1 ⴰⵡⴰⵔⵏⵉ ⵉ ⵡⴰⵟⵟⴰⵙ ⵏ ⵡⵓⵙⵙⴰⵏ, ⵉⵎⵙⴰⵔ, ⴰⵇⴰ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵉⵍⵉⵢⴰ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵍⴰⵜⴰ, ⵉⵏⵏⴰ: “ⵓⵢⵓⵔ, ⵙⵛⴻⵏ ⵉⵅⴻⴼ ⵏⵏⴻⴽ ⵉ ⴰⵅⴰⴱ, ⵎⴰⵖⴰⵔ ⵏⴻⵛⵛ ⴰⴷ ⵡⵛⴻⵖ ⴰⵏⵥⴰⵔ ⴷⵉ ⵜⴻⵎⵎⵓⵔⵜ.” 2 ⵓⵛⴰ ⵢⵓⵢⵓⵔ ⵉⵍⵉⵢⴰ ⵃⵉⵎⴰ ⴰⴷ ⵉⵙⵙⵛⴻⵏ ⵉⵅⴻⴼ ⵏⵏⴻⵙ ⵉ ⴰⵅⴰⴱ. ⵜⵓⵖⴰ ⵍⴰⵥ ⵉⵎⵖⴰⵔ ⴷⵉ ⵙⴰⵎⴰⵔⵢⴰ. 3 ⴰⵅⴰⴱ ⵜⵓⵖⴰ ⵉⵍⴰⵖⴰ ⵉ ⵄⵓⴱⴰⴷⵢⴰ ⵡⴻⵏⵏⵉ ⵉⴵⴰⵏ ⵅ ⵜⴰⴷⴷⴰⵔⵜ. ⵄⵓⴱⴰⴷⵢⴰ ⵜⵓⵖⴰ ⵉⵜⵜⴻⴳⴳⵯⴻⴷ ⵙⵉⴷⵉ ⴰⵟⵟⴰⵙ. 4 ⵓⵎⵉ ⵉⵥⴰⴱⴰⵍ ⵉⵇⴹⴰ ⵉⵏⴰⴱⵉⵢⵢⴻⵏ ⵏ ⵙⵉⴷⵉ, ⵉⵎⵙⴰⵔ, ⴰⵇⴰ ⵄⵓⴱⴰⴷⵢⴰ ⵢⵉⵡⵉ ⵎⵢⴰ ⵏ ⵉⵏⴰⴱⵉⵢⵢⴻⵏ, ⵉⵙⵙⵏⵓⴼⴼⴰⵔ ⵉ-ⵜⴻⵏ, ⵅⴻⵎⵙⵉⵏ ⴷⴻⴳ ⵉⵊⵊ ⵏ ⵢⴻⴼⵔⵉ, ⵓ ⵉⵄⵜⴻⵇ ⵉ-ⵜⴻⵏ ⵙ ⵡⴻⵖⵔⵓⵎ ⴷ ⵡⴰⵎⴰⵏ. 5 ⴰⵅⴰⴱ ⵉⵏⵏⴰ ⵉ ⵄⵓⴱⴰⴷⵢⴰ: “ⵓⵢⵓⵔ ⴷⵉ ⵜⴻⵎⵎⵓⵔⵜ ⵖⴰⵔ ⵎⴰⵔⵔⴰ ⵜⴰⵍⴰⵡⵉⵏ ⵏ ⵡⴰⵎⴰⵏ ⵓ ⵖⴰⵔ ⵎⴰⵔⵔⴰ ⵜⵉⵖⴻⵥⵔⴰⵜⵉⵏ. ⴰⴷ ⵜⴰⵖ ⴰⴷ ⵏⴰⴼ ⴰⵀⴻⴷⴷⵓ ⵓ ⵥⴻⵎⵎⴰⵔⴻⵏ ⵉⵢⵙⴰⵏ ⴷ ⵉⵙⴰⵔⴷⴰⵏ ⴰⴷ ⵇⵇⵉⵎⴻⵏ ⴷⴷⴰⵔⴻⵏ ⵓ ⴰⴷ ⵜⴰⴼ ⵏⵀⵍⴰ ⵎⴰ ⵏⴻⵏⵖⴰ ⵍⵎⴰⵍ.” 6 ⵏⵉⵜⵏⵉ ⴱⴹⴰⵏ ⵜⴰⵎⵎⵓⵔⵜ ⵊⴰⵔ ⴰⵙⴻⵏ ⵃⵉⵎⴰ ⴰⴷ ⵜⵜ ⵛⵓⵇⵇⴻⵏ. ⴰⵅⴰⴱ ⵢⵓⵢⵓⵔ ⵅ ⵉⵊⵊ ⵏ ⵡⴻⴱⵔⵉⴷ ⵡⴻⵃⵃⴷⴻⵙ ⵓ ⵄⵓⴱⴰⴷⵢⴰ ⵢⵓⵢⵓⵔ ⵡⴻⵃⵃⴷⴻⵙ ⵅ ⵉⵊⵊ ⵡⴻⴱⵔⵉⴷ ⵏⵏⴻⵖⵏⵉ.

