1 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵍⴰⵜⴰ ⵓ-ⵄⵉⵛⵔⵉⵏ ⵏ ⵢⵓⵡⴰⵛ, ⵎⵎⵉⵙ ⵏ ⴰⵅⴰⵥⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⴷⵡⴻⵍ ⵢⴰⵀⵓⵢⴰⵃⴰⵥ, ⵎⵎⵉⵙ ⵏ ⵢⴰⵀⵓ, ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ, ⴷⵉ ⵙⴰⵎⴰⵔⵢⴰ. ⵏⴻⵜⵜⴰ ⵉⵃⴽⴻⵎ ⵙⴱⴻⵄⵟⴰⵛ ⵏ ⵉⵙⴻⴳⴳⵯⵓⵙⴰ. 2 ⵏⴻⵜⵜⴰ ⵉⴳⴳⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ ⵓ ⵏⴻⵜⵜⴰ ⵉⴹⴼⴰⵔ ⴷⴷⵏⵓⴱ ⵏ ⵢⴰⵔⵓⴱⵄⴰⵎ, ⵎⵎⵉⵙ ⵏ ⵏⴰⴱⴰⵟ, ⵡⴻⵏⵏⵉ ⵢⴰⵔⵔⴰ ⵉⵙⵔⴰⵉⵍ ⴰⴷ ⵉⵅⴹⴰ. ⵏⴻⵜⵜⴰ ⵡⴰⵔ ⵉⵃⴻⵢⵢⴻⴷ ⵅ ⵎⴰⵏ ⴰⵢⴰ. 3 ⵅ ⵓⵢⴻⵏⵏⵉ ⵢⴰⵔⵖⴰ ⵡⴻⵖⴹⴰⴱ ⵏ ⵙⵉⴷⵉ ⵅ ⵉⵙⵔⴰⵉⵍ. ⵎⴰⵔⵔⴰ ⵓⵙⵙⴰⵏ ⵏⵏⵉ ⵉⵡⵛⴰ ⵉ-ⵜⴻⵏ ⴷⴻⴳ ⵉⴼⴰⵙⵙⴻⵏ ⵏ ⵃⴰⵥⴰⵢⵉⵍ, ⴰⵊⴻⴵⵉⴷ ⵏ ⴰⵔⴰⵎ, ⵓ ⴷⴻⴳ ⵉⴼⴰⵙⵙⴻⵏ ⵏ ⴱⵉⵏⵀⴰⴷⴰⴷ, ⵎⵎⵉⵙ ⵏ ⵃⴰⵥⴰⵢⵉⵍ.

