1 ⵅⵥⴰⵔ, ⵙ ⵡⴰⵡⴰⵍ ⵏ ⵙⵉⴷⵉ ⵢⵓⵙⴰ-ⴷⴷ ⵉⵊⵊ ⵏ ⵡⴻⵔⵢⴰⵥ ⵏ ⴰⵔⴻⴱⴱⵉ ⵥⵉ ⵢⴰⵀⵓⴷⴰ ⵖⴰⵔ ⴱⴰⵢⵜ-ⵉⵍ. ⵢⴰⵔⵓⴱⵄⴰⵎ ⵜⵓⵖⴰ ⵉⴱⴻⴷⴷ ⵥⵥⴰⵜ ⵉ ⵓⵄⴰⵍⵟⴰⵔ ⵃⵉⵎⴰ ⴰⴷ ⵉⵡⴻⵀⵀⴻⴱ ⵍⴻⴱⵅⵓⵔ. 2 ⵏⴻⵜⵜⴰ ⵉⵍⴰⵖⴰ ⵅ ⵓⵄⴰⵍⵟⴰⵔ, ⵙ ⵡⴰⵡⴰⵍ ⵏ ⴰⵔⴻⴱⴱⵉ, ⵉⵏⵏⴰ: “ⴰ ⴰⵄⴰⵍⵟⴰⵔ, ⴰⵄⴰⵍⵟⴰⵔ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⴷ ⴷⴷ-ⵉⵜⵜⵡⴰⵅⵍⴻⵇ ⵉⵊⵊ ⵏ ⵎⵎⵉⵙ ⴷⵉ ⵜⴰⴷⴷⴰⵔⵜ ⵏ ⴷⴰⵡⵓⴷ, ⴰⴷ ⴰⵙ ⵇⵇⴰⵔⴻⵏ ⵢⵓⵛⵉⵢⴰ. ⴰⴷ ⵅⴰⴽ ⵉⴳⴳ ⴷ ⵜⴰⵖⴰⵔⵚⵜ ⵉⴽⴻⵀⵀⴰⵏⴻⵏ ⵏ ⵍⴻⴳⵄⵓⴷⵉ ⵉⵏⵏⵉ ⵅⴰⴽ ⵉⵡⴻⵀⵀⴱⴻⵏ ⵍⴻⴱⵅⵓⵔ, ⵓ ⴰⴷ ⵅⴰⴽ ⵛⴻⵎⴹⴻⵏ ⵉⵅⵙⴰⵏ ⵏ ⵉⵡⴷⴰⵏ.” ^■   3 ⴷⴻⴳ ⵡⴰⵙⵙ ⵏⵏⵉ ⵉⵡⵛⴰ ⵉⵛⵜ ⵏ ⵍⴻⵄⵍⴰⵎⴻⵜ, ⵉⵏⵏⴰ: “ⵜⴰ ⴷ ⵍⴻⵄⵍⴰⵎⴻⵜ ⵉ ⵅ ⵉⵙⵙⵉⵡⴻⵍ ⵙⵉⴷⵉ. ⵅⵥⴰⵔ, ⴰⵄⴰⵍⵟⴰⵔ ⴰⴷ ⵉⵛⴰⵔⵔⴻⴳ ⵓ ⵉⵖⵖⴻⴹ ⵉ ⵅⴰⵙ ⵉⴵⴰⵏ ⴰⴷ ⵥⵥⴰⵢⴻⵙ ⴷⴷ-ⵉⵃⵔⵓⴵⴻⴹ.”

