1 ⵎⴰⵔⵔⴰ ⵡⴻⵏⵏⵉ ⵢⵓⵎⵏⴻⵏ ⴱⴻⵍⵍⵉ ⵢⴻⵛⵛⵓ ⴷ ⵍⵎⴰⵙⵉⵃ, ⴰⵇⴰ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⵥⵉ ⴰⵔⴻⴱⴱⵉ, ⵓⵛⴰ ⵎⴰⵔⵔⴰ ⵡⴻⵏⵏⵉ ⵉⵜⵜⴻⵅⵙⴻⵏ ⵡⴻⵏⵏⵉ ⵜ-ⵉ-ⴷⴷ ⵢⴻⵊⵊⵉⵏ, ⴰⴷ ⵉⵅⵙ ⵄⴰⵡⴻⴷ ⵡⴻⵏⵏⵉ ⵥⵥⴰⵢⴻⵙ ⴷⴷ-ⵉⵜⵜⵡⴰⵅⴻⵍⵇⴻⵏ. ^■   2 ⵣⵉ ⵎⴰⵏ ⴰⵢⴰ ⵏⴻⵙⵙⴻⵏ ⴱⴻⵍⵍⵉ ⵏⴻⵜⵜⴻⵅⵙ ⵜⴰⵔⵡⴰ ⵏ ⴰⵔⴻⴱⴱⵉ, ⵅⵎⵉ ⵏⴻⵜⵜⴻⵅⵙ ⴰⵔⴻⴱⴱⵉ ⵓ ⵏⴻⵜⵜⴻⴳⴳ ⵜⵉⵡⴻⵚⵚⴰ ⵏⵏⴻⵙ. 3 ⵎⵉⵏⵥⵉ ⵜⴰ ⴷ ⵜⴰⵢⵔⵉ ⵥⵉ ⴰⵔⴻⴱⴱⵉ, ⴰⴷ ⵏⴻⵃⴹⴰ ⵜⵉⵡⴻⵚⵚⴰ ⵏⵏⴻⵙ, ⵓⵛⴰ ⵜⵉⵡⴻⵚⵚⴰ ⵏⵏⴻⵙ ⵡⴰⵔ ⵡⵄⴰⵔⴻⵏⵜ ⵛⴰ. ^■   4 ⵎⴰⵔⵔⴰ ⵎⵉⵏ ⴷⴷ-ⵉⵜⵜⵡⴰⵅⴻⵍⵇⴻⵏ ⵥⵉ ⴰⵔⴻⴱⴱⵉ ⴰⴷ ⵉⵖⴻⵍⵍⴻⴱ ⵅ ⴷⴷⵓⵏⴻⵛⵜ. ⴷ ⵡⴰ ⴷ ⴰⵖⵍⴰⴱ ⵉ ⵉⵖⴻⵍⵍⴱⴻⵏ ⵅ ⴷⴷⵓⵏⴻⵛⵜ, ⴰⵇⴰ-ⵜ ⴷ ⵍ’ⵉⵎⴰⵏ ⵏⵏⴻⵖ! ^■   5 ⵎⴰⵏ ⵡⴻⵏ ⵉ ⵖⴰ ⵉⵖⴻⵍⵍⴱⴻⵏ ⵅ ⴷⴷⵓⵏⴻⵛⵜ, ⵎⵖⵉⵔ ⵡⴻⵏⵏⵉ ⵢⵓⵎⵏⴻⵏ ⴱⴻⵍⵍⵉ ⵢⴻⵛⵛⵓ ⴷ ⵎⵎⵉⵙ ⵏ ⴰⵔⴻⴱⴱⵉ! ^■  

