1 ⴰⵍⴰⵎⵉ ⴷⴷ-ⵉⴼⴼⴻⵖ ⵥⵉ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵉⵏⵏⴰ ⴰⵙ ⵉⵊⵊⴻⵏ ⵥⴻⴳ ⵉⵎⴻⵃⴹⴰⵔⴻⵏ ⵏⵏⴻⵙ: “ⴰ ⴰⵎⵙⴻⵖⵖⴰⵔ, ⵅⵥⴰⵔ, ⵎⴰⵎⵎⴻⵛ ⴵⴰⵏ ⵉⵥⵔⴰ ⴰⵢⴰ ⴷ ⵍⴻⴱⵏⵉ ⴰⵢⴰ!” ^■   2 ⵢⴰⵔⵔⴰ-ⴷⴷ ⵢⴻⵛⵛⵓ, ⵉⵏⵏⴰ ⴰⵙ: “ⵎⴰ ⵜⴻⵥⵔⵉⴷ ⵍⴻⴱⵏⵉ ⴰⵢⴰ ⵉⵎⵖⴰⵔⴻⵏ? ⵡⴰⵔ ⴷⴰ ⵉⵜⵜⵖⵉⵎⵉ ⵓⵍⴰ ⴷ ⵉⵊⵊ ⵏ ⵡⴻⵥⵔⵓ ⵅ ⵡⴻⵥⵔⵓ ⵏⵏⴻⵖⵏⵉ ⵉ ⵡⴰⵔ ⵉⵜⵜⵏⴻⵀⴷⵉⵎ.” ^■  

3 ⵍⴰⵎⵉ ⵜⵓⵖⴰ ⵉⵇⵇⵉⵎ ⵅ ⵡⴻⴷⵔⴰⵔ ⵏ ⵣⵥⵉⵜⵓⵏ ⵇⵉⴱⴰⵞ ⵉ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵙⵙⴻⵇⵙⴰⵏ ⵜ ⴱⵓⵟⵔⵓⵙ ⴷ ⵢⴰⵄⵇⵓⴱ ⴷ ⵢⵓⵃⴰⵏⵏⴰ ⴷ ⴰⵏⴷⵔⴰⵡⵓⵙ ⵍⴰⵎⵉ ⵜⴻⵏ ⵜⵓⵖⴰ ⵡⴻⵃⵃⴻⴷⵙⴻⵏ: ^■   4 “ⵉⵏⵉ ⴰⵏⴻⵖ ⵎⴻⵍⵎⵉ ⵉ ⵖⴰ ⵢⵉⵍⵉ ⵎⴰⵏ ⴰⵢⴰ, ⵓ ⵎⴰⵏ ⵍⴻⵄⵍⴰⵎⴻⵜ ⴰⵇⴰ ⴳⴳⵓⵔ ⴰⴷ ⵉⴽⴻⵎⵎⴻⵍ ⵎⴰⵔⵔⴰ ⴰⵢⴰ?” ^■   5 ⵉⴱⴷⴰ ⵢⴻⵛⵛⵓ ⵉⵇⵇⴰⵔ ⴰⵙⴻⵏ: “ⵅⵥⴰⵔⴻⵎ, ⵃⵉⵎⴰ ⵡⴰⵔ ⴽⴻⵏⵏⵉⵡ ⵉⵜⵜⵖⴰⵔⵔⵉ ⵃⴻⴷ. ^■  

