ⵏⴰⵃⴰⵎⵢⴰ ⵉⵡⵛⴰ ⴰⴼⵓⵙ ⵉ ⵉⵎⴻⵥⵍⴰⴹ
5
1 ⵉⴽⴽⴰⵔ ⵉⵊⵊ ⵏ ⵓⵖⵓⵢⵢⵉ ⵉⵎⵖⴰⵔ ⵏ ⵍⴳⴻⵏⵙ ⵓ ⵏ ⵜⴻⵎⵖⴰⵔⵉⵏ ⵏⵙⴻⵏ ⵛⴻⵜⵛⴰⵏⵜ ⵅ ⴰⵢⵜⵎⴰⵜⵙⴻⵏⵜ, ⵓⴷⴰⵢⴻⵏ. 2 ⴰⵇⴰ ⴷⵉⵏ ⵉⵏⵏⵉ ⵉⵏⵏⴰⵏ: “ⵉⵃⴻⵏⵊⵉⵔⴻⵏ ⵏⵏⴻⵖ ⴷ ⵜⵃⴻⵏⵊⵉⵔⵉⵏ ⵏⵏⴻⵖ ⴷ ⵏⴻⵛⵛⵉⵏ ⴷ ⴰⵟⵟⴰⵙ. ⵉⵜⵜⵅⴻⵚⵚⴰ ⴰⴷ ⵏⵙⴻⵖ ⵉⵎⴻⵏⴷⵉ ⵃⵉⵎⴰ ⴰⴷ ⵏⴻⵛⵛ ⴰⴷ ⵏⴻⴷⴷⴰⵔ.” 3 ⵉⵏⵏⴻⵖⵏⵉ ⵏⵏⴰⵏ: “ⵏⴻⵛⵛⵉⵏ ⵏⴰⵔⵀⴻⵏ ⵉⵢⵢⴰⵔⴻⵏ ⵏⵏⴻⵖ ⴷ ⵉⵎⴰⵔⵊⴰⵄⴻⵏ ⵏⵏⴻⵖ ⵏ ⵓⴹⵉⵍ ⴷ ⵜⵓⴷⵔⵉⵏ ⵏⵏⴻⵖ ⴷ ⴰⴹⵎⴰⵏ, ⵃⵉⵎⴰ ⴰⴷ ⵏⴰⵡⵉ ⵉⵎⴻⵏⴷⵉ ⴷⴻⴳ ⵡⵓⵙⵙⴰⵏ ⵏ ⵍⴰⵥ.” 4 ⵉⵏⵏⴻⵖⵏⵉ ⵏⵏⴰⵏ: “ⵏⴻⵛⵛⵉⵏ ⵏⴰⵔⴹⴻⵍ ⵏⵏⵓⵇⴰⵔⵜ ⵉ ⵍⵊⵉⵥⵢⴰ ⵉ ⵓⵊⴻⴵⵉⴷ ⵅ ⵉⵢⵢⴰⵔⴻⵏ ⵏⵏⴻⵖ ⵓ ⵅ ⵉⵎⴰⵔⵊⴰⵄⴻⵏ ⵏⵏⴻⵖ ⵏ ⵓⴹⵉⵍ.” 5 “ⵅⴻⵏⵏⵉ ⵍⴻⵅⵅⵓ, ⴰⵢⵙⵓⵎ ⵏⵏⴻⵖ ⴷ ⵡⴻⵢⵙⵓⵎ ⵏ ⴰⵢⵜⵎⴰⵜⵏⴻⵖ, ⵉⵃⴻⵏⵊⵉⵔⴻⵏ ⵏⵏⴻⵖ ⴰⵎ ⵉⵃⴻⵏⵊⵉⵔⴻⵏ ⵏⵙⴻⵏ, ⵓ ⵅⵥⴰⵔ, ⵉⵃⴻⵏⵊⵉⵔⴻⵏ ⵏⵏⴻⵖ ⴷ ⵜⵃⴻⵏⵊⵉⵔⵉⵏ ⵏⵏⴻⵖ ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⵜⴻⵏ ⵏⴰⵔⵔ ⴷ ⵉⵙⴻⵎⵖⴰⵏ. ⴰⵇⴰ ⴷⵉⵏ ⵥⵉ ⵢⴻⵙⵙⵉⵜⵏⴻⵖ ⵜⵉⵏⵏⵉ ⵉⴷⴻⵡⵍⴻⵏ ⴰⵎ ⵜⵙⴻⵖⵎⵉⵏ ⵓⵛⴰ ⴰⴼⵓⵙ ⵏⵏⴻⵖ ⵡⴰⵔ ⵉⵥⴻⵎⵎⴰⵔ ⴰⴷ ⵉⴳⴳ ⵛⴰ ⵓ ⵉⵢⵢⴰⵔⴻⵏ ⵏⵏⴻⵖ ⴷ ⵉⵎⴰⵔⵊⴰⵄⴻⵏ ⵏⵏⴻⵖ ⵏ ⵓⴹⵉⵍ ⴰⵇⴰ ⴷⴻⴳ ⵓⴼⵓⵙ ⵏ ⵉⵏⵏⴻⵖⵏⵉ.” 