7 ⵓⵎⵉ ⵜⵓⵖⴰ ⵄⵓⴱⴰⴷⵢⴰ ⴷⴻⴳ ⵡⴻⴱⵔⵉⴷ, ⵅⵥⴰⵔ, ⴰⵇⴰ ⵉⵎⵎⴻⵍⵇⴰ ⴰⴽⵉⴷⴻⵙ ⵉⵍⵉⵢⴰ. ⵄⵓⴱⴰⴷⵢⴰ ⵉⵄⵇⴻⵍ ⵉ-ⵜ, ⵉⵡⴹⴰ ⵥⵥⴰⵜⴻⵙ ⵙ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⵎⵎⵓⵔⵜ, ⵉⵏⵏⴰ: “ⵎⴰ ⴷ ⵛⴻⴽ, ⵙⵉⴷⵉ ⵉⵏⵓ ⵉⵍⵉⵢⴰ?” 8 ⵉⵏⵏⴰ ⴰⵙ ⵡⴰⵏⵉⵜⴰ: “ⴷ ⵏⴻⵛⵛ. ⵓⵢⵓⵔ, ⵉⵏⵏⴰ ⵉ ⵙⵉⴷⵉ ⵏⵏⴻⴽ: ‘ⵅⵥⴰⵔ, ⵉⵍⵉⵢⴰ ⴰⵇⴰ-ⵜ ⴷⴰⵏⵉⵜⴰ!’ ” 9 ⵎⴰⵛⴰ ⵏⴻⵜⵜⴰ ⵉⵏⵏⴰ: “ⵎⴰⵏ ⴷⴷⴻⵏⴱ ⵉ ⴳⴳⵉⵖ, ⴰⵇⴰ ⵛⴻⴽ ⴰⴷ ⴰⵢⵉ ⵜⵙⴻⵍⵍⵎⴻⴷ ⴷⴻⴳ ⵉⴼⴰⵙⵙⴻⵏ ⵏ ⴰⵅⴰⴱ ⵃⵉⵎⴰ ⴰⴷ ⴰⵢⵉ ⵉⵏⴻⵖ?

10 ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⵍⴳⴻⵏⵙ ⵏⵉⵖ ⵉⵛⵜ ⵏ ⵜⴳⴻⵍⴷⵉⵜ ⵎⴰⵏⵉ ⵙⵉⴷⵉ ⵉⵏⵓ ⵡⴰⵔ ⵉⵊⵊⵉ ⴰⴷ ⵅⴰⴽ ⵢⴰⵔⵥⵓ! ⵎⴰⵍⴰ ⵏⵏⴰⵏ ⵏⵉⵜⵏⵉ: ‘ⵏⴻⵜⵜⴰ ⵡⴰⵔ ⴷⴰ ⵉⴵⵉ!’, ⵅⴻⵏⵏⵉ ⵉⵊⵊⴰ ⵍⴳⴻⵏⵙ ⵏⵏⵉ ⴰⴷ ⵉⵊⵊⴰⴵ ⴱⴻⵍⵍⵉ ⵡⴰⵔ ⵥⴻⵎⵎⴰⵔⴻⵏ ⴰⴷ ⵛⴻⴽ ⴰⴼⴻⵏ.

11 ⵓ ⵍⴻⵅⵅⵓ ⵛⴻⴽ ⵜⴻⵏⵏⵉⴷ: ‘ⵓⵢⵓⵔ, ⵉⵏⵉ ⵉ ⵙⵉⴷⵉ ⵏⵏⴻⴽ: ⵅⵥⴰⵔ ⵉⵍⵉⵢⴰ ⴰⵇⴰ-ⵜ ⴷⴰⵏⵉⵜⴰ!’

12 ⴰⴷ ⵜⴰⵖ ⴰⴷ ⵉⵎⵙⴰⵔ, ⵅⵎⵉ ⵉ ⵅⴰⴽ ⵉ ⵖⴰ ⵓⵢⵓⵔⴻⵖ, ⴰⵇⴰ ⴰⵔⵔⵓⵃ ⵏ ⵙⵉⴷⵉ ⴰⴷ ⵛⴻⴽ ⵉⴽⵙⵉ, ⵡⴰⵔ ⵙⵙⵉⵏⴻⵖ ⵎⴰⵏⵉ. ⵎⴰⵍⴰ ⵅⴻⵏⵏⵉ ⵏⴻⵛⵛ ⴰⴷ ⴷⴷ-ⴰⵙⴻⵖ ⵃⵉⵎⴰ ⴰⴷ ⵜ ⵉⵏⵉⵖ ⵉ ⴰⵅⴰⴱ ⵓ ⵏⴻⵜⵜⴰ ⵡⴰⵔ ⵛⴻⴽ ⵉⵜⵜⵉⴼ, ⵏⴻⵜⵜⴰ ⴰⴷ ⴰⵢⵉ ⵉⵏⴻⵖ, ⵓⵎⵉ ⴰⵎⵙⴻⵅⵅⴰⵔ ⵏⵏⴻⴽ ⵉⵜⵜⴻⴳⴳⵯⴻⴷ ⵙⵉⴷⵉ ⵥⵉ ⵜⴻⵎⵥⵉ ⵉⵏⵓ.

13 ⵎⴰ ⵡⴰⵔ ⴷ ⴰⵛ ⵄⵉⵡⴷⴻⵏ ⵛⴰ ⵉ ⵙⵉⴷⵉ ⵉⵏⵓ, ⵎⵉⵏ ⴳⴳⵉⵖ ⵏⴻⵛⵛ, ⵓⵎⵉ ⵉⵥⴰⴱⴰⵍ ⵉⵏⵖⴰ ⵉⵏⴰⴱⵉⵢⵢⴻⵏ ⵏ ⵙⵉⴷⵉ? ⴰⵇⴰ ⵏⴻⵛⵛ ⵙⵙⵏⵓⴼⴼⴰⵔⴻⵖ ⵎⵢⴰ ⵏ ⵢⴻⵔⵢⴰⵥⴻⵏ ⵥⴻⴳ ⵉⵏⴰⴱⵉⵢⵢⴻⵏ, ⴽⵓⵍ ⵅⴻⵎⵙⵉⵏ ⴷⴻⴳ ⵉⵊⵊ ⵏ ⵢⴻⴼⵔⵉ, ⵓⵛⴰ ⵄⴻⵜⵇⴻⵖ ⵜⴻⵏ ⵙ ⵡⴻⵖⵔⵓⵎ ⴷ ⵡⴰⵎⴰⵏ?

