1 ⴷⴻⴳ ⵡⴰⵙⵙ ⵏⵏⵉ ⵉⴼⴼⴻⵖ ⵢⴻⵛⵛⵓ ⵥⵉ ⵜⴰⴷⴷⴰⵔⵜ, ⵉⵔⵓⵃ ⵉⵇⵇⵉⵎ ⵅ ⵜⵎⴰ ⵏ ⵍⴻⴱⵃⴰⵔ. ^■   2 ⵉⵎⵓⵏ-ⴷⴷ ⵅⴰⵙ ⵉⵊⵊ ⵏ ⵓⵀⵉⵎⵓⵔ ⵏ ⵍⵖⴰⵛⵉ, ⴰⵍⴰⵎⵉ ⵢⴻⵏⵢⴰ ⴷⵉ ⵜⵖⴰⵔⵔⴰⴱⵓⵜ, ⵉⵇⵇⵉⵎ ⴷⴰⵢⴻⵙ ⵓⵛⴰ ⵍⵖⴰⵛⵉ ⵎⴰⵔⵔⴰ ⴱⴻⴷⴷⴻⵏ ⵅ ⵜⵎⴰ. ^■   3 ⵉⵙⵙⵉⵡⴻⵍ ⴰⴽⵉⴷⵙⴻⵏ ⵅ ⵡⴰⵟⵟⴰⵙ ⵏ ⵜⵎⴻⵙⵍⴰⵢⵉⵏ ⵙ ⵉⵎⴻⴷⵢⴰ, ⵉⵏⵏⴰ: “ⵅⵥⴰⵔ, ⴰⴼⴻⴵⴰⵃ ⵉⴼⴼⴻⵖ ⵃⵉⵎⴰ ⴰⴷ ⵉⵥⴰⵔⵄ. 4 ⴰⵎ ⵜⵓⵖⴰ ⵉⵥⴰⵔⵔⴻⵄ, ⵜⴻⵡⴹⴰ ⵛⴰ ⵏ ⵥⵥⴰⵔⵉⵄⴻⵜ ⵅ ⵜⵎⴰ ⵏ ⵡⴻⴱⵔⵉⴷ, ⵅⴻⵛⵛⴻⵏ-ⴷⴷ ⵉⵊⴹⴰⴹ, ⵏⴻⵇⴱⴻⵏ ⵜⵜ. 5 ⵜⴻⵡⴹⴰ ⵛⴰ ⵏⵏⴻⵖⵏⵉ ⵅ ⵜⴻⵎⵎⵓⵔⵜ ⵏ ⵡⴻⵥⵔⵓ ⵎⴰⵏⵉ ⵜⵓⵖⴰ ⵡⴰⵔ ⵉⴵⵉ ⵓⵛⴰⵍ ⴰⵟⵟⴰⵙ. ⴷⴻⵖⵢⴰ ⵜⴻⵖⵎⵉ-ⴷⴷ ⵙ ⵎⵉⵏⵥⵉ ⵜⴰⵎⵎⵓⵔⵜ ⵡⴰⵔ ⵜⵓⴵⵉⵖ. 6 ⵓⵎⵉ ⴷⴷ-ⵜⴻⵏⵇⴰⵔ ⵜⴼⵓⵛⵜ, ⵉⵛⵎⴻⴹ ⵓⵖⴻⵎⵎⵓⵢ, ⵓⵛⴰ ⵉⵙⵍⴰⵡ ⵎⵉⵏⵥⵉ ⵡⴰⵔ ⵖⴰⵔⴻⵙ ⵜⵓⵖⵉ ⴱⵓ ⵡⴻⵥⵡⴰⵔ. 7 ⵛⴰ ⵏⵏⴻⵖⵏⵉ ⵜⴻⵡⴹⴰ ⵅ ⵉⵙⴻⵏⵏⴰⵏⴻⵏ. ⵎⵖⴰⵔⴻⵏ ⵉⵙⴻⵏⵏⴰⵏⴻⵏ, ⵊⵉⵢⵢⴼⴻⵏ ⵜⵜ. 8 ⵛⴰ ⵏⵏⴻⵖⵏⵉ ⵜⴻⵡⴹⴰ ⵅ ⵜⴻⵎⵎⵓⵔⵜ ⵜⴰⵚⴻⴱⵃⴰⵏⵜ, ⵜⵉⵡⵉ-ⴷⴷ ⵍⵖⵉⴵⴻⵜ, ⵛⴰ ⵎⵢⴰ, ⵛⴰ ⵏⵏⴻⵖⵏⵉ ⵙⴻⵜⵜⵉⵏ, ⵛⴰ ⵏⵏⴻⵖⵏⵉ ⵜⵍⴰⵜⵉⵏ ⵏ ⵜⵙⴻⵇⵇⴰⵔ. 9 ⵡⴻⵏⵏⵉ ⵖⴰⵔ ⵉⴵⴰ ⵉⵎⴻⵥⵥⵓⵖⴻⵏ ⵉ ⵓⵙⴻⴵⵉ, ⴻⵊⵊ ⵉ-ⵜ ⴰⴷ ⵉⵙⴻⵍ.”

