1 ⵖⴰⵔ ⵓⵇⴻⵟⵟⵓ ⵏ ⵓⵙⴻⴳⴳⵯⴰⵙ ⵏ ⵊⴷⵉⴷ, ⴷⵉ ⵍⵡⴻⵇⵜ ⵉ ⴷⴷ ⵉⵜⵜⴻⴼⴼⵖⴻⵏ ⵉⵊⴻⴵⵉⴷⴻⵏ ⵖⴰⵔ ⵓⵎⴻⵏⵖⵉ, ⵉⵎⵙⴰⵔ ⴰⵇⴰ ⵢⵓⵡⴰⴱ ⵉⴳⴻⵡⵡⴻⴷ ⵍⵄⴻⵙⴽⴰⵔ. ⵢⴰⵔⴻⴷⴷⴻⴵ ⵜⴰⵎⵎⵓⵔⵜ ⵏ ⴰⵢⵜ ⵏ ⵄⴰⵎⵎⵓⵏ ⵓⵛⴰ ⵉⵏⵏⴻⴹ ⵉ ⵔⴰⴱⴱⴰ, ⵉⵃⵚⴰⵔ ⵉ-ⵜⵜ, ⵎⵉⵏⵜⵍⴰ ⴷⴰⵡⵓⴷ ⵉⵇⵇⵉⵎ ⴷⵉ ⵓⵔⵛⴰⵍⵉⵎ. ⵢⵓⵡⴰⴱ ⵉⵖⵍⴻⴱ ⵅ ⵔⴰⴱⴱⴰ ⵓⵛⴰ ⵉⵜⴻⵃⵃⴰ ⵉ-ⵜⵜ. 2 ⴷⴰⵡⵓⴷ ⵉⴽⴽⴻⵙ ⵜⵜⴰⵊ ⵏ ⵓⵊⴻⴵⵉⴷ ⵅ ⵓⵥⴻⴵⵉⴼ ⵏⵏⴻⵙ, ⵓⵛⴰ ⵢⵓⴼⴰ ⵍⴻⵡⵥⴻⵏ ⵏⵏⴻⵙ ⴷ ⵉⵛⵜ ⵏ ⵜⴰⵍⵉⵏⵜ ⵏ ⵡⵓⵔⴻⵖ ⵓ ⵜⵓⵖⴰ ⵅⴰⵙ ⵜⴰⵢⴰⵇⵓⵜⵉⵏ ⵉⵖⵍⴰⵏ. ⵉⵜⵜⵡⴰⵙⵙⴰⵔⵙ ⵜⵜⴰⵊ ⵅ ⵓⵥⴻⴵⵉⴼ ⵏ ⴷⴰⵡⵓⴷ. ⵏⴻⵜⵜⴰ ⵢⵉⵡⵉ-ⴷⴷ ⵄⴰⵡⴻⴷ ⵜⴰⴽⴻⵛⵛⴰⴹⵜ ⴷ ⵜⴰⵎⴻⵇⵇⵔⴰⵏⵜ ⴰⵟⵟⴰⵙ ⵥⵉ ⵜⴻⵏⴷⵉⵏⵜ. 3 ⵍⴳⴻⵏⵙ ⵏⵏⵉ ⴷⴰⵢⴻⵙ ⵉⴵⴰⵏ, ⵉⵙⵙⵓⴼⴼⴻⵖ ⵉ-ⵜ ⵓⵛⴰ ⵉⵙⵙⴻⵥⵥⴻⵍ ⵉ-ⵜⴻⵏ ⵙⴰⴷⵓ ⵍⵎⴻⵏⵛⴰⵔⴰⵜ ⵓ ⵙⴰⴷⵓ ⵉⵢⴰⵍⵥⵉⵎⴻⵏ ⵏ ⵡⵓⵥⵥⴰⵍ ⵓ ⵙⴰⴷⵓ ⵛⵛⵡⴰⵇⴰⵔ ⵏ ⵡⵓⵥⵥⴰⵍ. ⴰⵎⵎⵓ ⵉ ⵉⴳⴳⴰ ⴷⴰⵡⵓⴷ ⴰⴽ-ⴷ ⵎⴰⵔⵔⴰ ⵜⵉⵏⴻⴷⴷⴰⵎ ⵏ ⴰⵢⵜ ⵏ ⵄⴰⵎⵎⵓⵏ. ⵅⴻⵏⵏⵉ ⵉⵄⵇⴻⴱ ⴷⴰⵡⵓⴷ ⴷ ⵎⴰⵔⵔⴰ ⵍⴳⴻⵏⵙ ⵖⴰⵔ ⵓⵔⵛⴰⵍⵉⵎ.

