1 ⵉⵄⵇⴻⴱ-ⴷⴷ ⵢⴰⵀⵓⵛⴰⴼⴰⵟ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵖⴰⵔ ⵜⴰⴷⴷⴰⵔⵜ ⵏⵏⴻⵙ ⴷⵉ ⵓⵔⵛⴰⵍⵉⵎ ⴷⵉ ⵍⴻⵀⵏⴰ. 2 ⵢⴰⵀⵓ, ⵎⵎⵉⵙ ⵏ ⵃⴰⵏⴰⵏⵉ, ⴰⵎⵡⴰⵍⴰⵡ, ⵉⴼⴼⴻⵖ-ⴷⴷ ⵖⴰⵔⴻⵙ ⵃⵉⵎⴰ ⴰⴷ ⵜ ⵉⵍⵇⴰ, ⵉⵏⵏⴰ ⵉ ⵓⵊⴻⴵⵉⴷ ⵢⴰⵀⵓⵛⴰⴼⴰⵟ: “ⵎⴰ ⵛⴻⴽ ⵜⴻⴳⴳⵉⴷ ⵜⵡⵉⵥⴰ ⵉ ⵓⵄⴻⴼⴼⴰⵏ ⵓ ⴰⴷ ⵜⴻⵅⵙⴻⴷ ⵉⵏⵏⵉ ⵉⵄⵉⴼⴼⴻⵏ ⵙⵉⴷⵉ? ⴰⵎⵎⵓ ⵉ ⵅⴰⴽ ⴷⴷ-ⵢⵓⵙⴰ ⵓⴷⵓⵇⵇⴻⵥ ⵏ ⵡⴻⵖⴹⴰⴱ ⵥⵉ ⵥⵥⴰⵜ ⵏ ⵡⵓⴷⴻⵎ ⵏ ⵙⵉⴷⵉ. 3 ⵡⴰⵅⵅⴰ ⴰⵎⴻⵏⵏⵉ ⵉⵜⵜⵡⴰⴼ ⴷⴰⵢⴻⴽ ⵎⵉⵏ ⵉⵚⴻⴱⵃⴻⵏ, ⵎⴰⵖⴰⵔ ⵜⴻⴽⴽⵙⴻⴷ ⵜⵉⵔⴻⴱⴱⵉⵏ ⵏ ⵛⵡⴰⵔⵜⵉ ⵥⵉ ⵜⴻⵎⵎⵓⵔⵜ ⵓⵛⴰ ⵜⴻⵙⵡⴻⵊⴷⴻⴷ ⵓⵍ ⵏⵏⴻⴽ ⵉ ⵜⴰⵔⴻⵥⵥⵓⵜ ⵅ ⴰⵔⴻⴱⴱⵉ.”