6 ⴷ ⵡⴰ ⵉ ⴷⴷ-ⵉⴽⴽⵉⵏ ⵥⴻⴳ ⵡⴰⵎⴰⵏ ⴷ ⵉⴷⴰⵎⵎⴻⵏ, ⵢⴻⵛⵛⵓ ⵍⵎⴰⵙⵉⵃ. ⵡⴰⵔ ⴷⴷ-ⵢⴻⴽⴽⵉ ⵥⴻⴳ ⵡⴰⵎⴰⵏ ⵡⴰⵀⴰ, ⵎⴰⵛⴰ ⵥⴻⴳ ⵡⴰⵎⴰⵏ ⴷ ⵉⴷⴰⵎⵎⴻⵏ. 7 ⴰⵔⵔⵓⵃ ⴷ ⵡⴻⵏⵏⵉ ⵉⵛⴻⵀⵀⴷⴻⵏ, ⵎⵉⵏⵥⵉ ⴰⵔⵔⵓⵃ ⴷ ⵜⵉⴷⴻⵜⵜ. 8 ⵓⵛⴰ ⴰⵇⴰ ⴷⵉⵏ ⵜⵍⴰⵜⴰ ⵏ ⵢⵉⵏⵏⵉ ⵉⵛⴻⵀⵀⴷⴻⵏ: ⴰⵔⵔⵓⵃ ⴷ ⵡⴰⵎⴰⵏ ⴷ ⵉⴷⴰⵎⵎⴻⵏ, ⵓⵛⴰ ⵏⵉⵜⵏⵉ ⵙ ⵜⵍⴰⵜⴰ ⴷ ⵉⵊⵊⴻⵏ.

9 ⵎⴰⵍⴰ ⵏⴻⵇⴱⴻⵍ ⵛⵛⵀⴰⴷⴻⵜ ⵏ ⵉⵡⴷⴰⵏ, ⵎⴻⵛⵃⴰⵍ ⴷ ⵜⴰⵎⴻⵇⵇⵔⴰⵏⵜ ⵛⵛⵀⴰⴷⴻⵜ ⵏ ⴰⵔⴻⴱⴱⵉ? ⵜⴰ ⴷ ⵛⵛⵀⴰⴷⴻⵜ ⵏ ⴰⵔⴻⴱⴱⵉ ⵜⴻⵏⵏⵉ ⵉⵛⵀⴻⴷ ⵅ ⵎⵎⵉⵙ.

10 ⵡⴻⵏⵏⵉ ⵢⵓⵎⵏⴻⵏ ⴷⵉ ⵎⵎⵉⵙ ⵏ ⴰⵔⴻⴱⴱⵉ, ⵖⴰⵔⴻⵙ ⵛⵛⵀⴰⴷⴻⵜ-ⴰ ⴷⴻⴳ ⵉⵅⴻⴼ ⵏⵏⴻⵙ. ⵡⴻⵏⵏⵉ ⵡⴰⵔ ⵢⵓⵎⵉⵏⴻⵏ ⵛⴰ ⴷⵉ ⴰⵔⴻⴱⴱⵉ, ⴰⵇⴰ ⵉⴳⴳⴰ ⵉ-ⵜ ⴷ ⴱⵓ-ⵉⵅⴰⵔⵔⵉⵇⴻⵏ ⵎⵉⵏⵥⵉ ⵏⴻⵜⵜⴰ ⵡⴰⵔ ⵢⵓⵎⵉⵏ ⵛⴰ ⴷⵉ ⵛⵛⵀⴰⴷⴻⵜ ⵜⴻⵏⵏⵉ ⵉⵡⵛⴰ ⴰⵔⴻⴱⴱⵉ ⵅ ⵎⵎⵉⵙ. ^■  

11 ⵓⵛⴰ ⵜⴰ ⴷ ⵛⵛⵀⴰⴷⴻⵜ: ⴰⵔⴻⴱⴱⵉ ⵉⵡⵛⴰ ⴰⵏⴻⵖ ⵜⵓⴷⴰⵔⵜ ⵉⵜⵜⴷⵓⵎⴰⵏ ⵓⵛⴰ ⵜⵓⴷⴰⵔⵜ ⵏⵏⵉ ⴰⵇⴰ-ⵜⵜ ⴷⵉ ⵎⵎⵉⵙ. ^■  

12 ⵡⴻⵏⵏⵉ ⵖⴰⵔ ⵉⴵⴰ ⵜⴰⵎⴻⵎⵎⵉⵜ, ⵖⴰⵔⴻⵙ ⵜⵓⴷⴰⵔⵜ. ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⵎⵎⵉⵙ ⵏ ⴰⵔⴻⴱⴱⵉ, ⵡⴰⵔ ⵖⴰⵔⴻⵙ ⴱⵓ ⵜⵓⴷⴰⵔⵜ.