6 ⴰⵇⴰ ⴰⵟⵟⴰⵙ ⴰⴷ ⴷⴷ-ⴰⵙⴻⵏ ⵙ ⵢⵉⵙⴻⵎ ⵉⵏⵓ ⵇⵇⴰⵔⴻⵏ: ‘ⴰⵇⴰ ⴷ ⵏⴻⵛⵛ!’, ⵓⵛⴰ ⴰⴷ ⵖⴰⵔⵔⴻⵏ ⴰⵟⵟⴰⵙ. ^■   7 ⵎⴰⵍⴰ ⵜⴻⵙⵍⵉⵎ ⵅ ⵍⴱⴰⵔⵓⴹ ⴷ ⵍⴻⵅⴱⴰⵔ ⵏ ⵍⴱⴰⵔⵓⴹ, ⵡⴰⵔ ⵜⵜⵏⴻⵅⵍⵉⵄⴻⵎ ⵛⴰ, ⵎⵉⵏⵥⵉ ⵙ ⵓⵖⵉⵍ ⴰⴷ ⵢⵉⵍⵉ ⵎⴰⵏ ⴰⵢⴰ, ⵎⴰⵛⴰ ⵡⴰⵔ ⵉⵜⵜⵉⵍⵉ ⵄⴰⴷ ⴷ ⴰⵏⴻⴳⴳⴰⵔ. 8 ⵎⵉⵏⵥⵉ ⵍⴳⴻⵏⵙ ⴰⴷ ⵉⴽⴽⴰⵔ ⴹⵉⴷⴷ ⵉ ⵍⴳⴻⵏⵙ ⵏⵏⴻⵖⵏⵉ ⵓ ⵜⴰⴳⴻⵍⴷⵉⵜ ⴹⵉⴷⴷ ⵉ ⵜⴳⴻⵍⴷⵉⵜ ⵏⵏⴻⵖⵏⵉ. ⴰⴷ ⵉⵍⵉⵏ ⵉⵏⵀⴻⵥⵥⴰⵏ ⵏ ⵜⴻⵎⵎⵓⵔⵜ ⵥⴻⴳ ⵡⴻⵎⵛⴰⵏ ⵖⴰⵔ ⵡⴻⵎⵛⴰⵏ ⵏⵏⴻⵖⵏⵉ ⵓⵛⴰ ⴰⴷ ⵢⵉⵍⵉ ⵍⴰⵥ ⴷ ⵓⵖⴻⵡⵡⵓⵖ. ⵜⵉⵎⴻⵙⵍⴰⵢⵉⵏ-ⴰ ⴷ ⴱⴻⴷⴷⵓ ⵏ ⵍⴻⵡⵊⴻⵄ ⵏ ⵜⴰⵔⵡⴰ. ^■  

9 ⵅⵥⴰⵔⴻⵎ ⵖⴰⵔ ⵢⵉⵅⴻⴼ ⵏⵡⴻⵎ, ⵎⵉⵏⵥⵉ ⴰⴷ ⴽⴻⵏⵏⵉⵡ ⵙⴻⵍⵍⵎⴻⵏ ⵉ ⵜⵓⴷⵔⵉⵏ ⵏ ⵛⵛⵔⴻⵄ, ⴰⴷ ⴽⴻⵏⵏⵉⵡ ⵀⴻⵜⵜⴽⴻⵏ ⵙ ⵓⵔⴻⴽⴽⵓⴹ ⴷⵉ ⵜⴻⵎⵥⵉⴷⴰⵡⵉⵏ ⵏⵙⴻⵏ, ⵓⵛⴰ ⴰⴷ ⴽⴻⵏⵏⵉⵡ ⵙⵙⵉⵡⴹⴻⵏ ⵖⴰⵔ ⵉⵊⴻⴵⵉⴷⴻⵏ ⴷ ⵍⵃⵓⴽⴽⴰⵎ ⵅ ⵙⵙⵉⴱⴱⴻⵜ ⵉⵏⵓ, ⴷ ⵛⵛⵀⴰⴷⴻⵜ ⵉ ⵏⵉⵜⵏⵉ. ^■  

10 ⵖⴰⵔ ⵓⵎⴻⵥⵡⴰⵔ ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⴱⴰⵔⵔⴻⵃ ⵙ ⵍⴻⵅⴱⴰⵔ ⴰⵚⴻⴱⵃⴰⵏ ⴷⵉ ⵎⴰⵔⵔⴰ ⵍⴻⴳⵏⵓⵙ.

