1 ⵅⴻⵏⵏⵉ ⵢⵓⵙⴰ-ⴷⴷ ⴰⵔⵔⵓⵃ ⵏ ⴰⵔⴻⴱⴱⵉ ⵅ ⵄⴰⵥⴰⵔⵢⴰ, ⵎⵎⵉⵙ ⵏ ⵄⵓⴷⵉⴷ. 2 ⵏⴻⵜⵜⴰ ⵢⵓⵢⵓⵔ ⵉⴱⴻⴷⴷ ⵥⵥⴰⵜ ⵉ ⴰⵙⴰ, ⵉⵏⵏⴰ ⴰⵙ: “ⵙⴻⵍ-ⴷⴷ ⵖⴰⵔⵉ, ⴰⵙⴰ, ⴷ ⵎⴰⵔⵔⴰ ⴰⵢⵜ ⵏ ⵢⴰⵀⵓⴷⴰ ⴷ ⴱⵉⵏⵢⴰⵎⵉⵏ! ⵙⵉⴷⵉ ⴰⵇⴰ-ⵜ ⴰⴽⵉⴷⵡⴻⵎ ⵓ ⴽⴻⵏⵏⵉⵡ ⴰⴽⵉⴷⴻⵙ. ⵎⴰⵍⴰ ⵜⴰⵔⴻⵥⵥⵓⵎ ⵅⴰⵙ, ⵏⴻⵜⵜⴰ ⴰⴷ ⴽⴻⵏⵏⵉⵡ ⵢⴰⵔⵔ ⴰⴷ ⵜ ⵜⴰⴼⴻⵎ, ⵎⴰⵛⴰ ⵎⴰⵍⴰ ⴽⴻⵏⵏⵉⵡ ⵜⵃⴻⵢⵢⴷⴻⵎ ⵅⴰⵙ, ⴰⴷ ⵅⴰⵡⴻⵎ ⵉⵃⴻⵢⵢⴻⴷ ⵓⵍⴰ ⴷ ⵏⴻⵜⵜⴰ. 3 ⴰⵟⵟⴰⵙ ⵏ ⵡⵓⵙⵙⴰⵏ ⵉ ⵉⵇⵇⵉⵎ ⵉⵙⵔⴰⵉⵍ ⴱⵍⴰ ⴰⵔⴻⴱⴱⵉ ⵏ ⵜⵉⴷⴻⵜⵜ ⵓ ⴱⵍⴰ ⵉⵊⵊ ⵏ ⵓⴽⴻⵀⵀⴰⵏ ⵉⵙⵙⵖⴰⵔⴰⵏ ⵓ ⴱⵍⴰ ⵛⵛⴰⵔⵉⵄⴰ. 4 ⵎⴰⵍⴰ ⴷⴻⵡⵍⴻⵏ-ⴷⴷ ⵏⵉⵜⵏⵉ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⴷⵉ ⵍⴻⵃⵚⴰⵔⴻⵜ ⵓ ⴰⵔⵥⵓⵏ ⵅⴰⵙ, ⵉⵊⵊⴰ ⵉ-ⵜⴻⵏ ⴰⴷ ⵜ ⴰⴼⴻⵏ. 5 ⴷⴻⴳ ⵡⵓⵙⵙⴰⵏ ⵏⵏⵉ ⵡⴰⵔ ⴷⵉⵏ ⵜⵓⵖⵉ ⵍⴻⵀⵏⴰ ⵉ ⵡⴻⵏⵏⵉ ⴷⴷ-ⵉⴼⴼⵖⴻⵏ ⵓ ⵉ ⵡⴻⵏⵏⵉ ⵢⴰⵔⴻⴳⴳⵯⵃⴻⵏ, ⵎⴰⵖⴰⵔ ⴰⵇⴰ ⴷⵉⵏ ⴰⵟⵟⴰⵙ ⵏ ⵍⴻⵃⵡⴻⵍ ⵊⴰⵔ ⵎⴰⵔⵔⴰ ⵉⵎⴻⵥⴷⴰⵖ ⵏ ⵜⴻⵎⵎⵓⵔⴰ. 