10 ⵅⴰⵙ ⵓⵛⴰ ⵓⵙⵉⵏ-ⴷⴷ ⵖⴰⵔⴻⵙ ⵉⵎⴻⵃⴹⴰⵔⴻⵏ ⵏⵏⴻⵙ, ⵏⵏⴰⵏ ⴰⵙ: “ⵎⴰⵢⴻⵎⵎⵉ ⴰⴽⵉⴷⵙⴻⵏ ⵜⴻⵙⵙⴰⵡⴰⵍⴻⴷ ⵙ ⵉⵎⴻⴷⵢⴰ?” ^■  

11 ⵏⴻⵜⵜⴰ ⵢⴰⵔⵔⴰ-ⴷⴷ, ⵉⵏⵏⴰ ⴰⵙⴻⵏ: “ⵎⵉⵏⵥⵉ ⵉⵎⵎⴻⵡⵛ ⴰⵡⴻⵎ ⴰⴷ ⵜⴻⵙⵙⵏⴻⵎ ⵙⵙⵉⵔⵔ ⵏ ⵜⴳⴻⵍⴷⵉⵜ ⵏ ⵉⵊⴻⵏⵡⴰⵏ, ⵏⵉⵜⵏⵉ ⵎⴰⵛⴰ ⵡⴰⵔ ⴷ ⴰⵙⴻⵏ ⵜ ⵉⵎⵎⴻⵡⵛ ⵛⴰ. ^■  

12 ⵎⵉⵏⵥⵉ ⵡⴻⵏⵏⵉ ⵖⴰⵔ ⵉⴵⴰ ⴰⴷ ⴰⵙ ⵉⵎⵎⴻⵡⵛ ⵓⵛⴰ ⴰⴷ ⵖⴰⵔⴻⵙ ⵢⵉⵍⵉ ⵙ ⵡⴰⵟⵟⴰⵙ, ⵎⴰⵛⴰ ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⵛⴰ ⴰⴷ ⵥⵥⴰⵢⴻⵙ ⵉⵜⵜⵡⴰⴽⴽⴻⵙ ⵓⵍⴰ ⴷ ⵎⵉⵏ ⵖⴰⵔⴻⵙ. ^■  

13 ⵙ ⵓⵢⴻⵏⵏⵉ ⵙⵙⴰⵡⴰⵍⴻⵖ ⴰⴽⵉⴷⵙⴻⵏ ⵙ ⵉⵎⴻⴷⵢⴰ, ⵎⵉⵏⵥⵉ ⵏⵉⵜⵏⵉ ⵜⵜⵡⴰⵍⴰⵏ ⴰⵎ ⵡⴰⵔ ⵜⵜⵡⵉⵍⵉⵏ, ⵓ ⵜⵜⴻⵙⵍⴰⵏ ⴰⵎ ⵡⴰⵔ ⵜⵜⴻⵙⵍⵉⵏ ⵡⴰⵔ ⴼⴻⵀⵀⵎⴻⵏ.

14 ⴷⴰⵢⵙⴻⵏ ⵉ ⵖⴰ ⵉⴽⴻⵎⵎⴻⵍ ⵡⴰⵡⴰⵍ ⵏ ⵉⵛⴰⵄⵢⴰ, ⵉⵇⵇⴰⵔ: ‘ⵙ ⵓⵙⴻⴵⵉ ⴰⴷ ⵙⵍⴻⵏ, ⵎⴰⵛⴰ ⵡⴰⵔ ⴼⴻⵀⵀⵎⴻⵏ, ⵙ ⵜⵎⵓⵖⵍⵉ ⴰⴷ ⵜⵥⴰⵔⴻⵎ, ⵡⴰⵔ ⵜⴼⴻⵜⵜⵏⴻⵎ ⵛⴰ, ^■  

15 ⵎⴰⵖⴰⵔ ⵓⵍ ⵏ ⵍⴳⴻⵏⵙ-ⴰ ⴰⵇⴰ ⵉⵇⴱⵓⴱⴱⴻⵥ, ⵉⵎⴻⵥⵥⵓⵖⴻⵏ ⵏⵙⴻⵏ ⴹⴻⵇⵍⴻⵏ ⴷⴻⴳ ⵓⵙⴻⴵⵉ ⵓ ⵏⵉⵜⵏⵉ ⴰⵇⴰ ⵇⵇⵏⴻⵏ ⵜⵉⵟⵟⴰⵡⵉⵏ ⵏⵙⴻⵏ, ⵎⴰⵃⴻⵏⴷ ⵡⴰⵔ ⵜⵜⵡⵉⵍⵉⵏ ⵙ ⵜⵉⵟⵟⴰⵡⵉⵏ ⵏⵙⴻⵏ, ⴰⴷ ⵙⵍⴻⵏ ⵙ ⵉⵎⴻⵥⵥⵓⵖⴻⵏ ⵏⵙⴻⵏ, ⴰⴷ ⴼⴻⵀⵎⴻⵏ ⵙ ⵡⵓⵍ ⵏⵙⴻⵏ ⵃⵉⵎⴰ ⴰⴷ ⵜⵓⴱⴻⵏ ⵓⵛⴰ ⵏⴻⵛⵛ ⴰⴷ ⵜⴻⵏ ⵙⵙⴳⴻⵏⴼⵉⵖ.’ ^■  

16 ⵎⴰⵛⴰ ⵙⵙⴻⵄⴷ ⵏ ⵜⵉⵟⵟⴰⵡⵉⵏ ⵏⵡⴻⵎ ⵓⵎⵉ ⵜⵜⵡⴰⵍⴰⵏⵜ, ⵙⵙⴻⵄⴷ ⵏ ⵉⵎⴻⵥⵥⵓⵖⴻⵏ ⵏⵡⴻⵎ ⵓⵎⵉ ⵜⵜⴻⵙⵍⴰⵏ! ^■  