11 ⵅⵎⵉ ⴽⴻⵏⵏⵉⵡ ⵉ ⵖⴰ ⴳⴳⴻⵡⵡⴷⴻⵏ ⵃⵉⵎⴰ ⴰⴷ ⴽⴻⵏⵏⵉⵡ ⵙⴻⵍⵍⵎⴻⵏ, ⵡⴰⵔ ⴽⴻⵙⵙⵉ ⵙ ⵡⴻⵎⵏⵓⵙ ⵇⴱⴻⵍ ⵥⵉ ⵎⵉⵏ ⵖⴰ ⵜⵉⵏⵉⵎ, ⵡⴰⵔ ⴷⴰⵢⴻⵙ ⵜⵅⴰⵔⵔⵉⵚⴻⵎ ⵛⴰ, ⵎⴰⵛⴰ ⵎⵉⵏ ⵎⴰ ⴷ ⴰⵡⴻⵎ ⵉ ⵖⴰ ⵉⵎⵎⴻⵡⵛⴻⵏ ⴷⵉ ⵜⵙⴰⵄⵄⴻⵜ ⵏⵏⵉ, ⵙⵉⵡⵍⴻⵎ ⵥⵥⴰⵢⴻⵙ, ⵎⵉⵏⵥⵉ ⵡⴰⵔ ⵜⴻⴵⵉⵎ ⴷ ⴽⴻⵏⵏⵉⵡ ⵉ ⵉⵙⵙⴰⵡⴰⵍⴻⵏ ⵎⴰⵛⴰ ⴷ ⴰⵔⵔⵓⵃ ⵉⵇⴻⴷⴷⵙⴻⵏ. ^■  

12 ⵓⵎⴰⵙ ⴰⴷ ⵉⵙⴻⵍⵍⴻⵎ ⵓⵎⴰⵙ ⵎⴰⵃⴻⵏⴷ ⴰⴷ ⵜ ⵏⵖⴻⵏ, ⵓ ⴱⴰⴱⴰⵙ ⴰⴷ ⵉⵙⴻⵍⵍⴻⵎ ⵎⵎⵉⵙ, ⵓⵛⴰ ⴰⴷ ⵜⴻⴽⴽⴰⵔ ⵜⴰⵔⵔⴰⵡⵜ ⵅ ⵍⵡⴰⵍⵉⴷⵉⵏ ⵏⵏⴻⵙ ⵓⵛⴰ ⴰⴷ ⵜⴻⵏ ⵏⵖⴻⵏ. ^■  

13 ⴰⴷ ⴽⴻⵏⵏⵉⵡ ⵛⴰⵔⵀⴻⵏ ⵎⴰⵔⵔⴰ ⴷⵉ ⵙⵙⵉⴱⴱⴻⵜ ⵏ ⵢⵉⵙⴻⵎ ⵉⵏⵓ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⵚⴱⴰⵔⴻⵏ ⴰⵍ ⴰⵏⴻⴳⴳⴰⵔ, ⴰⴷ ⵉⵜⵜⵡⴰⵙⵙⴻⵏⵊⴻⵎ. ^■  

14 ⵅⵎⵉ ⵉ ⵖⴰ ⵜⵥⴰⵔⴻⵎ ⵏⵏⵄⵉ ⵏ ⵡⴰⵔⴻⵢⵢⴻⴱ, ⵎⵉⵏ ⵅⴻⴼ ⵜⵓⵖⴰ ⵉⵙⵙⴰⵡⴰⵍ ⵓⵏⴰⴱⵉ ⴷⴰⵏⵉⵢⴰⵍ, ⵉⵜⵜⴱⴻⴷⴷⴰ ⵎⴰⵏⵉ ⵡⴰⵔ ⵉⵜⵜⵅⴻⵚⵚⴰ ⴰⴷ ⵉⴱⴻⴷⴷ - ⵡⴻⵏⵏⵉ ⵉⵖⵔⵉⵏ ⴰⴷ ⵉⴼⵀⴻⵎ! - ⵍⴻⵅⴷⴻⵏⵏⵉ ⵉⵜⵜⵅⴻⵚⵚⴰ ⵉ ⵢⴻⵏⵏⵉ ⵉⴵⴰⵏ ⴷⵉ ⵢⴰⵀⵓⴷⵉⵢⵢⴰ ⴰⴷ ⴰⵔⴻⵡⵍⴻⵏ ⵖⴰⵔ ⵉⴷⵓⵔⴰⵔ, ^■  