4 ⵎⴰⵛⴰ ⵢⴰⵀⵓⵢⴰⵃⴰⵥ ⵉⵃⴻⵛⵛⴻⵎ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓ ⵙⵉⴷⵉ ⵉⵙⵍⴰ ⴰⵙ, ⵎⴰⵖⴰⵔ ⵏⴻⵜⵜⴰ ⵉⵥⵔⴰ ⵍⴻⵃⵚⴰⵔⴻⵜ ⵏ ⵉⵙⵔⴰⵉⵍ, ⵎⴰⵎⵎⴻⵛ ⵉ ⵜⴻⵏ ⵉⵃⵚⴰⵍ ⵓⵊⴻⴵⵉⴷ ⵏ ⴰⵔⴰⵎ. 5 ⵙⵉⴷⵉ ⵉⵡⵛⴰ ⵉⵊⵊ ⵏ ⵓⵎⵙⴻⵏⵊⴻⵎ ⵉ ⵉⵙⵔⴰⵉⵍ, ⴰⵍⴰⵎⵉ ⵥⴻⵎⵎⴰⵔⴻⵏ ⴰⴷ ⵏⴼⴻⴽⴽⴻⵏ ⵥⴻⴳ ⵓⴼⵓⵙ ⵏ ⵉⵔⴰⵎⵉⵢⵢⴻⵏ ⵓⵛⴰ ⵅⴻⵏⵏⵉ ⵜⵓⵖⴰ ⴰⵢⵜ ⵏ ⵉⵙⵔⴰⵉⵍ ⵥⴻⴷⴷⵖⴻⵏ ⵄⴰⵡⴻⴷ ⴰⵎ ⵇⴱⴻⵍ ⴷⴻⴳ ⵉⵇⵉⴹⴰⵏ ⵏⵙⴻⵏ. 6 ⵎⴰⵛⴰ ⵏⵉⵜⵏⵉ ⵡⴰⵔ ⵃⴻⵢⵢⴷⴻⵏ ⵛⴰ ⵅ ⴷⴷⵏⵓⴱ ⵏ ⵜⴰⴷⴷⴰⵔⵜ ⵏ ⵢⴰⵔⵓⴱⵄⴰⵎ ⵡⴻⵏⵏⵉ ⵢⴰⵔⵔⵉⵏ ⵉⵙⵔⴰⵉⵍ ⴰⴷ ⵉⵅⴹⴰ. ⵓⵍⴰ ⴷ ⵏⴻⵜⵜⴰ ⵉⵇⵇⵉⵎ ⵉⴳⴳⵓⵔ ⴰⵎⵎⵓ, ⵓ ⵜⴻⵇⵇⵉⵎ ⵜⴰⵔⴻⴱⴱⵉⵜ ⵏ ⵛⵡⴰⵔⵜⵉ ⵜⴱⴻⴷⴷ ⴷⵉ ⵙⴰⵎⴰⵔⵢⴰ.

7 ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵊⵊⵉ ⵥⵉ ⵍⵄⴻⵙⴽⴰⵔ ⵏ ⵢⴰⵀⵓⵢⴰⵃⴰⵥ ⵎⵖⵉⵔ ⵅⴻⵎⵙⵉⵏ ⵏ ⵉⵎⵏⴰⵢⴻⵏ ⴷ ⵄⴻⵛⵔⴰ ⵏ ⵉⴽⴰⵔⵔⵓⵜⴻⵏ ⴷ ⵄⴻⵛⵔⴰ ⴰⵍⴻⴼ ⵏ ⵢⴻⵔⵢⴰⵥⴻⵏ ⵅ ⵉⴹⴰⵔⴻⵏ, ⵎⴰⵖⴰⵔ ⴰⵊⴻⴵⵉⴷ ⵏ ⴰⵔⴰⵎ ⵜⵓⵖⴰ ⵉⵇⴹⴰ ⵉ-ⵜⴻⵏ, ⵉⴳⴳⴰ ⵉ-ⵜⴻⵏ ⴰⵎ ⵜⵄⴻⵊⵊⴰⵊⵜ ⵖⴰⵔ ⵓⵙⴰⵔⵡⴻⵜ.

8 ⵉⵎⴻⵥⵔⵓⵢⴻⵏ ⵉⵇⵇⵉⵎⴻⵏ ⵏ ⵢⴰⵀⵓⵢⴰⵃⴰⵥ, ⴷ ⵎⴰⵔⵔⴰ ⵎⵉⵏ ⵉⴳⴳⴰ ⴷ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ ⵉⵎⴻⵃⴹⴻⵏ, ⵎⴰ ⵎⴰⵏ ⴰⵢⴰ ⵎⴰⵔⵔⴰ ⵡⴰⵔ ⵉⵜⵜⵡⴰⵥⴻⵎⵎⴻⵎ ⵛⴰ ⴷⴻⴳ ⵡⴻⴷⵍⵉⵙ ⵏ ⵉⵎⴻⵥⵔⵓⵢⴻⵏ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ? 9 ⵢⴰⵀⵓⵢⴰⵃⴰⵥ ⵉⵜⵜⵡⴰⵙⵙⴰⵔⵙ ⴷⴻⴳ ⵡⴻⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵏⴻⴹⵍⴻⵏ ⵜ ⴷⵉ ⵙⴰⵎⴰⵔⵢⴰ. ⵎⵎⵉⵙ ⵢⵓⵡⴰⵛ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ.

10 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵙⴻⴱⵄⴰ ⵓ-ⵜⵍⴰⵜⵉⵏ ⵏ ⵢⵓⵡⴰⵛ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⴷⵡⴻⵍ ⵢⵓⵡⴰⵛ, ⵎⵎⵉⵙ ⵏ ⵢⴰⵀⵓⵢⴰⵃⴰⵥ, ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ. ⵏⴻⵜⵜⴰ ⵉⵃⴽⴻⵎ ⵙⴻⵟⵟⴰⵛ ⵏ ⵉⵙⴻⴳⴳⵯⵓⵙⴰ ⴷⵉ ⵙⴰⵎⴰⵔⵢⴰ.

11 ⵏⴻⵜⵜⴰ ⵉⴳⴳⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ. ⵏⴻⵜⵜⴰ ⵡⴰⵔ ⵉⵃⴻⵢⵢⴻⴷ ⵅ ⴷⴷⵏⵓⴱ ⵏ ⵢⴰⵔⵓⴱⵄⴰⵎ, ⵎⵎⵉⵙ ⵏ ⵏⴰⴱⴰⵟ, ⵡⴻⵏⵏⵉ ⵢⴰⵔⵔⵉⵏ ⵉⵙⵔⴰⵉⵍ ⴰⴷ ⵉⵅⴹⴰ, ⵎⴰⵛⴰ ⵏⴻⵜⵜⴰ ⵢⵓⵢⵓⵔ ⴰⵎⴻⵏⵏⵉ.

12 ⵉⵎⴻⵥⵔⵓⵢⴻⵏ ⵉⵇⵇⵉⵎⴻⵏ ⵏ ⵢⵓⵡⴰⵛ ⴷ ⵎⴰⵔⵔⴰ ⵎⵉⵏ ⵉⴳⴳⴰ ⴷ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵙ ⵉⵎⴻⵃⴹⴻⵏ ⵉ ⵥⵉ ⵉⵎⵏⴻⵖ ⴰⴽ-ⴷ ⴰⵎⴰⵚⵢⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵎⴰ ⵎⴰⵏ ⴰⵢⴰ ⵎⴰⵔⵔⴰ ⵡⴰⵔ ⵉⵜⵜⵡⴰⵥⴻⵎⵎⴻⵎ ⵛⴰ ⴷⴻⴳ ⵡⴻⴷⵍⵉⵙ ⵏ ⵉⵎⴻⵥⵔⵓⵢⴻⵏ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ?

13 ⵢⵓⵡⴰⵛ ⵉⵜⵜⵡⴰⵙⵙⴰⵔⵙ ⴷⴻⴳ ⵡⴻⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵢⴰⵔⵓⴱⵄⴰⵎ ⵉⵏⵢⴰ ⵅ ⵍⵄⴰⵔⵛ ⵏⵏⴻⵙ. ⵢⵓⵡⴰⵛ ⵉⵜⵜⵡⴰⵏⴹⴻⵍ ⴷⵉ ⵙⴰⵎⴰⵔⵢⴰ ⵊⴰⵔ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ.

14 ⵉⵍⵉⵛⴰⵄ ⵉⵜⵜⵡⴰⵍⵇⴻⴼ ⵙ ⵍⴻⵀⵍⴰⵛ ⵉ ⵥⵉ ⵖⴰ ⵉⵎⵎⴻⵜ ⵓ ⵢⵓⵡⴰⵛ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⵉⵀⵡⴰ-ⴷⴷ ⵖⴰⵔⴻⵙ ⵓⵛⴰ ⵉⵔⵓ ⵥⵥⴰⵜⴻⵙ, ⵉⵏⵏⴰ: “ⴱⴰⴱⴰ ⵉⵏⵓ, ⴱⴰⴱⴰ ⵉⵏⵓ! ⴰⴽⴰⵔⵔⵓ ⵏ ⵉⵙⵔⴰⵉⵍ ⴷ ⵉⵎⵏⴰⵢⴻⵏ ⵏⵏⴻⵙ!” ^□  ■  

