1 ⵎⵎⴻⵏⵖⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴰⴽ-ⴷ ⵉⵙⵔⴰⵉⵍ. ⵉⵔⵢⴰⵥⴻⵏ ⵏ ⵉⵙⵔⴰⵉⵍ ⴰⵔⴻⵡⵍⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⵡⴹⴰⵏ ⴷ ⵉⵎⴻⵜⵜⴰⵏ ⵅ ⵜⴻⵎⵎⵓⵔⵜ ⵏ ⵉⴷⵓⵔⴰⵔ ⵏ ⵊⵉⵍⴱⵓⵄⴰ. 2 ⵉⴼⵉⵍⵉⵙⵟⵉⵏⵉⵢⵢⴻⵏ ⴹⴼⴰⵔⴻⵏ ⵛⴰⵡⵓⵍ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⴱⵍⴰ ⵇⴻⵟⵟⵓ ⵓⵛⴰ ⵏⵖⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵢⵓⵏⴰⵜⴰⵏ ⴷ ⴰⴱⵉⵏⴰⴷⴰⴱ ⴷ ⵎⴰⵍⴽⵉⵛⵓⵄⴰ, ⵉⵃⴻⵏⵊⵉⵔⴻⵏ ⵏ ⵛⴰⵡⵓⵍ. 3 ⵜⵓⵖⴰ ⴰⵎⴻⵏⵖⵉ ⴰⴽ-ⴷ ⵛⴰⵡⵓⵍ ⵉⵡⵄⴰⵔ. ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ ⵓⴼⵉⵏ ⵜ ⵓ ⵏⴻⵜⵜⴰ ⵜⵓⵖⴰ ⵉⴳⴳⵯⴻⴷ ⴰⵟⵟⴰⵙ ⵥⴻⴳ ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ. 4 ⵉⵏⵏⴰ ⵛⴰⵡⵓⵍ ⵉ ⵓⵃⴻⵎⵎⴰⵍ ⵏ ⵍⴻⵙⵏⴰⵃ ⵏⵏⴻⵙ: “ⵙⵓⴼⴼⴻⵖ-ⴷⴷ ⵙⵙⵉⴼ ⵏⵏⴻⴽ, ⵙⵏⵓⵇⵇⴻⴱ ⴰⵢⵉ ⵥⵥⴰⵢⴻⵙ! ⵏⵉⵖ ⴰⴷ ⴷⴷ-ⴰⵙⴻⵏ ⵉⵏⵏⵉ ⵡⴰⵔ ⵉⵜⵜⵡⴰⵅⴻⵜⵏⴻⵏ, ⴰⴷ ⵥⵥⴰⵢⵉ ⵙⵜⴻⵀⵥⴰⵏ.” ⵎⴰⵛⴰ ⴰⵃⴻⵎⵎⴰⵍ ⵏⵏⴻⵙ ⵏ ⵍⴻⵙⵏⴰⵃ ⵡⴰⵔ ⵉⵅⵙ ⴰⴷ ⵜⵜ ⵉⴳⴳ, ⵎⴰⵖⴰⵔ ⵜⵓⵖⴰ ⵉⴳⴳⵯⴻⴷ ⴰⵟⵟⴰⵙ. ⵅⴻⵏⵏⵉ ⵉⴽⵙⵉ ⵛⴰⵡⵓⵍ ⵙⵙⵉⴼ ⵓⵛⴰ ⵉⵙⵙⴻⵖⴹⴻⵍ ⵉⵅⴻⴼ ⵏⵏⴻⵙ ⵅⴰⵙ. 5 ⵓⵎⵉ ⵉⵥⵔⴰ ⵓⵃⴻⵎⵎⴰⵍ ⵏ ⵍⴻⵙⵏⴰⵃ, ⴰⵇⴰ ⵛⴰⵡⵓⵍ ⵉⵎⵎⵓⵜ, ⵉⵡⴹⴰ ⵍⴰ ⴷ ⵏⴻⵜⵜⴰ ⵅ ⵙⵙⵉⴼ ⵏⵏⴻⵙ ⵓⵛⴰ ⵉⵎⵎⵓⵜ. 6 ⵉⵎⵎⵓⵜ ⵛⴰⵡⵓⵍ ⴰⴽ-ⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵓⵛⴰ ⴰⵎⵎⵓ ⵜⴻⵎⵎⵓⵜ ⵇⴰⵄ ⵜⴰⴷⴷⴰⵔⵜ ⵏⵏⴻⵙ. 7 ⵓⵎⵉ ⵥⵔⵉⵏ ⵎⴰⵔⵔⴰ ⵢⴻⵔⵢⴰⵥⴻⵏ ⵏ ⵉⵙⵔⴰⵉⵍ, ⵉⵏⵏⵉ ⵜⵓⵖⴰ ⴷⵉ ⵍⴻⵡⴹⴰ ⵏ ⵜⴻⵖⵥⵓⵔⵜ, ⴱⴻⵍⵍⵉ ⵉⵔⵢⴰⵥⴻⵏ ⵏ ⵉⵙⵔⴰⵉⵍ ⴰⵔⴻⵡⵍⴻⵏ ⵓ ⵛⴰⵡⵓⵍ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⵜⵜⵡⴰⵏⵖⴻⵏ, ⵙⴻⵎⵃⴻⵏ ⵏⵉⵜⵏⵉ ⴷⵉ ⵜⵏⴻⴷⴷⴰⵎ ⵏⵙⴻⵏ ⵓⵛⴰ ⴰⵔⴻⵡⵍⴻⵏ. ⵍⴻⵅⴷⴻⵏⵏⵉ ⵓⵙⵉⵏ-ⴷⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⴷⴻⵡⵍⴻⵏ ⵥⴻⴷⴷⵖⴻⵏ ⴷⵉⵏ.

8 ⵜⵉⵡⴻⵛⵛⴰ ⵏⵏⴻⵙ ⵓⵎⵉ ⴷⴷ-ⵓⵙⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵃⵉⵎⴰ ⴰⴷ ⴽⴻⵛⵛⴹⴻⵏ ⵉⵏⵏⵉ ⵉⵜⵜⵡⴰⵏⵖⴻⵏ, ⵉⵎⵙⴰⵔ, ⴰⵇⴰ ⵓⴼⵉⵏ ⵛⴰⵡⵓⵍ ⴷ ⵉⵃⴻⵏⵊⵉⵔⴻⵏ ⵏⵏⴻⵙ, ⵉⵏⵏⵉ ⵜⵓⵖⴰ ⵉⵡⴹⴰⵏ ⵅ ⵡⴻⴷⵔⴰⵔ ⵏ ⵊⵉⵍⴱⵓⵄⴰ. 9 ⵏⵉⵜⵏⵉ ⴽⴻⵛⵛⴹⴻⵏ ⵜ ⵓⵛⴰ ⵉⵡⵢⴻⵏ ⴰⵥⴻⴵⵉⴼ ⵏⵏⴻⵙ ⴷ ⵍⴻⵙⵏⴰⵃ ⵏⵏⴻⵙ ⵓⵛⴰ ⵙⵙⴻⴽⴽⴻⵏ ⵜⴻⵏ ⴷⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵃⵉⵎⴰ ⴰⴷ ⵙⵙⵉⵡⴹⴻⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵖⴰⵔ ⵍⴻⵅⵢⴰⵍⴰⵜ ⵏ ⵚⵚⴰⵏⴰⵎ ⵏⵙⴻⵏ ⵓ ⵖⴰⵔ ⵍⴳⴻⵏⵙ.

10 ⵏⵉⵜⵏⵉ ⵙⵙⴰⵔⵙⴻⵏ ⵍⴻⵙⵏⴰⵃ ⵏ ⵛⴰⵡⵓⵍ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏⵙⴻⵏ ⵓ ⴰⵛⴻⵇⵇⵓⴼ ⵏ ⵓⵥⴻⴵⵉⴼ ⵏⵏⴻⵙ ⵙⴻⵎⵎⴰⵔⴻⵏ ⵜ ⵖⴰⵔ ⵍⵃⵉⴹ ⵏ ⴱⴰⵢⵜ-ⵛⴰⵏ.

11 ⵓⵎⵉ ⵙⵍⴰⵏ ⵎⴰⵔⵔⴰ ⵉⵎⴻⵥⴷⴰⵖ ⵏ ⵢⴰⴱⵉⵛ ⵎⵉⵏ ⴳⴳⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴰⴽ-ⴷ ⵛⴰⵡⵓⵍ,

12 ⴽⴽⴰⵔⴻⵏ ⵎⴰⵔⵔⴰ ⵉⵔⵢⴰⵥⴻⵏ ⵉⵎⴻⵃⴹⴻⵏ ⵓⵛⴰ ⴽⵙⵉⵏ ⵍⵅⴻⵛⴱⴻⵜ ⵏ ⵛⴰⵡⵓⵍ ⴷ ⵍⵅⴻⵛⴱⴰⵜ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵓⵛⴰ ⵉⵡⵢⴻⵏ ⵜⴻⵏⵜ ⵖⴰⵔ ⵢⴰⴱⵉⵛ. ⵏⵉⵜⵏⵉ ⵏⴻⴹⵍⴻⵏ ⵉⵅⵙⴰⵏ ⵏⵙⴻⵏ ⵙⴰⴷⵓ ⵉ ⵜⵛⴻⵊⵊⴰⵔⵜ ⵏ ⵢⵉⴳⴳ ⴷⵉ ⵢⴰⴱⵉⵛ ⵓⵛⴰ ⵥⵓⵎⵎⴻⵏ ⵙⴻⴱⵄⴰ ⵏ ⵡⵓⵙⵙⴰⵏ.

13 ⵛⴰⵡⵓⵍ ⵉⵎⵎⵓⵜ ⴷⵉ ⵙⵙⵉⴱⴱⴻⵜ ⵏ ⵍⴻⵖⴷⴰⵔ ⵏⵏⴻⵙ ⵉ ⵥⵉ ⵜⵓⵖⴰ ⵉⵖⴻⴷⴷⴰⵔ ⵙⵉⴷⵉ, ⴷⵉ ⵙⵙⵉⴱⴱⴻⵜ ⵏ ⵡⴰⵡⴰⵍ ⵏ ⵙⵉⴷⵉ ⵉ ⵡⴰⵔ ⴷⴰⵢⴻⵙ ⵉⵟⵟⵉⴼ ⵏⴻⵜⵜⴰ, ⵓ ⵓⵎⵉ ⵢⴰⵔⵥⵓ ⵛⵛⵡⴰⵔ ⵖⴰⵔ ⵡⴻⵏⵏⵉ ⵉⵙⵙⴰⵡⴰⵍⴻⵏ ⴰⴽ-ⴷ ⵉⵎⴻⵜⵜⴰⵏ

14 ⵓⵛⴰ ⵡⴰⵔ ⵉⵙⵙⴻⵇⵙⵉ ⵙⵉⴷⵉ. ⵙ ⵓⵢⴻⵏⵏⵉ ⵉⵏⵖⴰ ⵉ-ⵜ ⵙⵉⴷⵉ ⵓⵛⴰ ⵉⵙⵙⵎⵓⵟⵟⵉⵢ ⵜⴰⴳⴻⵍⴷⴰ ⵉ ⴷⴰⵡⵓⴷ, ⵎⵎⵉⵙ ⵏ ⵢⴰⵙⵙⴰ.