14 ⵓ ⵍⴻⵅⵅⵓ ⵜⴻⵇⵇⴰⵔⴻⴷ ‘ⵓⵢⵓⵔ, ⵉⵏⵉ ⵉ ⵙⵉⴷⵉ ⵏⵏⴻⴽ: ⵅⵥⴰⵔ, ⵉⵍⵉⵢⴰ ⴰⵇⴰ-ⵜ ⴷⴰ!’ ⵏⴻⵜⵜⴰ ⴰⴷ ⴰⵢⵉ ⵉⵏⴻⵖ.”

15 ⵉⵏⵏⴰ ⵉⵍⵉⵢⴰ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ ⵓⵎⵉ ⵉ ⴱⴻⴷⴷⴻⵖ, ⴰⵇⴰ ⵏⵉⵛⴰⵏ ⵏⴻⵛⵛ ⴰⴷ ⵙⴻⵛⵛⵏⴻⵖ ⵉⵅⴻⴼ ⵉⵏⵓ ⴰⵙⵙ-ⴰ!”

16 ⵅⴻⵏⵏⵉ ⵢⵓⵢⵓⵔ ⵄⵓⴱⴰⴷⵢⴰ ⵖⴰⵔ ⵓⵎⵙⴰⴳⴰⵔ ⴰⴽ-ⴷ ⴰⵅⴰⴱ ⵓ ⵉⵅⴻⴱⴱⴰⵔ ⴰⵙ ⵜ. ⵓⵛⴰ ⴰⵅⴰⴱ ⵢⵓⵢⵓⵔ ⵎⴰⵃⴻⵏⴷ ⴰⴷ ⵉⵎⵙⴰⴳⴰⵔ ⴰⴽ-ⴷ ⵉⵍⵉⵢⴰ.

17 ⵓⵎⵉ ⵉⵥⵔⴰ ⴰⵅⴰⴱ ⵉⵍⵉⵢⴰ, ⵉⵎⵙⴰⵔ, ⴰⵇⴰ ⴰⵅⴰⴱ ⵉⵏⵏⴰ ⴰⵙ: “ⵎⴰ ⵛⴻⴽ ⴷ ⴰⴹⴻⵢⵢⴻⵄ ⵏ ⵉⵙⵔⴰⵉⵍ?” ^■  

18 ⵏⴻⵜⵜⴰ ⵉⵏⵏⴰ: ‘ⵏⴻⵛⵛ ⵡⴰⵔ ⴹⵉⵢⵢⵄⴻⵖ ⵛⴰ ⵉⵙⵔⴰⵉⵍ, ⵎⴰⵛⴰ ⵛⴻⴽ ⴷ ⵜⴰⴷⴷⴰⵔⵜ ⵏ ⴱⴰⴱⴰⵛ ⵓⵎⵉ ⴽⴻⵏⵏⵉⵡ ⵜⴻⵊⵊⵉⵎ ⵍⵓⵎⵓⵔⴰⵜ ⵏ ⵙⵉⴷⵉ ⵖⴰⵔ ⵓⵖⴻⵥⴷⵉⵙ ⵓ ⵛⴻⴽ ⵜⵓⵢⵓⵔⴻⴷ ⴰⵡⴰⵔⵏⵉ ⵉ ⵉⴱⴰⵄⵍⴻⵏ.

19 ⵅⴻⵏⵏⵉ ⵍⴻⵅⵅⵓ, ⵙⵎⵓⵏ ⵎⴰⵔⵔⴰ ⵉⵙⵔⴰⵉⵍ ⵖⴰⵔⵉ ⵖⴰⵔ ⵡⴻⴷⵔⴰⵔ ⵏ ⴽⴰⵔⵎⵉⵍ ⵓⵍⴰ ⴷ ⴰⵔⴻⴱⵄⴰ-ⵎⵢⴰ ⵓ-ⵅⴻⵎⵙⵉⵏ ⵏ ⵉⵏⴰⴱⵉⵢⵢⴻⵏ ⵏ ⴱⴰⵄⵍ ⴷ ⴰⵔⴻⴱⵄⴰ-ⵎⵢⴰ ⵏ ⵉⵏⴰⴱⵉⵢⵢⴻⵏ ⵏ ⵜⵔⴻⴱⴱⵉⵜ ⵏ ⵛⵡⴰⵔⵜⵉ ⵏⵏⵉ ⵉⵜⵜⴻⵜⵜⴻⵏ ⵥⵉ ⵟⵟⴰⴱⵍⴰ ⵏ ⵉⵥⴰⴱⴰⵍ.”

