1 ⵍⴰⵎⵉ ⵉⵙⵙⵉⵡⴻⵍ ⵉⵍⵉⵛⴰⵄ ⴰⴽ-ⴷ ⵜⴻⵎⵖⴰⵔⵜ ⵜⴻⵏⵏⵉ ⵓⵎⵉ ⵜⵓⵖⴰ ⵉⵙⵙⴼⴰⵇ ⵎⵎⵉⵙ, ⵉⵏⵏⴰ: “ⴽⴽⴰⵔ, ⴼⴼⴻⵖ, ⵛⴻⴽ ⴰⴽ-ⴷ ⵜⵡⴰⵛⵓⵏⵜ ⵏⵏⴻⴽ ⵓ ⵥⴷⴻⵖ ⴰⵎ ⵓⴱⴰⵔⵔⴰⵏⵉ ⵎⴰⵏⵉ ⵎⴰ ⵜⵥⴻⵎⵎⴰⵔⴻⴷ ⴰⴷ ⵜⵥⴻⴷⵖⴻⴷ, ⵎⴰⵖⴰⵔ ⵙⵉⴷⵉ ⵢⵓⵔⴰ ⵉⵛⵜ ⵏ ⵍⴻⵃⵚⴰⵔⴻⵜ ⵏ ⵍⴰⵥ ⵜⴻⵏⵏⵉ ⵉ ⵖⴰ ⵢⴻⴽⴽⴻⵏ ⵄⴰⵡⴻⴷ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵅ ⵜⴻⵎⵎⵓⵔⵜ.” ^■   2 ⵓⵛⴰ ⵜⴻⴽⴽⴰⵔ ⵜⴻⵎⵖⴰⵔⵜ, ⵜⴻⴳⴳⴰ ⵄⵍⴰⵃⵙⴰⴱ ⴰⵡⴰⵍ ⵏ ⵡⴻⵔⵢⴰⵥ ⵏ ⴰⵔⴻⴱⴱⵉ. ⵏⴻⵜⵜⴰⵜ ⵜⴻⴼⴼⴻⵖ ⴰⴽ-ⴷ ⵜⵡⴰⵛⵓⵏⵜ ⵏⵏⴻⵙ ⵓⵛⴰ ⵜⴻⵥⴷⴻⵖ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⴷⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ.

