1 ⵎⵎⵉⵙ ⵢⴰⵀⵓⵛⴰⴼⴰⵟ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ ⵓ ⵏⴻⵜⵜⴰ ⵉⵙⵙⴻⵊⵀⴻⴷ ⵉⵅⴻⴼ ⵏⵏⴻⵙ ⴹⵉⴷⴷ ⵉ ⵉⵙⵔⴰⵉⵍ. 2 ⵏⴻⵜⵜⴰ ⵢⵉⵡⵉ ⵍⵄⴻⵙⴽⴰⵔ ⵖⴰⵔ ⵎⴰⵔⵔⴰ ⵜⵉⵏⴻⴷⴷⴰⵎ ⵉⴼⴰⵔⵢⴻⵏ ⵏ ⵢⴰⵀⵓⴷⴰ ⵓ ⵉⴳⴳⴰ ⵍⵄⴻⵙⴽⴰⵔⴰⵜ ⵏ ⵓⵃⴻⵡⵡⴻⵙ ⴷⵉ ⵜⴻⵎⵎⵓⵔⵜ ⵏ ⵢⴰⵀⵓⴷⴰ ⵓ ⴷⵉ ⵜⵏⴻⴷⴷⴰⵎ ⵏ ⵉⴼⵔⴰⵢⵉⵎ, ⵜⵉⵏⵏⵉ ⵉ ⵜⵓⵖⴰ ⵉⵟⵟⴻⴼ ⴱⴰⴱⴰⵙ ⴰⵙⴰ. 3 ⵙⵉⴷⵉ ⵜⵓⵖⴰ-ⵜ ⴰⴽ-ⴷ ⵢⴰⵀⵓⵛⴰⴼⴰⵟ, ⵎⴰⵖⴰⵔ ⵏⴻⵜⵜⴰ ⵉⴹⴼⴰⵔ ⵉⴱⵔⵉⴷⴻⵏ ⵉⵎⴻⵥⵡⵓⵔⴰ ⵏ ⴱⴰⴱⴰⵙ ⴷⴰⵡⵓⴷ, ⵡⴰⵔ ⵢⴰⵔⵥⵓ ⵛⴰ ⵅ ⵉⴱⴰⵄⵍⴻⵏ, ^□   4 ⵎⴰⵛⴰ ⵢⴰⵔⵥⵓ ⵅ ⴰⵔⴻⴱⴱⵉ ⵏ ⴱⴰⴱⴰⵙ ⵓⵛⴰ ⵢⵓⵢⵓⵔ ⴷⵉ ⵜⵡⴻⵚⵚⴰ ⵏⵏⴻⵙ, ⵡⴰⵔ ⵉⴳⴳⵉ ⴰⵎ ⵜ ⵉⴳⴳⴰ ⵉⵙⵔⴰⵉⵍ. 5 ⵙⵉⴷⵉ ⵉⵙⵙⴻⵎⵜⴻⵏ ⵜⴰⴳⴻⵍⴷⴰ ⵜⴻⵏⵏⵉ ⴷⴻⴳ ⵓⴼⵓⵙ ⵏⵏⴻⵙ ⵓ ⵎⴰⵔⵔⴰ ⵢⴰⵀⵓⴷⴰ ⵢⵉⵡⵉ ⵜⵉⵔⵥⵉⴼⵉⵏ ⵉ ⵢⴰⵀⵓⵛⴰⴼⴰⵟ. ⵉⴷⵡⴻⵍ ⵖⴰⵔⴻⵙ ⴰⵟⵟⴰⵙ ⵏ ⵡⴰⴳⵍⴰ ⴷ ⵛⵛⴰⵏ. 6 ⵓⵍ ⵏⵏⴻⵙ ⵉⵜⵜⵡⴰⵙⴻⵎⵃⴻⴹ ⴷⴻⴳ ⵉⴱⵔⵉⴷⴻⵏ ⵏ ⵙⵉⴷⵉ ⵓ ⵏⴻⵜⵜⴰ ⵉⴽⴽⴻⵙ ⵓⵍⴰ ⴷ ⵍⴻⴳⵄⵓⴷⵉ ⴷ ⵜⵔⴻⴱⴱⵉⵏ ⵏ ⵛⵡⴰⵔⵜⵉ ⵥⵉ ⵢⴰⵀⵓⴷⴰ.

