مِينْ إِقَّارْ وذْلِيسْ إِقذْسنْ خْ مَامّشْ د-إِخْڒقْ أَربِّي مَارَّا؟

أَمزْوَارُو - ؤُذمْ 1

ثَاخڒْقِيثْ ن أَجنَّا ذ ثمُّورْثْ

ذڭْ ؤُمزْوَارُو إِخْڒقْ-د أَربِّي إِجنْوَانْ ذ ثمُّورْثْ.

ثُوغَا ثَامُّورْثْ ثَاربّجْ ؤُ ثخْڒَا ؤُ خْ وُوذمْ ن وَامَانْ يُودْجْغنْ طّْڒَامْ ؤُ أَرُّوحْ ن أَربِّي ثُوغَا إِتّْرَاحْ إِتَّاسْ-د خْ وُوذمْ ن وَامَانْ.

 

ؤُشَا إِنَّا أَربِّي ”أَذْ د-ثَاسْ ثْفَاوْثْ“ ؤُشَا ثُوسَا-د ثْفَاوْثْ!

إِژْرَا أَربِّي بلِّي ثِيفَاوْثْ ثصْبحْ ؤُشَا إِبْضَا أَربِّي جَارْ ثْفَاوْثْ ذ طّْڒَامْ.

إِڒَاغَا أَربِّي ثِيفَاوْثْ ’أَزِيڒْ‘ ؤُ ’طّْڒَامْ‘ إِڒَاغَا أَسْ ’دْجِيڒثْ‘. ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ أَمزْوَارُو.

 

ؤُشَا إِنَّا أَربِّي ”أَذْ ثِيڒِي إِشْثْ ن ڒْْقُوبّثْ ذِي ڒْْوسْثْ ن وَامَانْ، أَذْ ثبْضَا أَمَانْ خْ وَامَانْ!“

أَربِّي إِڭَّا ڒْْقُوبّثْ ن ؤُجنَّا ؤُشَا إِبْضَا أَمَانْ إِ إِدْجَانْ سْوَادَّايْ إِ ڒْْقُوبّثْ خْ وَامَانْ إِ إِدْجَانْ سنّجْ إِ ڒْْقُوبّثْ. ؤُشَا أَمُّو إِ ثمْسَارْ.

إِڒَاغَا أَربِّي إِ ڒْْقُوبّثْ ’أَجنَّا‘. ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ثْنَاينْ.

 

ؤُشَا إِنَّا أَربِّي ”أَذْ مُوننْ وَامَانْ إِ إِدْجَانْ سْوَادَّايْ إِ ؤُجنَّا غَارْ إِجّنْ ومْشَانْ مَاحنْذْ أَذْ د-إِبَانْ ڒْْبَارّْ!“ ؤُشَا أَمُّو إِ ثمْسَارْ.

إِڒَاغَا أَربِّي إِ ڒْْبَارّْ ’ثَامُّورْثْ‘ ؤُشَا أَمُونِي ن وَامَانْ إِڒَاغَا أَسْ ’ڒبْحُورْ‘. ؤُشَا إِژْرَا أَربِّي بلِّي مَانْ أَيَا إِصْبحْ.

إِنَّا أَربِّي ”أَذْ د-ثسّغْمِي ثمُّورْثْ أَغمُّويْ أَزِيزَا: أَفْسُو أَزِيزَا إِ إِزَارّْعنْ زَّارِيعثْ ذ ثْشجِّيرَا س فْرُوثَا إِ ذ إِتِّيشّنْ فْرُوثَاثْ أَمشْنَاوْ مَارْكَا نْسنْثْ س زَّارِيعثْ نْسنْثْ ذَايْسْ خْ وُوذمْ ن ثمُّورْثْ!“ ؤُشَا أَمُّو إِ ثمْسَارْ.

ثسّغْمِي-د ثمُّورْثْ أَغمُّويْ أَزِيزَا: أَفْسُو أَزِيزَا إِ إِزَارّْعنْ زَّارِيعثْ أَمشْنَاوْ مَارْكَا نّسْ ذ ثْشجِّيرَا إِ د-إِتِّيشّنْ ڒْْغِيدْجثْ أَمشْنَاوْ مَارْكَا نْسنْثْ س زَّارِيعثْ نْسنْثْ ذَايْسْ. ؤُشَا إِژْرَا أَربِّي بلِّي مَانْ أَيَا إِصْبحْ.

ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ثْڒَاثَا.

 

ؤُشَا إِنَّا أَربِّي ”أَذْ (ذِينْ) إِڒِينْثْ ثْفَاوِينْ ذِي ڒْْقُوبّثْ ن ؤُجنَّا حِيمَا أَذْ بْضَانْثْ جَارْ وَاسّْ ذ دْجِيڒثْ، أَذْ إِڒِينْثْ ذ ڒِْيمَارَاثْ ذ ڒْْوقْثْ إِثْوَاڭّنْ ذ وُوسَّانْ ذ إِسڭّْوُوسَا ؤُشَا أَذْ إِڒِينْثْ ذ ثِيفَاوِينْ ذِي ڒْْقُوبّثْ ن ؤُجنَّا حِيمَا أَذْ وْشنْثْ ثِيفَاوْثْ خْ ثمُّورْثْ!“ ؤُشَا أَمُّو إِ ثمْسَارْ.

إِڭَّا أَربِّي ثْنَاينْ ن ثْفَاوِينْ مْغَارنْثْ، ثِيفَاوْثْ ثَامقّْرَانْثْ حِيمَا أَذْ ثحْكمْ خْ وَاسّْ ؤُ ثِيفَاوْثْ ثَامژْيَانْثْ هِيمَا أَذْ ثحْكمْ خْ دْجِيڒثْ، ؤُڒَا ذ إِثْرَانْ.

إِسَّارْسْ إِثنْثْ أَربِّي ذِي ڒْْقُوبّثْ ن ؤُجنَّا حِيمَا أَذْ وْشنْثْ ثِيفَاوْثْ خْ ثمُّورْثْ ؤُ حِيمَا أَذْ حكْمنْثْ خْ وَاسّْ ذ دْجِيڒثْ ؤُ حِيمَا أَذْ بْضَانْثْ جَارْ ثْفَاوْثْ ذ طّْڒَامْ. ؤُشَا إِژْرَا أَربِّي بلِّي مَانْ أَيَا إِصْبحْ. ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ أَربْعَا.

 

ؤُشَا إِنَّا أَربِّي ”أَذْ د-سّفّْينْ وَامَانْ س وسْفَايْ ن مَارَّا مِينْ ذَايْسْ ن بُوحْبڒْ إِدَّارنْ ؤُشَا أَذْ ذِينْ ضْونْ إِجْضَاضْ سنّجْ إِ ثمُّورْثْ غَارْ مَانِي ثدْجْ ڒْْقُوبّثْ ن ؤُجنَّا!“ إِخْڒقْ-د أَربِّي إِمُودَّارنْ إِمقّْرَاننْ ذِي ڒبْحَارْ ؤُ مَارَّا بُوحْبڒْ إِدَّارنْ إِتّنْهزَّانْ إِ خَاسْ إِسّفّْينْ وَامَانْ أَمشْنَاوْ مَارْكَاثْ نْسنْ ؤُشَا مَارَّا إِجْضَاضْ س وفْرِيونْ أَمشْنَاوْ مَارْكَاثْ نْسنْ. ؤُشَا إِژْرَا أَربِّي بلِّي مَانْ أَيَا إِصْبحْ.

إِبَارْكْ إِثنْ أَربِّي، إِنَّا ”جّمْ-د ڒْْغِيدْجثْ، ثْوَاكْثَارمْ،عمَّارمْ أَمَانْ ن ڒبْحُورْ ؤُشَا أَذْ ثْوَاكْثَارنْ إِجْضَاضْ ذِي ثمُّورْثْ.“

ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ خمْسَا.

 

ؤُشَا إِنَّا أَربِّي ”أجّْ ثمُّورْثْ أَذْ ثسُّوفّغْ مَارَّا مِينْ غَارْسْ ذ بُوحْبڒْ إِدَّارنْ أَمشْنَاوْ مَارْكَا نّسْ: ڒبْهَايمْ ذ إِمُودَّارنْ نِّي إِتّْبُوعنْ ذ ڒْْمَاڒْ ن ڒخْڒَا أَمشْنَاوْ مَارْكَا نْسنْ!“ ؤُشَا أَمُّو إِ ثمْسَارْ. إِڭَّا أَربِّي ڒْْمَاڒْ ن ڒخْڒَا ن ثمُّورْثْ أَمشْنَاوْ مَارْكَا نْسنْ، ؤُ ڒبْهَايمْ أَمشْنَاوْ مَارْكَا نْسنْثْ ؤُ مَارَّا إِمُودَّارنْ إِنِّي إِتّْبُوعنْ خْ ثمُّورْثْ أَمشْنَاوْ مَارْكَاثْ نْسنْ. ؤُشَا إِژْرَا أَربِّي بلِّي مَانْ أَيَا إِصْبحْ.