15 ⵓ ⵡⴻⵏⵏⵉ ⵉⴵⴰⵏ ⵅ ⵜⵥⴻⵇⵇⴰ ⵡⴰⵔ ⴷⴷ-ⵉⵀⴻⴽⴽⵡⵉ ⵛⴰ ⵖⴰⵔ ⵜⴰⴷⴷⴰⵔⵜ ⵓ ⵡⴰⵔ ⵉⵜⵜⵉⴷⴻⴼ ⵛⴰ ⵃⵉⵎⴰ ⴰⴷ ⵉⴽⵙⵉ ⵛⴰ ⵥⵉ ⵜⴰⴷⴷⴰⵔⵜ ⵏⵏⴻⵙ,

16 ⵓ ⵡⴻⵏⵏⵉ ⵉⴵⴰⵏ ⴷⴻⴳ ⵉⵢⵢⴰⵔ ⵡⴰⵔ ⴷⴷ-ⵉⵜⵜⵄⵉⵇⵇⵉⴱ ⵛⴰ ⵃⵉⵎⴰ ⴰⴷ ⵉⴽⵙⵉ ⴰⵙⴻⵍⵀⴰⵎ ⵏⵏⴻⵙ.

17 ⵓⵛⵜ ⵅ ⵜⵉⵏⵏⵉ ⵉⴵⴰⵏ ⵙ ⴷⴷⴻⵢⵙⴻⵜ ⴷ ⵜⵉⵏⵏⵉ ⵉⵙⵙⵓⵟⵓⴹⴻⵏ ⴷⴻⴳ ⵡⵓⵙⵙⴰⵏ ⵏⵏⵉ!

18 ⵥⴰⴵⴻⵎ ⵃⵉⵎⴰ ⵡⴰⵔ ⵜᵉⵜⵜⵉⵍⵉ ⵜⴰⵔⴻⵡⵍⴰ ⵏⵡⴻⵎ ⴷⵉ ⵍⵎⴻⵛⵜⴰ,

19 ⵎⵉⵏⵥⵉ ⴷⴻⴳ ⵡⵓⵙⵙⴰⵏ ⵏⵏⵉ ⴰⴷ ⴷⵉⵏ ⵜⵉⵍⵉ ⵉⵛⵜ ⵏ ⵍⵎⴻⵃⵏⴻⵜ ⵉ ⵡⴰⵔ ⵜⵓⵖⵉ ⴰⵎⴻⵛⵏⴰⵡ ⵏⴻⵜⵜⴰⵜ ⵥⴻⴳ ⵡⴰⵎⵉ ⴷⴷ-ⵉⵅⵍⴻⵇ ⴰⵔⴻⴱⴱⵉ ⴷⴷⵓⵏⴻⵛⵜ ⴰⵍ ⵍⴻⵅⵅⵓ ⵓⵛⴰ ⵡⴰⵔ ⵜᵉⵜⵜⵉⵍⵉ ⵄⴻⵎⵎⴰⵔⵚ ⵄⴰⵡⴻⴷ. ^■   20 ⵎⴰⵍⴰ ⵙⵉⴷⵉ ⵡⴰⵔ ⵉⵙⵙⴻⵎⵥⵉ ⵓⵙⵙⴰⵏ ⵏⵏⵉ, ⵡⴰⵔ ⵜⵏⴻⵊⵊⴻⵎ ⵓⵍⴰ ⴷ ⵉⵛⵜ ⵏ ⴷⴷⴰⵜ, ⵎⴰⵛⴰ ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵉⵜⵜⵡⴰⴼⴰⵔⵥⴻⵏ ⵉⵏⵏⵉ ⵉ ⵉⵅⴹⴰⵔ ⵏⴻⵜⵜⴰ, ⴰⵇⴰ ⵉⵙⵙⴻⵎⵥⵉ ⵓⵙⵙⴰⵏ ⵏⵏⵉ.