13 ⵓⵔⵉⵖ ⴰⵡⴻⵎ-ⴷⴷ ⵎⴰⵏ ⴰⵢⴰ, ⵃⵉⵎⴰ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵖⴰⵔⵡⴻⵎ ⵜⵓⴷⴰⵔⵜ ⵉⵜⵜⴷⵓⵎⴰⵏ ⵓⵛⴰ ⵃⵉⵎⴰ ⴰⴷ ⵜⴰⵎⵏⴻⵎ ⴷⴻⴳ ⵢⵉⵙⴻⵎ ⵏ ⵎⵎⵉⵙ ⵏ ⴰⵔⴻⴱⴱⵉ. ^■  

14 ⴷ ⵜⴰ ⴷ ⵜⵜⵉⵇⵇⴻⵜ ⵜⴻⵏⵏⵉ ⵖⴰⵔⵏⴻⵖ ⴷⴰⵢⴻⵙ, ⴰⵇⴰ ⵎⴰⵔⵔⴰ ⵎⵉⵏ ⵥⵥⴰⵢⴻⵙ ⵏⴻⵜⵜⴰⵔ ⵄⵍⴰⵃⵙⴰⴱ ⵎⵉⵏ ⵉⵅⵙ ⵏⴻⵜⵜⴰ, ⵏⴻⵜⵜⴰ ⴰⴷ ⵖⴰⵔⵏⴻⵖ ⵉⵙⴻⵍ. ^■  

15 ⵎⴰⵍⴰ ⵏⴻⵜⵜⵡⴰⵙⵙⴻⵇⵏⴻⵄ ⵏⵉⵛⴰⵏ ⴰⵇⴰ ⴰⴷ ⴰⵏⴻⵖ ⵉⵙⴻⵍ ⵎⵉⵏ ⵎⴰ ⴷ ⴰⵙ ⵏⴻⵜⵜⴰⵔ, ⵅⴻⵏⵏⵉ ⵏⴻⵜⵜⵉⵇⵇ ⴱⴻⵍⵍⵉ ⴰⵇⴰ ⵢⵓⵙⴰ-ⴷⴷ ⴰⵏⴻⵖ ⵎⵉⵏ ⴷ ⴰⵙ ⵏⴻⵜⵜⴰⵔ.

16 ⵎⴰⵍⴰ ⵉⵊⵊⴻⵏ ⵉⵥⵔⴰ ⵓⵎⴰⵙ ⵉⵅⴹⴰ, ⵉⵊⵊ ⵏ ⵓⵅⴻⵟⵟⵓ ⵡⴰⵔ ⵉⴵⵉ ⵛⴰ ⵉ ⵍⵎⴻⵡⵜ, ⴻⵊⵊ ⵉ-ⵜ ⴰⴷ ⵉⵜⵜⴰⵔ ⴷⵉ ⵟⵟⵡⴻⵄ ⵏⵏⴻⵙ, ⵓⵛⴰ ⴰⴷ ⴰⵙ ⵜⴻⵎⵎⴻⵡⵛ ⵜⵓⴷⴰⵔⵜ, ⵉ ⵡⴻⵏⵏⵉ ⵡⴰⵔ ⵉⵅⴻⵟⵟⵉⵏ ⵛⴰ ⵉ ⵍⵎⴻⵡⵜ. ⴰⵇⴰ ⴷⵉⵏ ⴰⵅⴻⵟⵟⵓ ⵉ ⵍⵎⴻⵡⵜ, ⵅ ⵡⴰ ⵡⴰⵔ ⴷ ⴰⵡⴻⵎ ⵇⵇⴰⵔⴻⵖ ⴰⴷ ⵉⵜⵜⴰⵔ. ^■  