4 ⵓⵎⵉ ⵉⵙⵍⴰ ⵓⵊⴻⴵⵉⴷ ⴰⵡⴰⵍ ⵏ ⵡⴻⵔⵢⴰⵥ ⵏ ⴰⵔⴻⴱⴱⵉ ⵡⴻⵏⵏⵉ ⵉⵍⴰⵖⴰⵏ ⵅ ⵓⵄⴰⵍⵟⴰⵔ ⴷⵉ ⴱⴰⵢⵜ-ⵉⵍ, ⵉⵎⵙⴰⵔ, ⴰⵇⴰ ⵉⵙⵙⵡⵉⵥⵥⴻⴹ ⵢⴰⵔⵓⴱⵄⴰⵎ ⴰⴼⵓⵙ ⵏⵏⴻⵙ ⵅ ⵓⵄⴰⵍⵟⴰⵔ, ⵉⵏⵏⴰ: “ⵟⵟⴻⴼ ⵉ-ⵜ!” ⵎⴰⵛⴰ ⴰⴼⵓⵙ ⵏⵏⴻⵙ ⵏⵏⵉ ⵜⵓⵖⴰ ⵖⴰⵔⴻⵙ ⵉⵙⵙⵡⵉⵥⵥⴹⴻⵏ, ⵢⵓⵥⴻⵖ, ⴰⵍⴰⵎⵉ ⵡⴰⵔ ⵉⵥⴻⵎⵎⴰⵔ ⵄⴰⴷ ⴰⴷ ⵜ-ⵉ-ⴷⴷ-ⵢⴰⵔⵔ ⵖⴰⵔⴻⵙ. 5 ⵉⵛⴰⵔⵔⴻⴳ ⵓⵄⴰⵍⵟⴰⵔ ⵓⵛⴰ ⵉⵃⵍⵓⴵⴻⴷ ⵥⵥⴰⵢⴻⵙ ⵢⵉⵖⵖⴻⴷ ⵄⵍⴰⵃⵙⴰⴱ ⵍⴻⵄⵍⴰⵎⴻⵜ ⵉ ⵉⵡⵛⴰ ⵡⴻⵔⵢⴰⵥ ⵏ ⴰⵔⴻⴱⴱⵉ ⵙ ⵡⴰⵡⴰⵍ ⵏ ⵙⵉⴷⵉ. 6 ⵅⴻⵏⵏⵉ ⵢⴰⵔⵔⴰ-ⴷⴷ ⵓⵊⴻⴵⵉⴷ, ⵉⵏⵏⴰ ⵉ ⵡⴻⵔⵢⴰⵥ ⵏ ⴰⵔⴻⴱⴱⵉ: “ⵣⴰⵡⴳ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵓⵛⴰ ⵥⴰⴵ ⵅⴰⴼⵉ ⵃⵉⵎⴰ ⴰⴼⵓⵙ ⵉⵏⵓ ⴰⴷ ⵖⴰⵔⵉ ⴷⴷ-ⵉⴷⵡⴻⵍ!” ⵓⵛⴰ ⵉⵥⴰⵡⴳ ⵡⴻⵔⵢⴰⵥ ⵏ ⴰⵔⴻⴱⴱⵉ ⵉ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⴰⴼⵓⵙ ⵏ ⵓⵊⴻⴵⵉⴷ ⵉⴷⵡⴻⵍ-ⴷⴷ ⵖⴰⵔⴻⵙ ⵓⵛⴰ ⵉⴷⵡⴻⵍ ⴰⵎ ⵎⴰⵎⵎⴻⵛ ⵜ ⵜⵓⵖⴰ ⵇⴱⴻⵍ. ^■   7 ⵅⴰⵙ ⵓⵛⴰ ⵉⵙⵙⵉⵡⴻⵍ ⵓⵊⴻⴵⵉⴷ ⴰⴽ-ⴷ ⵡⴻⵔⵢⴰⵥ ⵏ ⴰⵔⴻⴱⴱⵉ: “ⴰⵙ-ⴷⴷ ⵖⴰⵔ ⵜⴰⴷⴷⴰⵔⵜ ⵉⵏⵓ ⵓⵛⴰ ⴰⵔⴻⵢⵢⴻⵃ! ⵓⵍⴰ ⴷ ⵏⴻⵛⵛ ⴰⴷ ⴰⵛ ⵡⵛⴻⵖ ⵉⵛⵜ ⵏ ⵜⴻⵔⵥⴻⴼⵜ.” 