3 ⴰⵡⴰⵔⵏⵉ ⵉ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ, ⵉⵎⵙⴰⵔ ⴱⴻⵍⵍⵉ ⵜⴰⵎⵖⴰⵔⵜ ⵜⴻⵄⵇⴻⴱ-ⴷⴷ ⵥⵉ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵏⴻⵜⵜⴰⵜ ⵜⴻⴼⴼⴻⵖ ⵃⵉⵎⴰ ⴰⴷ ⵜᵉⵜⵜⴰⵔ ⵜⵡⵉⵥⴰ ⵏ ⵓⵊⴻⴵⵉⴷ ⵅ ⵜⴰⴷⴷⴰⵔⵜ ⵏⵏⴻⵙ ⴷ ⵢⴻⵢⵢⴰⵔ ⵏⵏⴻⵙ. 4 ⴰⵊⴻⴵⵉⴷ ⵜⵓⵖⴰ ⵉⵜⵜⵃⴰⵔⵔⴻⴹ ⴰⴽ-ⴷ ⵊⵉⵃⴰⵥⵉ ⴰⵃⵓⴷⵔⵉ ⵏ ⵡⴻⵔⵢⴰⵥ ⵏ ⴰⵔⴻⴱⴱⵉ, ⵉⵏⵏⴰ: “ⵃⴰⵊⴰ ⴰⵢⵉ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵜⵉⵎⴻⵇⵇⵔⴰⵏⵉⵏ ⵉ ⵉⴳⴳⴰ ⵉⵍⵉⵛⴰⵄ.” 5 ⵉⵎⵙⴰⵔ ⴰⵎ ⵜⵓⵖⴰ ⵉⵜⵜⵄⴰⵡⴰⴷ ⵡⴰⵏⵉⵜⴰ ⵉ ⵓⵊⴻⴵⵉⴷ ⵅ ⵎⴰⵎⵎⴻⵛ ⴷⴷ-ⵉⵙⵙⴼⴰⵇ ⵉⵍⵉⵛⴰⵄ ⵉⵊⵊ ⵏ ⵓⵎⴻⵜⵜⵉⵏ, ⵅⵥⴰⵔ, ⵜⵓⵙⴰ-ⴷⴷ ⵜⴻⵎⵖⴰⵔⵜ ⵏⵏⵉ ⵓⵎⵉ ⴷⴷ-ⵉⵙⵙⴼⴰⵇ ⵎⵎⵉⵙ, ⵃⵉⵎⴰ ⴰⴷ ⵜᵉⵜⵜⴰⵔ ⵜⵡⵉⵥⴰ ⵏ ⵓⵊⴻⴵⵉⴷ ⵅ ⵜⴰⴷⴷⴰⵔⵜ ⵏⵏⴻⵙ ⴷ ⵢⴻⵢⵢⴰⵔ ⵏⵏⴻⵙ. ⵅⴻⵏⵏⵉ ⵉⵏⵏⴰ ⵊⵉⵃⴰⵥⵉ: “ⴰ ⵙⵉⴷⵉ ⴰⵊⴻⴵⵉⴷ, ⵜⴰ ⴷ ⵜⴰⵎⵖⴰⵔⵜ ⴷ ⵡⴰ ⴷ ⵎⵎⵉⵙ ⵉ ⴷⴷ-ⵉⵙⵙⴼⴰⵇ ⵉⵍⵉⵛⴰⵄ ⵖⴰⵔ ⵜⵓⴷⴰⵔⵜ.” 6 ⴰⵊⴻⴵⵉⴷ ⵉⵙⵙⴻⵇⵙⴰ ⵜⴰⵎⵖⴰⵔⵜ ⵓ ⵏⴻⵜⵜⴰⵜ ⵜⵃⴰⵊⴰ ⴰⵙ ⵜⵜ-ⵉⴷ. ⵅⴰⵙ ⵓⵛⴰ ⵉⵡⵛⴰ ⴰⵙ ⵓⵊⴻⴵⵉⴷ ⵉⵊⵊ ⵏ ⵓⵎⵙⴻⵅⵅⴰⵔ ⵉⵛⴻⵏⵄⴻⵏ, ⵉⵏⵏⴰ: “ⵃⴹⴰⵜ ⴰⴷ ⵖⴰⵔⴻⵙ ⵉⵜⵜⵡⴰⵔⵔ ⵎⴰⵔⵔⴰ ⵎⵉⵏ ⵉⴵⴰⵏ ⵏⵏⴻⵙ ⵓⵍⴰ ⴷ ⵎⴰⵔⵔⴰ ⵚⵚⴰⴱⴻⵜ ⵏ ⵉⵢⵢⴰⵔⴻⵏ ⵥⴻⴳ ⵡⴰⵙⵙ ⵏⵏⵉ ⴷⵉ ⵜⴻⵊⵊⴰ ⵏⴻⵜⵜⴰⵜ ⵜⴰⵎⵎⵓⵔⵜ ⴰⵍ ⴰⵙⵙ-ⴰ.”