15 ⵉⵍⵉⵛⴰⵄ ⵉⵏⵏⴰ: “ⴽⵙⵉ ⵍⵇⴻⵡⵙ ⴷ ⴼⵍⵉⵜⵛⴰⵜ!” ⵏⴻⵜⵜⴰ ⵉⵟⵟⴻⴼ ⵉ ⵢⵉⵅⴻⴼ ⵏⵏⴻⵙ ⵉⵊⵊ ⵏ ⵍⵇⴻⵡⵙ ⴷ ⴼⵍⵉⵜⵛⴰⵜ.

16 ⵅⴻⵏⵏⵉ ⵉⵏⵏⴰ ⵏⴻⵜⵜⴰ ⵉ ⵓⵊⴻⴵⵉⴷ ⵏ ⵉⵙⵔⴰⵉⵍ: “ⵙⴰⵔⵙ ⴰⴼⵓⵙ ⵏⵏⴻⴽ ⵅ ⵍⵇⴻⵡⵙ!” ⵓⵛⴰ ⵉⵙⵙⴰⵔⵙ ⵏⴻⵜⵜⴰ ⴰⴼⵓⵙ ⵏⵏⴻⵙ ⵅ ⵍⵇⴻⵡⵙ ⵓⵛⴰ ⵉⵙⵙⴰⵔⵙ ⵉⵍⵉⵛⴰⵄ ⵉⴼⴰⵙⵙⴻⵏ ⵏⵏⴻⵙ ⵅ ⵉⴼⴰⵙⵙⴻⵏ ⵏ ⵓⵊⴻⴵⵉⴷ,

17 ⵉⵏⵏⴰ: “ⴰⵔⵥⴻⵎ ⵍⴽⴰⵥⵉ ⵉ ⵉⴵⴰⵏ ⵖⴰⵔ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ!”, ⵓⵛⴰ ⵏⴻⵜⵜⴰ ⵢⴰⵔⵥⴻⵎ ⵉ-ⵜ. ⵅⴻⵏⵏⵉ ⵉⵏⵏⴰ ⵉⵍⵉⵛⴰⵄ: “ⵡⵡⴻⵜ!”. ⵓ ⵏⴻⵜⵜⴰ ⵉⵡⵜⴰ ⵙ ⵍⵇⴻⵡⵙ ⵏⵏⴻⵙ. ⵓⵛⴰ ⵉⵏⵏⴰ ⵉⵍⵉⵛⴰⵄ: “ⴰⵇⴰ-ⵜⵜ ⴷ ⵉⵛⵜ ⵏ ⴼⵍⵉⵜⵛⴰ ⵏ ⵓⵙⴻⵏⵊⴻⵎ ⵙ ⵓⴼⵓⵙ ⵏ ⵙⵉⴷⵉ ⵓⵍⴰ ⴷ ⵉⵛⵜ ⵏ ⴼⵍⵉⵜⵛⴰ ⵏ ⵓⵙⴻⵏⵊⴻⵎ ⵥⴻⴳ ⵉⴼⴰⵙⵙⴻⵏ ⵏ ⴰⵔⴰⵎ, ⵎⵉⵏⵥⵉ ⴰⴷ ⵜⵖⴻⵍⴱⴻⴷ ⴰⵔⴰⵎ ⴷⵉ ⵄⴰⴼⵉⴽ ⴰⵍ ⵖⴰ ⵉⵜⵜⵡⴰⵔⴻⴷⴷⴻⴵ.” ^■  

18 ⵅⴰⵙ ⵓⵛⴰ ⵉⵏⵏⴰ ⵏⴻⵜⵜⴰ: “ⴽⵙⵉ ⴼⵍⵉⵜⵛⴰⵜ!” ⵓⵛⴰ ⵏⴻⵜⵜⴰ ⵉⵟⵟⴻⴼ ⵉ-ⵜⴻⵏⵜ. ⵅⴻⵏⵏⵉ ⵉⵏⵏⴰ ⵉ ⵓⵊⴻⴵⵉⴷ ⵏ ⵉⵙⵔⴰⵉⵍ: “ⵡⵡⴻⵜ ⵅ ⵜⴻⵎⵎⵓⵔⵜ!” ⵓⵛⴰ ⵡⴰⵏⵉⵜⴰ ⵉⵡⵜⴰ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⵅ ⵜⴻⵎⵎⵓⵔⵜ ⵓⵛⴰ ⵍⴻⵅⴷⴻⵏⵏⵉ ⵉⴱⴻⴷⴷ.

19 ⴰⵔⵢⴰⵥ ⵏ ⴰⵔⴻⴱⴱⵉ ⵉⴼⴼⵓⴳⴻⵎ ⵅⴰⵙ ⴰⵟⵟⴰⵙ, ⵉⵏⵏⴰ: “ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵜⴻⵡⵜⴻⴷ ⵅⴻⵎⵙⴰ ⵏⵉⵖ ⵙⴻⵜⵜⴰ ⵏ ⵜⵡⴰⵍⴰⵡⵉⵏ, ⵉⵍⵉ ⴰⴷ ⵜⴻⵖⵍⴻⴱ ⵅ ⴰⵔⴰⵎ ⴰⵍⴰⵎⵉ ⵜ ⵉ ⵖⴰ ⵜⴻⵇⴹⵉⴷ ⵇⴰⵄ. ⵍⴻⵅⵅⵓ ⵎⴰⵛⴰ ⴰⴷ ⵜⵖⴻⵍⴱⴻⴷ ⵅ ⴰⵔⴰⵎ ⵎⵖⵉⵔ ⵜⵍⴰⵜⴰ ⵏ ⵜⵡⴰⵍⴰⵡⵉⵏ.

20 ⵉⵍⵉⵛⴰⵄ ⵉⵎⵎⵓⵜ ⵓⵛⴰ ⵏⴻⴹⵍⴻⵏ ⵜ. ⴱⴰⵏⴷⵉⵢⵢⴰⵜ ⵏ ⵉⵎⵓ’ⴰⴱⵉⵢⵢⴻⵏ ⵜⵓⵖⴰ ⵏⵏⵓⵎⴻⵏⵜ ⴰⴷ ⴰⴷⴼⴻⵏⵜ ⵖⴰⵔ ⵜⴻⵎⵎⵓⵔⵜ ⵖⴰⵔ ⵓⵎⴻⵥⵡⴰⵔⵓ ⵏ ⵓⵙⴻⴳⴳⵯⴰⵙ. 21 ⵅⵥⴰⵔ, ⵓⵎⵉ ⵜⵓⵖⴰ ⵏⴻⵟⵟⵍⴻⵏ ⵉⵛⵜ ⵏ ⵜⵡⴰⵍⴰ ⵉⵊⵊ ⵏ ⵡⴻⵔⵢⴰⵥ, ⵉⵎⵙⴰⵔ ⴰⵇⴰ ⵥⵔⵉⵏ ⵉⵛⵜ ⵏ ⴱⴰⵏⴷⵉⵢⵢⴰ. ⵏⵉⵜⵏⵉ ⵏⴹⴰⵔⴻⵏ ⴰⵔⵢⴰⵥ ⴷⴻⴳ ⵡⴻⵏⴹⴻⵍ ⵏ ⵉⵍⵉⵛⴰⵄ. ⵓⵎⵉ ⴷⴰⵢⴻⵙ ⵉⵡⴹⴰ ⵡⴻⵔⵢⴰⵥ, ⵉⵃⴰⴷⴰ ⵉⵢⵙⴰⵏ ⵏ ⵉⵍⵉⵛⴰⵄ, ⵉⴷⵡⴻⵍ ⵉⴷⴷⴰⵔ ⵄⴰⵡⴻⴷ ⵓⵛⴰ ⵉⴽⴽⴰⵔ ⵉⴱⴻⴷⴷ ⵅ ⵉⴹⴰⵔⴻⵏ ⵏⵏⴻⵙ.

22 ⵃⴰⵥⴰⵢⵉⵍ, ⴰⵊⴻⴵⵉⴷ ⵏ ⴰⵔⴰⵎ, ⵉⵃⵚⴰⵔ ⵅ ⵉⵙⵔⴰⵉⵍ, ⵎⴰⵔⵔⴰ ⵓⵙⵙⴰⵏ ⵏ ⵢⴰⵀⵓⵢⴰⵃⴰⵥ. 23 ⵎⴰⵛⴰ ⵙⵉⴷⵉ ⵉⵃⵉⵏⵏ ⵅ ⵍⴳⴻⵏⵙ ⵏⵏⴻⵙ ⵓⵛⴰ ⵢⴰⵔⵃⴻⵎ ⵅⴰⵙⴻⵏ ⵓⵛⴰ ⵉⵏⵏⴻⵇⵍⴻⴱ ⵖⴰⵔⵙⴻⵏ ⴷⵉ ⵟⵟⵡⴻⵄ ⵏ ⵍⵄⴰⵀⴷ ⵏⵏⴻⵙ ⴰⴽ-ⴷ ⵉⴱⵔⴰⵀⵉⵎ, ⵉⵙⵃⴰⵇ ⴷ ⵢⴰⵄⵇⵓⴱ. ⵏⴻⵜⵜⴰ ⵜⵓⵖⴰ ⵡⴰⵔ ⵉⵅⵙ ⴰⴷ ⵜⴻⵏ ⵢⴰⵔⴻⴷⴻⴵ ⵓ ⵡⴰⵔ ⵉⵅⵙ ⴰⴷ ⵜⴻⵏ ⵉⵙⵙⴻⴽⴽ ⵥⵉ ⵥⵥⴰⵜ ⵏ ⵡⵓⴷⴻⵎ ⵏⵏⴻⵙ, ⴰⵍ ⵍⴻⵅⵅⵓ. 24 ⵃⴰⵥⴰⵢⵉⵍ, ⴰⵊⴻⴵⵉⴷ ⵏ ⴰⵔⴰⵎ, ⵉⵎⵎⵓⵜ ⵓ ⵎⵎⵉⵙ ⴱⵉⵏⵀⴰⴷⴰⴷ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ. 25 ⵢⵓⵡⴰⵛ, ⵎⵎⵉⵙ ⵏ ⵢⴰⵀⵓⵢⴰⵃⴰⵥ, ⵉⴽⴽⴻⵙ-ⴷⴷ ⵥⴻⴳ ⵉⴼⴰⵙⵙⴻⵏ ⵏ ⴱⵉⵏⵀⴰⴷⴰⴷ, ⵎⵎⵉⵙ ⵏ ⵃⴰⵥⴰⵢⵉⵍ, ⵜⵉⵏⴻⴷⴷⴰⵎ ⵏⵏⵉ ⵜⵓⵖⴰ ⵡⴰⵏⵉⵜⴰ ⵉⵟⵟⴻⴼ ⵥⴻⴳ ⵉⴼⴰⵙⵙⴻⵏ ⵏ ⴱⴰⴱⴰⵙ ⵢⴰⵀⵓⵢⴰⵃⴰⵥ. ⵢⵓⵡⴰⵛ ⵉⵖⵍⴻⴱ ⵅⴰⵙ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⵓⵛⴰ ⵢⴰⵔⵔⴰ-ⴷⴷ ⵜⵉⵏⴻⴷⴷⴰⵎ ⵄⴰⵡⴻⴷ ⵖⴰⵔ ⵉⵙⵔⴰⵉⵍ.