8 ⵎⴰⵛⴰ ⵢⴰⵔⵔⴰ-ⴷⴷ ⵡⴻⵔⵢⴰⵥ ⵏ ⴰⵔⴻⴱⴱⵉ ⵅ ⵓⵊⴻⴵⵉⴷ: “ⵡⴰⵅⵅⴰ ⵛⴻⴽ ⵜⴻⵡⵛⵉⴷ ⴰⵢⵉ ⴰⵥⵢⴻⵏ ⵏ ⵜⴰⴷⴷⴰⵔⵜ ⵏⵏⴻⴽ, ⵏⴻⵛⵛ ⵡⴰⵔ ⴰⴽⵉⴷⴻⴽ ⴳⴳⵓⵔⴻⵖ ⵓ ⵡⴰⵔ ⵜⵜⵉⵛⴻⵖ ⴰⵖⵔⵓⵎ ⴷⴻⴳ ⵡⴻⵎⵛⴰⵏ-ⴰ ⵓⵍⴰ ⵡⴰⵔ ⴷⴰ ⵙⴻⵙⵙⴻⵖ. ^■   9 ⵎⴰⵖⴰⵔ ⴰⵎⵎⵓ ⵉ ⴷ ⴰⵢⵉ ⵉⵡⴻⵚⵚⴰ ⵙ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: ‘ⵛⴻⴽ ⵡⴰⵔ ⴷⵉⵏⵏⵉ ⵜⵜᵉⵜⵜⴻⴷ ⵓ ⵡⴰⵔ ⴷⵉⵏⵏⵉ ⵜⵙⴻⵙⵙⴻⴷ ⵓ ⵡⴰⵔ ⵜⵄⵉⵇⵇⵉⴱⴻⴷ ⵅ ⵡⴻⴱⵔⵉⴷ ⵉ ⵅ ⴷⴷ-ⵜⵓⵙⵉⴷ.’ ”

10 ⵓⵛⴰ ⵏⴻⵜⵜⴰ ⵉⵔⵓⵃ ⵅ ⵉⵊⵊ ⵏ ⵡⴻⴱⵔⵉⴷ ⵏⵏⴻⵖⵏⵉ ⵓ ⵡⴰⵔ ⴷⴷ-ⵉⵄⵇⵉⴱ ⵛⴰ ⵅ ⵡⴻⴱⵔⵉⴷ ⵉ ⵅ ⴷⴷ-ⵢⵓⵙⴰ ⵖⴰⵔ ⴱⴰⵢⵜ-ⵉⵍ.

11 ⴷⵉ ⴱⴰⵢⵜ-ⵉⵍ ⵜⵓⵖⴰ ⵉⵥⴻⴷⴷⴻⵖ ⵄⴰⴷ ⵉⵊⵊ ⵏ ⵓⵏⴰⴱⵉ ⵉⵡⵙⴰⵔ. ⵎⵎⵉⵙ ⵏⵏⴻⵙ ⵢⵓⵙⴰ-ⴷⴷ, ⵉⵃⴰⵊⴰ ⴰⵙ ⵎⵉⵏ ⵜⵓⵖⴰ ⵉⴳⴳⴰ ⵡⴻⵔⵢⴰⵥ ⵏ ⴰⵔⴻⴱⴱⵉ ⴷⴻⴳ ⵡⴰⵙⵙ ⵏⵏⵉ ⴷⵉ ⴱⴰⵢⵜ-ⵉⵍ, ⵓⵍⴰ ⴷ ⴰⵡⴰⵍⴻⵏ ⵉ ⵉⵏⵏⴰ ⵉ ⵓⵊⴻⴵⵉⴷ. ⵏⵉⵜⵏⵉ ⵃⴰⵊⴰⵏ ⴰⵙ ⵜⴻⵏ ⵉ ⴱⴰⴱⴰⵜⵙⴻⵏ.

12 ⵉⵏⵏⴰ ⴰⵙⴻⵏ ⴱⴰⴱⴰⵜⵙⴻⵏ: “ⵅ ⵎⴰⵏ ⴰⴱⵔⵉⴷ ⵉ ⵢⵓⵢⵓⵔ ⵏⴻⵜⵜⴰ?” ⵉⵃⴻⵏⵊⵉⵔⴻⵏ ⵜⵓⵖⴰ ⵥⵔⵉⵏ ⵎⴰⵏ ⴰⴱⵔⵉⴷ ⵜⵓⵖⴰ ⵉⵟⵟⴻⴼ ⵡⴻⵔⵢⴰⵥ ⵏ ⵙⵉⴷⵉ ⵡⴻⵏⵏⵉ ⵜⵓⵖⴰ ⵉ ⴷⴷ-ⵢⵓⵙⵉⵏ ⵥⵉ ⵢⴰⵀⵓⴷⴰ.

