِجّنْ نّغْنِي أَذْ إِشّْ،
ؤُ مِينْ غَارِي د-إِغمَّاينْ أَذْ إِتّْوَاقْڒعْ!
9 مَاڒَا ؤُڒْ إِنُو إِتّْوَاغْوَا غَارْ إِشْثْ ن ثمْغَارْثْ،
نِيغْ ثُوغَا تّْحَامِيغْ
غَارْ ثوَّارْثْ ن وَاجَّارْ إِنُو، ▪
10 أجّْ خنِّي ثَامْغَارْثْ إِنُو
أَذْ ثحْرِي إِمنْذِي إِ يِيجّنْ نّغْنِي،
جّمْ إِنّغْنِي أَذْ خَاسْ أَضَارنْ.
11 مَاغَارْ أَيَا ذ ڒفْضِيحثْ،
ذ إِشْثْ ن لْجَارِيمَا إِ خَاسْ إِ غَا وْثنْ ڒْقُوضَاثْ.
12 مَاغَارْ أَيَا ذ ثِيمسِّي ثتّتّْ أَڒْ أَهلّكْ،
ثْقدْجعْ مَارَّا ڒْغِيدْجثْ إِنُو.
13 مَاڒَا سّْحقَّارغْ ڒْحقّْ
ن إِسْمغْ إِنُو ذ ثَايَّا إِنُو،
ڒَْامِي ثُوغَا تّمْشُوبُّوشنْ أَكِيذِي،
14 مِينْ إِ غَا ڭّغْ خنِّي مَاڒَا سِيذِي إِكَّارْ،
مَاڒَا نتَّا إِقدْجبْ أَيِي،
مِينْ خَاسْ د غَا يَارّغْ خنِّي؟ ▪
15 ونِّي ذ أَيِي إِڭِّينْ ذڭْ ؤُعذِّيسْ ن يمَّا،
مَا وَارْ ث إِڭِّي ؤُڒَا ذ نتَّا؟
مَا وَارْ إِدْجِي ذ إِجّْ ونِّي ذ أَنغْ د-إِخڒْقنْ
ذڭْ ؤُعذِّيسْ ن يمَّاثْنغْ؟ ▪
16 مَاڒَا قمّْحغْ أَمژْرِي ن إِمزْڒَاضْ
نِيغْ سّْرُوغْ ثِيطَّاوِينْ ن ثَاجَّاتْشْ،
17 مَاڒَا نشّْ مْغِيرْ شِّيغْ
أَڒقُّوزْ ن وغْرُومْ إِنُو،
أَمْ وَارْ زَّايسْ إِشِّي ؤُيُوجِيڒْ،
18 - مَاغَارْ زِي ثمْژِي إِيْمَا نتَّا غَارِي
أَمْ إِيْمَا غَارْ بَابَاسْ،
زڭْ ؤُعذِّيسْ ن يمَّا نذْهغْ ت -
19 مَاڒَا ژْرِيغْ إِجّنْ إِتّْوَاهلّكْ
مِينْزِي وَارْ غَارسْ إِدْجِي وَارُّوضْ،
نِيغْ مِينْزِي وَارْ ذِينْ إِدْجِي دُّورِي إِ ؤُمزْڒُوضْ،
20 مَاڒَا عمَّارْصْ وَارْ ذ أَيِي بَارْكنْثْ
ثجْعِينَّاثِينْ نّسْ،
مِينْزِي إِڭَّا أَذْ إِسِّيحْمَا إِخفْ نّسْ
س وَادْجَاسْ ن ثْضُوفْثْ ن إِزْمَارنْ إِنُو،
21 مَاڒَا أَفُوسْ إِنُو إِهُودّْ خْ ؤُيُوجِيڒْ،
مِينْزِي ژْرِيغْ أَقَا ذِينْ ثْوِيزَا إِ نشّْ
غَارْ ثوَّارْثْ ن ثنْذِينْثْ، ▫
22 أجّْ خنِّي أَذْ أَيِي ثوْضَا
ثغْرُوضْثْ إِنُو زڭْ إِجِيمَانْ،
أَذْ أَيِي يَارْژْ ؤُغِيڒْ إِنُو زڭْ يِيغسْ!
23 مَاغَارْ أَذْ خَافِي د-إِوْضَا
ؤُنخْڒِيعْ أَمقّْرَانْ،
إِشْثْ ن ڒْمُوصِيبثْ زِي غَارْ أَربِّي،
وَارْ زمَّارغْ أَذْ ڭّغْ وَالُو
زَّاثْ إِ ؤُعُودْجِي نّسْ.