20 ⴰⵅⴰⴱ ⵉⵙⵙⴻⴽⴽ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ ⵓ ⵉⵙⵙⵎⵓⵏ ⵉⵏⴰⴱⵉⵢⵢⴻⵏ ⵖⴰⵔ ⵡⴻⴷⵔⴰⵔ ⵏ ⴽⴰⵔⵎⵉⵍ. 21 ⵉⵍⵉⵢⴰ ⵉⵇⴰⵔⵔⴻⴱ-ⴷⴷ ⵖⴰⵔ ⵎⴰⵔⵔⴰ ⵍⴳⴻⵏⵙ, ⵉⵏⵏⴰ: “ⵎⴻⵛⵃⴰⵍ ⵄⴰⴷ ⵉ ⵖⴰ ⵜⴻⴽⴽⴻⵎ ⵄⴰⴷ ⵜⵜⵏⴻⵇⵍⴰⴱⴻⵎ ⴽⴻⵏⵏⵉⵡ ⵖⴰⵔ ⵜⵏⴰⵢⴻⵏ ⵏ ⵉⵖⴻⵥⴷⵉⵙⴻⵏ? ⵎⴰⵍⴰ ⵙⵉⴷⵉ ⴷ ⴰⵔⴻⴱⴱⵉ, ⴹⴼⴰⵔⴻⵎ ⴰⵙ-ⴷⴷ ⵓ ⵎⴰⵍⴰ ⴷ ⴱⴰⵄⵍ, ⵅⴻⵏⵏⵉ ⴹⴼⴰⵔⴻⵎ ⵡⴰⵏⵉⵜⴰ!” ⵎⴰⵛⴰ ⵍⴳⴻⵏⵙ ⵡⴰⵔ ⵅⴰⵙ ⴷⴷ-ⵢⴰⵔⵔⵉ ⵓⵍⴰ ⵙ ⵢⵉⵊⵊ ⵏ ⵡⴰⵡⴰⵍ. ^■   22 ⵅⴻⵏⵏⵉ ⵉⵏⵏⴰ ⵉⵍⵉⵢⴰ ⵉ ⵍⴳⴻⵏⵙ: “ⵏⴻⵛⵛ ⵡⴰⵀⴰ ⵉ ⵉⵇⵇⵉⵎⴻⵏ ⴷ ⴰⵏⴰⴱⵉ ⵏ ⵙⵉⴷⵉ ⵓⵛⴰ ⵉⵏⴰⴱⵉⵢⵢⴻⵏ ⵏ ⴱⴰⵄⵍ ⴰⵇⴰ ⴰⵜⴻⵏ ⵙ ⴰⵔⴻⴱⵄⴰ-ⵎⵢⴰ ⵓ ⵅⴻⵎⵙⵉⵏ ⵏ ⵢⴻⵔⵢⴰⵥⴻⵏ. 23 ⴻⵊⵊ ⴰⴷ ⴰⵏⴻⵖ ⵡⵛⴻⵏ ⵜⵏⴰⵢⴻⵏ ⵏ ⵉⵢⴻⵏⴷⵓⵥⴻⵏ. ⴻⵊⵊ ⵉ-ⵜⴻⵏ ⵅⴻⵏⵏⵉ ⴰⴷ ⴼⴰⵔⵥⴻⵏ ⵉⵊⵊ ⵏ ⵓⵢⴻⵏⴷⵓⵥ ⵉ ⵢⵉⵅⴻⴼ ⵏⵙⴻⵏ, ⴰⴷ ⵜ ⴱⴹⴰⵏ ⵓ ⴰⴷ ⵜ ⵙⵙⴰⵔⵙⴻⵏ ⵅ ⵓⴽⴻⵛⵛⵓⴹ, ⵎⴰⵛⴰ ⵡⴰⵔ ⵜⵜⴻⴳⴳⴻⵏ ⵜⵉⵎⴻⵙⵙⵉ ⵙⴰⴷⵓ ⵏⵏⴻⵙ. ⵏⴻⵛⵛ ⴰⴷ ⵙⵙⵡⴻⵊⴷⴻⵖ ⴰⵎⵡⴰ ⵏⵏⴻⵖⵏⵉ, ⴰⴷ ⵜ ⵙⵙⴰⵔⵙⴻⵖ ⵅ ⵓⴽⴻⵛⵛⵓⴹ ⵓ ⵡⴰⵔ ⵜⵜⴻⴳⴳⴻⵖ ⵜⵉⵎⴻⵙⵙⵉ ⵙⴰⴷⵓ ⵏⵏⴻⵙ. 24 ⵅⴻⵏⵏⵉ ⴰⴷ ⵜⵍⴰⵖⴰⵎ ⵉⵙⴻⵎ ⵏ ⴰⵔⴻⴱⴱⵉ ⵏⵡⴻⵎ ⵓ ⵏⴻⵛⵛ ⴰⴷ ⵍⴰⵖⵉⵖ ⵉⵙⴻⵎ ⵏ ⵙⵉⴷⵉ ⵓⵛⴰ ⴰⵔⴻⴱⴱⵉ ⵡⴻⵏⵏⵉ ⵉ ⵖⴰ ⵢⴰⵔⵔⴻⵏ ⵙ ⵜⵎⴻⵙⵙⵉ, ⴷ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵔⴻⴱⴱⵉ.” ⵓⵛⴰ ⵉⵍⴰⵖⴰ ⵎⴰⵔⵔⴰ ⵍⴳⴻⵏⵙ, ⵏⵏⴰⵏ: “ⴰⵡⴰⵍ-ⴰ ⴷ ⵍⴻⵎⵍⵉⵃ!”