6 ⵉⵊⵊ ⵏ ⵍⴳⴻⵏⵙ ⵉⵜⵜⵡⴰⵄⴼⴻⵙ ⵥⴻⴳ ⵉⵊⵊ ⵏ ⵍⴳⴻⵏⵙ ⵏⵏⴻⵖⵏⵉ ⵓ ⵉⵛⵜ ⵏ ⵜⴻⵏⴷⵉⵏⵜ ⵥⴻⴳ ⵉⵛⵜ ⵏ ⵜⴻⵏⴷⵉⵏⵜ ⵏⵏⴻⵖⵏⵉⵜ, ⵎⴰⵖⴰⵔ ⴰⵔⴻⴱⴱⵉ ⵉⵙⵙⵉⴳⴳⵯⴻⴷ ⵉ-ⵜⴻⵏ ⵙ ⴽⵓⵍ ⵍⴻⵃⵚⴰⵍⴻⵜ. 7 ⴽⴻⵏⵏⵉⵡ ⵎⴰⵛⴰ ⵉⵍⵉⵎ ⴷ ⵉⵔⵢⴰⵥⴻⵏ, ⵡⴰⵔ ⵜⵜⴻⵊⵊⵉⵎ ⴰⴷ ⴰⵔⵅⵓⵏ ⵉⴼⴰⵙⵙⴻⵏ ⵏⵡⴻⵎ, ⵎⴰⵖⴰⵔ ⴰⵇⴰ ⴷⵉⵏ ⵍⵎⵓⵏⴻⵜ ⵉ ⵍⵅⴻⴷⵎⴻⵜ ⵏⵡⴻⵎ.” 8 ⵓⵎⵉ ⴰⵙⴰ ⵉⵙⵍⴰ ⴰⵡⴰⵍⴻⵏ-ⴰ ⴷ ⵏⵏⵓⴱⵓⵡⴰ ⵏ ⵓⵏⴰⴱⵉ ⵄⵓⴷⵉⴷ, ⵉⵙⵙⴻⵊⵀⴻⴷ ⵉⵅⴻⴼ ⵏⵏⴻⵙ ⵓⵛⴰ ⵉⵙⵙⴱⴻⵄⵄⴻⴷ ⵏⵏⵄⴰⵡⴰⵜ ⵏ ⵚⵚⴰⵏⴰⵎ ⵥⵉ ⵎⴰⵔⵔⴰ ⵜⴰⵎⵎⵓⵔⵜ ⵏ ⵢⴰⵀⵓⴷⴰ ⴷ ⴱⵉⵏⵢⴰⵎⵉⵏ ⵓ ⵥⵉ ⵎⴰⵔⵔⴰ ⵜⵉⵏⴻⴷⴷⴰⵎ ⵏⵏⵉ ⵜⵓⵖⴰ ⵉⵟⵟⴻⴼ ⵅ ⵉⴷⵓⵔⴰⵔ ⵏ ⵉⴼⵔⴰⵢⵉⵎ ⵓⵛⴰ ⵉⵄⴷⴻⵍ ⵓⵄⴰⵍⵟⴰⵔ ⵏ ⵙⵉⴷⵉ, ⵡⴻⵏⵏⵉ ⵉⴵⴰⵏ ⵥⵥⴰⵜ ⵉ ⵡⴻⵙⵇⵉⴼ ⵏ ⵡⴰⴷⴰⴼ ⵉ ⵣⵥⴰⵡⴻⵛⵜ ⵏ ⵙⵉⴷⵉ. 9 ⵉⵙⵙⵎⵓⵏ ⵎⴰⵔⵔⴰ ⵢⴰⵀⵓⴷⴰ ⴷ ⴱⵉⵏⵢⴰⵎⵉⵏ, ⵓⵍⴰ ⴷ ⵉⴱⴰⵔⵔⴰⵏⵉⵢⵢⴻⵏ ⵥⴻⴳ ⵉⴼⵔⴰⵢⵉⵎ, ⵥⵉ ⵎⴰⵏⴰⵙⵙⴰ ⵓ ⵥⵉ ⵛⵉⵎⵄⵓⵏ. ⵎⴰⵖⴰⵔ ⴰⵟⵟⴰⵙ ⵥⵉ ⵉⵙⵔⴰⵉⵍ ⵄⴷⵓⵏ ⵖⴰⵔⴻⵙ, ⵓⵎⵉ ⵏⵉⵜⵏⵉ ⵥⵔⵉⵏ, ⴰⵇⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ, ⵜⵓⵖⴰ-ⵜ ⴰⴽⵉⴷⴻⵙ.