7 ⵉⵍⵉⵛⴰⵄ ⵢⵓⵙⴰ-ⴷⴷ ⵖⴰⵔ ⴷⵉⵎⴰⵛⵇ ⵓⵎⵉ ⴱⵉⵏⵀⴰⴷⴰⴷ, ⴰⵊⴻⴵⵉⴷ ⵏ ⴰⵔⴰⵎ, ⵉⵀⵍⴻⵛ. ⵃⴰⵊⴰⵏ ⴰⵙ, ⵏⵏⴰⵏ: “ⴰⵇⴰ ⴰⵔⵢⴰⵥ ⵏ ⴰⵔⴻⴱⴱⵉ ⵢⵓⵙⴰ-ⴷⴷ ⴷⴰⵏⵉⵜⴰ.” 8 ⵅⴰⵙ ⵓⵛⴰ ⵉⵏⵏⴰ ⵓⵊⴻⴵⵉⴷ ⵉ ⵃⴰⵥⴰⵢⵉⵍ: “ⴰⵡⵉ-ⴷⴷ ⴰⴽⵉⴷⴻⴽ ⵉⵛⵜ ⵏ ⵜⴻⵔⵥⴻⴼⵜ, ⵔⵓⵃ ⴰⴷ ⵜⴻⵍⵇⵉⴷ ⴰⵔⵢⴰⵥ ⵏ ⴰⵔⴻⴱⴱⵉ ⵓⵛⴰ ⵙⴻⵇⵙⴰ ⵥⵥⴰⵢⴻⵙ ⵙⵉⴷⵉ, ⴰⴷ ⵜⵉⵏⵉⴷ: “ⵎⴰ ⵏⴻⵛⵛ ⴰⴷ ⴳⴳⴻⵏⴼⵉⵖ ⵥⵉ ⵍⴻⵀⵍⴰⵛ-ⴰ?” ^■   9 ⵃⴰⵥⴰⵢⵉⵍ ⵢⵓⵢⵓⵔ ⴰⴷ ⵜ ⵉⵍⵇⴰ ⵓⵛⴰ ⵢⵉⵡⵉ ⴰⴽⵉⴷⴻⵙ ⵉⵛⵜ ⵏ ⵜⴻⵔⵥⴻⴼⵜ, ⵄⵍⴰⵎ ⴽⵓⵍ ⵏ ⵎⵉⵏ ⵉⴵⴰⵏ ⴷ ⵍⴻⵎⵍⵉⵃ ⵥⵉ ⴷⵉⵎⴰⵛⵇ, ⵉⵊⵊ ⵏ ⴷⴷⵇⴻⵍ ⵏ ⴰⵔⴻⴱⵄⵉⵏ ⵏ ⵉⵍⴻⵖⵎⴰⵏ. ⵏⴻⵜⵜⴰ ⵢⵉⵡⴻⴹ ⵓ ⵉⴱⴻⴷⴷ ⵥⵥⴰⵜⴻⵙ, ⵉⵏⵏⴰ: “ⵎⵎⵉⵛ ⴱⵉⵏⵀⴰⴷⴰⴷ, ⴰⵊⴻⴵⵉⴷ ⵏ ⴰⵔⴰⵎ, ⵉⵙⵙⴻⴽⴽ ⴰⵢⵉ-ⴷⴷ ⵖⴰⵔⴻⴽ ⵎⴰⵃⴻⵏⴷ ⴰⴷ ⵙⵙⴻⵇⵙⵉⵖ: ‘ⵎⴰ ⴰⴷ ⴳⴳⴻⵏⴼⵉⵖ ⵥⵉ ⵍⴻⵀⵍⴰⵛ-ⴰ?’ ”

10 ⵉⵏⵏⴰ ⴰⵙ ⵉⵍⵉⵛⴰⵄ: “ⵓⵢⵓⵔ, ⴰⴷ ⵜⵉⵏⵉⴷ: ‘ⵛⴻⴽ ⵡⴰⵔ ⵜⴻⴳⴳⴻⵏⴼⵉⴷ ⵛⴰ ⴽⵓⵍⵛⵉ!’ ⵙⵉⴷⵉ ⵉⵙⵙⵛⴻⵏ ⴰⵢⵉ, ⴰⵇⴰ ⵏⴻⵜⵜⴰ ⴰⴷ ⵉⵎⵎⴻⵜ ⵏⵉⵛⴰⵏ.”

11 ⵓⴷⴻⵎ ⵏⵏⴻⵙ ⵉⴱⵄⴰⵔ ⵓ ⵉⵙⵙⴻⵇⵙⴻⵃ ⴷⴰⵢⴻⵙ ⵜⴰⵎⵓⵖⵍⵉ ⴰⵍⴰⵎⵉ ⵡⴰⵔ ⵉⵙⵙⵉⵏ ⵎⵉⵏ ⵖⴰ ⵢⴻⴳⴳ. ⵅⴻⵏⵏⵉ ⵉⴱⴷⴰ ⵡⴻⵔⵢⴰⵥ ⵏ ⴰⵔⴻⴱⴱⵉ ⵉⵜⵜⵔⵓ.