21 ⵅⴻⵏⵏⵉ ⵎⴰⵍⴰ ⵉⵏⵏⴰ ⴰⵡⴻⵎ ⵉⵊⵊⴻⵏ: ‘ⴰⵇⴰ ⵍⵎⴰⵙⵉⵃ ⴷⴰ!’, ⵏⵉⵖ: ‘ⴰⵇⴰ-ⵜ ⴷⵉⵀⴰ!’, ⵡⴰⵔ ⵜ ⵜⵜⴰⵎⵏⴻⵎ. ^■   22 ⵎⵉⵏⵥⵉ ⴰⴷ ⴷⴷ-ⴽⴽⴰⵔⴻⵏ ⵉⵎⴰⵙⵉⵃⴻⵏ ⵉⵙⵙⵅⴰⵔⵔⵉⵇⴻⵏ ⴷ ⵉⵏⴰⴱⵉⵢⵢⴻⵏ ⵉⵙⵙⵅⴰⵔⵔⵉⵇⴻⵏ, ⴰⴷ ⴳⴳⴻⵏ ⵍⴻⵄⵍⴰⵎⴰⵜ ⴷ ⵍⴻⵄⵊⴰⵢⴻⴱ ⵃⵉⵎⴰ, ⵎⴰⵍⴰ ⵉⵥⴻⵎⵎⴰⵔ, ⴰⴷ ⵖⴰⵔⵔⴻⵏ ⵄⴰⴷ ⵉⵏⵏⵉ ⵉⵜⵜⵡⴰⴼⴰⵔⵥⴻⵏ. ^■   23 ⴽⴻⵏⵏⵉⵡ ⵎⴰⵛⴰ, ⵃⴹⴰⵎ, ⴰⵇⴰ ⵎⴰⵔⵔⴰ ⵏⵏⵉⵖ ⴰⵡⴻⵎ ⵜ ⵇⴱⴻⵍ.

24 ⵎⴰⵛⴰ ⴷⴻⴳ ⵡⵓⵙⵙⴰⵏ ⵏⵏⵉ ⴰⵡⴰⵔⵏⵉ ⵍⵎⴻⵃⵏⴻⵜ ⵏⵏⵉ ⴰⴷ ⵜⴻⴱⴱⴰⵔⵛⴻⵏ ⵜⴼⵓⵛⵜ ⵓⵛⴰ ⵜⴰⵥⵉⵔⵉ ⵡⴰⵔ ⵜᵉⵜⵜⵉⵛ ⵄⴰⴷ ⵟⵟⵢⴰ ⵏⵏⴻⵙ, ^■   25 ⵉⵜⵔⴰⵏ ⴰⴷ ⴷⴷ-ⵡⴹⴰⵏ ⵥⴻⴳ ⵓⵊⴻⵏⵏⴰ ⵓⵛⴰ ⵚⵚⵓⵍⴰⵟⴰⵜ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ ⴰⴷ ⵜⵜⵡⴰⵏⵀⴻⵥⵥⴻⵏⵜ. ^■   26 ⵅⴻⵏⵏⵉ ⴰⴷ ⵥⴰⵔⴻⵏ ⵎⵎⵉⵙ ⵏ ⴱⵏⴰⴷⴻⵎ ⵉⵜⵜⴰⵙ-ⴷⴷ ⴷⴻⴳ ⵉⵙⴻⵢⵏⵓⵜⴻⵏ ⵙ ⵊⵊⴻⵀⴷ ⴷ ⵓⵄⵓⴵⵉ ⴰⵎⴻⵇⵇⵔⴰⵏ. ^■   27 ⵍⴻⵅⴷⴻⵏⵏⵉ ⴰⴷ ⵉⵙⵙⴻⴽⴽ ⵍⵎⴰⵍⴰⴽⴰⵜ ⵏⵏⴻⵙ ⵓⵛⴰ ⴰⴷ ⵉⵢⵔⵓ ⵉⵏⵏⵉ ⵥⵥⴰⵢⴻⵙ ⵉⵜⵜⵡⴰⴼⴰⵔⵥⴻⵏ ⵥⵉ ⴰⵔⴻⴱⵄⴰ ⵉⵙⴻⵎⵎⵉⴹⴻⵏ ⵥⵉ ⵟⵟⴰⵔⴼ ⴰⵏⴻⴳⴳⴰⵔⵓ ⵏ ⵜⴻⵎⵎⵓⵔⵜ ⴰⵍ ⵟⵟⴰⵔⴼ ⴰⵏⴻⴳⴳⴰⵔⵓ ⵏ ⵓⵊⴻⵏⵏⴰ.