10 ⵏⵉⵜⵏⵉ ⵎⵓⵏⴻⵏ ⴷⵉ ⵓⵔⵛⴰⵍⵉⵎ ⴷⴻⴳ ⵓⵢⵓⵔ ⵡⵉⵙⵙ ⵜⵍⴰⵜⴰ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵅⴻⵎⵎⴻⵙⵟⴰⵛ ⵏ ⵜⴳⴻⵍⴷⴰ ⵏ ⴰⵙⴰ.

11 ⴷⴻⴳ ⵡⴰⵙⵙ ⵏⵏⵉ ⵡⴻⵀⵀⴱⴻⵏ ⵏⵉⵜⵏⵉ ⵙⴻⴱⵄⴰ-ⵎⵢⴰ ⵏ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵙⴻⴱⵄⴰ ⴰⵍⴰⴼ ⵏ ⵡⵓⴵⵉ ⴷ ⵜⵖⴰⵔⵚⵜ ⵉ ⵙⵉⴷⵉ ⵥⵉ ⵜⴽⴻⵛⵛⴰⴹⵜ ⵉ ⴽⵉⴷⵙⴻⵏ ⵉⵡⵢⴻⵏ.

12 ⵏⵉⵜⵏⵉ ⵓⴷⴼⴻⵏ ⵖⴰⵔ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⵙⵉⴷⵉ ⵎⴰⵃⴻⵏⴷ ⴰⴷ ⴰⵔⵥⵓⵏ ⵙⵉⴷⵉ, ⴰⵔⴻⴱⴱⵉ ⵏ ⵉⴱⴰⴱⴰⵜⴻⵏ ⵏⵙⴻⵏ, ⵙ ⵎⴰⵔⵔⴰ ⵓⵍ ⵏⵙⴻⵏ ⵓ ⵙ ⵎⴰⵔⵔⴰ ⵍⴻⵄⵎⴰⵔ ⵏⵙⴻⵏ.

13 ⵎⴰⵔⵔⴰ ⵡⴻⵏⵏⵉ ⵡⴰⵔ ⵢⴰⵔⴻⵥⵥⵓⵏ ⵅ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⵏⴻⵖ, ⴰⵎ ⵓⵎⴻⵥⵢⴰⵏ ⴰⵎ ⵓⵎⴻⵇⵇⵔⴰⵏ, ⴰⵎ ⵡⴻⵔⵢⴰⵥ ⴰⵎ ⵜⴻⵎⵖⴰⵔⵜ.

14 ⵏⵉⵜⵏⵉ ⵊⵊⵓⴵⴻⵏ ⵉ ⵙⵉⴷⵉ ⵙ ⵜⵎⵉⵊⵊⴰ ⵜⴻⵊⵀⴻⴷ, ⵙⴰⴷⵓ ⵓⵚⵓⴹⵉ ⵙ ⵍⵖⴰⵢⵟⴰⵜ ⴷ ⵡⴰⵛⵛⴰⵡⴻⵏ ⵏ ⵉⵛⴰⵔⵔⵉ.