12 ⵅⴻⵏⵏⵉ ⵉⵏⵏⴰ ⵃⴰⵥⴰⵢⵉⵍ: “ⵎⴰⵢⴻⵎⵎⵉ ⵉⵜⵜⵔⵓ ⵙⵉⴷⵉ ⵉⵏⵓ?” ⵏⴻⵜⵜⴰ ⵉⵏⵏⴰ: “ⵎⵉⵏⵥⵉ ⵏⴻⵛⵛ ⵙⵙⵏⴻⵖ ⵍⴻⵃⵍⵉⵇ ⵉ ⴷ ⵖⴰ ⵜⴰⵡⵢⴻⴷ ⵛⴻⴽ ⵉ ⴰⵢⵜ ⵏ ⵉⵙⵔⴰⵉⵍ. ⵛⴻⴽ ⴰⴷ ⵜⴻⵇⵇⴷⴻⴷ ⵜⵉⵎⴻⵙⵙⵉ ⵉ ⵜⵏⴻⴷⴷⴰⵎ ⵏⵙⴻⵏ ⵉⴼⴰⵔⵢⴻⵏ ⵙ ⵉⵖⴻⴱⵔⴰⵡⴻⵏ, ⴰⴷ ⵜⴻⵏⵖⴻⴷ ⵉⵃⵓⴷⵔⵉⵢⵢⴻⵏ ⵏⵙⴻⵏ ⵙ ⵙⵙⵉⴼ ⵓ ⴰⴷ ⵜⵍⴻⴱⵥⴻⴷ ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⵜⵉⵎⵖⴰⵔⵉⵏ ⵏⵙⴻⵏ ⵉ ⵉⴽⵙⵉⵏ ⵙ ⴷⴷⴻⵢⵙⴻⵜ ⴰⴷ ⴰⵙⴻⵏⵜ ⵜⵛⴰⵔⵔⴳⴻⴷ ⴰⵄⴻⴷⴷⵉⵙ.” ^■  

13 ⵃⴰⵥⴰⵢⵉⵍ ⵉⵏⵏⴰ: “ⵎⴰⵖⴰⵔ ⵎⵉⵏ ⵉⵄⵏⴰ ⵓⵎⵙⴻⵅⵅⴰⵔ ⵏⵏⴻⴽ, ⴰⵇⵥⵉⵏ ⵏⵏⵉ, ⴰⵇⴰ ⵏⴻⵜⵜⴰ ⵉⵥⴻⵎⵎⴰⵔ ⴰⴷ ⵜⵜ ⵉⴳⴳ ⴷ ⵜⴰⵎⴻⵇⵇⵔⴰⵏⵜ?” ⵉⵍⵉⵛⴰⵄ ⵉⵏⵏⴰ: “ⵙⵉⴷⵉ ⵉⵙⵙⵛⴻⵏ ⴰⵢⵉ-ⴷⴷ ⴱⴻⵍⵍⵉ ⴰⴷ ⵜⵉⵍⵉⴷ ⴷ ⴰⵊⴻⴵⵉⴷ ⵅ ⴰⵔⴰⵎ.”

14 ⵅⴻⵏⵏⵉ ⵉⴼⴼⴻⵖ ⵉⵍⵉⵛⴰⵄ. ⵓⵛⴰ ⵢⵓⵙⴰ-ⴷⴷ ⵏⴻⵜⵜⴰ ⵖⴰⵔ ⵙⵉⴷⵉ ⵏⵏⴻⵙ ⵓ ⵡⴰⵏⵉⵜⴰ ⵉⵏⵏⴰ ⴰⵙ: “ⵎⵉⵏ ⴷ ⴰⵛ ⵉⵏⵏⴰ ⵉⵍⵉⵛⴰⵄ?” ⵓ ⵏⴻⵜⵜⴰ ⵢⴰⵔⵔⴰ-ⴷⴷ: “ⵏⴻⵜⵜⴰ ⵉⵏⵏⴰ ⴰⵢⵉ: ‘ⴰⵇⴰ ⵛⴻⴽ ⴰⴷ ⵜⴻⴳⴳⴻⵏⴼⵉⴷ!’ ”

15 ⵜⵉⵡⴻⵛⵛⴰ ⵏⵏⴻⵙ ⵉⵎⵙⴰⵔ ⴰⵇⴰ ⵉⴽⵙⵉ ⵏⴻⵜⵜⴰ ⵉⵛⵜ ⵏ ⵎⴰⵍⵜⴰ, ⵉⵙⵙⴻⵖⴹⴻⵚ ⵉ-ⵜⵜ ⴷⴻⴳ ⵡⴰⵎⴰⵏ ⵓⵛⴰ ⵉⵙⵙⴰⵔⵙ ⵉ-ⵜⵜ ⵅ ⵓⵖⴻⵎⴱⵓⴱ ⵏⵏⴻⵙ ⴰⵍⴰⵎⵉ ⵉⵎⵎⵓⵜ.