25 ⵉⵏⵏⴰ ⵉⵍⵉⵢⴰ ⵉ ⵉⵏⴰⴱⵉⵢⵢⴻⵏ ⵏ ⴱⴰⵄⵍ: “ⵅⴹⴰⵔⴻⵎ ⵉ ⵢⵉⵅⴻⴼ ⵏⵡⴻⵎ ⴰⵢⴻⵏⴷⵓⵥ ⴰⵎⴻⵥⵡⴰⵔⵓ ⵓ ⵙⵙⵡⴻⵊⴷⴻⵎ ⴰⵙ ⵜ ⴷ ⴰⵎⴻⵥⵡⴰⵔⵓ, ⵎⴰⵖⴰⵔ ⴽⴻⵏⵏⵉⵡ ⵙ ⵡⴰⵟⵟⴰⵙ. ⵍⴰⵖⴰⵎ ⵅⴻⵏⵏⵉ ⵉⵙⴻⵎ ⵏ ⴰⵔⴻⴱⴱⵉ ⵏⵡⴻⵎ, ⵎⴰⵛⴰ ⵡⴰⵔ ⵙⵔⵓⵙⴰⵎ ⵛⴰ ⵜⵉⵎⴻⵙⵙⵉ ⵙⴰⴷⵓ ⵏⵏⴻⵙ.” 26 ⵏⵉⵜⵏⵉ ⴽⵙⵉⵏ ⴰⵢⴻⵏⴷⵓⵥ ⵉ ⴷ ⴰⵙⴻⵏ ⵉⵡⵛⴰ ⵏⴻⵜⵜⴰ ⵓ ⵙⵙⵡⴻⵊⴷⴻⵏ ⵜ. ⵅⴻⵏⵏⵉ ⵍⴰⵖⴰⵏ ⵉ ⵢⵉⵙⴻⵎ ⵏ ⴱⴰⵄⵍ, ⵥⵉ ⵜⵓⴼⴼⵓⵜ ⵖⴰⵔⴻⵙ ⴰⵍ ⴰⵥⴰⵍ ⵓ ⵏⵏⴰⵏ: “ⴰ ⴱⴰⵄⵍ, ⴰⵔⵔ ⴰⵏⴻⵖ-ⴷⴷ!” ⵎⴰⵛⴰ ⵡⴰⵍⵓ ⵏ ⵍⵃⴻⵙⵙ ⵓⵛⴰ ⵓⵍⴰ ⴷ ⵉⵊⵊ ⵡⴰⵔ ⴷⴷ-ⵢⴰⵔⵔⵉ ⵛⴰ. ⵏⵉⵜⵏⵉ ⵏⴻⴳⵥⴻⵏ ⵅ ⵓⵄⴰⵍⵟⴰⵔ ⵉ ⴷⵉⵏ ⵉⵜⵜⵡⴰⴳⴳⴻⵏ. 27 ⵖⴰⵔ ⵡⴰⵥⴰⵍ ⵉⴱⴷⴰ ⵉⵍⵉⵢⴰ ⵉⵜⵜⵇⴻⵙⵙⴰⵔ ⵅⴰⵙⴻⵏ, ⵉⵏⵏⴰ: “ⵍⴰⵖⴰⵎ ⵙ ⵜⵎⵉⵊⵊⴰ ⵉⵊⴻⵀⴷⴻⵏ, ⴰⵇⴰ-ⵜ ⴷ ⴰⵔⴻⴱⴱⵉ. ⵏⵉⵛⴰⵏ ⵏⴻⵜⵜⴰ ⵉⵜⵜⵅⴻⵎⵎⴰⵎ ⵏⵉⵖ ⵉⵄⴻⵥⵥⴻⵍ ⵛⵡⴰⵢⵜ ⵏⵉⵖ ⵏⴻⵜⵜⴰ ⵄⴰⴷ ⴷⴻⴳ ⵡⴻⴱⵔⵉⴷ. ⴰⴷ ⵜⴰⵖ ⵉⵜⵜⴻⵟⵟⴻⵚ ⵓⵛⴰ ⵉⵜⵜⵅⴻⵚⵚⴰ ⴰⵙ ⴰⴷ ⵉⴼⴰⵇ ⵄⴰⴷ.” 28 ⵏⵉⵜⵏⵉ ⵙⵖⵓⵢⵢⴻⵏ ⵙ ⵜⵎⵉⵊⵊⴰ ⵉⵊⴻⵀⴷⴻⵏ ⵓ ⵇⴻⵙⵙⴻⵏ ⵉⵅⴻⴼ ⵏⵙⴻⵏ ⵙ ⵍⴻⵙⵢⵓⴼ ⴷ ⵉⵃⵔⵉⵛⴻⵏ ⴰⵎ ⵜⵏⴰⵎⵉⵜ ⵏⵙⴻⵏ, ⴰⵍⴰⵎⵉ ⵓⵥⵥⵍⴻⵏ ⵉⴷⴰⵎⵎⴻⵏ ⵏⵙⴻⵏ ⵅⴰⵙⴻⵏ. 29 ⵓⵎⵉ ⵉⵄⴷⵓ ⴰⵥⴰⵍ, ⵉⵎⵙⴰⵔ, ⴰⵇⴰ ⵏⵉⵜⵏⵉ ⵜⵜⵏⴻⴱⴱⴰⵏ ⵖⴰⵔⴻⵙ ⴰⵍ ⴷⴷ ⵖⴰ ⵢⴰⵡⵢⴻⵏ ⵜⴰⵡⵀⵉⴱⵜ ⵏ ⵍⵖⵉⴵⴻⵜ. ⵎⴰⵛⴰ ⵡⴰⵔ ⴷⵉⵏ ⵓⵍⴰ ⴷ ⵉⵛⵜ ⵏ ⵜⵎⵉⵊⵊⴰ ⵓⵛⴰ ⵓⵍⴰ ⴷ ⵉⵊⵊ ⵡⴰⵔ ⴷⴷ-ⵢⴰⵔⵔⵉ ⵓ ⵡⴰⵔ ⴷⵉⵏ ⴱⵓ ⵍⵉⵙⵜⵉⵊⴰⴱⴰ ⵡⴰⵍⵓ.