13 ⵏⴻⵜⵜⴰ ⵉⵏⵏⴰ ⵉ ⵉⵃⴻⵏⵊⵉⵔⴻⵏ ⵏⵏⴻⵙ: “ⴱⴰⵔⴷⵄⴻⵎ ⴰⵢⵉ ⵉ ⵡⴻⵖⵢⵓⵍ!” ⵏⵉⵜⵏⵉ ⴱⴰⵔⴷⵄⴻⵏ ⴰⵙ ⵉ ⵡⴻⵖⵢⵓⵍ ⵓⵛⴰ ⵏⴻⵜⵜⴰ ⵉⵏⵢⴰ ⵅⴰⵙ ⵉⵔⵓⵃ.

14 ⵏⴻⵜⵜⴰ ⵢⴰⵔⴻⴷⴷⴻⴼ ⴰⵔⵢⴰⵥ ⵏ ⴰⵔⴻⴱⴱⵉ ⵓⵛⴰ ⵢⵓⴼⴰ ⵉ-ⵜ ⴰⵎ ⵉⵇⵇⵉⵎ ⵙⴰⴷⵓ ⵉⵛⵜ ⵏ ⵜⵛⴻⵊⵊⴰⵔⵜ ⵏ ⵢⵉⴳⴳ. ⵏⴻⵜⵜⴰ ⵉⵏⵏⴰ ⴰⵙ: “ⵎⴰ ⵛⴻⴽ ⴷ ⴰⵔⵢⴰⵥ ⵏ ⴰⵔⴻⴱⴱⵉ ⵡⴻⵏⵏⵉ ⴷⴷ-ⵉⴼⴼⵖⴻⵏ ⵥⵉ ⵢⴰⵀⵓⴷⴰ?” ⵏⴻⵜⵜⴰ ⵉⵏⵏⴰ: “ⴷ ⵏⴻⵛⵛ!”

15 ⵅⴻⵏⵏⵉ ⵉⵏⵏⴰ ⴰⵙ: “ⴰⵙ-ⴷⴷ ⴰⴽⵉⴷⵉ ⵖⴰⵔ ⵜⴰⴷⴷⴰⵔⵜ ⵉⵏⵓ ⵓ ⴻⵛⵛ ⴰⵖⵔⵓⵎ.”

16 ⵎⴰⵛⴰ ⵏⴻⵜⵜⴰ ⵉⵏⵏⴰ: “ⵏⴻⵛⵛ ⵡⴰⵔ ⵥⴻⵎⵎⴰⵔⴻⵖ ⴰⴽⵉⴷⴻⴽ ⵄⴻⵇⴱⴻⵖ ⵓ ⵏⴻⵛⵛ ⵡⴰⵔ ⴰⴽⵉⴷⴻⴽ-ⴷⴷ ⵜⵜⴰⵙⴻⵖ. ⵓⵍⴰ ⴷ ⵏⴻⵛⵛ ⵡⴰⵔ ⵜⵜᵉⵜⵜⴻⵖ, ⵡⴰⵔ ⵙⴻⵙⵙⴻⵖ ⴷⴻⴳ ⵡⴻⵎⵛⴰⵏ-ⴰ.

17 ⵎⴰⵖⴰⵔ ⵉⴼⴼⴻⵖ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔⵉ: “ⵛⴻⴽ ⵡⴰⵔ ⵜⵥⴻⵎⵎⴰⵔⴻⴷ ⴰⴷ ⴷⵉⵏⵏⵉ ⵜⴻⵛⵛⴻⴷ ⴰⵖⵔⵓⵎ ⵓ ⵡⴰⵔ ⵜⵙⴻⵙⵙⴻⴷ ⴰⵎⴰⵏ. ⵛⴻⴽ ⵡⴰⵔ ⵜⵥⴻⵎⵎⴰⵔⴻⴷ ⴰⴷ ⴷⴷ-ⵜⵄⴻⵇⴱⴻⴷ ⵅ ⵡⴻⴱⵔⵉⴷ ⵉ ⵅ ⴷⴷ-ⵜⵓⵙⵉⴷ.”