ⵓⵛⴰ ⵉⴷⵡⴻⵍ ⵃⴰⵥⴰⵢⵉⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ.

16 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵅⴻⵎⵙⴰ ⵏ ⵢⵓⵔⴰⵎ, ⵎⵎⵉⵙ ⵏ ⴰⵅⴰⴱ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⵓⵎⵉ ⵜⵓⵖⴰ ⵢⴰⵀⵓⵛⴰⴼⴰⵜ ⴷ ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⴷⵡⴻⵍ ⵢⴰⵀⵓⵔⴰⵎ, ⵎⵎⵉⵙ ⵏ ⵢⴰⵀⵓⵛⴰⴼⴰⵟ, ⴷ ⴰⵊⴻⴵⵉⴷ ⵏ ⵢⴰⵀⵓⴷⴰ. ^■  

17 ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⵉⴷⵡⴻⵍ ⴷ ⴰⵊⴻⴵⵉⴷ. ⵏⴻⵜⵜⴰ ⵉⵃⴽⴻⵎ ⵜⵎⴻⵏⵢⴰ ⵏ ⵉⵙⴻⴳⴳⵯⵓⵙⴰ ⴷⵉ ⵓⵔⵛⴰⵍⵉⵎ.

18 ⵏⴻⵜⵜⴰ ⵢⵓⵢⵓⵔ ⴷⴻⴳ ⵡⴻⴱⵔⵉⴷ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ, ⴰⵎ ⵎⴰⵎⵎⴻⵛ ⵜⵓⵖⴰ ⵜⴻⴳⴳⴰ ⵜⴰⴷⴷⴰⵔⵜ ⵏ ⴰⵅⴰⴱ, ⵎⴰⵖⴰⵔ ⵢⴻⴵⵉⵙ ⵏ ⴰⵅⴰⴱ ⵜⴻⴷⵡⴻⵍ ⴷ ⵜⴰⵎⵖⴰⵔⵜ ⵏⵏⴻⵙ. ⵏⴻⵜⵜⴰ ⵉⴳⴳⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ.

19 ⵎⴰⵛⴰ ⵙⵉⴷⵉ ⵡⴰⵔ ⵉⵅⵙ ⴰⴷ ⵢⴰⵔⴻⴷⴷⴻⴵ ⵢⴰⵀⵓⴷⴰ ⴷⵉ ⵟⵟⵡⴻⵄ ⵏ ⵓⵎⵙⴻⵅⵅⴰⵔ ⵏⵏⴻⵙ ⴷⴰⵡⵓⴷ, ⴰⵎ ⵎⴰⵎⵎⴻⵛ ⵉ ⴷ ⴰⵙ ⵜⵓⵖⴰ ⵉⵏⵏⴰ, ⴰⴷ ⴰⵙ ⵉⵡⵛ ⵍⴻⴱⴷⴰ ⵉⵊⵊ ⵏ ⵍⴻⴼⵏⴰⵔ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ ⵙ ⵉⵃⴻⵏⵊⵉⵔⴻⵏ ⵏⵏⴻⵙ. ^■  