30 ⵅⴻⵏⵏⵉ ⵉⵏⵏⴰ ⵉⵍⵉⵢⴰ ⵉ ⵍⴳⴻⵏⵙ: “ⵇⴰⵔⵔⴱⴻⵎ-ⴷⴷ ⵖⴰⵔⵉ!” ⵎⴰⵔⵔⴰ ⵍⴳⴻⵏⵙ ⵉⵇⴰⵔⵔⴻⴱ-ⴷⴷ ⵖⴰⵔⴻⵙ ⵓ ⵏⴻⵜⵜⴰ ⵉⵄⴷⴻⵍ ⴰⵄⴰⵍⵟⴰⵔ ⵏ ⵙⵉⴷⵉ ⵉ ⵜⵓⵖⴰ ⵉⵜⵜⵡⴰⵀⴷⴻⵎ. 31 ⵉⵍⵉⵢⴰ ⵉⴽⵙⵉ ⵜⴻⵏⵄⴰⵛ ⵏ ⵢⴻⵥⵔⴰ, ⵅ ⵍⵇⴻⴷⴷ ⵏ ⵜⵇⴻⴱⴱⴰⵍ ⵏ ⵉⵃⴻⵏⵊⵉⵔⴻⵏ ⵏ ⵢⴰⵄⵇⵓⴱ, ⵡⴻⵏⵏⵉ ⵓⵎⵉ ⵉ ⴷⴷ-ⵢⵓⵙⴰ ⵡⴰⵡⴰⵍ ⵏ ⵙⵉⴷⵉ ⵉ ⵜⵓⵖⴰ ⵉⵏⵏⴰ: “ⵉⵙⵔⴰⵢⵉⵍ ⴰⴷ ⵢⵉⵍⵉ ⴷ ⵉⵙⴻⵎ ⵏⵏⴻⴽ.” ^■   32 ⵙ ⵢⴻⵥⵔⴰ ⵏⵏⵉ ⵉⴱⵏⴰ ⵏⴻⵜⵜⴰ ⴰⵄⴰⵍⵟⴰⵔ ⴷⴻⴳ ⵢⵉⵙⴻⵎ ⵏ ⵙⵉⴷⵉ. ⵉⵇⴻⵡⵡⴰⵔ ⵉ ⵓⵄⴰⵍⵟⴰⵔ ⵉⵛⵜ ⵏ ⵜⴰⵔⵢⴰ ⵙ ⵍⵇⴻⴷⴷ ⵏ ⵜⵏⴰⵢⴻⵏ ⵏ ⵍⴻⵇⵢⴰⵙ ⵏ ⵥⵥⴰⵔⵉⵄⴻⵜ. ^□   33 ⵉⵙⴻⵜⵜⴻⴼ ⴰⴽⴻⵛⵛⵓⴹ ⵓⵛⴰ ⵉⴱⴹⴰ ⴰⵢⴻⵏⴷⵓⵥ ⴷⵉ ⵉⵛⴻⴵⵉⵇⴻⵏ, ⵉⵙⵙⴰⵔⵙ ⵉ-ⵜ ⵅ ⵓⴽⴻⵛⵛⵓⴹ. 34 ⵉⵏⵏⴰ: “ⵄⴻⵎⵎⴰⵔⴻⵎ ⴰⵔⴻⴱⵄⴰ ⵏ ⵉⴱⵓⵇⴰⵍⴻⵏ ⵙ ⵡⴰⵎⴰⵏ ⵓⵛⴰ ⵥⴻⴵⵄⴻⵎ ⵜⴻⵏ ⵜⵉⵡⴰ ⵉ ⵜⵖⴰⵔⵚⵜ ⵏ ⵡⴻⵛⵎⴰⴹ ⵓ ⵅ ⵓⴽⴻⵛⵛⵓⴹ!” ⵓⵛⴰ ⵢⴰⵔⵏⵉ ⵉⵏⵏⴰ: “ⴳⴳⴻⵎ ⵜ ⵜⵡⴰⵍⴰ ⵏⵏⴻⵖⵏⵉⵜ!” ⵓ ⵏⵉⵜⵏⵉ ⴳⴳⵉⵏ ⵜ ⵜⵡⴰⵍⴰ ⵏⵏⴻⵖⵏⵉⵜ. ⵅⴻⵏⵏⵉ ⵉⵏⵏⴰ: “ⴳⴳⴻⵎ ⵜ ⵡⵉⵙⵙ ⵜⵍⴰⵜⴰ ⵏ ⵜⵡⴰⵍⴰⵡⵉⵏ!” ⵓ ⵏⵉⵜⵏⵉ ⴳⴳⵉⵏ ⵜ ⵡⵉⵙⵙ ⵜⵍⴰⵜⴰ ⵏ ⵜⵡⴰⵍⴰⵡⵉⵏ. 35 ⵜⵜⴰⵥⵥⵍⴻⵏ ⵡⴰⵎⴰⵏ ⵏⵏⴹⴻⵏ ⵉ ⵓⵄⴰⵍⵟⴰⵔ. ⵓ ⵏⴻⵜⵜⴰ ⵉⵄⴻⵎⵎⴰⵔ ⵓⵍⴰ ⴷ ⵜⴰⵔⵢⴰ ⵙ ⵡⴰⵎⴰⵏ.