7 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵍⴰⵜⴰ ⵏ ⵍⴻⵃⴽⴰⵎⴻⵜ ⵏⵏⴻⵙ ⵉⵙⵙⴻⴽⴽ ⵉⵛⵜ ⵏ ⵜⴻⴱⵔⴰⵜ ⵉ ⵍⵃⵓⴽⴽⴰⵎ, ⵉ ⴱⵉⵏ-ⵃⴰⵢⵉⵍ, ⵄⵓⴱⴰⴷⵢⴰ, ⵣⴰⴽⴰⵔⵉⵢⵢⴰ, ⵏⴰⵜⴰⵏⵉⵢⵉⵍ ⴷ ⵎⵉⵅⴰⵢⴰ, ⵃⵉⵎⴰ ⴰⴷ ⵙⵙⵖⴰⵔⴻⵏ ⴷⵉ ⵜⵏⴻⴷⴷⴰⵎ ⵏ ⵢⴰⵀⵓⴷⴰ. 8 ⵔⵓⵃⴻⵏ ⴰⴽⵉⴷⵙⴻⵏ ⵉⵍⴰⵡⵉⵢⵢⴻⵏ ⵛⵎⴰⵄⵢⴰ, ⵏⴰⵜⴰⵏⵢⴰ, ⵣⴰⴱⴰⴷⵢⴰ, ⵄⴰⵙⴰⵢⵉⵍ, ⵛⴰⵎⵉⵔⴰⵎⵓⵜ, ⵢⵓⵏⴰⵜⴰⵏ, ⵜⵓⴱⵉⵢⴰ ⴷ ⵟⵓⴱ-ⴰⴷⵓⵏⵉⵢⴰ, ⵎⴰⵔⵔⴰ ⵉⵍⴰⵡⵉⵢⵢⴻⵏ, ⵓⵛⴰ ⵓⵍⴰ ⴷ ⵉⴽⴻⵀⵀⴰⵏⴻⵏ ⴰⵍⵉⵛⴰⵎⴰⵄ ⴷ ⵢⴰⵀⵓⵔⴰⵎ ⵔⵓⵃⴻⵏ ⴰⴽⵉⴷⵙⴻⵏ. 9 ⵏⵉⵜⵏⵉ ⵙⵙⵖⴰⵔⴻⵏ ⴷⵉ ⵢⴰⵀⵓⴷⴰ ⵓ ⵜⵓⵖⴰ ⵖⴰⵔⵙⴻⵏ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ ⵏ ⵛⵛⴰⵔⵉⵄⴰ ⵏ ⵙⵉⴷⵉ. ⴽⴽⵉⵏ ⵎⴰⵔⵔⴰ ⵜⵉⵏⴻⴷⴷⴰⵎ ⵏ ⵢⴰⵀⵓⴷⴰ ⵓⵛⴰ ⵙⵙⵖⴰⵔⴻⵏ ⵍⴳⴻⵏⵙ.

10 ⵜⵓⵙⴰ-ⴷⴷ ⴰⵔⵔⴻⵀⴱⴻⵜ ⵏ ⵙⵉⴷⵉ ⵅ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏ ⵜⴻⵎⵎⵓⵔⴰ ⵉ-ⴷⴷ-ⵉⵏⵏⴹⴻⵏ ⵉ ⵢⴰⵀⵓⴷⴰ, ⴰⵍⴰⵎⵉ ⵡⴰⵔ ⵙⵙⴻⴽⴽⴰⵔⴻⵏⵜ ⴰⵎⴻⵏⵖⵉ ⴰⴽ-ⴷ ⵢⴰⵀⵓⵛⴰⴼⴰⵟ.

11 ⵣⴻⴳ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵙⵉⵏ-ⴷⴷ ⵛⴰ ⵉⵡⵢⴻⵏ ⵜⵉⵔⵥⵉⴼⵉⵏ ⴷ ⵏⵏⵓⵇⴰⵔⵜ ⴰⵎ ⵍⵊⵉⵥⵢⴰ ⵉ ⵢⴰⵀⵓⵛⴰⴼⴰⵟ. ⵓⵍⴰ ⴷ ⴰⵄⵔⴰⴱⴻⵏ ⵙⵙⴻⴽⴽⴻⵏ ⴰⵙ ⵓⴵⵉ: ⵙⴻⴱⵄⴰ-ⴰⵍⴰⴼ ⵓ-ⵙⴻⴱⵄⴰ-ⵎⵢⴰ ⵏ ⵉⵛⴰⵔⵔⵉⵢⵢⴻⵏ ⴷ ⵙⴻⴱⵄⴰ-ⴰⵍⴰⴼ ⵓ-ⵙⴻⴱⵄⴰ-ⵎⵢⴰ ⵏ ⵉⵎⵓⵢⴰⵏ.

12 ⴰⵎⵎⵓ ⵉ ⵉⴷⵡⴻⵍ ⵢⴰⵀⵓⵛⴰⴼⴰⵟ ⵢⴰⵔⵏⵉ ⴷⵉ ⵍⴻⵎⵖⴰⵔⴻⵜ ⴰⵍ ⵟⵟⴰⵔⴼ ⵓⵛⴰ ⵉⴱⵏⴰ ⵍⵇⴻⵍⵄⴰⵜ ⴷ ⵜⵏⴻⴷⴷⴰⵎ ⵏ ⵍⴻⵅⵥⴻⵏ ⴷⵉ ⵢⴰⵀⵓⴷⴰ.