28 ⵍⴻⵎⴷⴻⵎ ⵥⴻⴳ ⵡⴰⵔⵜⵓ ⵏ ⵜⴰⵥⴰⵔⵜ ⴰⵎⴻⵜⵜⵉⵍ-ⴰ: ⵅⵎⵉ ⵉ ⵖⴰ ⴷⴻⵡⵍⴻⵏ ⵍⴻⴼⵔⵓⵄ ⵏⵏⴻⵙ ⴰⴷ ⴷⴷ-ⴰⵔⴻⴹⴱⴻⵏ ⵓⵛⴰ ⵜⵉⴼⵔⴰⵢ ⴰⴷ ⴷⴷ-ⴼⴼⵖⴻⵏⵜ, ⵅⴻⵏⵏⵉ ⴰⴷ ⵜⴻⵙⵙⵏⴻⵎ ⴰⵇⴰ ⴰⵏⴻⴱⴷⵓ ⵢⵉⵡⴻⴹ-ⴷⴷ. ^■   29 ⴰⵎⵎⵓ ⵄⴰⵡⴻⴷ ⵓⵍⴰ ⴷ ⴽⴻⵏⵏⵉⵡ, ⵅⵎⵉ ⵉ ⵖⴰ ⵜⵥⴰⵔⴻⵎ ⵜⵉⵎⴻⵙⵍⴰⵢⵉⵏ-ⴰ ⵜⵜⴻⵎⵙⴰⵔⴰⵏⵜ, ⵅⴻⵏⵏⵉ ⵙⵙⵏⴻⵎ, ⴰⵇⴰ ⵎⴰⵏ ⴰⵢⴰ ⵢⵓⴷⴻⵙ-ⴷⴷ ⵅ ⵜⴻⵡⵡⴰⵔⵜ. 30 ⵙ ⵜⵉⴷⴻⵜⵜ ⴰⴷ ⴰⵡⴻⵎ ⵉⵏⵉⵖ, ⵊⵊⵉⵍ-ⴰ ⵡⴰⵔ ⵉⵄⴻⴷⴷⵓ ⵛⴰ ⴰⵍ ⴷ ⵖⴰ ⵢⵉⵍⵉ ⵎⴰⵏ ⴰⵢⴰ ⵎⴰⵔⵔⴰ. 31 ⴰⵊⴻⵏⵏⴰ ⴷ ⵜⴻⵎⵎⵓⵔⵜ ⴰⴷ ⴼⵏⴰⵏ, ⵎⴰⵛⴰ ⴰⵡⴰⵍⴻⵏ ⵉⵏⵓ ⵡⴰⵔ ⴼⴻⵏⵏⴰⵏ ⵄⴻⵎⵎⴰⵔⵚ. ^■   32 ⵎⴰⵛⴰ ⴰⵙⵙ ⵏⵏⵉ ⴷ ⵜⵙⴰⵄⵄⴻⵜ ⵏⵏⵉ ⵓⵍⴰ ⴷ ⵉⵊⵊ ⵡⴰⵔ ⵜ ⵉⵙⵙⵉⵏ, ⵓⵍⴰ ⴷ ⵍⵎⴰⵍⴰⴽⴰⵜ ⵉⵏⵏⵉ ⵉⴵⴰⵏ ⴷⴻⴳ ⵓⵊⴻⵏⵏⴰ, ⵓⵍⴰ ⴷ ⵜⴰⵎⴻⵎⵎⵉⵜ, ⵎⵖⵉⵔ ⵜⴰⴱⴰⴱⴰⵜ. ^■   33 ⵃⴹⴰⵎ, ⵄⴻⵙⵙⴻⵎ, ⵥⴰⴵⴻⵎ, ⵎⵉⵏⵥⵉ ⵡⴰⵔ ⵜⴻⵙⵙⵉⵏⴻⵎ ⵛⴰ ⵎⴻⵍⵎⵉ ⴷⴷ ⵖⴰ ⵜⴰⵡⴻⴹ ⵍⵡⴻⵇⵜ ⵏⵏⵉ. ^■  