 

إِنَّا أَربِّي ”أجّْ أَنغْ أَذْ نڭّْ أَذَامْ، (بْنَاذمْ)، ذِي صِّيفثْ نّغْ، ذڭْ وَارْوَاسْ نّغْ، ؤُشَا أَذْ غَارْسْ يِيڒِي جّهْذْ خْ إِسڒْمَانْ ن ڒبْحَارْ ؤُ خْ إِجْضَاضْ ن ؤُجنَّا ؤُ خْ ڒبْهَايمْ ؤُ خْ مَارَّا ثَامُّورْثْ ؤُ خْ مَارَّا إِمُودَّارنْ إِنِّي إِتّْبُوعنْ خْ ثمُّورْثْ!“ إِخْڒقْ-د أَربِّي أَذَامْ ذِي صِّيفثْ نّسْ. إِخْڒقْ إِثْ-د ذِي صِّيفثْ ن أَربِّي، إِخْڒقْ إِثنْ-د أَوْثمْ ذ ثوْثمْثْ. إِبَارْكْ إِثنْ أَربِّي ؤُشَا إِنَّا أَسنْ أَربِّي ”جّمْ-د ڒْْغِيدْجثْ، ثْوَاكْثَارمْ،عمَّارمْ ثَامُّورْثْ ؤُشَا أَرّمْ ت-إِدّْ سَاذُو ؤُفُوسْ نْومْ، حكْممْ خْ إِسڒْمَانْ ن ڒبْحَارْ ؤُ خْ إِجْضَاضْ ن ؤُجنَّا ؤُ خْ مَارَّا إِمُودَّارنْ نِّي إِتّْبُوعنْ خْ ثمُّورْثْ!“

 

إِنَّا أَربِّي ”خْزَارمْ، أَذْ أَومْ وْشغْ مَارَّا أَفْسُو أَزِيزَا إِ إِزَارّْعنْ زَّارِيعثْ خْ وُوذمْ ن ثمُّورْثْ ؤُ مَارَّا ثِيشجِّيرَا س ڒْْغِيدْجثْ غَارْ ثْشجَّارْثْ نِّي إِزَارّْعنْ زَّارِيعثْ. ذ مَانْ أَيَا أَذْ أَومْ يِيڒِي ذ مَاشَّا ؤُ إِ مَارَّا ڒْْمَاڒْ ن ڒخْڒَا ن ثمُّورْثْ ؤُ إِ مَارَّا إِجْضَاضْ ن ؤُجنَّا ؤُ إِ مَارَّا مِينْ إِتّْبُوعنْ خْ ثمُّورْثْ إِ ذِي إِدْجْ بُوحْبڒْ إِدَّارنْ، أَذْ أَسنْ يِيڒِي مَارَّا أَفْسُو (أَزِيزَا) ذ مَاشَّا إِ نِيثْنِي.“ ؤُشَا أَمُّو إِ ثمْسَارْ.

ؤُشَا إِژْرَا أَربِّي مَارَّا مِينْ إِڭَّا، ؤُ خْزَارْ، ثُوغَا إِصْبحْ أَطَّاسْ. ؤُشَا ثذْوڒْ ذ ثَامذِّيثْ ؤُ إِذْوڒْ ذ صّْبحْ: ذ أَسّْ وِيسّْ ستَّا.

 

أَمزْوَارُو - ؤُذمْ 2

أَمُّو إِ ثْوَاكمّْڒنْ إِجنْوَانْ ذ ثمُّورْثْ ذ قَاعْ أَستّفْ نْسنْ ن ثْزمَّارْ.

ذڭْ وَاسّْ وِيسّْ سبْعَا إِكمّڒْ أَربِّي ڒْْخذْمثْ نّسْ إِ إِڭَّا ؤُشَا يَاريّحْ ذڭْ وَاسّْ وِيسّْ سبْعَا زِي مَارَّا ڒْْخذْمثْ نّسْ إِ يڭَّا.