17 ⵙ ⵜⵉⴷⴻⵜⵜ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⴰⵟⵟⴰⵙ ⵏ ⵉⵏⴰⴱⵉⵢⵢⴻⵏ ⴷ ⵉⵎⵙⴻⴳⴳⴰⴷⴻⵏ ⵜⵓⵖⴰ ⵅⵙⴻⵏ ⴰⴷ ⵥⴰⵔⴻⵏ ⵎⵉⵏ ⵜⴻⵥⵔⵉⵎ, ⵎⴰⵛⴰ ⵡⴰⵔ ⵜ ⵥⵔⵉⵏ, ⵅⵙⴻⵏ ⴰⴷ ⵙⵍⴻⵏ ⵎⵉⵏ ⵜⴻⵙⵍⵉⵎ, ⵡⴰⵔ ⵜ ⵙⵍⵉⵏ.” ^■  

18 “ⵅⴻⵏⵏⵉ ⴽⴻⵏⵏⵉⵡ, ⵙⵍⴻⵎ ⵉ ⵓⵎⴻⴷⵢⴰ ⵏ ⵡⴻⵏⵏⵉ ⵉⵥⴰⵔⵔⵄⴻⵏ. ^■  

19 ⴽⵓⵍ ⵉⵊⵊⴻⵏ ⵡⴻⵏⵏⵉ ⵉⵜⵜⴻⵙⵍⴰⵏ ⵉ ⵡⴰⵡⴰⵍ ⵏ ⵜⴳⴻⵍⴷⵉⵜ ⵓⵛⴰ ⵡⴰⵔ ⵜ ⵉⴼⵀⵉⵎ, ⴰⴷ ⵖⴰⵔⴻⵙ ⴷⴷ-ⵢⴰⵙ ⵓⵎⵄⴻⴼⴼⴰⵏ, ⴰⴷ ⵉⵅⴹⴻⴼ ⵎⵉⵏ ⵉⵜⵜⵡⴰⵥⴰⵔⵄⴻⵏ ⴷⴻⴳ ⵡⵓⵍ ⵏⵏⴻⵙ. ⴰⵇⴰ ⴷ ⵎⴰⵏ ⴰⵢⴰ ⵎⵉⵏ ⵉⵜⵜⵡⴰⵥⴰⵔⵄⴻⵏ ⵅ ⵜⵎⴰ ⵏ ⵡⴻⴱⵔⵉⴷ. ^■   20 ⵎⵉⵏ ⵉⵜⵜⵡⴰⵥⴰⵔⵄⴻⵏ ⴷⵉ ⵜⴻⵎⵎⵓⵔⵜ ⵏ ⵡⴻⵥⵔⵓ, ⴰⵇⴰ ⵡⴰ ⴷ ⵡⴻⵏⵏⵉ ⵉ ⵖⴰ ⵉⵙⴻⴵⴻⵏ ⴰⵡⴰⵍ, ⴰⴷ ⵜ ⵉⵇⴱⴻⵍ ⴷⴻⵖⵢⴰ ⵙ ⵍⴻⴼⵔⴰⵃⴻⵜ, 21 ⵎⴰⵛⴰ ⵡⴰⵔ ⴷ ⴰⵙ ⵉⵡⵜⵉ ⵛⴰ ⵡⴻⵥⵡⴰⵔ ⴷⴻⴳ ⵉⵅⴻⴼ ⵏⵏⴻⵙ, ⴰⴷ ⵉⵇⵇⵉⵎ ⴷⵔⵓⵙ ⵡⴰⵀⴰ. ⵅⵎⵉ ⴷⴷ ⵖⴰ ⵜⴰⵙ ⵍⴻⵃⵚⴰⵔⴻⵜ ⵏⵉⵖ ⴰⵎⴰⵔⵔⴻⵜ ⴷⵉ ⵟⵟⵡⴻⵄ ⵏ ⵡⴰⵡⴰⵍ ⴰⴷ ⵉⵏⵏⴻⴷⵔⴻⴼ ⴷⴻⵖⵢⴰ. 22 ⵎⵉⵏ ⵉⵜⵜⵡⴰⵥⴰⵔⵄⴻⵏ ⵊⴰⵔ ⵉⵙⴻⵏⵏⴰⵏⴻⵏ ⴰⵇⴰ ⵡⴰ ⴷ ⵡⴻⵏⵏⵉ ⵉⵜⵜⴻⵙⵍⴰⵏ ⴰⵡⴰⵍ, ⵎⴰⵛⴰ ⴰⵎⵏⵓⵙ ⵏ ⵍⵡⴻⵇⵜ-ⴰ ⴷ ⵓⵖⴻⴽⴽⵡⵉ ⵏ ⵡⴰⴳⵍⴰ ⴰⴷ ⵊⵉⵢⵢⴼⴻⵏ ⴰⵡⴰⵍ ⵓⵛⴰ ⵏⴻⵜⵜⴰ ⵡⴰⵔ ⴷⴷ-ⵉⵜⵜⵉⵡⵉ ⵛⴰ ⵍⵖⵉⴵⴻⵜ. ^■   23 ⵎⵉⵏ ⵉⵜⵜⵡⴰⵥⴰⵔⵄⴻⵏ ⴷⵉ ⵜⴻⵎⵎⵓⵔⵜ ⵜⴰⵚⴻⴱⵃⴰⵏⵜ ⴰⵇⴰ ⵡⴰ ⴷ ⵡⴻⵏⵏⵉ ⵉⵜⵜⴻⵙⵍⴰⵏ ⴰⵡⴰⵍ ⵓⵛⴰ ⴰⴷ ⵜ ⵉⴼⵀⴻⵎ, ⴰⴷ ⴷⴷ-ⵢⴰⵡⵉ ⵅⴻⵏⵏⵉ ⵍⵖⵉⴵⴻⵜ: ⵉⵊⵊⴻⵏ ⴰⴷ ⵢⴰⵍⵓ ⵎⵢⴰ ⵏ ⵜⵙⴻⵇⵇⴰⵔ, ⵡⴻⵏⵏⴻⵖⵏⵉ ⵙⴻⵜⵜⵉⵏ ⵓⵛⴰ ⵡⴻⵏⵏⴻⵖⵏⵉ ⵜⵍⴰⵜⵉⵏ.”

24 ⵉⵡⵛⴰ ⴰⵙⴻⵏ ⵉⵊⵊ ⵏ ⵓⵎⴻⴷⵢⴰ ⵏⵏⴻⵖⵏⵉ, ⵉⵏⵏⴰ: “ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⴰⵎⴻⵛⵏⴰⵡ ⵉⵊⵊ ⵏ ⴱⵏⴰⴷⴻⵎ ⵜⵓⵖⴰ ⵉⵥⴰⵔⵔⴻⵄ ⵥⵥⴰⵔⵉⵄⴻⵜ ⵜⴰⵚⴻⴱⵃⴰⵏⵜ ⴷⴻⴳ ⵉⵢⵢⴰⵔ ⵏⵏⴻⵙ. 25 ⴰⵍⴰⵎⵉ ⵜⵓⵖⴰ ⵉⵡⴷⴰⵏ ⵟⵟⵚⴻⵏ, ⵢⵓⵙⴰ-ⴷⴷ ⵍⴻⵄⴷⵓ ⵏⵏⴻⵙ, ⵉⵥⴰⵔⵄ ⵍⵃⴰⵢⵢⴰⵔ ⴷⵉ ⵍⵡⴻⵙⵜ ⵏ ⵢⵉⵔⴷⴻⵏ ⵓⵛⴰ ⵢⵓⵢⵓⵔ. 26 ⴰⵍⴰⵎⵉ ⴷⴷ-ⵉⵎⵖⴰⵔ ⵓⵖⴻⵎⵎⵓⵢ ⵓⵛⴰ ⵢⵉⵡⵉ-ⴷⴷ ⵍⵖⵉⴵⴻⵜ, ⵍⴻⵅⴷⴻⵏⵏⵉ ⵉⴹⵀⴰⵔ-ⴷⴷ ⵍⵃⴰⵢⵢⴰⵔ ⵜⴰⵏⵢⴰ. 27 ⵅⴻⵏⵏⵉ ⵓⵙⵉⵏ-ⴷⴷ ⵉⵎⵙⴻⵅⵅⴰⵔⴻⵏ ⵏ ⴱⴰⴱ ⵏ ⵜⴰⴷⴷⴰⵔⵜ, ⵏⵏⴰⵏ ⴰⵙ: ‘ⴰ ⵙⵉⴷⵉⵜⵏⴻⵖ, ⵎⴰ ⵡⴰⵔ ⵜⵥⴰⵔⵄⴻⴷ ⵛⴰ ⵥⵥⴰⵔⵉⵄⴻⵜ ⵜⴰⵚⴻⴱⵃⴰⵏⵜ ⴷⴻⴳ ⵉⵢⵢⴰⵔ ⵏⵏⴻⴽ? ⵎⴰⵏⵉⵙ ⵉ ⴷⴷ-ⵢⵓⵙⴰ ⵍⵃⴰⵢⵢⴰⵔ-ⴰ?’ 28 ⵉⵏⵏⴰ ⴰⵙⴻⵏ: ‘ⴰⵇⴰ ⵍⴻⵄⴷⵓ ⵉⴳⴳⴰ ⵎⴰⵏ ⴰⵢⴰ’. ⵏⵏⴰⵏ ⴰⵙ ⵉⵎⵙⴻⵅⵅⴰⵔⴻⵏ: ‘ⵎⴰ ⵜⴻⵅⵙⴻⴷ ⴰⴷ ⵏⵔⴰⵃ, ⴰⴷ ⵜ ⵏⴻⵢⵔⵓ?’ 29 ⵎⴰⵛⴰ ⵏⴻⵜⵜⴰ ⵉⵏⵏⴰ: ‘ⵍⵍⴰ, ⵃⵉⵎⴰ ⵅⵎⵉ ⵉ ⵖⴰ ⵜⵢⴰⵔⵔⵡⴻⵎ ⵍⵃⴰⵢⵢⴰⵔ ⵡⴰⵔ ⴽⵉⵙ ⵜⵇⴻⴵⵄⴻⵎ ⵓⵍⴰ ⴷ ⵉⵔⴷⴻⵏ. 30 ⴻⵊⵊ ⵉ-ⵜⴻⵏ ⴰⴷ ⵎⵖⴰⵔⴻⵏ ⵙ ⵜⵏⴰⵢⴻⵏ ⴰⵍ ⵜⴰⵎⴻⵢⵔⴰ. ⴷⵉ ⵍⵡⴻⵇⵜ ⵏ ⵜⵎⴻⵢⵔⴰ ⴰⴷ ⵉⵏⵉⵖ ⵉ ⵉⵛⵓⵡⵡⴰⵔⴻⵏ: ‘ⵢⴰⵔⵡⴻⵎ ⴰⵎⴻⵥⵡⴰⵔ ⵍⵃⴰⵢⵢⴰⵔ, ⵛⴻⴷⴷⴻⵎ ⵜ ⴷⵉ ⵜⵇⴻⴱⴱⵉⵟⵉⵏ ⵃⵉⵎⴰ ⴰⴷ ⵉⵜⵜⵡⴰⵙⴻⵛⵎⴻⴹ, ⵎⴰⵛⴰ ⵉⵔⴷⴻⵏ, ⵢⴰⵔⵡⴻⵎ ⵜ ⴷⵉ ⵍⵎⴰⵔⵙⵉ ⵉⵏⵓ.’ ” ^■  

31 ⵉⵡⵛⴰ ⴰⵙⴻⵏ ⵄⴰⵡⴻⴷ ⵉⵊⵊ ⵏ ⵓⵎⴻⴷⵢⴰ ⵏⵏⴻⵖⵏⵉ, ⵉⵏⵏⴰ: “ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⴰⵎⴻⵛⵏⴰⵡ ⵉⵛⵜ ⵏ ⵜⵃⴻⴱⴱⵓⵛⵜ ⵏ ⵥⵥⴰⵔⵉⵄⴻⵜ ⵏ ⵓⵅⴻⵔⴷⴻⵍ, ⵢⵉⵡⵢⵉ ⵜⵜ-ⵉ-ⴷⴷ ⵉⵊⵊ ⵏ ⵡⴻⵔⵢⴰⵥ, ⵉⵥⴰⵔⵄ ⵉ-ⵜⵜ ⴷⴻⴳ ⵉⵢⵢⴰⵔ ⵏⵏⴻⵙ. ^■   32 ⵡⴰⵅⵅⴰ ⵏⴻⵜⵜⴰⵜ ⴷ ⵜⴰⵎⴻⵥⵢⴰⵏⵜ ⵇⴰⵄ ⵥⵉ ⵎⴰⵔⵔⴰ ⵥⵥⴰⵔⵉⵄⴻⵜ ⵏⵏⴻⵖⵏⵉ, ⵅⵎⵉ ⵜⵎⴻⵇⵇⴰⵔ, ⵜᵉⴷⴷⴻⴽⴽⵡⴰⵍ ⴷ ⵜⴰⵎⴻⵇⵇⵔⴰⵏⵜ ⵥⵉ ⵎⴰⵔⵔⴰ ⵜⵉⴱⴱⵉ ⵓⵛⴰ ⵜⴷⴻⴽⴽⵡⴰⵍ ⴷ ⵜⴰⵛⴻⵊⵊⴰⵔⵜ ⵎⴰⵃⴻⵏⴷ ⴰⴷ ⵖⴰⵔⴻⵙ ⴷⴷ-ⴰⵙⴻⵏ ⵢⵉⵊⴹⴰⴹ ⵏ ⵓⵊⴻⵏⵏⴰ ⵓⵛⴰ ⴰⴷ ⴳⴳⴻⵏ ⵍⴻⵄⵡⴰⵛⵛ ⵏⵙⴻⵏ ⵅ ⵍⴻⴼⵔⵓⵄ ⵏⵏⴻⵙ.” ^□  

33 ⵉⵡⵛⴰ ⴰⵙⴻⵏ ⵄⴰⵡⴻⴷ ⵉⵊⵊ ⵏ ⵓⵎⴻⴷⵢⴰ ⵏⵏⴻⵖⵏⵉ, ⵉⵏⵏⴰ: “ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⴰⵎⴻⵛⵏⴰⵡ ⴰⵏⵜⵓⵏ, ⵜⵉⵡⵢⵉ ⵜ-ⵉ-ⴷⴷ ⵉⵛⵜ ⵏ ⵜⴻⵎⵖⴰⵔⵜ ⵓⵛⴰ ⵜⴻⵙⵙⵏⵓⴼⴼⴰⵔ ⵉ-ⵜ ⴷⵉ ⵜⵍⴰⵜⴰ ⵏ ⵍⴻⵎⴷⵓⴷ ⵏ ⵡⴰⵔⴻⵏ, ⴰⵍⴰⵎⵉ ⵉⵙⵙⵎⴻⵎⵎ ⵡⴰⵔⴻⵛⵜⵉ ⵇⴰⵄ.” ^■  

34 ⵎⴰⵏ ⴰⵢⴰ ⵉⵙⵙⵉⵡⴻⵍ ⵥⵥⴰⵢⴻⵙ ⵢⴻⵛⵛⵓ ⵉ ⵍⵖⴰⵛⵉ ⵙ ⵉⵎⴻⵜⵜⵉⵍⴻⵏ ⵓⵛⴰ ⴱⵍⴰ ⴰⵎⴻⴷⵢⴰ ⵡⴰⵔ ⴽⵉⵙⴻⵏ ⵉⵙⵙⵉⵡⴻⵍ ⵛⴰ, ^■   35 ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵎⵉⵏ ⵅⴻⴼ ⵉⵙⵙⵉⵡⴻⵍ ⵓⵏⴰⴱⵉ ⵉ ⵉⵏⵏⴰⵏ: “ⴰⴷ ⴰⵔⴻⵥⵎⴻⵖ ⴰⵇⴻⵎⵎⵓⵎ ⵉⵏⵓ ⵙ ⵉⵎⴻⴷⵢⴰ, ⴰⴷ ⴱⴰⵔⵔⵃⴻⵖ ⵙ ⵎⵉⵏ ⵉⵏⵏⵓⴼⴰⵔⴻⵏ ⵥⴻⴳ ⵡⴰⵎⵉ ⵉⵜⵜⵡⴰⴳⴳ ⴷⵙⴰⵙ ⵏ ⴷⴷⵓⵏⴻⵛⵜ.” ^■  

