1 ⵓⵛⴰ ⵥⵔⵉⵖ ⴷⴻⴳ ⵓⴼⵓⵙ ⴰⴼⵓⵙⵉ ⵏ ⵡⴻⵏⵏⵉ ⵉⵇⵇⵉⵎⴻⵏ ⵅ ⵍⵄⴰⵔⵛ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ, ⵜⵓⵖⴰ ⵅⴰⵙ ⵜⵉⵔⴰ ⵖⴰⵔ ⴷⴰⵅⴻⵍ ⴷ ⴱⴰⵔⵔⴰ, ⵓⵛⴰ ⴰⴷⵍⵉⵙ ⵜⵓⵖⴰ ⵉⵜⵜⵡⴰⵛⴻⵎⵎⴻⵄ ⵙ ⵙⴻⴱⵄⴰ ⵏ ⵉⵛⴻⵎⵎⵉⵄⴻⵏ. ^■   2 ⵓⵛⴰ ⵥⵔⵉⵖ ⵉⵊⵊ ⵏ ⵍⵎⴰⵍⴰⴽ ⵉⵊⵀⴻⴷ ⵏⵏⴻⵖⵏⵉ, ⵉⵜⵜⵍⴰⵖⴰ ⵙ ⵊⵊⴻⵀⴷ: “ⵎⴰⵏ ⵡⴻⵏ ⵉⵙⴷⴰⵀⴻⴵⴻⵏ ⴰⴷ ⵢⴰⵔⵥⴻⵎ ⴰⴷⵍⵉⵙ-ⴰ ⵉⵜⵜⵡⴰⵏⵏⴹⴻⵏ ⵓⵛⴰ ⴰⴷ ⵉⴽⴽⴻⵙ ⵉⵛⴻⵎⵎⵉⵄⴻⵏ ⵏⵏⴻⵙ?” 3 ⵓⵛⴰ ⵓⵍⴰ ⴷ ⵉⵊⵊ ⴷⴻⴳ ⵓⵊⴻⵏⵏⴰ ⵏⵉⵖ ⴷⵉ ⵜⴻⵎⵎⵓⵔⵜ ⵏⵉⵖ ⵙⴰⴷⵓ ⵜⴻⵎⵎⵓⵔⵜ ⵉⵥⴻⵎⵎⴰⵔ ⴰⴷ ⵢⴰⵔⵥⴻⵎ ⴰⴷⵍⵉⵙ-ⴰ ⵉⵜⵜⵡⴰⵏⵏⴹⴻⵏ ⵓ ⴰⴷ ⵉⴽⴽⴻⵙ ⵉⵛⴻⵎⵎⵉⵄⴻⵏ ⵏⵏⴻⵙ, ⴰⴷ ⴷⴰⵢⴻⵙ ⵉⵅⵥⴰⵔ. ^■   4 ⵏⴻⵛⵛ ⵔⵓⵖ ⴰⵟⵟⴰⵙ ⵓⵎⵉ ⵡⴰⵔ ⵓⴼⵉⵏ ⵡⵉ ⵉⵙⴷⴰⵀⴻⴵⴻⵏ ⴰⴷ ⵢⴰⵔⵥⴻⵎ ⴰⴷⵍⵉⵙ-ⴰ ⵉⵜⵜⵡⴰⵏⵏⴹⴻⵏ ⵓ ⴰⴷ ⵢⴰⵔⵥⴻⵎ ⵉⵛⴻⵎⵎⵉⵄⴻⵏ ⵏⵏⴻⵙ. 5 ⵉⵊⵊⴻⵏ ⵥⴻⴳ ⵉⵎⵖⴰⵔⴻⵏ ⵉⵏⵏⴰ ⴰⵢⵉ: “ⵡⴰⵔ ⵜⵜⵔⵓ ⵛⴰ! ⵅⵥⴰⵔ ⴰⵢⵔⴰⴷ ⵥⴻⴳ ⴰⵢⵜ ⵏ ⵢⴰⵀⵓⴷⴰ, ⴰⵥⵡⴰⵔ ⵏ ⴷⴰⵡⵓⴷ, ⴰⵇⴰ ⵉⵖⴻⵍⵍⴻⴱ ⵃⵉⵎⴰ ⴰⴷ ⵢⴰⵔⵥⴻⵎ ⴰⴷⵍⵉⵙ-ⴰ ⵉⵜⵜⵡⴰⵏⵏⴹⴻⵏ ⵓ ⵃⵉⵎⴰ ⴰⴷ ⵢⴰⵔⵥ ⵉⵛⴻⵎⵎⵉⵄⴻⵏ ⵏⵏⴻⵙ.” ^■  