36 ⵓⵎⵉ ⵇⴻⴷⴷⵎⴻⵏ ⵜⴰⵡⵀⵉⴱⵜ ⵏ ⵍⵖⵉⴵⴻⵜ, ⵉⵎⵙⴰⵔ, ⴰⵇⴰ ⴰⵏⴰⴱⵉ ⵉⵍⵉⵢⴰ ⵉⵇⴰⵔⵔⴻⴱ-ⴷⴷ, ⵉⵏⵏⴰ: “ⵙⵉⴷⵉ, ⴰⵔⴻⴱⴱⵉ ⵏ ⵉⴱⵔⴰⵀⵉⵎ ⴷ ⵉⵙⵃⴰⵇ ⴷ ⵉⵙⵔⴰⵉⵍ, ⴻⵊⵊ ⴰⴷ ⵉⵜⵜⵡⴰⵙⵙⴻⵏ ⴰⵙⵙ-ⴰ ⴰⵇⴰ ⵛⴻⴽ ⴷ ⴰⵔⴻⴱⴱⵉ ⴷⵉ ⵉⵙⵔⴰⵉⵍ ⵓ ⴰⵇⴰ ⵏⴻⵛⵛ ⴷ ⴰⵎⵙⴻⵅⵅⴰⵔ ⵏⵏⴻⴽ ⵉ ⴵⵉⵖ ⵓ ⴱⴻⵍⵍⵉ ⵏⴻⵛⵛ ⴳⴳⵉⵖ ⵎⴰⵔⵔⴰ ⵎⴰⵏ ⴰⵢⴰ ⵄⵍⴰⵃⵙⴰⴱ ⴰⵡⴰⵍ ⵏⵏⴻⴽ. ^■   37 ⴰⵔⵔ ⴰⵢⵉ-ⴷⴷ, ⴰ ⵙⵉⴷⵉ, ⴰⵔⵔ ⴰⵢⵉ-ⴷⴷ ⵃⵉⵎⴰ ⵍⴳⴻⵏⵙ-ⴰ ⴰⴷ ⵉⵙⵙⴻⵏ, ⴰⵇⴰ ⵛⴻⴽ, ⴰ ⵙⵉⴷⵉ, ⴷ ⴰⵔⴻⴱⴱⵉ ⵉ ⵜⴻⴵⵉⴷ ⵓ ⴰⵇⴰ ⵛⴻⴽ ⵜⴰⵔⵔⵉⴷ-ⴷⴷ ⵓⵍ ⵏⵙⴻⵏ ⵖⴰⵔⴻⴽ.” 38 ⵓⵛⴰ ⵜⴻⵀⵡⴰ-ⴷⴷ ⵜⵎⴻⵙⵙⵉ ⵏ ⵙⵉⴷⵉ, ⵜⴻⵛⵛⴰ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⴷ ⵓⴽⴻⵛⵛⵓⴹ ⴷ ⵢⴻⵥⵔⴰ ⴷ ⵜⵄⴻⵊⵊⴰⵊⵜ, ⵓⵛⴰ ⵜⴻⵍⵙⴻⵃ ⵓⵍⴰ ⴷ ⴰⵎⴰⵏ ⵉ ⵉⴵⴰⵏ ⴷⵉ ⵜⴰⵔⵢⴰ. 39 ⵎⴰⵔⵔⴰ ⵍⴳⴻⵏⵙ ⵉⵥⵔⴰ ⵉ-ⵜ. ⵏⵉⵜⵏⵉ ⵡⴹⴰⵏ ⵙ ⵓⵖⴻⵎⴱⵓⴱ ⵏⵙⴻⵏ ⵖⴰⵔ ⵜⴻⵎⵎⵓⵔⵜ, ⵏⵏⴰⵏ: “ⵙⵉⴷⵉ ⴰⵇⴰ-ⵜ ⴷ ⴰⵔⴻⴱⴱⵉ, ⵙⵉⴷⵉ ⴰⵇⴰ-ⵜ ⴷ ⴰⵔⴻⴱⴱⵉ!” 40 ⵉⵍⵉⵢⴰ ⵉⵏⵏⴰ ⴰⵙⴻⵏ: “ⵟⵟⴼⴻⵎ ⵉⵏⴰⴱⵉⵢⵢⴻⵏ ⵏ ⴱⴰⵄⵍ, ⵡⴰⵔ ⵜⴻⵊⵊⴰⵎ ⵓⵍⴰ ⴷ ⵉⵊⵊ ⵥⵥⴰⵢⵙⴻⵏ ⴰⴷ ⵢⴰⵔⵡⴻⵍ.” ⵟⵟⴼⴻⵏ ⵜⴻⵏ ⵓⵛⴰ ⵉⵍⵉⵢⴰ ⵉⵊⵊⴰ ⵉ-ⵜⴻⵏ ⴰⴷ ⵙⵙⴻⵀⵡⴰⵏ ⵖⴰⵔ ⵜⴻⵖⵥⴰⵔⵜ ⵏ ⵇⵉⵛⵓⵏ ⵓⵛⴰ ⵉⵏⵖⴰ ⵉ-ⵜⴻⵏ ⴷⵉⵏⵏⵉ.