24 مَاڒَا ڭِّيغْ ؤُرغْ ذ أَثشْڒِي إِنُو،
نِيغْ نِّيغْ إِ وُورغْ إِغْڒَانْ أَطَّاسْ:
’شكْ ذ ڒَامَانْ إِنُو!‘، ▪
25 مَاڒَا فَارْحغْ ؤُمِي إِمْغَارْ وَاڭْڒَا إِنُو،
ؤُمِي أَفُوسْ إِنُو إِطّفْ أَطَّاسْ ذ أَڭْڒَا، ▪
26 مَاڒَا ژْرِيغْ ثَافَاوْثْ ن ثْفُوشْثْ خْمِي ثتّْوسّڭْ،
نِيغْ ثَازِيرِي خْمِي ثڭُّورْ ذِي ثِيسِّيقْثْ نّسْ، ▪
27 ؤُشَا إِتّْوَاغْوَا وُوڒْ إِنُو س ثْنُوفّْرَا،
ؤُشَا أَقمُّومْ إِنُو، إِسُّوذمْ إِ-ث ؤُفُوسْ إِنُو،
28 خنِّي إِڒِي ؤُڒَا ذ مَانْ أَيَا ذ ڒْمُوعْصِييّثْ
أَذْ ت وْشنْ إِ ڒْقُوضَاثْ،
مَاغَارْ خنِّي أَذْ نْكَارغْ أَربِّي
نِّي إِدْجَانْ سنّجْ.
29 مَاڒَا فَارْحغْ إِ أَرْژِييّثْ
ن ونِّي ذ أَيِي إِشَارّْهنْ،
فَارْحغْ ؤُمِي ث إِڒْقفْ ڒْغَارْ! ▪
30 نشّْ مَاشَا وَارْ جِّيغْ أَنغْ إِنُو أَذْ إِخْضَا،
ؤُمِي كّْوَارغْ ڒعْمَارْ نّسْ س نّعْڒثْ! ▪
31 مَاڒَا إِرْيَازنْ نِّي إِدْجَانْ ذڭْ ؤُقِيضُونْ إِنُو
وَارْ قَّارنْ:
’مَانْ ونْ وَارْ إِتّْوَاسّْجِيوْننْ
زڭْ يِينِّي إِكْسِينْ زڭْ ويْسُومْ نّسْ؟‘
32 ؤُڒَا ذ إِجّْ ن ڒْبَارَّانِي
وَارْ إِسّنْسْ ذِي بَارَّا خْ وبْرِيذْ،
مَاغَارْ إِ ؤُمْسبْرِيذْ أَرْزْمغْ ثِيوُّورَا إِنُو.▪
33 مَاڒَا نشّْ، أَمْ أَذَامْ، ذْڒِيغْ أَخطُّو إِنُو،
ؤُمِي سّْنُوفَّارغْ ڒْمُوعْصِييّثْ إِنُو
ذڭْ وحْسِينْ إِنُو، ▫
34 مِينْزِي ڭّْوذغْ زِي ڒْغَاشِي أَمقّْرَانْ،
نِيغْ إِسّْنخْڒعْ أَيِي ؤُسحْقَارْ ن ڒْوَاشُونْ إِنُو،
أَڒَامِي قِّيمغْ سّغْذغْ،
وَارْ فِّيغغْ عَاذْ زِي ثوَّارْثْ غَارْ بَارَّا ...
35 مْڒِي غَارِي إِجّنْ ونِّي ذ أَيِي غَا إِسْڒنْ.
خْزَارْ، أَشمِّيعْ إِنُو
- أَمْزمَّارْ خْ كُوڒْشِي أَذْ خَافِي د-يَارّْ -
ؤُڒَا ذ أَذْلِيسْ إِتّْوَانّْضنْ نِّي ث يُورَا
ورْيَازْ نِّي كِيذِي إِتّمْشُوبُّوشنْ. ▪
36 معْلِيكْ ؤُفِيغْ مَا وَارْ ث أَربُّوغْ
خْ ثْغَارْضْثْ إِنُو،
أَذْ ث قّْنغْ إِ ؤُزدْجِيفْ إِنُو أَمْ يِيجّْ ن تَّاجْ.
37 إِوَا، أَذْ أَسْ إِنِيغْ ڒْقدّْ ن إِصُورَافْ إِنُو،
أَذْ غَارسْ د-قَارّْبغْ أَمْ يِيجّْ ن ڒْحَاكمْ.
38 مَاڒَا ڒعْرَاصِي إِنُو إِسْغُويْ خَافِي،
إِعيَّاذنْ نّسْ أَذْ رُونْ
أَكْ-ذ وَايَاوْيَا مَارَّا،
39 مَاڒَا شِّيغْ صَّابثْ نّسْ نْهْڒَا أَخدْجصْ،
نِيغْ ڭِّيغْ ڒعْمَارْ ن إِخمَّاسنْ نّسْ
إِضْڒقْ إِ بُوحْبڒْ،
40 أجّْ خنِّي أَذْ إِغْمِي شْبَارْقْ أَكْ-ذ إِسنَّاننْ
ذڭْ ومْشَانْ ن يِيرْذنْ،
ؤُڒَا ذ ڒعْشُوبْ يَارْصُوذنْ
ذڭْ ومْشَانْ ن إِمنْذِي.
أَقَا ذَا إِ قْضَانْ وَاوَاڒنْ ن أَيُوبْ.