4 ⵢⴰⵀⵓⵛⴰⴼⴰⵟ ⵉⵇⵇⵉⵎ ⵉⵥⴻⴷⴷⴻⵖ ⴷⵉ ⵓⵔⵛⴰⵍⵉⵎ ⵓⵛⴰ ⵉⴼⴼⴻⵖ ⵄⴰⵡⴻⴷ ⵊⴰⵔ ⵍⴳⴻⵏⵙ, ⵥⵉ ⴱⵉ’ⵔ-ⵙⴻⴱⵄⴰ ⵖⴰⵔ ⵉⴷⵓⵔⴰⵔ ⵏ ⵉⴼⵔⴰⵢⵉⵎ, ⵓⵛⴰ ⵢⴰⵔⵔⴰ ⵉ-ⵜⴻⵏ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⴱⴰⴱⴰⵜⴻⵏ ⵏⵙⴻⵏ. 5 ⵏⴻⵜⵜⴰ ⵢⴰⵍⴻⵇⵇⴻⵎ ⵍⵇⵓⴹⴰⵜ ⴷⵉ ⵜⴻⵎⵎⵓⵔⵜ, ⴷⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵉⴼⴰⵔⵢⴻⵏ ⵏ ⵢⴰⵀⵓⴷⴰ, ⵥⵉ ⵜⴻⵏⴷⵉⵏⵜ ⴰⵍ ⵜⴰⵏⴷⵉⵏⵜ. 6 ⵏⴻⵜⵜⴰ ⵉⵏⵏⴰ ⵉ ⵍⵇⵓⴹⴰⵜ: “ⵅⵥⴰⵔⴻⵎ ⵎⵉⵏ ⵖⴰ ⵜⴻⴳⴳⴻⵎ, ⵎⴰⵖⴰⵔ ⵡⴰⵔ ⵜⵃⴻⴽⴽⵎⴻⵎ ⵉ ⵉⵡⴷⴰⵏ, ⵎⴰⵛⴰ ⵉ ⵙⵉⴷⵉ ⵓ ⵏⴻⵜⵜⴰ ⴰⵇⴰ ⵉⵃⴹⴰⵔ ⴰⴽⵉⴷⵡⴻⵎ ⴷⴻⴳ ⵡⴻⵃⴽⴰⵎ. 7 ⵅⴻⵏⵏⵉ ⵍⴻⵅⵅⵓ, ⴰⴷ ⵅⴰⵡⴻⵎ ⵜⵉⵍⵉ ⵜⵉⴳⴳⵯⵓⴷⵉ ⵏ ⵙⵉⴷⵉ. ⵃⴹⴰⵎ ⵓ ⴳⴳⴻⵎ ⵜ, ⵎⴰⵖⴰⵔ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵡⴰⵔ ⵉⴵⵉ ⵍⵖⴻⵛⵛ ⵓ ⵏⴻⵜⵜⴰ ⵡⴰⵔ ⵉⵜⵜⴻⴳⴳ ⵙ ⵡⵓⴷⵎⴰⵡⴻⵏ ⵓ ⵡⴰⵔ ⵉⴽⴻⵙⵙⵉ ⵜⵉⵔⵥⵉⴼⵉⵏ.”

8 ⵓⵎⵉ ⴷⴷ-ⵄⴻⵇⴱⴻⵏ ⵖⴰⵔ ⵓⵔⵛⴰⵍⵉⵎ, ⵉⴳⴳⴰ ⵢⴰⵀⵓⵛⴰⴼⴰⵟ ⴷⵉ ⵓⵔⵛⴰⵍⵉⵎ ⵄⴰⵡⴻⴷ ⵛⴰ ⵏ ⵉⵍⴰⵡⵉⵢⵢⴻⵏ ⴷ ⵉⴽⴻⵀⵀⴰⵏⴻⵏ ⴷ ⵉⵥⴻⴵⵉⴼⴻⵏ ⵏ ⵜⵓⴷⵔⵉⵏ ⵏ ⵉⴱⴰⴱⴰⵜⴻⵏ ⵏ ⵉⵙⵔⴰⵉⵍ ⵉ ⵓⴷⴻⴱⴱⴰⵔ ⵏ ⵍⴻⵃⴽⴰⵎ ⵏ ⵙⵉⴷⵉ ⵓ ⵉ ⴷⴷⵄⴰⵡⵉ. 9 ⵏⴻⵜⵜⴰ ⵢⵓⵎⵓⵔ ⵉ-ⵜⴻⵏ, ⵉⵏⵏⴰ: “ⴳⴳⴻⵎ ⴰⵎⴻⵏⵏⵉ ⵙ ⵜⵉⴳⴳⵯⵓⴷⵉ ⵏ ⵙⵉⴷⵉ, ⵙ ⵍⴰⵎⴰⵏ ⵓ ⵙ ⵢⵉⵊⵊ ⵏ ⵡⵓⵍ ⵏⵉⵛⴰⵏ ⵉⵎⵓⵏ.

10 ⵖⴰⵔ ⴽⵓⵍ ⴷⴷⴻⵄⵡⴻⵜ ⵉ ⴷ ⴰⵡⴻⵎ ⵉ ⴷ ⵖⴰ ⵢⴰⵡⵢⴻⵏ ⴰⵢⵜⵎⴰⵜⵡⴻⵎ ⵏⵏⵉ ⵉⵥⴻⴷⴷⵖⴻⵏ ⴷⵉ ⵜⵏⴻⴷⴷⴰⵎ ⵏⵙⴻⵏ, ⵊⴰⵔ ⵉⴷⴰⵎⵎⴻⵏ ⴷ ⵉⴷⴰⵎⵎⴻⵏ ⵓ ⵊⴰⵔ ⵛⵛⴰⵔⵉⵄⴰ ⴷ ⵍⵓⵎⵓⵔ ⴷ ⵜⴻⵡⵚⵉⵢⵢⴰⵜ ⴷ ⵍⴼⴰⵔⴰⵢⵉⴹ, ⵉⵜⵜⵅⴻⵚⵚⴰ ⴰⴷ ⴰⵙⴻⵏ ⵜⵄⴻⵍⵎⴻⵎ, ⵎⴰⵃⴻⵏⴷ ⵡⴰⵔ ⵜⵜⵄⴻⴷⴷⴰⵏ ⵅ ⵙⵉⴷⵉ, ⴰⵍⴰⵎⵉ ⵅⴰⵡⴻⵎ ⴷⴷ ⵖⴰ ⵉⵡⴹⴰ ⵓⴷⵓⵇⵇⴻⵥ ⴷ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ, ⵓ ⵅ ⴰⵢⵜⵎⴰⵜⵡⴻⵎ. ⴳⴳⴻⵎ ⴰⵎⴻⵏⵏⵉ, ⵅⴻⵏⵏⵉ ⵡⴰⵔ ⴷⴰⵢⵡⴻⵎ ⵜⵜ ⵉⵜⵜⴻⴳⴳ ⵃⴻⴷ.

11 ⵅⵥⴰⵔⴻⵎ, ⴰⵎⴰⵔⵢⴰ ⴷ ⴰⴽⴻⵀⵀⴰⵏ ⴰⵎⴻⵇⵇⵔⴰⵏ ⵉ ⵅⴰⵡⴻⵎ ⵉⴵⴰⵏ ⴷⵉ ⵎⴰⵔⵔⴰ ⴷⴷⴻⵄⵡⴻⵜ ⵏ ⵙⵉⴷⵉ, ⵓ ⵣⴰⴱⴰⴷⵢⴰ, ⵎⵎⵉⵙ ⵏ ⵉⵙⵎⴰⵄⵉⵍ, ⵍⵃⴰⴽⴻⵎ ⵏ ⵜⴰⴷⴷⴰⵔⵜ ⵏ ⵢⴰⵀⵓⴷⴰ, ⴰⵇⴰ-ⵜ ⵅ ⴽⵓⵍ ⴷⴷⴻⵄⵡⴻⵜ ⵏ ⵓⵊⴻⴵⵉⴷ. ⵓⵍⴰ ⴷ ⵉⵡⴻⵇⵇⴰⴼⴻⵏ, ⵉⵍⴰⵡⵉⵢⵢⴻⵏ, ⴰⵇⴰ-ⵜⴻⵏ ⴷⵉⵏ ⵥⵥⴰⵜ ⵉ ⵡⵓⴷⴻⵎ ⵏⵡⴻⵎ. ⵉⵍⵉⵎ ⴷ ⵉⵔⵢⴰⵥⴻⵏ ⵓ ⴳⴳⴻⵎ ⵜ ⵓⵛⴰ ⵙⵉⴷⵉ ⴰⴷ ⵢⵉⵍⵉ ⴰⴽ-ⴷ ⵡⴻⵏⵏⵉ ⵉⵚⴻⵍⵃⴻⵏ.”