4 ⴰⵡⴰⵔⵏⵉ ⴰⵙ ⵉⵎⵙⴰⵔ, ⴰⵇⴰ ⵉⴽⴽⴰⵔ ⵄⴰⵡⴻⴷ ⵓⵎⴻⵏⵖⵉ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⵉ ⵊⴰⵥⴰⵔ. ⵍⴻⵅⴷⴻⵏⵏⵉ ⵉⵖⵍⴻⴱ ⵙⴰⴱⴽⴰⵢ, ⴰⵃⵓⵛⴰⵢⵉ, ⵅ ⵙⴰⴼⴼⴰⵢ, ⵡⴻⵏⵏⵉ ⴷ ⵉⵊⵊ ⵥⴻⴳ ⵉⵃⴻⵏⵊⵉⵔⴻⵏ ⵏ ⵔⴰⴼⴰ, ⵓⵛⴰ ⵜⵜⵡⴰⵙⵡⴰⴹⵄⴻⵏ ⵏⵉⵜⵏⵉ.

5 ⵜⵓⵖⴰ ⴷⵉⵏ ⵄⴰⵡⴻⴷ ⴰⵎⴻⵏⵖⵉ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ. ⵉⵍⵃⴰⵏⴰⵏ, ⵎⵎⵉⵙ ⵏ ⵢⴰⵄⵉⵔ, ⵉⵖⵍⴻⴱ ⵅ ⵍⴰⵃⵎⵉ, ⵓⵎⴰⵙ ⵏ ⵊⵓⵍⵉⵢⴰⵜ, ⵥⵉ ⵊⴰⵜ. ⴰⴽⴻⵛⵛⵓⴹ ⵏ ⵍⴰⵏⵙⴰ ⵏⵏⴻⵙ ⵉⴳⴳⴰ ⴰⵎ ⵉⵊⵊ ⵏ ⵡⴻⵄⵎⵓⴹ ⵏ ⵓⴽⴻⵛⵛⵓⴹ ⵏ ⵓⵅⴻⵢⵢⴻⴹ. 6 ⵓⵛⴰ ⵉⴽⴽⴰⵔ ⵄⴰⵡⴻⴷ ⵓⵎⴻⵏⵖⵉ ⴷⵉ ⵊⴰⵜ. ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵥ ⴷ ⴰⵥⵉⵔⴰⵔ, ⵙ ⵙⴻⵜⵜⴰ ⵏ ⵉⴹⴻⵡⴹⴰⵏ ⴷⴻⴳ ⵉⴼⴰⵙⵙⴻⵏ ⵏⵏⴻⵙ ⵓ ⵙⴻⵜⵜⴰ ⵏ ⵜⴼⴻⴷⵏⵉⵏ ⴷⴻⴳ ⵉⴹⴰⵔⴻⵏ ⵏⵏⴻⵙ, ⵎⴰⵔⵔⴰ ⵍⵇⴻⴷⴷ ⵏⵙⴻⵏ ⴰⵔⴻⴱⵄⴰ ⵓ-ⵄⵉⵛⵔⵉⵏ. ⵓⵍⴰ ⴷ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⵉ ⵔⴰⴼⴰ. 7 ⵏⴻⵜⵜⴰ ⵉⵙⵙⵜⴻⵀⵥⴰ ⵥⵉ ⵉⵙⵔⴰⵉⵍ, ⵎⴰⵛⴰ ⵢⵓⵏⴰⵜⴰⵏ, ⵎⵎⵉⵙ ⵏ ⵛⵉⵎⵄⴰ, ⵓⵎⴰⵙ ⵏ ⴷⴰⵡⵓⴷ, ⵉⵖⵍⴻⴱ ⵅⴰⵙ. 8 ⵉⵏⴰ ⵜⵜⵡⴰⵅⴻⵍⵇⴻⵏ-ⴷⴷ ⵉ ⵔⴰⴼⴰ ⴷⵉ ⵊⴰⵜ ⵓ ⵏⵉⵜⵏⵉ ⵡⴹⴰⵏ ⵙ ⵓⴼⵓⵙ ⵏ ⴷⴰⵡⵓⴷ ⵓ ⵙ ⵓⴼⵓⵙ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ.