1 ⵓⵎⵉ ⵢⵓⵡⴰⴱ, ⵎⵎⵉⵙ ⵏ ⵚⴰⵔⵓⵢⴰ, ⵉⵃⴻⴽⴽⴰⵔ ⴰⵇⴰ ⵓⵍ ⵏ ⵓⵊⴻⴵⵉⴷ ⵜⵓⵖⴰ ⴹⵉⴷⴷ ⵉ ⴰⴱⵛⴰⵍⵓⵎ, 2 ⵉⵙⵙⴻⴽⴽ ⵢⵓⵡⴰⴱ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵜⴰⵇⵓⵄⴰ ⵓⵛⴰ ⵉⵊⵊⴰ ⴰⴷ ⵙⵙⴻⵏⵏⵉ ⴷⴷ-ⴰⵡⵢⴻⵏ ⵉⵛⵜ ⵏ ⵜⴻⵎⵖⴰⵔⵜ ⴷ ⵜⴰⵎⵉⵖⵉⵙⵜ, ⵉⵏⵏⴰ ⴰⵙ: “ⵜⵜⵥⴰⵡⴳⴻⵖ, ⴻⴳⴳ ⴰⵅⵎⵉ ⵛⴻⵎ ⵜⵛⴻⴹⵏⴻⴷ, ⵢⴰⵔⴹ ⴰⵔⵔⵓⴹ ⵏ ⵡⴻⵛⴹⴰⵏ ⵓ ⵡⴰⵔ ⴷⴻⵀⵀⴻⵏ ⵉⵅⴻⴼ ⵏⵏⴻⵎ ⵙ ⵥⵥⴻⵛⵜ! ⵙⵏⴻⵄⵎⵉⵍ ⴰⵎ ⵉⵛⵜ ⵏ ⵜⴻⵎⵖⴰⵔⵜ ⵏⵏⵉ ⵉⵛⴻⴹⵏⴻⵏ ⵅ ⵉⵊⵊ ⵏ ⵓⵎⴻⵜⵜⵉⵏ ⴰⵟⵟⴰⵙ ⵏ ⵡⵓⵙⵙⴰⵏ. ^□   3 ⴰⴷⴻⴼ ⵖⴰⵔ ⵓⵊⴻⴵⵉⴷ ⵓ ⵙⵉⵡⴻⵍ ⴰⴽⵉⴷⴻⵙ ⴰⵡⴰⵍ-ⴰ ⵡⴰⵏⵉⵜⴰ ⴷ ⵉⵊⵊⴻⵏ.” ⵓⵛⴰ ⵢⵓⵡⴰⴱ ⵉⵏⵏⴰ ⴰⵙ ⵎⵉⵏ ⵖⴰ ⵜⵉⵏⵉ.

4 ⵜⴰⵎⵖⴰⵔⵜ ⵥⵉ ⵜⴰⵇⵇⵓⵄⴰ ⵜⴻⵏⵏⴰ ⵉ ⵓⵊⴻⴵⵉⴷ, ⴰⵎ ⵜⴻⵡⴹⴰ ⵙ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⵎⵎⵓⵔⵜ, ⵜⵓⴹⴰⵔ: “ⵙⴻⵏⵊⴻⵎ ⴰⵢⵉ, ⴰ ⴰⵊⴻⴵⵉⴷ!” 5 ⵉⵏⵏⴰ ⴰⵙ ⵓⵊⴻⴵⵉⴷ: “ⵎⵉⵏ ⵛⴻⵎ ⵢⵓⵖⵉⵏ?” ⵏⴻⵜⵜⴰⵜ ⵜⴻⵏⵏⴰ ⴰⵙ: “ⵙ ⵜⵉⴷⴻⵜⵜ ⵏⴻⵛⵛ ⴷ ⵜⴰⵊⵊⴰⵞ, ⴰⵔⵢⴰⵥ ⵉⵏⵓ ⵉⵎⵎⵓⵜ. 6 ⵜⴰⵎⵙⴻⵅⵅⴰⵔⵜ ⵏⵏⴻⴽ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵏ ⵉⵃⴻⵏⵊⵉⵔⴻⵏ ⵓ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⵎⵎⴻⵏⵖⴻⵏ ⴷⴻⴳ ⵉⵢⵢⴰⵔ. ⵜⵓⵖⴰ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⴰⴷ ⵜⴻⵏ ⵉⴱⴹⴰ. ⵅⴻⵏⵏⵉ ⵉⵡⵜⴰ ⵉⵊⵊⴻⵏ ⵡⴻⵏⵏⴻⵖⵏⵉ ⵓⵛⴰ ⵉⵏⵖⴰ ⵉ-ⵜ. 7 ⵓ ⵅⵥⴰⵔ, ⵎⴰⵔⵔⴰ ⵍⴰⴵ ⵉⵖⴻⵡⵡⴻⵖ ⵅ ⵜⴻⵎⵙⴻⵅⵅⴰⵔⵜ ⵏⵏⴻⴽ, ⵏⵏⴰⵏ: ‘ⴰⵡⵉ-ⴷⴷ ⵡⴻⵏⵏⵉ ⵉⵏⵖⵉⵏ ⵓⵎⴰⵙ ⴷⴰ, ⵎⴰⵃⴻⵏⴷ ⴰⴷ ⵜ ⵏⴻⵏⵏⴻⵖ ⴷⵉ ⵙⵙⵉⴱⴱⴻⵜ ⵏ ⵍⴻⵄⵎⴰⵔ ⵏ ⵓⵎⴰⵙ ⵡⴻⵏⵏⵉ ⵜ ⵉⵏⵖⵉⵏ ⵓ ⴰⵎⵎⵓ ⵉ ⵖⴰ ⵏⴻⵇⴹⴰ ⵓⵍⴰ ⵅ ⵡⴻⵡⵔⵉⵜ.’ ⴰⵎⵎⵓ ⵉ ⵅⵙⴻⵏ ⵏⵉⵜⵏⵉ ⴰⴷ ⵙⵙⵅⴻⵙⵢⴻⵏ ⴰⵢⴻⵏⵏⵉ ⵏ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⵉ ⴷ ⴰⵢⵉ ⵉⵇⵇⵉⵎⴻⵏ ⴰⵍⴰⵎⵉ ⵡⴰⵔ ⵉⵜⵜⵖⵉⵎⵉ ⵉ ⵡⴻⵔⵢⴰⵥ ⵉⵏⵓ ⵉⵙⴻⵎ ⴷⵉ ⵜⴻⵎⵎⵓⵔⵜ ⵇⴰⵄ.”