17 ⵎⴰⵔⵔⴰ ⵜⵓⵄⴻⴼⴼⵏⴰ, ⴰⵇⴰ-ⵜ ⴷ ⴷⴷⴻⵏⴱ, ⵓⵛⴰ ⴰⵇⴰ ⴷⵉⵏ ⴷⴷⴻⵏⴱ ⵉ ⵡⴰⵔ ⵉⴵⵉⵏ ⵛⴰ ⴰⵍ ⵍⵎⴻⵡⵜ. ^■  

18 ⵏⴻⵙⵙⴻⵏ ⴱⴻⵍⵍⵉ ⴽⵓⵍ ⵉⵊⵊⴻⵏ ⵡⴻⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵥⵉ ⴰⵔⴻⴱⴱⵉ, ⵡⴰⵔ ⵉⵅⴻⵟⵟⵉ ⵛⴰ, ⵎⵉⵏⵥⵉ ⵡⴻⵏⵏⵉ ⴷⴷ-ⵉⵜⵜⵡⴰⵅⴻⵍⵇⴻⵏ ⵥⵉ ⴰⵔⴻⴱⴱⵉ ⴰⴷ ⵉⵃⴹⴰ ⵉⵅⴻⴼ ⵏⵏⴻⵙ ⵓ ⵡⴰⵔ ⵜ ⵉⵜⵜⵃⵉⴷⵉ ⵓⵎⵄⴻⴼⴼⴰⵏ.^■  

19 ⵏⴻⵙⵙⴻⵏ, ⴰⵇⴰ ⴰⵏⴻⵖ ⵥⵉ ⴰⵔⴻⴱⴱⵉ ⵓⵛⴰ ⴷⴷⵓⵏⴻⵛⵜ ⵎⴰⵔⵔⴰ ⴰⵇⴰ-ⵜⵜ ⴷⴻⴳ ⵉⴼⴰⵙⵙⴻⵏ ⵏ ⵓⵎⵄⴻⴼⴼⴰⵏ, 20 ⵏⴻⵙⵙⴻⵏ ⴱⴻⵍⵍⵉ ⵎⵎⵉⵙ ⵏ ⴰⵔⴻⴱⴱⵉ ⴰⵇⴰ ⵢⵓⵙⴰ-ⴷⴷ ⵓⵛⴰ ⵉⵡⵛⴰ ⴰⵏⴻⵖ-ⴷⴷ ⵍⴻⴼⵀⴰⵎⴻⵜ ⵃⵉⵎⴰ ⴰⴷ ⵏⴻⵙⵙⴻⵏ ⵡⴻⵏⵏⵉ ⵉⴵⴰⵏ ⴷ ⵜⵉⴷⴻⵜⵜ ⵓ ⵃⵉⵎⴰ ⴰⴷ ⵏⵉⵍⵉ ⴷⴻⴳ ⵡⴻⵏⵏⵉ ⴷ ⵜⵉⴷⴻⵜⵜ, ⴷⵉ ⵎⵎⵉⵙ ⵢⴻⵛⵛⵓ ⵍⵎⴰⵙⵉⵃ. ⴷ ⵡⴰ ⴷ ⴰⵔⴻⴱⴱⵉ ⵙ ⵜⵉⴷⴻⵜⵜ ⴷ ⵜⵓⴷⴰⵔⵜ ⵉⵜⵜⴷⵓⵎⴰⵏ. ^■  

21 ⴰ ⵉⵃⴻⵏⵊⵉⵔⴻⵏ ⵉⵏⵓ, ⵃⴹⴰⵎ ⵉⵅⴻⴼ ⵏⵡⴻⵎ ⵥⴻⴳ ⵡⴻⵄⴱⴻⴷ ⵏ ⵍ’ⴰⵚⵏⴰⵎ!