6 ⵓⵎⵉ ⵙⵍⵉⵖ ⵉⵖⵓⵢⵢⴰⵏ ⵏⵙⴻⵏ ⴷ ⵡⴰⵡⴰⵍⴻⵏ-ⴰ, ⴷⴻⵡⵍⴻⵖ ⵅⴻⵢⵢⵇⴻⵖ ⴰⵟⵟⴰⵙ. 7 ⵏⴻⵛⵛ ⵅⴰⵔⵔⵚⴻⵖ ⴷⴻⴳ ⵡⵓⵍ ⵉⵏⵓ ⵓ ⵛⴻⵜⵛⵉⵖ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ ⵓ ⵅ ⵉⵎⴹⴻⴱⴱⴰⵔⴻⵏ, ⵏⵏⵉⵖ ⴰⵙⴻⵏ: “ⴽⵓⵍ ⵉⵊⵊⴻⵏ ⵥⵥⴰⵢⵡⴻⵎ ⴷⴰⵢⴻⵙ ⴷ ⵍⵄⵉⴱ ⵓⵎⵉ ⵉⵜⵜⴰⵔ ⴰⵔⵔⵉⴱⴰ ⵥⴻⴳ ⵓⵎⴰⵙ.” ⵏⴻⵛⵛ ⴳⴳⵉⵖ ⵉⵊⵊ ⵏ ⵡⴻⴳⵔⴰⵡ ⴷ ⴰⵎⴻⵇⵇⵔⴰⵏ ⴹⵉⴷⴷ ⵏⵙⴻⵏ. ■ 8 ⵏⴻⵛⵛ ⵏⵏⵉⵖ ⴰⵙⴻⵏ: “ⵏⴻⵛⵛⵉⵏ ⵏⴻⵙⵖⴰ ⴰⵢⵜⵎⴰⵜⵏⴻⵖ, ⵓⴷⴰⵢⴻⵏ, ⵉⵏⵏⵉ ⵜⵓⵖⴰ ⵉⵜⵜⵡⴰⵥⵥⴻⵏⵥⴻⵏ ⵉ ⵍⴻⴳⵏⵓⵙ, ⵄⵍⴰⵃⵙⴰⴱ ⵜⵉⵥⴻⵎⵎⴰⵔ ⵏⵏⴻⵖ. ⴽⴻⵏⵏⵉⵡ ⵎⴰⵛⴰ, ⵎⴰ ⵜⴻⵅⵙⴻⵎ ⴰⴷ ⵜⴻⵥⵥⴻⵏⵥⴻⵎ ⵜⴰⵡⵎⴰⵜ ⵏⵡⴻⵎ ⵏⵉⵖ ⵜⴻⴳⴳⵉⵎ ⵜⴻⵏ ⵍⴻⵅⵅⵓ ⴰⴷ ⵜⵜⵡⴰⵎⵎⴻⵏⵥⴻⵏ ⵉ ⵏⴻⵛⵛⵉⵏ?” ⵓⵛⴰ ⵙⵙⴻⵖⴷⴻⵏ ⵡⴰⵔ ⵓⴼⵉⵏ ⵎⵉⵏ ⵖⴰ ⵉⵏⵉⵏ. 9 ⵅⴰⵙ ⵓⵛⴰ ⵏⵏⵉⵖ: “ⵎⵉⵏ ⵜⴻⴳⴳⴻⵎ ⴽⴻⵏⵏⵉⵡ, ⵡⴰⵔ ⵉⴵⵉ ⵏⵉⵛⴰⵏ. ⵎⴰ ⵡⴰⵔ ⵉⵜⵜⵅⴻⵚⵚⵉ ⴰⴷ ⵜⵓⵢⵓⵔⴻⵎ ⵥⵥⴰⵜ ⵉ ⴰⵔⴻⴱⴱⵉ ⵏⵏⴻⵖ ⵙ ⵓⵡⴻⵇⵇⴰⵔ ⵥⵉ ⵙⵙⵉⴱⴱⴻⵜ ⵏ ⵓⵙⴻⵃⵇⴰⵔ ⵏ ⵍⴻⴳⵏⵓⵙ, ⵍⵄⴻⴷⵢⴰⵏ ⵏⵏⴻⵖ?