إِبَاركْ أَربِّي أَسّْ وِيسّْ سبْعَا ؤُشَا إِسّْقدّسْ إِثْ، مِينْزِي ذَايْسْ إِ يَاريّحْ زِي مَارَّا ڒْْخذْمثْ نّسْ إِ د-إِخْڒقْ أَربِّي مَاحنْذْ أَذْ ت إِڭّْ أَمنِّي.

 

إِنَا ذ إِنِّي إِثْوَارْونْ زڭْ إِجنْوَانْ ذ ثمُّورْثْ ڒَْامِي د-ثْوَاخڒْقنْثْ ذڭْ وَاسّْ إِ إِڭَّا سِيذِي أَربِّي ثَامُّورْثْ ذ إِجنْوَانْ.

ؤُڒَا ذ إِجّْ ن شْبَارْقْ وَارْ ثُوغِي عَاذْ ذِي ثمُّورْثْ نِيغْ ذ إِجّْ ن ؤُفْسُو ن ييَّارْ وَارْ د-إِغْمِي عَاذْ، مِينْزِي سِيذِي أَربِّي وَارْ إِجِّي أَنْژَارْ أَذْ إِوّثْ عَاذْ خْ ثمُّورْثْ ؤُشَا وَارْ ثُوغِي ذِينْ أَذَامْ (عَاذْ) حِيمَا أَذْ إِخْذمْ ثَامُّورْثْ. مَاشَا ثْڭَاعّذْ إِشْثْ ن ثَايُوثْ زِي ثمُّورْثْ، ثسُّو مَارَّا ؤُذمْ ن ثمُّورْثْ.

 

خنِّي إِكوّنْ سِيذِي أَربِّي أَذَامْ زِي ثْعجَّاجْثْ ن ؤُشَاڒْ ؤُشَا إِصُوضْ ڒعْوِينْ ن ثُوذَارْثْ ذِي ثِينْزَارْثْ نّسْ. أَمُّو إِ إِذْوڒْ أَذَامْ ذ إِجّْ ن بُوحْبڒْ إِدَّارْ.

خنِّي إِژُّو سِيذِي أَربِّي جّنّثْ جِّيهثْ ن شَّارْقْ ذِي عَاذْنْ ؤُشَا إِسَّارْسْ ذِينْ أَذَامْ إِ إِكوّنْ ؤُشَا إِسّغْمِي-د سِيذِي أَربِّي زِي ثمُّورْثْ كُوڒْ ثَاشجَّارْثْ ثشْنَا إِ ڒْْخژْرَاثْ ؤُ ثْمِيژِيذْثْ إِ مَاشَّا ؤُ إِسّغْمِي-د ثَاشجَّارْثْ ن ثُوذَارْثْ ذِي ڒْْوسْثْ ن جّنّثْ ؤُڒَا ذ ثَاشجَّارْثْ ن ثُوسّْنَا ن ڒْْخَارْ ذ ڒْْغَارْ.

 

إِفّغْ-د إِجّْ ن يغْزَارْ زِي عَاذْنْ حِيمَا أَذْ إِسُّووْ جّنّثْ ؤُ زِي سنِّي إِمّْسبْضَا خْ أَربْعَا ن إِقمُّومنْ. إِسمْ ن يغْزَارْ أَمزْوَارُو فِيشُونْ إِ ثُوغَا إِنّْضنْ إِ مَارَّا ثَامُّورْثْ ن حَاوِيلَا مَانِي إِدْجْ وُورغْ. أَقَا ؤُرغْ ن ثمُّورْثْ نِّي إِصْبحْ. أَقَا ذِينْ عَاوذْ ڒبْخُورْ ن سُّوذَانْ ذ وژْرُو ن ’بِيرِيلْ‘.

إِسمْ ن يغْزَارْ وِيسّْ ثْنَاينْ ذ جِيهُونْ إِ ثُوغَا إِنّْضنْ إِ مَارَّا ثَامُّورْثْ ن كُوشْ. إِسمْ ن يغْزَارْ وِيسّْ ثْڒَاثَا ذ حِيذَاقِّيلْ إِ إِسُّوفُّوغنْ غَارْ شَّارْقْ ن أَشُّورْ. إِغْزَارْ وِيسّْ أَربْعَا ذ لْفُورَاثْ.