34 ⴰⵇⴰ-ⵜ ⴰⵎⴻⵛⵏⴰⵡ ⵉⵊⵊ ⵏ ⴱⵏⴰⴷⴻⵎ ⵉⵜⵜⵅⴻⵚⵚⴰ ⴰⵙ ⴰⴷ ⵉⵙⴰⴼⴰⵔ, ⵉⵊⵊⴰ ⵜⴰⴷⴷⴰⵔⵜ ⵏⵏⴻⵙ, ⵉⵡⴻⴽⴽⴻⵍ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵙ ⵚⵚⵓⵍⵟⴰ, ⵉⵡⵛⴰ ⵉ ⴽⵓⵍ ⵉⵊⵊ ⵥⵥⴰⵢⵙⴻⵏ ⵍⵅⴻⴷⵎⴻⵜ ⵏⵏⴻⵙ, ⵓⵛⴰ ⵉⵄⵍⴻⵎ ⴰⵙ ⵉ ⵓⵄⴻⵙⵙⴰⵙ ⵏ ⵜⴻⵡⵡⴰⵔⵜ ⵎⴰⵃⴻⵏⴷ ⴰⴷ ⵉⵇⵇⵉⵎ ⴰⴷ ⵉⵃⴹⴰ. 35 ⵉⵡⴰ ⵃⴹⴰⵎ ⵅⴻⵏⵏⵉ, ⵎⵉⵏⵥⵉ ⵡⴰⵔ ⵜⴻⵙⵙⵉⵏⴻⵎ ⵛⴰ ⵎⴻⵍⵎⵉ ⵉ ⴷⴷ ⵖⴰ ⵢⴰⵙ ⴱⴰⴱ ⵏ ⵜⴰⴷⴷⴰⵔⵜ, ⵖⴰⵔ ⵓⵄⴻⵛⵛⵉ ⵏⵉⵖ ⵖⴰⵔ ⵡⴻⵥⵢⴻⵏ ⵏ ⴵⵉⵍⴻⵜ ⵏⵉⵖ ⵖⴰⵔ ⵓⵙⵇⵓⵇⴻⵄ ⵏ ⵓⵢⴰⵥⵉⴹ ⵏⵉⵖ ⵖⴰⵔ ⵚⵚⴱⴻⵃ ⵥⵉⵛ, 36 ⵃⵉⵎⴰ ⵡⴰⵔ ⴷⴷ-ⵉⵜⵜⵉⵙ ⴷⴻⵖⵢⴰ, ⴰⴷ ⴽⴻⵏⵏⵉⵡ ⵢⴰⴼ ⵜᵉⵜⵜⴻⵟⵟⵚⴻⵎ. 37 ⵎⵉⵏ ⴷ ⴰⵡⴻⵎ ⵇⵇⴰⵔⴻⵖ ⵍⴻⵅⵅⵓ, ⵇⵇⴰⵔⴻⵖ ⵜ ⵉ ⵎⴰⵔⵔⴰ: ⵇⵇⵉⵎⴻⵎ ⵜⴼⴰⵇⴻⵎ!”