13 ⵜⵓⵖⴰ ⵖⴰⵔⴻⵙ ⴰⵟⵟⴰⵙ ⵏ ⵍⵅⴻⴷⵎⴻⵜ ⴷⵉ ⵜⵏⴻⴷⴷⴰⵎ ⵏ ⵢⴰⵀⵓⴷⴰ, ⵓⵍⴰ ⴷ ⵉⵄⴻⵙⴽⴰⵔⵉⵢⵢⴻⵏ, ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ, ⴷⵉ ⵓⵔⵛⴰⵍⵉⵎ.

14 ⴷ ⵡⴰⵏⵉⵜⴰ ⴷ ⵍⵇⴻⴷⴷ ⵏⵙⴻⵏ, ⵄⵍⴰⵃⵙⴰⴱ ⵜⵓⴷⵔⵉⵏ ⵏ ⵉⴱⴰⴱⴰⵜⴻⵏ ⵏⵙⴻⵏ. ⴷⵉ ⵢⴰⵀⵓⴷⴰ ⴰⵇⴰ ⵉⵏⴰ ⴷ ⵉⵎⴻⵇⵇⵔⴰⵏⴻⵏ ⵅ ⵍⵓⵍⵓⴼ: ⴰⵎⴻⵇⵇⵔⴰⵏ ⴰⴷⵏⴰ, ⵓ ⴰⴽⵉⴷⴻⵙ ⵜⴻⵍⵜ-ⵎⵢⴰⵜ-ⴰⵍⴻⴼ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ.

15 ⵖⴰⵔ ⵓⵖⴻⵥⴷⵉⵙ ⵏⵏⴻⵙ ⴰⵎⴻⵇⵇⵔⴰⵏ ⵢⴰⵀⵓⵏⴰⵜⴰⵏ, ⵓ ⴰⴽⵉⴷⴻⵙ ⵎⵉⵜⴰⵢⴻⵏ ⵓ-ⵜⵎⴰⵏⵢⵉⵏ-ⴰⵍⴻⴼ ⵏ ⵢⴻⵔⵢⴰⵥⴻⵏ.

16 ⵖⴰⵔ ⵓⵖⴻⵥⴷⵉⵙ ⵏⵏⴻⵙ ⴰⵎⴻⵇⵇⵔⴰⵏ ⵄⴰⵎⴰⵙⵢⴰ, ⵎⵎⵉⵙ ⵏ ⵣⵉⴽⵔⵉ, ⵡⴻⵏⵏⵉ ⵜⵓⵖⴰ ⵉⵙⴻⴱⴱⵍⴻⵏ ⵉⵅⴻⴼ ⵏⵏⴻⵙ ⵙ ⵍⵅⴰⴹⴰⵔ, ⵓ ⴰⴽⵉⴷⴻⵙ ⵎⵉⵜⴰⵢⴻⵏ-ⴰⵍⴻⴼ ⵏ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ.

17 ⵣⵉ ⴱⵉⵏⵢⴰⵎⵉⵏ ⵜⵓⵖⴰ ⴰⵍⵉⵢⴰⴷⴰⵄ, ⵉⵊⵊ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ, ⴷ ⴰⵎⴻⵇⵇⵔⴰⵏ ⵏⵙⴻⵏ, ⵓ ⴰⴽⵉⴷⴻⵙ ⵎⵉⵜⴰⵢⴻⵏ-ⴰⵍⴻⴼ ⵏ ⵢⴻⵔⵢⴰⵥⴻⵏ ⵙ ⵍⵇⴻⵡⵙ ⴷ ⵜⵙⴻⴷⴷⴰⵔⵜ ⵏ ⵓⵄⴻⵙⴽⴰⵔⵉ ⵉ ⵓⵎⴻⵏⵖⵉ.

18 ⵖⴰⵔ ⵓⵖⴻⵥⴷⵉⵙ ⵏⵏⴻⵙ ⴰⵎⴻⵇⵇⵔⴰⵏ ⵢⴰⵀⵓⵥⴰⴱⴰⴷ ⵓ ⴰⴽⵉⴷⴻⵙ ⵎⵢⴰ ⵓ-ⵜⵎⴰⵏⵢⵉⵏ-ⴰⵍⴻⴼ ⵏ ⵢⴻⵔⵢⴰⵥⴻⵏ ⵃⴻⵥⵥⵎⴻⵏ ⵉ ⵓⵎⴻⵏⵖⵉ.

19 ⵉⵏⴰ ⵜⵓⵖⴰ ⵜⵜⵙⴻⵅⵅⴰⵔⴻⵏ ⵉ ⵓⵊⴻⴵⵉⴷ, ⴱⵍⴰ ⵉⵏⵏⵉ ⵉ ⵜⵓⵖⴰ ⵉⴳⴳⴰ ⵓⵊⴻⴵⵉⴷ ⵅ ⵜⵏⴻⴷⴷⴰⵎ ⵉⴼⴰⵔⵢⴻⵏ ⵙ ⵍⴻⵃⵢⵓⴹ ⴷⵉ ⵎⴰⵔⵔⴰ ⵢⴰⵀⵓⴷⴰ.