 

خنِّي إِكْسِي سِيذِي أَربِّي أَذَامْ ؤُشَا إِسَّارْسْ إِثْ ذِي جّنّثْ ن عَاذْنْ، هِيمَا أَذْ ت إِخْذمْ ؤُ أَذْ ت إِحْضَا. سِيذِي أَربِّي إِوصَّا أَذَامْ، إِنَّا ”زِي مَارَّا ثِيشجِّيرَا ن جّنّثْ أَذْ ثشّذْ مَاشَّا، مَاشَا زِي ثْشجَّارْثْ ن ثُوسّْنَا ن ڒْْخَارْ ذ ڒْْغَارْ وَارْ تّتّذْ شَا زَّايسْ، مِينْزِي ذڭْ وَاسّْ إِ زَّايسْ إِ غَا ثشّذْ، ڒْْموْثْ إِ غَا ثمْثذْ.“

 

إِنَّا سِيذِي أَربِّي ”وَارْ إِعدّڒْ أَذْ يِيڒِي أَذَامْ وحْذسْ. أَذْ أَسْ ڭّغْ وِي ث إِ غَا إِعَاوْننْ، وِي ث إِ غَا إِڒِيقّنْ قِيبَاتْشْ نّسْ.“

ؤُشَا إِڭَّا سِيذِي أَربِّي زڭْ ؤُشَاڒْ مَارَّا ڒْْمَاڒْ ن ڒخْڒَا ؤُ مَارَّا إِجْضَاضْ ن ؤُجنَّا ؤُشَا إِنْذهْ إِثنْ غَارْ أَذَامْ حِيمَا أَذْ إِژَارْ مَامّشْ ثنْ إِ غَا إِسمَّا. مَامّشْ إِ غَا إِسمَّا أَذَامْ كُوڒْ بُوحْبڒْ إِدَّارنْ ذ وَا ذ إِسمْ نّسْ. إِڭَّا أَذَامْ إِسْمَاونْ إِ مَارَّا ڒبْهَايمْ ذ إِجْضَاضْ ن إِجنْوَانْ ؤُ إِ مَارَّا ڒْْمَاڒْ ن ڒخْڒَا، مَاشَا إِ أَذَامْ وَارْ إِثْوِيفِي وِي ث إِ غَا إِعَاوْننْ ذ وِي ث إِ غَا إِڒِيقّنْ قِيبَاتْشْ نّسْ.

 

إِسّهْوَا-د سِيذِي أَربِّي إِجّْ ن يِيضصْ يُودْجغْ خْ أَذَامْ ؤُشَا أَمْ ثُوغَا إِطّصْ، ڒخْذنِّي إِكْسِي إِشْثنْ زِي ثْغزْذِيسِينْ نّسْ ؤُشَا إِقّنْ أَمْشَانْ سَاذُو نّسْ س ويْسُومْ. يَارَّا سِيذِي أَربِّي ثَاغزْذِيسْثْ ثنِّي إِ إِكْسِي زِي أَذَامْ ذ ثَامْغَارْثْ ؤُشَا إِوْيِي ت-إِدّْ غَارْ أَذَامْ. إِنَّا أَذَامْ

 

”ڒخُّو ثَانِيثَا أَقَا-ت ذ إِغسْ زڭْ إِخْسَانْ إِنُو ذ أَيْسُومْ زڭْ ويْسُومْ إِنُو.

أَذْ ثثْوَاسمَّا ’ثَارْيَازْثْ‘، (إِخْسْ أَذْ يِينِي ’ثَامْغَارْثْ‘)، مِينْزِي نتَّاثْ ثثْوَاكْسِي-د زڭْ ورْيَازْ.

سْ مَانْ أَيَا أَذْ يجّْ أَرْيَازْ بَابَاسْ ذ يمَّاسْ، أَذْ إِقّنْ غَارْ ثمْغَارْثْ نّسْ، أَذْ إِڒِينْ ذ إِجّْ ن ويْسُومْ.“

 

ثُوغَا-ثنْ س ثْنَاينْ إِذْسنْ ذ إِعَارْيَاننْ، أَذَامْ ذ ثمْغَارْثْ نّسْ، ؤُشَا وَارْ ثُوغِي ذِينْ شَا ڒحْيَا جَارَاسنْ.