1 ⴷⴰⵡⵓⴷ ⵉⵎⵛⴰⵡⴰⵔ ⴰⴽ-ⴷ ⵍⵇⴻⴱⵟⴰⵏⴰⵜ ⵅ ⵡⴰⵍⴻⴼ ⴷ ⵅ ⵎⵢⴰ ⵓ ⴰⴽ-ⴷ ⵎⴰⵔⵔⴰ ⵉⵎⴳⴻⵡⵡⴰⴷⴻⵏ. 2 ⴷⴰⵡⵓⴷ ⵉⵏⵏⴰ ⵉ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ ⵏ ⵉⵙⵔⴰⵉⵍ: “ⵎⴰⵍⴰ ⵢⴰⵔⴹⴰ ⵉ ⴽⴻⵏⵏⵉⵡ ⵓⵍⴰ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⴻⵊⵊ ⴰⵏⴻⵖ ⴰⴷ ⵏⴻⵙⵙⴻⴽⴽ ⴷⴻⵖⵢⴰ ⵉⵔⴻⵇⵇⴰⵙⴻⵏ ⵖⴰⵔ ⵢⴰⵢⵜⵎⴰⵜⵏⴻⵖ ⵏⵏⵉ ⵉⵇⵇⵉⵎⴻⵏ ⴷⵉ ⵎⴰⵔⵔⴰ ⵜⵉⵎⵎⵓⵔⴰ ⵏ ⵉⵙⵔⴰⵉⵍ ⵓ ⵖⴰⵔ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ ⵏⵏⵉ ⵉⵥⴻⴷⴷⵖⴻⵏ ⴰⴽⵉⴷⵙⴻⵏ ⴷⵉ ⵜⵏⴻⴷⴷⴰⵎ ⴰⴽ-ⴷ ⴷⴷⵎⴰⵏⵉ ⵏⵙⴻⵏⵜ ⵏ ⵜⴰⵔⴻⵡⵙⴰ, ⵃⵉⵎⴰ ⵏⵉⵜⵏⵉ ⴰⴷ ⵖⴰⵔⵏⴻⵖ ⵏⵏⵢⴰⵔⵡⴻⵏ 3 ⵓ ⴻⵊⵊ ⴰⵏⴻⵖ ⴰⴷ ⵖⴰⵔⵏⴻⵖ ⴷⴷ-ⵏⴰⵔⵔ ⵜⵜⴰⴱⵓⵜ ⵏ ⴰⵔⴻⴱⴱⵉ, ⵎⴰⵖⴰⵔ ⴷⴻⴳ ⵡⵓⵙⵙⴰⵏ ⵏ ⵛⴰⵡⵓⵍ ⵡⴰⵔ ⴰⴽⵉⴷⴻⵙ ⵏⴻⵍⵀⵉ. 4 ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ ⵉⵏⵏⴰ ⴱⴻⵍⵍⵉ ⴰⴷ ⴳⴳⴻⵏ ⴰⵎⵎⵓ, ⵎⴰⵖⴰⵔ ⴷ ⵎⴰⵏ ⴰⵢⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⴷ ⵜⴰⵚⴻⴱⵃⴰⵏⵜ ⴷⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵍⴳⴻⵏⵙ.

5 ⴷⴰⵡⵓⴷ ⵉⵙⵙⵎⵓⵏ ⵎⴰⵔⵔⴰ ⵉⵙⵔⴰⵉⵍ, ⵥⴻⴳ ⵢⴻⵖⵥⴰⵔ ⵏ ⵛⵉⵃⵓⵔ ⵖⴰⵔ ⵎⵉⵚⵔⴰ ⴰⵍ ⵎⴰⵏⵉ ⵉ ⵖⴰ ⵜⵉⵡⴹⴻⴷ ⵖⴰⵔ ⵃⴰⵎⴰⵜ, ⵃⵉⵎⴰ ⴰⴷ ⵙⵙⴳⴻⵄⵄⴷⴻⵏ ⵜⵜⴰⴱⵓⵜ ⵏ ⴰⵔⴻⴱⴱⵉ ⵥⵉ ⵇⴰⵔⵢⴰⵜ-ⵢⴰⵄⴰⵔⵉⵎ. 6 ⵅⴻⵏⵏⵉ ⵉⴼⴼⴻⵖ ⴷⴰⵡⵓⴷ ⴰⴽ-ⴷ ⵎⴰⵔⵔⴰ ⵉⵙⵔⴰⵉⵍ ⵖⴰⵔ ⴱⴰⵄⵍⴰ, ⵖⴰⵔ ⵇⴰⵔⵢⴰⵜ-ⵢⴰⵄⴰⵔⵉⵎ ⵡⴻⵏⵏⵉ ⵉⴵⴰⵏ ⴷⵉ ⵢⴰⵀⵓⴷⴰ ⵃⵉⵎⴰ ⴰⴷ ⵙⵙⴳⴻⵄⵄⴷⴻⵏ ⵜⵜⴰⴱⵓⵜ ⵏ ⴰⵔⴻⴱⴱⵉ ⵙⵙⴻⵏⵏⵉ. ⵜⵜⴰⴱⵓⵜ ⵏ ⵙⵉⴷⵉ ⵡⴻⵏⵏⵉ ⵉⵜⵜⵖⵉⵎⴰⵏ ⵙⴻⵏⵏⴻⵊ ⵉ ⵉⴽⵉⵔⵓⴱⴻⵏ ⵎⴰⵏⵉ ⵉⵜⵜⵡⴰⵍⴰⵖⴰ ⵅ ⵢⵉⵙⴻⵎ ⵏⵏⴻⵙ. ^□   7 ⵏⵉⵜⵏⵉ ⵉⵡⵢⴻⵏ-ⴷⴷ ⵜⵜⴰⴱⵓⵜ ⵏ ⴰⵔⴻⴱⴱⵉ ⵅ ⵉⵊⵊ ⵏ ⵓⴽⴰⵔⵔⵓ ⵏ ⵊⴷⵉⴷ ⵥⵉ ⵜⴰⴷⴷⴰⵔⵜ ⵏ ⴰⴱⵉⵏⴰⴷⴰⴱ. ⵄⵓⵥⵥⴰ ⴷ ⴰⵅⵉⵢⵓ ⵏⴻⴷⵀⴻⵏ ⴰⴽⴰⵔⵔⵓ. 8 ⴷⴰⵡⵓⴷ ⴷ ⵎⴰⵔⵔⴰ ⵉⵙⵔⴰⵉⵍ ⵜⵜⵉⵔⴰⵔⴻⵏ ⵍⵎⵓⵙⵉⵇⴰ ⵙ ⵎⴰⵔⵔⴰ ⵊⵊⴻⵀⴷ ⵏⵙⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ ⵙ ⵢⴻⵥⵍⴰⵏ ⴷ ⵍⴳⴰⵎⴱⵔⵉⵢⴰⵜ ⴷ ⵍⵀⴰⵔⴱⴰⵜ ⴷ ⵉⴱⴻⵏⴷⵉⵔⴻⵏ ⴷ ⵜⴻⴵⵓⵏⵉⵏ ⵏ ⵡⵓⵥⵥⴰⵍ ⴷ ⵍⵖⴰⵢⵟⴰⵜ.

9 ⵓⵎⵉ ⴷⴷ-ⵉⵡⴹⴻⵏ ⵏⵉⵜⵏⵉ ⵖⴰⵔ ⵓⵏⴻⴷⵔⴰⵔ ⵏ ⴽⵉⴷⵓⵏ, ⵉⵙⵙⵡⵉⵥⵥⴻⴹ ⵄⵓⵥⵥⴰ ⴰⴼⵓⵙ ⵏⵏⴻⵙ, ⵃⵉⵎⴰ ⴰⴷ ⵉⵟⵟⴻⴼ ⵜⵜⴰⴱⵓⵜ ⵎⵉⵏⵥⵉ ⵏⴷⴻⵔⴼⴻⵏ ⵉⴼⵓⵏⴰⵙⴻⵏ.