10 ⵓⵍⴰ ⴷ ⵏⴻⵛⵛ, ⴰⵢⵜⵎⴰ ⴷ ⵉⵃⵓⴷⵔⵉⵢⵢⴻⵏ ⵉⵏⵓ, ⴰⵇⴰ ⵏⴰⵔⴹⴻⵔ ⴰⵙⴻⵏ ⵏⵏⵓⵇⴰⵔⵜ ⴷ ⵉⵎⴻⵏⴷⵉ. ⵊⵊⴻⵎ ⴰⵏⴻⵖ ⴰⴷ ⵏⴻⵙⵎⴻⵃ ⵎⴰⵛⴰ ⴷⵉ ⴰⵔⵔⵉⴱⴰ ⴰⵢⴰ.
11 ⴰⵔⵔⴻⵎ ⴰⵙⴻⵏ ⴰⵙⵙ-ⴰ ⵉⵢⵢⴰⵔⴻⵏ ⵏⵙⴻⵏ, ⵉⵎⴰⵔⵊⴰⵄⴻⵏ ⵏⵙⴻⵏ ⵏ ⵓⴹⵉⵍ, ⵍⴻⵄⵔⴰⵚⵉⵜ ⵏⵙⴻⵏ ⵏ ⵥⵥⵉⵜⵓⵏ ⴷ ⵜⵓⴷⵔⵉⵏ ⵏⵙⴻⵏ ⵓⵍⴰ ⴷ ⵜⴰⵙⵖⴰⵔⵜ ⵡⵉⵙⵙ ⵎⵢⴰ ⵏ ⵏⵏⵓⵇⴰⵔⵜ ⴷ ⵉⵎⴻⵏⴷⵉ ⴷ ⴱⵉⵏⵓ ⵏ ⵊⴷⵉⴷ ⴷ ⵥⵥⴻⵛⵜ ⵏⵏⵉ ⵉ ⵥⵥⴰⵢⵙⴻⵏ ⵜᵉⵜⵜⴰⵔⴻⵎ.”
12 ⵅⴰⵙ ⵓⵛⴰ ⵏⵏⴰⵏ: “ⴰⴷ ⴰⵙⴻⵏ ⵜ ⵏⴰⵔⵔ ⵎⴰⵔⵔⴰ ⵓ ⵡⴰⵔ ⵥⵥⴰⵢⵙⴻⵏ ⵜ ⵏᵉⵜⵜⴻⵜⵜⴰⵔ ⵄⴰⴷ. ⵏⴻⵛⵛⵉⵏ ⴰⴷ ⵏⴻⴳⴳ, ⴰⵎ ⵎⴰⵎⵎⴻⵛ ⵜⴻⵏⵏⵉⴷ ⵛⴻⴽ.” ⵓⵛⴰ ⵍⴰⵖⵉⵖ ⵉ ⵉⴽⴻⵀⵀⴰⵏⴻⵏ ⵓ ⵊⵊⵉⵖ ⵜⴻⵏ ⴰⴷ ⵊⵊⴰⴵⴻⵏ, ⴰⵇⴰ ⵏⵉⵜⵏⵉ ⴰⴷ ⴳⴳⴻⵏ ⵄⵍⴰⵃⵙⴰⴱ ⴰⵡⴰⵍ-ⴰ.
13 ⵅⴻⵏⵏⵉ ⵥⵥⴻⵔⵥⴻⵖ ⵡⴻⵃⵙⵉⵏ ⵏ ⵡⴰⵔⵔⵓⴹ ⵉⵏⵓ, ⵏⵏⵉⵖ: “ⴰⵎⵎⵓ ⵉ ⵖⴰ ⵉⵥⵥⴻⵔⵥ ⴰⵔⴻⴱⴱⵉ ⴽⵓⵍ ⴰⵔⵢⴰⵥ, ⵡⴻⵏⵏⵉ ⵡⴰⵔ ⵉⵟⵟⵉⴼⴻⵏ ⴷⴻⴳ ⵡⴰⵡⴰⵍ-ⴰ, ⵥⵉ ⵜⴰⴷⴷⴰⵔⵜ ⵏⵏⴻⵙ ⵓ ⵥⴻⴳ ⵡⴰⴳⵍⴰ ⵏⵏⴻⵙ, ⵏⴻⵜⵜⴰ ⴰⴷ ⵉⵎⵎⴻⵔⵥ ⴰⴷ ⵉⵅⵡⴰ ⴰⵎⵎⵓ.” ⴰⴳⵔⴰⵡ ⵏ ⵍⴳⴻⵏⵙ ⵎⴰⵔⵔⴰ ⵉⵏⵏⴰ: “ⴰⵎⵉⵏ!” ⵏⵉⵜⵏⵉ ⵙⵙⴻⵎⵖⴰⵔⴻⵏ ⵙⵉⴷⵉ ⴷ ⵍⴳⴻⵏⵙ ⵉ ⵉⴳⴳⵉⵏ ⵄⵍⴰⵃⵙⴰⴱ ⴰⵡⴰⵍ-ⴰ. □
ⴰⵎⴻⴷⵢⴰ ⵏ ⵏⴰⵃⴰⵎⵢⴰ
14 ⵓⵍⴰ ⴷ ⵏⴻⵛⵛ ⴷ ⵢⴰⵢⵜⵎⴰ ⵡⴰⵔ ⵏⴻⵛⵛⵉ ⵛⴰ ⵥⵉ ⵎⴰⵛⵛⴰ ⵏ ⵍⵡⴰⵍⵉ ⵥⴻⴳ ⵡⴰⵙⵙ ⵏⵏⵉ ⴷⵉ ⴷ ⴰⵢⵉ ⵜⵓⵖⴰ ⵉⴳⴳⴰ ⴷ ⴰⵊⴻⴵⵉⴷ ⴷ ⵍⵡⴰⵍⵉ ⵏⵙⴻⵏ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ, ⵥⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵄⵉⵛⵔⵉⵏ ⴰⵍ ⴰⵙⴻⴳⴳⵯⴰⵙ ⵡⵉⵙⵙ ⵜⵏⴰⵢⴻⵏ ⵓ-ⵜⵍⴰⵜⵉⵏ ⵏ ⵓⵊⴻⴵⵉⴷ ⴰⵔⵜⴰⵃⵛⴰⵙⵜⴰ, ⵜⴻⵇⵇⴰⵔ ⵜⴻⵏⵄⴰⵛ ⵏ ⵉⵙⴻⴳⴳⵯⵓⵙⴰ.
15 ⵍⵡⵓⵍⴰⵜ ⵏⵏⵉ ⴷⵉⵏ ⵉⴵⴰⵏ ⵇⴱⴻⵍ ⵉ ⵏⴻⵛⵛ, ⵜⵓⵖⴰ ⴳⴳⵉⵏ ⴷⴷⵇⴻⵍ ⵅ ⵍⴳⴻⵏⵙ ⵓ ⵜⵓⵖⴰ ⴽⵙⵉⵏ ⵥⵥⴰⵢⴻⵙ ⴰⵖⵔⵓⵎ ⴷ ⴱⵉⵏⵓ ⵓ ⵄⴰⵡⴻⴷ ⴰⵔⴻⴱⵄⵉⵏ ⵏ ⵉⵛⵉⵇⵍⴻⵏ ⵏ ⵏⵏⵓⵇⴰⵔⵜ. ⵓⵍⴰ ⴷ ⵉⵃⵓⴷⵔⵉⵢⵢⴻⵏ ⵏⵙⴻⵏ ⵙⴻⴵⴹⴻⵏ ⵅ ⵍⴳⴻⵏⵙ. ⵏⴻⵛⵛ ⵎⴰⵛⴰ ⵡⴰⵔ ⴳⴳⵉⵖ ⴰⵢⴰ ⵥⵉ ⵜⵉⴳⴳⵯⵓⴷⵉ ⵏ ⴰⵔⴻⴱⴱⵉ.