41 ⵅⴻⵏⵏⵉ ⵉⵏⵏⴰ ⵉⵍⵉⵢⴰ ⵉ ⴰⵅⴰⴱ: “ⴳⴰⵄⵄⴻⴷ, ⴻⵛⵛ ⵜⴻⵙⵡⴻⴷ, ⵎⴰⵖⴰⵔ ⵏⴻⵛⵛ ⴰⵇⴰ ⵜⵜⴻⵙⵍⵉⵖ ⵍⵃⴻⵙⵙ ⵏ ⵉⵊⵊ ⵏ ⵓⵛⴰⵔⵛⴰⵔ ⵏ ⵡⴻⵏⵥⴰⵔ ⴰⵟⵟⴰⵙ.” 42 ⴰⵅⴰⴱ ⵉⴳⴻⵄⵄⴻⴷ ⵃⵉⵎⴰ ⴰⴷ ⵉⵛⵛ ⴰⴷ ⵉⵙⵓ ⵓⵛⴰ ⵉⴳⴻⵄⵄⴻⴷ ⵉⵍⵉⵢⴰ ⵖⴰⵔ ⵜⵇⵉⵛⵛⴰⵜ ⵏ ⴽⴰⵔⵎⵉⵍ. ⵉⵇⵇⵓⵏⵊⴻⵍ ⵅ ⵜⴻⵎⵎⵓⵔⵜ ⵓⵛⴰ ⵉⴳⴳⴰ ⵓⴷⴻⵎ ⵏⵏⴻⵙ ⵊⴰⵔ ⵉⴼⴰⴷⴷⴻⵏ ⵏⵏⴻⵙ. 43 ⵅⴻⵏⵏⵉ ⵉⵏⵏⴰ ⵉ ⵓⵃⵓⴷⵔⵉ ⵏⵏⴻⵙ: “ⴳⴰⵄⵄⴻⴷ ⵓⵛⴰ ⵅⵥⴰⵔ ⵖⴰⵔ ⵍⴻⴱⵃⴰⵔ!” ⵡⴰⵏⵉⵜⴰ ⵉⴳⴻⵄⵄⴻⴷ, ⵉⵅⵥⴰⵔ ⵖⴰⵔ ⵍⴰⴳⴳⵯⴰⵊ, ⵉⵏⵏⴰ: “ⵡⴰⵔ ⵜⵜⵡⵉⵍⵉⵖ ⵡⴰⵍⵓ!” ⵉⵍⵉⵢⴰ ⵉⵏⵏⴰ: “ⴷⵡⴻⵍ-ⴷⴷ ⵜⵡⴰⵍⴰ ⵏⵏⴻⵖⵏⵉⵜ!” ⵓⵛⴰ ⴰⵎⵎⵓ ⵙⴻⴱⵄⴰ ⵏ ⵜⵡⴰⵍⴰⵡⵉⵏ! 44 ⵖⴰⵔ ⵜⵡⴰⵍⴰ ⵡⵉⵙⵙ ⵙⴻⴱⵄⴰ, ⵉⵎⵙⴰⵔ, ⴰⵇⴰ ⵉⵏⵏⴰ: “ⵅⵥⴰⵔ, ⵉⵛⵜ ⵏ ⵜⵙⴻⵢⵏⵓⵜ ⵜⴰⵎⴻⵥⵢⴰⵏⵜ, ⴰⵎ ⵓⴼⵓⵙ ⵏ ⵉⵊⵊ ⵏ ⵡⴻⵔⵢⴰⵥ, ⵉⴳⴻⵄⵄⴻⴷ-ⴷⴷ ⵥⵉ ⵍⴻⴱⵃⴰⵔ.” ⵅⴻⵏⵏⵉ ⵉⵏⵏⴰ: “ⵓⵢⵓⵔ, ⵉⵏⵉ ⵉ ⴰⵅⴰⴱ: ‘ⵃⴻⵥⵥⴻⵎ ⵉⵢⵙⴰⵏ, ⵀⵡⴰ-ⴷⴷ ⵎⴰⵃⴻⵏⴷ ⴰⵏⵥⴰⵔ ⵡⴰⵔ ⵛⴻⴽ ⵉⵜⵜᵉⵟⵟⴻⴼ.” 45 ⵊⴰⵔ ⵓ ⵊⴰⵔ ⵉⴱⴱⴰⵔⵛⴻⵏ ⵓⵊⴻⵏⵏⴰ ⵙ ⵉⵙⴻⵢⵏⵓⵜⴻⵏ ⵓ ⵙ ⵓⵚⴻⵎⵎⵉⴷ ⵓⵛⴰ ⵉⴱⴷⴰ ⵡⴻⵏⵥⴰⵔ ⴰⴷ ⵉⵡⵡⴻⵜ ⴰⵟⵟⴰⵙ. ⵅⴻⵏⵏⵉ ⵉⵏⵢⴰ ⴰⵅⴰⴱ ⴷⴻⴳ ⵓⴽⴰⵔⵔⵓ, ⵉⴼⴼⴻⵖ, ⵢⵓⵢⵓⵔ ⵖⴰⵔ ⵢⴰⵥⵔⴰⵄⵉⵍ. 46 ⵜⵓⵖⴰ ⴰⴼⵓⵙ ⵏ ⵙⵉⴷⵉ ⵅ ⵉⵍⵉⵢⴰ. ⵏⴻⵜⵜⴰ ⵉⴱⵢⴻⵙ ⵜⴰⵄⵊⵉⵏⵏⴰ ⵏⵏⴻⵙ ⵓⵛⴰ ⵢⵓⵢⵓⵔ ⵥⵥⴰⵜ ⵉ ⵡⵓⴷⴻⵎ ⵏ ⴰⵅⴰⴱ ⵖⴰⵔⴻⵙ ⴰⵍⴰⵎⵉ ⴷⴷ-ⵜⵉⵡⴹⴻⴷ ⵖⴰⵔ ⵢⴰⵥⵔⴰⵄⵉⵍ.