18 ⵏⴻⵜⵜⴰ ⵉⵏⵏⴰ ⴰⵙ: “ⵓⵍⴰ ⴷ ⵏⴻⵛⵛ ⴷ ⵉⵊⵊ ⵏ ⵓⵏⴰⴱⵉ ⴰⵎ ⵛⴻⴽ, ⵓ ⵉⵊⵊ ⵏ ⵓⵎⴰⵍⴰⴽ ⵉⵙⵙⵉⵡⴻⵍ ⴰⴽⵉⴷⵉ ⵙ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: ‘ⴰⵡⵢⵉ ⵜ ⵖⴰⵔⴻⴽ ⴷⵉ ⵜⴰⴷⴷⴰⵔⵜ ⵏⵏⴻⴽ, ⵃⵉⵎⴰ ⴰⴷ ⵢⴻⵛⵛ ⴰⵖⵔⵓⵎ, ⴰⴷ ⵉⵙⴻⵙⵙ ⴰⵎⴰⵏ.’ ” ⴰⵎⵎⵓ ⵉ ⵉⵙⵙⵅⴰⵔⵔⴻⵇ ⵅⴰⵙ.^■  

19 ⵓⵛⴰ ⵏⴻⵜⵜⴰ ⵉⵄⵇⴻⴱ ⴰⴽⵉⴷⴻⵙ ⵓ ⵉⵛⵛⴰ ⴰⵖⵔⵓⵎ ⴷⵉ ⵜⴰⴷⴷⴰⵔⵜ ⵏⵏⴻⵙ, ⵉⵙⵡⴰ ⴰⵎⴰⵏ.

20 ⵓⵎⵉ ⵇⵇⵉⵎⴻⵏ ⵏⵉⵜⵏⵉ ⵖⴰⵔ ⵟⵟⴰⴱⵍⴰ, ⴰⵇⴰ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵓⵏⴰⴱⵉ ⵡⴻⵏⵏⵉ ⵜⵓⵖⴰ ⵜ-ⵉ-ⴷⴷ-ⵢⴰⵔⵔⵉⵏ, 21 ⵓ ⵏⴻⵜⵜⴰ ⵉⵍⴰⵖⴰ ⵉ ⵡⴻⵔⵢⴰⵥ ⵏ ⴰⵔⴻⴱⴱⵉ ⵉ ⴷⴷ-ⵢⵓⵙⵉⵏ ⵥⵉ ⵢⴰⵀⵓⴷⴰ, ⵉⵏⵏⴰ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵎⴰⵖⴰⵔ ⵛⴻⴽ ⵜⵖⴻⵡⵡⵖⴻⴷ ⵅ ⵡⴰⵡⴰⵍ ⵏ ⵙⵉⴷⵉ ⵓ ⵡⴰⵔ ⵜⴻⵃⴹⵉⴷ ⵍⵓⵎⵓⵔ ⵉ ⴷ ⴰⵛ ⵢⵓⵎⵓⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, 22 