10 ⵅⴰⵙ ⵓⵛⴰ ⵢⴰⵔⵖⴰ ⵡⴻⵖⴹⴰⴱ ⵏ ⵙⵉⴷⵉ ⵅ ⵄⵓⵥⵥⴰ ⵓⵛⴰ ⵉⵡⵜⴰ ⵉ-ⵜ ⵎⴰⵖⴰⵔ ⵡⴰⵏⵉⵜⴰ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵖⴰⵔ ⵜⵜⴰⴱⵓⵜ ⵓⵛⴰ ⵉⵎⵎⵓⵜ ⴷⵉⵏ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ.

11 ⵢⵉⵡⴻⴹ ⵙⵙⴻⵎ ⵖⴰⵔ ⵡⵓⵍ ⵏ ⴷⴰⵡⵓⴷ, ⴰⵇⴰ ⵙⵉⴷⵉ ⵉⵙⵄⴰⵔ ⴰⵎⵎⵓ ⵅ ⵄⵓⵥⵥⴰ ⵓ ⵉⴳⴳⴰ ⴰⵙ ⵉ ⵡⴻⵎⵛⴰⵏ ⵏⵏⵉ ⴼⴰⵔⵉⵚ-ⵄⵓⵥⵥⴰ ⴰⵍ ⴰⵙⵙ-ⴰ.

12 ⴷⴻⴳ ⵡⴰⵙⵙ ⵏⵏⵉ ⵜⴻⵍⵇⴻⴼ ⴷⴰⵡⵓⴷ ⵜⵉⴳⴳⵯⵓⴷⵉ ⵥⵉ ⴰⵔⴻⴱⴱⵉ, ⵉⵏⵏⴰ: “ⵎⴰⵎⵎⴻⵛ ⵉ ⵖⴰ ⴳⴳⴻⵖ ⴰⴷ ⵖⴰⵔⵉ-ⴷⴷ ⴰⵡⵢⴻⵖ ⵜⵜⴰⴱⵓⵜ ⵏ ⴰⵔⴻⴱⴱⵉ?”

13 ⵅ ⵓⵢⴰ ⴷⴰⵡⵓⴷ ⵡⴰⵔ ⵉⵊⵊⵉ ⴰⴷ ⵖⴰⵔⴻⵙ-ⴷⴷ ⴰⵡⵢⴻⵏ ⵜⵜⴰⴱⵓⵜ ⴷⵉ ⵜⴻⵏⴷⵉⵏⵜ ⵏ ⴷⴰⵡⵓⴷ, ⵎⴰⵛⴰ ⵉⵊⵊⴰ ⵉ-ⵜⵜ ⴰⴷ ⵜⴰⴳⴳⵯⴻⵊ ⵖⴰⵔ ⵜⴰⴷⴷⴰⵔⵜ ⵏ ⵄⵓⴱⵉⴷ-ⵉⴷⵓⵎ, ⴰⵊⵉⵜⵜⵉ.

14 ⵜⴻⴽⴽⴰ ⵜⵜⴰⴱⵓⵜ ⵏ ⴰⵔⴻⴱⴱⵉ ⵜⵍⴰⵜⴰ ⵏ ⵉⵢⵓⵔⴻⵏ ⴷⵉ ⵜⴰⴷⴷⴰⵔⵜ ⵏⵏⴻⵙ ⵖⴰⵔ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏ ⵄⵓⴱⵉⴷ-ⵉⴷⵓⵎ, ⵓ ⵉⴱⴰⵔⴻⴽ ⵙⵉⴷⵉ ⵜⴰⴷⴷⴰⵔⵜ ⵏ ⵄⵓⴱⵉⴷ-ⵉⴷⵓⵎ ⴷ ⵎⴰⵔⵔⴰ ⵎⵉⵏ ⵖⴰⵔⴻⵙ ⵉⴵⴰⵏ.