36 ⵍⴰⵎⵉ ⵉⵙⵎⴻⵃ ⵢⴻⵛⵛⵓ ⵉ ⵍⵖⴰⵛⵉ ⴰⴷ ⵓⵢⵓⵔⴻⵏ, ⵉⵔⵓⵃ ⵖⴰⵔ ⵜⴰⴷⴷⴰⵔⵜ. ⵓⵙⵉⵏ-ⴷⴷ ⵖⴰⵔⴻⵙ ⵉⵎⴻⵃⴹⴰⵔⴻⵏ ⵏⵏⴻⵙ, ⵇⵇⴰⵔⴻⵏ: “ⵉⵏⵉ ⴰⵏⴻⵖ ⵎⵉⵏ ⵉⵅⵙ ⴰⴷ ⵢⵉⵏⵉ ⵓⵎⴻⴷⵢⴰ ⵏ ⵍⵃⴰⵢⵢⴰⵔ ⴷⴻⴳ ⵉⵢⵢⴰⵔ!” 37 ⵢⴰⵔⵔⴰ-ⴷⴷ ⵅⴰⵙⴻⵏ: “ⵡⴻⵏⵏⵉ ⵉⵥⴰⵔⵔⵄⴻⵏ ⵥⵥⴰⵔⵉⵄⴻⵜ ⵜⴰⵚⴻⴱⵃⴰⵏⵜ ⵏⴻⵜⵜⴰ ⴷ ⵎⵎⵉⵙ ⵏ ⴱⵏⴰⴷⴻⵎ. 38 ⵉⵢⵢⴰⵔ ⴷ ⴷⴷⵓⵏⴻⵛⵜ ⵓⵛⴰ ⵥⵥⴰⵔⵉⵄⴻⵜ ⵜⴰⵚⴻⴱⵃⴰⵏⵜ ⵏⴻⵜⵜⴰⵜ ⴷ ⵜⴰⵔⵡⴰ ⵏ ⵜⴳⴻⵍⴷⵉⵜ ⵓⵛⴰ ⵍⵃⴰⵢⵢⴰⵔ ⵏⴻⵜⵜⴰ ⴷ ⵜⴰⵔⵡⴰ ⵏ ⵓⵎⵄⴻⴼⴼⴰⵏ. 39 ⵍⴻⵄⴷⵓ ⵡⴻⵏⵏⵉ ⵜ ⵉⵥⴰⵔⵄⴻⵏ, ⴰⵇⴰ ⵏⴻⵜⵜⴰ ⴷ ⵛⵛⵉⵟⴰⵏ, ⵓⵛⴰ ⵚⵚⴰⴱⴻⵜ, ⴰⵇⴰ ⵏⴻⵜⵜⴰⵜ ⴷ ⵇⴻⵟⵟⵓ ⵏ ⴷⴷⵓⵏⴻⵛⵜ ⵓ ⵉⵛⴻⵡⵡⴰⵍⴻⵏ ⵏⵉⵜⵏⵉ ⴷ ⵍⵎⴰⵍⴰⴽⴰⵜ. ^■   40 ⴰⵎⴻⵛⵏⴰⵡ ⵎⴰⵎⵎⴻⵛ ⵙⵙⵎⵓⵏⴻⵏ ⵍⵃⴰⵢⵢⴰⵔ ⵓⵛⴰ ⵙⵙⵛⴻⵎⴹⴻⵏ ⵜ ⵙ ⵜⵎⴻⵙⵙⵉ, ⴰⵎⵎⵓ ⵉ ⵖⴰ ⵢⵉⵍⵉ ⵖⴰⵔ ⵇⴻⵟⵟⵓ ⵏ ⴷⴷⵓⵏⴻⵛⵜ-ⴰ. 41 ⵎⵎⵉⵙ ⵏ ⴱⵏⴰⴷⴻⵎ ⴰⴷ ⴷⴷ-ⵉⵙⵙⴻⴽⴽ ⵍⵎⴰⵍⴰⴽⴰⵜ ⵏⵏⴻⵙ, ⴰⴷ ⵙⵙⵃⴻⵢⵢⴷⴻⵏⵜ ⵥⵉ ⵜⴳⴻⵍⴷⵉⵜ ⵏⵏⴻⵙ ⵇⴰⵄ ⵜⵉⵄⴻⵏⴽⵍⵉⴼⵉⵏ ⴷ ⵎⴰⵔⵔⴰ ⵉⵄⴻⴼⴼⴰⵏⴻⵏ. 42 ⴰⴷ ⵜⴻⵏ ⵏⴹⴰⵔⴻⵏ ⴷⵉ ⵍⴽⵓⵛⵛⴻⵜ ⵏ ⵜⵎⴻⵙⵙⵉ ⵎⴰⵏⵉ ⵉ ⵖⴰ ⵢⵉⵍⵉⵏ ⵉⵎⴻⵟⵟⴰⵡⴻⵏ ⴷ ⵓⵖⴻⵥⵥⵉ ⵏ ⵜⴻⵖⵎⴰⵙ. ^■   43 ⵍⴻⵅⴷⴻⵏⵏⵉ ⵉⵎⵙⴻⴳⴳⴰⴷⴻⵏ ⴰⴷ ⴰⵔⵖⴻⵏ ⴰⵎ ⵜⴼⵓⵛⵜ ⴷⵉ ⵜⴳⴻⵍⴷⵉⵜ ⵏ ⴱⴰⴱⴰⵜⵙⴻⵏ. ⵡⴻⵏⵏⵉ ⵖⴰⵔ ⵉⴵⴰ ⵉⵎⴻⵥⵥⵓⵖⴻⵏ ⵉ ⵓⵙⴻⴵⵉ ⴰⴷ ⵉⵙⴻⵍ.” ^■  