ⵎⴰⵛⴰ ⵜⵄⴻⵇⴱⴻⴷ ⵓ ⵜⴻⵛⵛⵉⴷ ⴰⵖⵔⵓⵎ ⵓ ⵜⴻⵙⵡⵉⴷ ⴰⵎⴰⵏ ⴷⴻⴳ ⵡⴻⵎⵛⴰⵏ ⵉ ⵅ ⵉ ⴷ ⴰⵛ ⵉⵏⵏⴰ: ‘ⵡⴰⵔ ⵜⵥⴻⵎⵎⴰⵔⴻⴷ ⴰⴷ ⴷⵉⵏ ⵜⴻⵛⵛⴻⴷ ⴰⵖⵔⵓⵎ ⵓ ⵡⴰⵔ ⴷⵉⵏ ⵜⵙⵙⴻⵙⴻⴷ ⴰⵎⴰⵏ, ⵅ ⵓⵢⴰ ⵍⵅⴻⵛⴱⴻⵜ ⵏⵏⴻⴽ ⵡⴰⵔ ⴷⴷ-ⵜⵓⵙⴰ ⴷⴻⴳ ⵡⴻⵏⴹⴻⵍ ⵏ ⵉⴱⴰⴱⴰⵜⴻⵏ ⵏⵏⴻⴽ.’ ”

23 ⴰⵡⴰⵔⵏⵉ ⵓⵎⵉ ⵜⵓⵖⴰ ⵉⵛⵛⴰ ⴷ ⵉⵙⵡⴰ, ⵉⴱⴰⵔⴷⴻⵄ ⴰⵙ ⵉ ⵡⴻⵖⵢⵓⵍ ⵉ ⵓⵏⴰⴱⵉ ⵉ ⴷ ⵉⴳⴳⴰ ⴰⴷ ⴷⴷ-ⵉⴷⵡⴻⵍ. 24 ⴰⵎⵎⵓ ⴷⴷ-ⵉⴼⴼⴻⵖ ⵓⵛⴰ ⵉⵎⵙⴰⴳⴰⵔ ⴰⴽⵉⴷⴻⵙ ⵉⵊⵊ ⵏ ⵡⴻⵢⵔⴰⴷ, ⵉⵏⵖⴰ ⵉ-ⵜ. ⵍⵅⴻⵛⴱⴻⵜ ⵏⵏⴻⵙ ⵜⵓⵖⴰ ⵜⴻⵎⵎⴻⵏⴹⴰⵔ ⴷⵉⵏ ⵅ ⵡⴻⴱⵔⵉⴷ ⵓ ⴰⵖⵢⵓⵍ ⵉⴱⴻⴷⴷ ⵥⵥⴰⵜⴻⵙ ⵓⵛⴰ ⵓⵍⴰ ⴷ ⴰⵢⵔⴰⴷ ⵉⴱⴻⴷⴷ ⵥⵥⴰⵜ ⵉ ⵍⵅⴻⵛⴱⴻⵜ. ^■   25 ⵓ ⵅⵥⴰⵔ, ⵄⴷⵓⵏ ⵛⴰ ⵏ ⵢⴻⵔⵢⴰⵥⴻⵏ, ⵥⵔⵉⵏ ⵍⵅⴻⵛⴱⴻⵜ ⵜⴻⵎⵎⴻⵏⴹⴰⵔ ⵅ ⵡⴻⴱⵔⵉⴷ ⵓⵍⴰ ⴷ ⴰⵢⵔⴰⴷ ⵉⴱⴻⴷⴷ ⵥⵥⴰⵜ ⵉ ⵍⵅⴻⵛⴱⴻⵜ. ⵏⵉⵜⵏⵉ ⵉⵡⴹⴻⵏ ⵖⴰⵔ ⵜⴻⵏⴷⵉⵏⵜ ⵏ ⵓⵏⴰⴱⵉ ⵉⵡⵙⴰⵔⴻⵏ ⵓⵛⴰ ⵙⵙⵉⵡⵍⴻⵏ ⵅ ⵎⴰⵏ ⴰⵢⴰ. 26 ⵓⵎⵉ ⴰⵏⴰⴱⵉ ⵡⴻⵏⵏⵉ ⵉ ⵜ-ⵉ-ⴷⴷ ⵢⴰⵔⵔⵉⵏ ⵥⴻⴳ ⵡⴻⴱⵔⵉⴷ, ⵉⵙⵍⴰ ⵎⴰⵏⴰⵢⴰ, ⵉⵏⵏⴰ ⵏⴻⵜⵜⴰ: “ⵡⴰ ⴷ ⴰⵔⵢⴰⵥ ⵏ ⴰⵔⴻⴱⴱⵉ ⵡⴻⵏⵏⵉ ⵜⵓⵖⴰ ⵉⵖⴻⵡⵡⵖⴻⵏ ⵅ ⵡⴰⵡⴰⵍ ⵏ ⵙⵉⴷⵉ. ⵅ ⵓⵢⴻⵏⵏⵉ ⵉⵡⵛⴰ ⵉ-ⵜ ⵙⵉⴷⵉ ⵉ ⵡⴻⵢⵔⴰⴷ ⵓ ⵡⴰⵏⵉⵜⴰ ⵉⵎⴻⵥⵥⴻⵇ ⵉ-ⵜ ⵓⵛⴰ ⵉⵏⵖⴰ ⵉ-ⵜ ⵄⵍⴰⵃⵙⴰⴱ ⴰⵡⴰⵍ ⵏ ⵙⵉⴷⵉ ⵡⴻⵏⵏⵉ ⵜⵓⵖⴰ ⴽⵉⴷⴻⵙ ⵉⵙⵙⵉⵡⵍⴻⵏ.” 27 ⵓⵛⴰ ⵏⴻⵜⵜⴰ ⵉⵙⵙⵉⵡⴻⵍ ⴰⴽ-ⴷ ⵉⵃⴻⵏⵊⵉⵔⴻⵏ ⵏⵏⴻⵙ, ⵉⵏⵏⴰ: “ⴱⴰⵔⴷⵄⴻⵎ ⴰⵢⵉ ⵉ ⵡⴻⵖⵢⵓⵍ!” ⵏⵉⵜⵏⵉ ⴱⴰⵔⴷⵄⴻⵏ ⴰⵙ 28 ⵓⵛⴰ ⵏⴻⵜⵜⴰ ⵉⴼⴼⴻⵖ, ⵢⵓⴼⴰ ⵍⵅⴻⵛⴱⴻⵜ ⵜⴻⵎⵎⴻⵏⴹⴰⵔ ⵅ ⵡⴻⴱⵔⵉⴷ ⵓⵍⴰ ⴷ ⴰⵖⵢⵓⵍ ⴷ ⵡⴰⵢⵔⴰⴷ ⵉ ⵉⴱⴻⴷⴷⴻⵏ ⵥⵥⴰⵜ ⵉ ⵍⵅⴻⵛⴱⴻⵜ. ⴰⵢⵔⴰⴷ ⵡⴰⵔ ⵢⴻⵛⵛⵉ ⵍⵅⴻⵛⴱⴻⵜ ⵓ ⵡⴰⵔ ⵉⵎⴻⵥⵥⴻⵇ ⴰⵖⵢⵓⵍ. 29 ⵅⴻⵏⵏⵉ ⵉⵙⵙⴳⴻⵄⵄⴻⴷ ⵓⵏⴰⴱⵉ ⵍⵅⴻⵛⴱⴻⵜ, ⵉⵙⵙⴰⵔⵙ ⵉ-ⵜⵜ ⵅ ⵡⴻⵖⵢⵓⵍ ⵓⵛⴰ ⵢⵉⵡⵢⵉ ⵜⵜ ⴰⴽⵉⴷⴻⵙ. ⴰⵎⵎⵓ ⵉ ⴷⴷ-ⵢⵓⵙⴰ ⵓⵏⴰⴱⵉ ⵉⵡⵙⴰⵔⴻⵏ ⴷⵉ ⵜⴻⵏⴷⵉⵏⵜ ⵃⵉⵎⴰ ⴰⴷ ⵅⴰⵙ ⵉⵡⵡⴻⵜ ⴰⴳⴻⵊⴷⵓⵔ ⵓ ⴰⴷ ⵜ ⵉⵏⴹⴻⵍ. 30 ⵏⴻⵜⵜⴰ ⵉⵏⴹⴻⵍ ⵍⵅⴻⵛⴱⴻⵜ ⴷⴻⴳ ⵡⴻⵏⴹⴻⵍ ⵏⵏⴻⵙ ⵓ ⵏⵉⵜⵏⵉ ⵡⵜⵉⵏ ⵅⴰⵙ ⴰⴳⴻⵊⴷⵓⵔ: “ⵓⵀ, ⵓⵎⴰ ⵉⵏⵓ!” 31 ⴰⵡⴰⵔⵏⵉ ⵉ ⵓⵎⵉ ⵜⵓⵖⴰ ⵜ ⵉⵏⴹⴻⵍ, ⵉⵎⵙⴰⵔ, ⴰⵇⴰ ⵉⵙⵙⵉⵡⴻⵍ ⴰⴽ-ⴷ ⵉⵃⴻⵏⵊⵉⵔⴻⵏ ⵏⵏⴻⵙ, ⵉⵏⵏⴰ: “ⵅⵎⵉ ⵉ ⵖⴰ ⵎⵎⵜⴻⵖ, ⵏⴻⴹⵍⴻⵎ ⴰⵢⵉ ⴷⴻⴳ ⵡⴻⵏⴹⴻⵍ ⵉ ⴷⵉ ⵉⵎⵎⴻⵏⴹⴰⵔ ⵡⴻⵔⵢⴰⵥ ⵏ ⴰⵔⴻⴱⴱⵉ ⵓ ⵙⵙⴰⵔⵙⴻⵎ ⵉⵅⵙⴰⵏ ⵉⵏⵓ ⵅ ⵓⵖⴻⵥⴷⵉⵙ ⵏ ⵉⵅⵙⴰⵏ ⵏⵏⴻⵙ! 32 ⵎⴰⵖⴰⵔ ⴰⵡⴰⵍ ⵉ ⵉⴱⴰⵔⵔⴻⵃ ⵙ ⵡⴰⵡⴰⵍ ⵏ ⵙⵉⴷⵉ ⵅ ⵓⵄⴰⵍⵟⴰⵔ-ⴰ ⵏⵏⵉ ⵉⴵⴰⵏ ⴷⵉ ⴱⴰⵢⵜ-ⵉⵍ ⵓ ⵅ ⵎⴰⵔⵔⴰ ⵜⵉⵥⴰⵡⵉⵢⵢⵉⵏ ⵏ ⵍⴻⴳⵄⵓⴷⵉ ⵏⵏⵉ ⵉⴵⴰⵏ ⴷⵉ ⵜⵏⴻⴷⴷⴰⵎ ⵏ ⵙⴰⵎⴰⵔⵢⴰ, ⴰⴷ ⴷⴷ-ⵉⴼⴼⴻⵖ ⵏⵉⵛⴰⵏ.” ^■  

33 ⴰⵡⴰⵔⵏⵉ ⵉ ⵡⴰⵡⴰⵍ-ⴰ ⵡⴰⵔ ⴷⴷ-ⵉⴷⴷⴻⴽⴽⵯⵉⵍ ⵛⴰ ⵢⴰⵔⵓⴱⵄⴰⵎ ⵥⴻⴳ ⵡⴻⴱⵔⵉⴷ ⴰⵄⴻⴼⴼⴰⵏ ⵏⵏⴻⵙ, ⵎⴰⵛⴰ ⵢⴰⵍⴻⵇⵇⴻⵎ ⵄⴰⵡⴻⴷ ⵉⴽⴻⵀⵀⴰⵏⴻⵏ ⵥⵉ ⵎⴰⵔⵔⴰ ⵟⵟⵔⵓⴼⴰ ⵏ ⵍⴳⴻⵏⵙ ⵅ ⵍⴻⴳⵄⵓⴷⵉ. ⵡⴻⵏⵏⵉ ⵜ ⵉⵅⵙⴻⵏ, ⵢⴰⵍⴻⵇⵇⴻⵎ ⵉ-ⵜ ⵓ ⵡⴰⵏⵉⵜⴰ ⵉⴷⵡⴻⵍ ⴷ ⵉⵊⵊ ⵥⴻⴳ ⵉⴽⴻⵀⵀⴰⵏⴻⵏ ⵏ ⵍⴻⴳⵄⵓⴷⵉ. ^■   34 ⵣⵉ ⵜⵎⴻⵙⵍⴰⵛⵜ-ⴰ ⵜⴻⵡⴹⴰ ⵜⴰⴷⴷⴰⵔⵜ ⵏ ⵢⴰⵔⵓⴱⵄⴰⵎ ⴷⵉ ⴷⴷⵏⵓⴱ ⴰⵍⴰⵎⵉ ⴷⴷ-ⵜⵇⴰⵔⵔⴻⴱ ⵖⴰⵔ ⵓⵜⴻⵃⵃⵉ ⴷ ⵡⴰⵔⴻⴷⴷⴻⴵ ⵥⵉ ⵜⴻⵎⵎⵓⵔⵜ.