16 ⴰⵇⴰ ⵡⵛⵉⵖ ⵊⵊⴻⵀⴷ ⵉⵏⵓ ⵉ ⵍⵅⴻⴷⵎⴻⵜ ⵖⴰⵔ ⵍⵃⵉⴹ ⵓ ⵏⴻⵛⵛⵉⵏ ⵡⴰⵔ ⵏⴻⵙⵖⵉ ⵛⴰ ⴰⵃⵡⵉⵛ ⵓ ⵎⴰⵔⵔⴰ ⵉⵃⵓⴷⵔⵉⵢⵢⴻⵏ ⵉⵏⵓ ⵎⵓⵏⴻⵏ ⴷⵉⵏ ⵅ ⵍⵅⴻⴷⵎⴻⵜ.
17 ⵖⴰⵔ ⵟⵟⴰⴱⵍⴰ ⵉⵏⵓ ⵇⵇⵉⵎⴻⵏ ⵎⵢⴰ ⵓ-ⵅⴻⵎⵙⵉⵏ ⵏ ⵢⴻⵔⵢⴰⵥⴻⵏ ⵥⴻⴳ ⵡⵓⴷⴰⵢⴻⵏ ⵓ ⵥⴻⴳ ⵉⵎⴹⴻⴱⴱⴰⵔⴻⵏ ⵓⵍⴰ ⴷ ⵉⵏⵏⵉ ⵉ ⵖⴰⵔⵏⴻⵖ ⴷⴷ-ⵢⵓⵙⵉⵏ ⵥⵉ ⵍⴻⴳⵏⵓⵙ ⵉ ⴷ ⴰⵏⴻⵖ ⴷⴷ-ⵉⵏⵏⴹⴻⵏ.
18 ⵎⵉⵏ ⵉⵜⵜⵡⴰⵙⵡⴻⵊⴷⴻⵏ ⵉ ⵢⵉⵊⵊ ⵏ ⵡⴰⵙⵙ ⴰⵇⴰ ⴷ ⵉⵊⵊ ⵏ ⵓⴼⵓⵏⴰⵙ, ⵓ ⵥⴻⴳ ⵡⵓⴵⵉ ⴰⵇⴰ ⵜⵜⵡⴰⴼⴰⵔⵥⴻⵏ ⵙⴻⵜⵜⴰ ⵥⵥⴰⵢⵙⴻⵏ, ⵓⵛⴰ ⵙⵙⵡⴻⵊⴷⴻⵏ ⴰⵢⵉ ⵓⵍⴰ ⴷ ⵉⵊⴹⴰⴹ ⵓ ⴷⵉ ⴽⵓⵍ ⵄⴻⵛⵔⴰ ⵏ ⵡⵓⵙⵙⴰⵏ ⵄⵍⴰⵎ ⴽⵓⵍ ⴱⵉⵏⵓ ⵙ ⵓⴼⴻⵢⵢⴻⴹ. ⵙ ⵎⴰⵔⵔⴰ ⴰⵢⴰ ⵡⴰⵔ ⵜⵜⴰⵔⴻⵖ ⵎⴰⵛⵛⴰ ⵏ ⵍⵡⴰⵍⵉ, ⵎⴰⵖⴰⵔ ⵜⴰⵙⴻⵅⵅⴰⵔⵜ ⵜⴻⵙⵙⴻⴷⵇⴻⵍ ⴰⵟⵟⴰⵙ ⵅ ⵍⴳⴻⵏⵙ-ⴰ.
19 ⵉⴷⴰⵔ ⴰⵢⵉ ⵙ ⵍⵅⴰⵔ, ⴰ ⴰⵔⴻⴱⴱⵉ ⵉⵏⵓ, ⵙ ⵎⴰⵔⵔⴰ ⵎⵉⵏ ⴳⴳⵉⵖ ⵉ ⵍⴳⴻⵏⵙ-ⴰ. ■