44 “ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⵄⴰⵡⴻⴷ ⴰⵎⴻⵛⵏⴰⵡ ⵉⵊⵊ ⵏ ⵍⴽⴻⵏⵥ ⵉⵜⵜⵡⴰⵙⵏⵓⴼⴼⴰⵔⴻⵏ ⴷⴻⴳ ⵉⵢⵢⴰⵔ, ⵢⵓⴼⴰ ⵉ-ⵜ ⵉⵊⵊ ⵏ ⵡⴻⵔⵢⴰⵥ, ⵉⵙⵙⵏⵓⴼⴼⴰⵔ ⵉ-ⵜ ⵓⵛⴰ ⴷⵉ ⵍⴻⴼⵔⴰⵃⴻⵜ ⵏⵏⴻⵙ ⵢⵓⵢⵓⵔ, ⵉⵥⵥⴻⵏⵥ ⵇⴰⵄ ⵎⵉⵏ ⵉⴵⴰⵏ ⵖⴰⵔⴻⵙ ⵓⵛⴰ ⵉⵙⵖⴰ ⵉⵢⵢⴰⵔ ⵏⵏⵉ.” ^■  

45 “ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⵄⴰⵡⴻⴷ ⴰⵎⴻⵛⵏⴰⵡ ⵉⵊⵊ ⵏ ⵓⵙⴻⴱⴱⴰⴱ ⵉ ⵢⴰⵔⴻⵥⵥⵓⵏ ⵜⵉⵢⴰⵇⵓⵜⵉⵏ ⵜⵉⵚⴻⴱⵃⴰⵏⵉⵏ. 46 ⵍⴰⵎⵉ ⵢⵓⴼⴰ ⵉⵛⵜ ⵏ ⵜⵢⴰⵇⵓⵜ ⵜⵉⵖⵍⴰ ⴰⵟⵟⴰⵙ, ⵢⵓⵢⵓⵔ, ⵉⵥⵥⴻⵏⵥ ⵎⴰⵔⵔⴰ ⵎⵉⵏ ⵜⵓⵖⴰ ⵖⴰⵔⴻⵙ, ⵅⴻⵏⵏⵉ ⵉⵙⵖⴰ ⵉ-ⵜⵜ.”

47 “ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⵄⴰⵡⴻⴷ ⴰⵎⴻⵛⵏⴰⵡ ⵜⵔⴰⵛⵛⴰ ⵉⵎⵎⴻⵏⴹⴰⵔⴻⵏ ⴷⵉ ⵍⴻⴱⵃⴰⵔ ⴰⴷ ⵜⴻⵢⵔⵓ ⵄⵍⴰⵎ ⴽⵓⵍ ⴰⵙⵍⴻⵎ. 48 ⵅⵎⵉ ⵉ ⵖⴰ ⵜⴻⵛⵛⵓⵔ, ⴰⴷ ⵜⵜ-ⵉ-ⴷⴷ-ⵙⵙⵓⴼⴼⵖⴻⵏ ⵉⴱⴻⵃⵔⵉⵢⵢⴻⵏ ⵖⴰⵔ ⵜⵎⴰ ⵏ ⵍⴻⴱⵃⴰⵔ, ⵓⵛⴰ ⴰⴷ ⵇⵇⵉⵎⴻⵏ, ⴰⴷ ⵥⵥⴰⵢⴻⵙ ⴼⴰⵔⵥⴻⵏ ⵎⵉⵏ ⵉⵚⴻⴱⵃⴻⵏ ⴷⵉ ⵜⵙⵓⴵⴰⵜⵉⵏ ⵏⵙⴻⵏ, ⵎⴰⵛⴰ ⴰⴷ ⵏⴹⴰⵔⴻⵏ ⵎⵉⵏ ⵡⴰⵔ ⵉⵃⵍⵉⵏ. 49 ⴰⵎⵎⵓ ⵉ ⵖⴰ ⵜⵉⵍⵉ ⴷⵉ ⵇⴻⵟⵟⵓ ⵏ ⴷⴷⵓⵏⴻⵛⵜ. ⴰⴷ ⴷⴷ-ⴼⴼⵖⴻⵏⵜ ⵍⵎⴰⵍⴰⴽⴰⵜ, ⴰⴷ ⴼⴰⵔⵏⴻⵏⵜ ⵉⵄⴻⴼⴼⴰⵏⴻⵏ ⵥⵉ ⵍⵡⴻⵙⵜ ⵏ ⵉⵎⵙⴻⴳⴳⴰⴷⴻⵏ. 50 ⴰⴷ ⵜⴻⵏ ⵏⴹⴰⵔⴻⵏ ⴷⵉ ⵍⴽⵓⵛⵛⴻⵜ ⵏ ⵜⵎⴻⵙⵙⵉ ⵎⴰⵏⵉ ⵉ ⵖⴰ ⵢⵉⵍⵉⵏ ⵉⵎⴻⵟⵟⴰⵡⴻⵏ ⴷ ⵓⵖⴻⵥⵥⵉ ⵏ ⵜⴻⵖⵎⴰⵙ.” ^■   51 ⵉⵏⵏⴰ ⴰⵙⴻⵏ ⵢⴻⵛⵛⵓ: “ⵎⴰ ⵜⴼⴻⵀⵎⴻⵎ ⵉ ⵎⴰⵔⵔⴰ ⵎⴰⵏ ⴰⵢⴰ?” ⵏⵏⴰⵏ ⴰⵙ: “ⵡⴰⵀ, ⴰ ⵙⵉⴷⵉⵜⵏⴻⵖ!” 52 ⵅⴻⵏⵏⵉ ⵉⵏⵏⴰ ⴰⵙⴻⵏ: “ⵙ ⵓⵢⴻⵏⵏⵉ ⴽⵓⵍ ⴰⵎⵙⴻⵍⵎⴰⴷ ⵏ ⵉⴷⵍⵉⵙⴻⵏ ⵡⴻⵏⵏⵉ ⵉⴷⵡⴻⵍ ⴷ ⴰⵎⴻⵃⴹⴰⵔ ⵏ ⵜⴳⴻⵍⴷⵉⵜ ⵏ ⵉⵊⴻⵏⵡⴰⵏ, ⴰⵇⴰ ⵉⴳⴳⴰ ⴰⵎⴻⵛⵏⴰⵡ ⵉⵊⵊ ⵏ ⴱⴰⴱ ⵏ ⵜⴰⴷⴷⴰⵔⵜ ⵉⵙⵙⵓⴼⴼⵓⵖ ⵥⵉ ⵍⴽⴻⵏⵥ ⵏⵏⴻⵙ ⵎⵉⵏ ⵉⴵⴰⵏ ⴷ ⵊⴷⵉⴷ ⵓ ⵎⵉⵏ ⵉⴵⴰⵏ ⴷ ⴰⵇⴷⵉⵎ.”

53 ⴰⵡⴰⵔⵏⵉ ⵍⴰⵎⵉ ⵉⴽⴻⵎⵎⴻⵍ ⵢⴻⵛⵛⵓ ⵉⵎⴻⴷⵢⴰ ⴰⵢⴰ, ⵢⵓⵢⵓⵔ ⵙⵙⴻⵏⵏⵉ. ^■   54 ⵍⴰⵎⵉ ⴷⴷ-ⵢⵓⵙⴰ ⵖⴰⵔ ⵜⴻⵎⵎⵓⵔⵜ ⵏⵏⴻⵙ, ⵉⴽⴽⴰⵔ ⵉⵙⵙⴻⵍⵎⴰⴷ ⵉ-ⵜⴻⵏ ⴷⵉ ⵜⴻⵎⵥⵉⴷⴰ ⵏⵙⴻⵏ ⴰⵍⴰⵎⵉ ⵇⵇⵉⵎⴻⵏ ⵜⴱⴻⵀⵜⴻⵏ, ⵏⵏⴰⵏ: “ⵎⴰⵏⵉⵙ ⴷ ⴰⵙ ⴷⴷ-ⵜⴻⴽⴽⴰ ⵜⵉⵖⵉⵜ-ⴰ ⴷ ⵍⴻⵄⵊⴰⵢⴻⴱ-ⴰ? ^■   55 ⵎⴰ ⵡⴰⵔ ⵉⴵⵉ ⵡⴰ ⴷ ⵎⵎⵉⵙ ⵏ ⵓⵏⴻⵊⵊⴰⵔ? ⵎⴰ ⵡⴰⵔ ⵇⵇⴰⵔⴻⵏ ⵉ ⵢⴻⵎⵎⴰⵙ ⵎⴰⵔⵢⴰⵎ, ⴷ ⴰⵢⵜⵎⴰⵙ ⵎⴰ ⵡⴰⵔ ⴷ ⴰⵙⴻⵏ ⵇⵇⴰⵔⴻⵏ ⵢⴰⵄⵇⵓⴱ ⴷ ⵢⵓⵙⵉⵙ ⴷ ⵛⵉⵎⵄⵓⵏ ⴷ ⵢⴰⵀⵓⴷⴰ? ^■   56 ⵎⴰ ⵡⴰⵔ ⴵⵉⵏⵜ ⵢⴻⵙⵙⵎⴰⵙ ⵇⴰⵄ ⵖⴰⵔⵏⴻⵖ? ⵎⴰⵏⵉⵙ ⴷ ⴰⵙ ⴷⴷ-ⵉⴽⴽⴰ ⵎⴰⵏ ⴰⵢⴰ ⵎⴰⵔⵔⴰ?” 57 ⵓⵛⴰ ⵏⴷⴻⵔⴼⴻⵏ ⵥⵥⴰⵢⴻⵙ. ⵎⴰⵛⴰ ⵢⴻⵛⵛⵓ ⵉⵏⵏⴰ ⴰⵙⴻⵏ: “ⴰⵏⴰⴱⵉ ⵄⴻⵎⵎⴰⵔⵚ ⵡⴰⵔ ⵉⴵⵉ ⴱⵍⴰ ⵛⵛⴰⵏ, ⵎⵖⵉⵔ ⴷⵉ ⵜⴻⵏⴷⵉⵏⵜ ⵏⵏⴻⵙ ⵓ ⴷⵉ ⵜⴰⴷⴷⴰⵔⵜ ⵏⵏⴻⵙ.” ^■   58 ⵓⵛⴰ ⵡⴰⵔ ⵉⴳⴳⵉ ⴷⵉⵀⴰ ⵍⵎⵓⵄⵊⵉⵥⴰⵜ ⴰⵟⵟⴰⵙ ⵎⵉⵏⵥⵉ ⵏⵉⵜⵏⵉ ⵡⴰⵔ ⵓⵎⵉⵏⴻⵏ.