15 ⵎⴰⵔⵔⴰ ⵢⴰⵀⵓⴷⴰ ⵜⴼⴰⵔⵃ ⵅ ⵜⵊⴰⴵⵉⵜ ⵎⴰⵖⴰⵔ ⵏⵉⵜⵏⵉ ⵜⵓⵖⴰ ⴳⴳⵉⵏ ⵜⵜ ⵙ ⵎⴰⵔⵔⴰ ⵓⵍ ⵏⵙⴻⵏ ⵓⵎⵉ ⵏⵉⵜⵏⵉ ⴰⵔⵥⵓⵏ ⵅⴰⵙ ⵙ ⵎⴰⵔⵔⴰ ⴰⵔⴹⴰ ⵏⵙⴻⵏ ⵓ ⵏⴻⵜⵜⴰ ⵉⵊⵊⴰ ⵉ-ⵜⴻⵏ ⴰⴷ ⵜ ⴰⴼⴻⵏ ⵓⵛⴰ ⵙⵉⴷⵉ ⵉⵡⵛⴰ ⴰⵙⴻⵏ ⵍⵀⵓⴷⵏⴻⵜ ⵥⵉ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵏⵙⴻⵏ.

16 ⵉⵙⵙⵃⴻⵢⵢⴻⴷ ⴰⵙⴰ ⵓⵍⴰ ⴷ ⵃⴻⵏⵏⴰⵙ ⵎⴰⵄⴽⴰ ⵥⵉ ⵊⵊⴻⵀⴷ ⵏⵏⴻⵙ, ⵎⴰⵖⴰⵔ ⵏⴻⵜⵜⴰⵜ ⵜⵓⵖⴰ ⵜⴻⴳⴳⴰ ⵉⵛⵜ ⵏ ⵊⵊⵄⵉⴼⴻⵛⵜ ⵏ ⵍⴻⵅⵢⴰⵍ ⵉ ⵜⵔⴻⴱⴱⵉⵜ ⵏ ⵛⵡⴰⵔⵜⵉ. ⴰⵙⴰ ⵉⵛⴻⵇⵇⴰⵔ ⵊⵊⵄⵉⴼⴻⵛⵜ ⵏⵏⴻⵙ, ⵉⵍⴱⴻⵥ ⵉ-ⵜⵜ ⵓⵛⴰ ⵉⵙⵙⵛⴻⵎⴹ ⵉ-ⵜⵜ ⵖⴰⵔ ⵜⴻⵖⵥⴰⵔⵜ ⵏ ⵇⵉⴷⵔⵓⵏ. ^■  

17 ⵡⴰⵅⵅⴰ ⵡⴰⵔ ⵜⵜⵡⴰⵃⴻⵢⵢⴷⴻⵏⵜ ⵍⴻⴳⵄⵓⴷⵉ, ⵎⴰⵛⴰ ⵓⵍ ⵏ ⴰⵙⴰ ⵜⵓⵖⴰ ⵉⵛⴹⴰⵔ ⵏⵉⵛⴰⵏ ⵉ ⵙⵉⴷⵉ, ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ. ^■  

18 ⵜⵉⵡⵀⵉⴱⵉⵏ ⵉⵇⴻⴷⴷⵙⴻⵏ ⵏ ⴱⴰⴱⴰⵙ ⴷ ⵎⵉⵏ ⵜⵓⵖⴰ ⵉⵙⵙⵇⴻⴷⴷⴻⵙ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵢⵉⵡⵢⵉ-ⵜ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵓⵍⴰ ⴷ ⵜⵉⵡⵀⵉⴱⵉⵏ ⵏⵏⴻⵙ ⵉⵇⴻⴷⴷⵙⴻⵏ: ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵇⵛⵓⵄ ⵏⵏⴻⵖⵏⵉ. ^■  

19 ⵡⴰⵔ ⴷⵉⵏ ⵉⵇⵇⵉⵎ ⵄⴰⴷ ⵓⵎⴻⵏⵖⵉ ⴰⵍ ⴰⵙⴻⴳⴳⵯⴰⵙ ⵡⵉⵙⵙ ⵅⴻⵎⵙⴰ ⵓ-ⵜⵍⴰⵜⵉⵏ ⵏ ⵜⴳⴻⵍⴷⴰ ⵏ ⴰⵙⴰ.