20 ⴷⴻⴳ ⵡⵓⵙⵙⴰⵏ ⵏⵏⴻⵙ ⵉⵥⴻⵎⵎⴰⵔ ⵉⴷⵓⵎ ⴰⴷ ⵉⵅⵜⵓⵜⵜⴻⵍ ⵥⴻⴳ ⵉⴼⴰⵙⵙⴻⵏ ⵏ ⵢⴰⵀⵓⴷⴰ ⵓⵎⵉ ⵖⴻⵡⵡⵖⴻⵏ, ⵓ ⵏⵉⵜⵏⵉ ⴳⴳⵉⵏ ⵉⵊⵊ ⵏ ⵓⵊⴻⴵⵉⴷ ⵅ ⵢⵉⵅⴻⴼ ⵏⵙⴻⵏ. ^■   21 ⵢⴰⵀⵓⵔⴰⵎ ⵉⵄⴷⵓ ⵅⴻⵏⵏⵉ ⴰⴽ-ⴷ ⵎⴰⵔⵔⴰ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ ⵏⵏⴻⵙ ⵖⴰⵔ ⵚⴰⵄⵉⵔ. ⵓⵛⴰ ⵉⵎⵙⴰⵔ ⴰⵇⴰ ⵉⴽⴽⴰⵔ ⵙ ⴵⵉⵍⴻⵜ ⵓⵛⴰ ⵉⵀⵊⴻⵎ ⵅ ⴰⵢⵜ ⵏ ⵉⴷⵓⵎ ⵉⵏⵏⵉ ⵜⵓⵖⴰ ⵉ ⴷ ⴰⵙ ⴷⴷ-ⵉⵏⵏⴹⴻⵏ ⵉ ⵏⴻⵜⵜⴰ ⵓ ⵉ ⵉⵎⴻⵇⵇⵔⴰⵏⴻⵏ ⵏ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ, ⵎⴰⵛⴰ ⵍⴳⴻⵏⵙ ⵢⴰⵔⵡⴻⵍ ⵖⴰⵔ ⵉⵇⵉⴹⴰⵏ ⵏⵏⴻⵙ. 22 ⵅⴻⵏⵏⵉ ⵅⵜⵓⵜⵜⵍⴻⵏ ⴰⵢⵜ ⵏ ⵉⴷⵓⵎ ⵙ ⵓⵖⴻⵡⵡⴻⵖ ⵥⵉ ⵊⴰⵔ ⵉⴼⴰⵙⵙⴻⵏ ⵏ ⵢⴰⵀⵓⴷⴰ ⴰⵍ ⴰⵙⵙ-ⴰ. ⴷⵉ ⵍⵡⴻⵇⵜ ⵏⵏⵉ ⴱⴻⵄⴷⴰ ⵉⵖⴻⵡⵡⴻⵖ ⵓⵍⴰ ⴷ ⵍⵉⴱⵏⴰ.

23 ⵉⵎⴻⵥⵔⵓⵢⴻⵏ ⵉ ⵉⵇⵇⵉⵎⴻⵏ ⵏ ⵢⴰⵀⵓⵔⴰⵎ, ⴷ ⵎⴰⵔⵔⴰ ⵎⵉⵏ ⵉⴳⴳⴰ, ⵎⴰ ⵎⴰⵏ ⴰⵢⴰ ⵎⴰⵔⵔⴰ ⵡⴰⵔ ⵉⵜⵜⵡⴰⵥⴻⵎⵎⴻⵎ ⵛⴰ ⴷⴻⴳ ⵡⴻⴷⵍⵉⵙ ⵏ ⵉⵎⴻⵥⵔⵓⵢⴻⵏ ⵏ ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ? 24 ⵢⴰⵀⵓⵔⴰⵎ ⵉⵜⵜⵡⴰⵙⵙⴰⵔⵙ ⴷⴻⴳ ⵡⴻⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵏⴻⵜⵜⴰ ⵉⵜⵜⵡⴰⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ ⴷⵉ ⵜⴻⵏⴷⵉⵏⵜ ⵏ ⴷⴰⵡⵓⴷ. ⵎⵎⵉⵙ, ⴰⵅⴰⵥⵢⴰ, ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ. ^■  

25 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⴻⵏⵄⴰⵛ ⵏ ⵢⵓⵔⴰⵎ, ⵎⵎⵉⵙ ⵏ ⴰⵅⴰⴱ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⵉⴱⴷⴰ ⴰⵅⴰⵥⵢⴰ, ⵎⵎⵉⵙ ⵏ ⵢⴰⵀⵓⵔⴰⵎ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⴰⴷ ⵉⵃⴽⴻⵎ. ^■   26 ⴰⵅⴰⵥⵢⴰ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵓ-ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⵉⴷⵡⴻⵍ ⴷ ⴰⵊⴻⴵⵉⴷ. ⵏⴻⵜⵜⴰ ⵉⵃⴽⴻⵎ ⵉⵊⵊ ⵏ ⵓⵙⴻⴳⴳⵯⴰⵙ ⴷⵉ ⵓⵔⵛⴰⵍⵉⵎ. ⵢⴻⵎⵎⴰⵙ ⵇⵇⴰⵔⴻⵏ ⴰⵙ ⵄⴰⵜⴰⵍⵢⴰ, ⵢⴻⴵⵉⵙ ⵏ ⵄⵓⵎⵔⵉ, ⴰⵊⴻⴵⵉⴷ ⵏ ⵉⵙⵔⴰⵉⵍ. ^■   27 ⵏⴻⵜⵜⴰ ⵢⵓⵢⵓⵔ ⴷⴻⴳ ⵡⴻⴱⵔⵉⴷ ⵏ ⵜⴰⴷⴷⴰⵔⵜ ⵏ ⴰⵅⴰⴱ ⵓ ⵉⴳⴳⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ, ⴰⵎ ⵜⴰⴷⴷⴰⵔⵜ ⵏ ⴰⵅⴰⴱ, ⵎⴰⵖⴰⵔ ⵜⵓⵖⴰ ⴷ ⴰⴹⴻⴳⴳⵯⴰⵍ ⵏ ⵜⴰⴷⴷⴰⵔⵜ ⵏ ⴰⵅⴰⴱ.

28 ⵉⴼⴼⴻⵖ ⴰⴽ-ⴷ ⵢⵓⵔⴰⵎ, ⵎⵎⵉⵙ ⵏ ⴰⵅⴰⴱ, ⵉ ⵓⵎⴻⵏⵖⵉ ⴰⴽ-ⴷ ⵃⴰⵥⴰⵢⵉⵍ, ⴰⵊⴻⴵⵉⴷ ⵏ ⴰⵔⴰⵎ, ⵖⴰⵔ ⵔⴰⵎⵓⵜ ⴷⵉ ⵊⵉⵍⵄⴰⴷ ⵓ ⵉⵔⴰⵎⵉⵢⵢⴻⵏ ⵖⴻⵍⴱⴻⵏ ⵅ ⵢⵓⵔⴰⵎ. 29 ⵅⴻⵏⵏⵉ ⵢⴰⵔⴻⴳⴳⵯⴻⵃ ⵓⵊⴻⴵⵉⴷ ⵢⵓⵔⴰⵎ, ⵎⴰⵃⴻⵏⴷ ⴰⴷ ⵢⴰⵔⵥⵓ ⴷⵉ ⵢⴰⵥⵔⴰⵄⵉⵍ ⴰⴳⴻⵏⴼⵓ ⵥⴻⴳ ⵉⵢⴻⵥⵥⵉⵎⴻⵏ ⵏⵏⵉ ⵉ ⴷ ⴰⵙ ⵜⵓⵖⴰ ⴳⴳⵉⵏ ⴰⵢⵜ ⵏ ⴰⵔⴰⵎ ⵓⵎⵉ ⵉⵎⵏⴻⵖ ⵏⴻⵜⵜⴰ ⴷⵉ ⵔⴰⵎⵓⵜ ⴰⴽ-ⴷ ⵓⵊⴻⴵⵉⴷ ⵏⵙⴻⵏ ⵃⴰⵥⴰⵢⵉⵍ, ⴰⵊⴻⴵⵉⴷ ⵏ ⴰⵔⴰⵎ. ⴰⵅⴰⵥⵢⴰ, ⵎⵎⵉⵙ ⵏ ⵢⴰⵀⵓⵔⴰⵎ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⵀⵡⴰ-ⴷⴷ ⴷⵉⵏ ⵃⵉⵎⴰ ⴰⴷ ⵉⵙⵙⵉⵊⵊ ⵅ ⵢⵓⵔⴰⵎ, ⵎⵎⵉⵙ ⵏ ⴰⵅⴰⴱ, ⴷⵉ ⵢⴰⵥⵔⴰⵄⵉⵍ, ⵓⵎⵉ ⵜⵓⵖⴰ ⵉⵀⵍⴻⵛ ⵏⴻⵜⵜⴰ. ^■