6 ⵓⵛⴰ ⵥⵔⵉⵖ ⴷⵉ ⵍⵡⴻⵙⵜ ⵏ ⵍⵄⴰⵔⵛ ⴷ ⴰⵔⴻⴱⵄⴰ ⵏ ⵉⵎⴻⴷⴷⴰⵔⴻⵏ ⵓⵛⴰ ⴷⵉ ⵍⵡⴻⵙⵜ ⵏ ⵉⵎⵖⴰⵔⴻⵏ, ⵉⵊⵊ ⵏ ⵉⵥⵎⴰⵔ ⵉⴱⴻⴷⴷ, ⵉⴳⴳⴰ ⴰⵅⵎⵉ ⴷ ⵜⴰⵖⴰⵔⵚⵜ. ⵏⴻⵜⵜⴰ ⵖⴰⵔⴻⵙ ⵙⴻⴱⵄⴰ ⵏ ⵡⴰⵛⵛⴰⵡⴻⵏ ⴷ ⵙⴻⴱⵄⴰ ⵏ ⵜⵉⵟⵟⴰⵡⵉⵏ, ⵏⵉⵜⵏⵉ ⴷ ⵙⴻⴱⵄⴰ ⵏ ⴰⵔⵔⵓⵃⴰⵜ ⵏ ⴰⵔⴻⴱⴱⵉ ⵉⵏⵏⵉ ⴷⴷ-ⵉⵜⵜⵡⴰⵙⵙⴻⴽⴽⴻⵏ ⵖⴰⵔ ⴷⴷⵓⵏⴻⵛⵜ ⵜⵎⵓⵏ. ^□  ■   7 ⴰⵇⴰ ⵏⴻⵜⵜⴰ ⵢⵓⵙⴰ-ⴷⴷ ⵓⵛⴰ ⵉⴽⵙⵉ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ ⵥⴻⴳ ⵓⴼⵓⵙ ⵏ ⵡⴻⵏⵏⵉ ⵜⵓⵖⴰ ⵉⵇⵇⵉⵎⴻⵏ ⵅ ⵍⵄⴰⵔⵛ.

8 ⴰⵍⴰⵎⵉ ⵉⵟⵟⴻⴼ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ, ⵡⴹⴰⵏ-ⴷⴷ ⴰⵔⴻⴱⵄⴰ ⵏ ⵉⵎⴻⴷⴷⴰⵔⴻⵏ ⴷ ⴰⵔⴻⴱⵄⴰ ⵓ-ⵄⵉⵛⵔⵉⵏ ⵏ ⵉⵎⵖⴰⵔⴻⵏ ⵖⴰⵔ ⵜⴻⵎⵎⵓⵔⵜ ⵥⵥⴰⵜ ⵉ ⵢⴻⵥⵎⴰⵔ. ⵏⵉⵜⵏⵉ ⵎⴰⵔⵔⴰ ⵉⴷⵙⴻⵏ ⵖⴰⵔⵙⴻⵏ ⵉⵛⵜ ⵏ ⵍⴳⴰⵎⴱⵔⵉ ⴷ ⵟⵟⴱⴰⵚⴰ ⵏ ⵡⵓⵔⴻⵖ ⵛⵛⵓⵔⴻⵏⵜ ⵙ ⵍⴻⴱⵅⵓⵔ: ⵎⴰⵏ ⴰⵢⴰ ⴷ ⵜⵉⵥⴰⴵⵉⵜⵉⵏ ⵏ ⵉⵎⵇⴻⴷⴷⴰⵙⴻⵏ. ^■   9 ⵓⵛⴰ ⵖⴻⵏⵏⵊⴻⵏ ⵉⵊⵊ ⵏ ⵉⵥⵍⵉ ⵏ ⵊⴷⵉⴷ:

“ⵛⴻⴽ ⵜⴻⵙⴷⴰⵀⴻⴵⴻⴷ ⴰⴷ ⵜⴻⴽⵙⵉⴷ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ,

ⴰⴷ ⵜⴻⴽⴽⵙⴻⴷ ⵉⵛⴻⵎⵎⵉⵄⴻⵏ ⵏⵏⴻⵙ,

ⵎⵉⵏⵥⵉ ⵛⴻⴽ ⵜᵉⵜⵜⵡⴰⵖⴰⵔⵚⴻⴷ

ⵓⵛⴰ ⵙ ⵉⴷⴰⵎⵎⴻⵏ ⵏⵏⴻⴽ ⵜⴻⵙⵖⵉⴷ ⴰⵏⴻⵖ ⵉ ⴰⵔⴻⴱⴱⵉ,

ⵥⵉ ⴽⵓⵍ ⵜⴰⵇⴱⵉⵞ ⴷ ⵢⵉⵍⴻⵙ ⴷ ⵍⴳⴻⵏⵙ ⴷ ⵛⵛⴻⵄⴱ. ^■  

10 ⵛⴻⴽ ⵜⴰⵔⵔⵉⴷ ⵜⴻⵏ ⴷ ⵜⴳⴻⵍⴷⴰ ⴷ ⵉⴽⴻⵀⵀⴰⵏⴻⵏ ⵉ ⴰⵔⴻⴱⴱⵉ ⵏⵏⴻⵖ,

ⵓ ⵏⵉⵜⵏⵉ ⴰⴷ ⵃⴻⴽⵎⴻⵏ ⴰⵎ ⵉⵊⴻⴵⵉⴷⴻⵏ ⵅ ⵜⴻⵎⵎⵓⵔⵜ.” ^■  

11 ⵅⴻⵏⵏⵉ ⵥⵔⵉⵖ, ⵓⵛⴰ ⵙⵍⵉⵖ ⵜⵎⵉⵊⵊⴰ ⵏ ⵡⴰⵟⵟⴰⵙ ⵏ ⵍⵎⴰⵍⴰⴽⴰⵜ ⵏⵏⴹⴻⵏⵜ ⵉ ⵍⵄⴰⵔⵛ ⵓ ⵏ ⵉⵎⴻⴷⴷⴰⵔⴻⵏ ⵓ ⵏ ⵉⵎⵖⴰⵔⴻⵏ, ⵓⵛⴰ ⵜⵓⵖⴰ ⴰⵜⴻⵏ ⵄⴻⵛⵔⴰ-ⴰⵍⴰⴼ ⴷⵉ ⵄⴻⵛⵔⴰ ⵏ ⵍⵓⵍⵓⴼ ⵓ ⴰⵍⴰⴼ ⴷⵉ ⵍⵓⵍⵓⴼ, ^■  

12 ⵇⵇⴰⵔⴻⵏ ⵙ ⵜⵎⵉⵊⵊⴰ ⵉⵊⴻⵀⴷⴻⵏ:

“ⵉⵥⵎⴰⵔ ⵡⴻⵏⵏⵉ ⵉⵜⵜⵡⴰⵖⴰⵔⵚⴻⵏ ⵉⵙⴷⴰⵀⴻⴵ ⴰⴷ ⵉⵟⵟⴻⴼ

ⵚⵚⵓⵍⵟⴰ ⴷ ⵡⴰⴳⵍⴰ ⴷ ⵜⵉⵖⵉⵜ,

ⴷ ⵊⵊⴻⵀⴷ ⴷ ⵛⵛⴰⵏ ⴷ ⵓⵄⵓⴵⵉ,

ⴷ ⵍⴱⴰⵔⴰⴽⴰ!” ^■  

13 ⵓⵛⴰ ⵎⴰⵔⵔⴰ ⵡⵉ ⵉⴵⴰⵏ ⴷⴻⴳ ⵓⵊⴻⵏⵏⴰ ⵓ ⵅ ⵜⴻⵎⵎⵓⵔⵜ ⴷ ⵙⴰⴷⵓ ⵜⴻⵎⵎⵓⵔⵜ ⵓ ⵅ ⵍⴻⴱⵃⴰⵔ, ⵡⴰⵀ ⵇⴰⵄ ⵎⵉⵏ ⵉⴵⴰⵏ ⴷⴰⵢⵙⴻⵏ, ⵙⵍⵉⵖ ⴰⵙⴻⵏ, ⵇⵇⴰⵔⴻⵏ:

“ⴰⵇⴰⴷⵉ ⴷ ⵛⵛⴰⵏ ⴷ ⵓⵄⵓⴵⵉ ⴷ ⵚⵚⵓⵍⵟⴰ

ⴰⴷ ⵉⵍⵉⵏ ⵉ ⵡⴻⵏⵏⵉ ⵉⵇⵇⵉⵎⴻⵏ ⵅ ⵍⵄⴰⵔⵛ ⵓ ⵉ ⵢⴻⵥⵎⴰⵔ,

ⵉ ⵍⴻⴱⴷⴰ ⵇⴰⵄ!”

14 ⵓⵛⴰ ⵓⵎⵉ ⴰⵔⴻⴱⵄⴰ ⵏ ⵉⵎⴻⴷⴷⴰⵔⴻⵏ ⵏⵏⴰⵏ: “ⴰⵎⵉⵏ!”, ⵡⴹⴰⵏ ⵉⵎⵖⴰⵔⴻⵏ ⵖⴰⵔ ⵜⴻⵎⵎⵓⵔⵜ, ⵙⴻⵊⴷⴻⵏ.