8 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ ⵉ ⵜⴻⵎⵖⴰⵔⵜ: “ⵓⵢⵓⵔ ⵖⴰⵔ ⵜⴰⴷⴷⴰⵔⵜ! ⵏⴻⵛⵛ ⴰⴷ ⵙⵙⵓⴼⴼⵖⴻⵖ ⵍⵓⵎⵓⵔⴰⵜ ⵅⴰⵎ.” 9 ⵎⴰⵛⴰ ⵜⴰⵎⵖⴰⵔⵜ ⵥⵉ ⵜⴰⵇⵇⵓⵄⴰ ⵜⴻⵏⵏⴰ ⵉ ⵓⵊⴻⴵⵉⴷ: “ⵙⵉⴷⵉ ⵉⵏⵓ ⴰⵊⴻⴵⵉⴷ, ⴰⵇⴰ ⵍⵎⵓⵄⵚⵉⵢⵢⴻⵜ ⵜⴻⴵⴰ ⵅⴰⴼⵉ ⵓ ⵅ ⵜⴰⴷⴷⴰⵔⵜ ⵏ ⴱⴰⴱⴰ. ⴰⵊⴻⴵⵉⴷ ⴷ ⵍⵄⴰⵔⵛ ⵏⵏⴻⵙ ⴷ ⵉⵎⴻⵥⴷⴰⴳⴻⵏ.”

10 ⵉⵏⵏⴰ ⵓⵊⴻⴵⵉⴷ: “ⴰⵡⵉ ⴰⵢⵉ-ⴷⴷ ⵡⴻⵏⵏⵉ ⵖⴰⵔ ⵉⴵⴰ ⵛⴰ ⵅⴰⵎ, ⵖⴰⵔⵉ ⵓ ⵏⴻⵜⵜⴰ ⵡⴰⵔ ⵉⵜⵜⵖⵉⵎⵉ ⵄⴰⴷ ⴰⴷ ⵛⴻⵎ ⵉⵃⴰⴷⴰ.”

11 ⵏⴻⵜⵜⴰⵜ ⵜⴻⵏⵏⴰ: “ⴻⵊⵊ ⴰⵊⴻⴵⵉⴷ ⴰⴷ ⵉⵅⴰⵔⵔⴻⵚ ⴷⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵃⵉⵎⴰ ⵡⴻⵏⵏⵉ ⵉⵅⵙⴻⵏ ⴰⴷ ⵉⵅⵍⴻⴼ ⵉⴷⴰⵎⵎⴻⵏ ⵡⴰⵔ ⵢⴰⵔⴻⵏⵏⵉ ⵄⴰⴷ ⴷⵉ ⴰⵔⵥⵉⵢⵢⴻⵜ ⵓ ⵡⴰⵔ ⵉⵙⵙⵓⴼⴼⵓⵖ ⵎⵎⵉ ⵖⴰⵔ ⵟⵟⴰⵔⴼ.” ⵅⴻⵏⵏⵉ ⵉⵏⵏⴰ ⵏⴻⵜⵜⴰ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ, ⵎⴰⵍⴰ ⵓⵍⴰ ⴷ ⵉⵊⵊ ⵏ ⵓⵥⴻⵟⵟⵓ ⵏ ⵓⵛⴻⵡⵡⴰⴼ ⵏ ⵓⵥⴻⴵⵉⴼ ⵏ ⵎⵎⵉⵎ ⴰⴷ ⵉⵡⴹⴰ ⴷⵉ ⵜⴻⵎⵎⵓⵔⵜ!”

12 ⵅⴻⵏⵏⵉ ⵜⴻⵏⵏⴰ ⵜⴻⵎⵖⴰⵔⵜ: “ⵜⵜⵥⴰⵡⴳⴻⵖ, ⴻⵊⵊ ⵜⴰⵎⵙⴻⵅⵅⴰⵔⵜ ⵏⵏⴻⴽ ⴰⴷ ⵜⵉⵏⵉ ⵄⴰⴷ ⵉⵊⵊ ⵏ ⵡⴰⵡⴰⵍ ⵉ ⵙⵉⴷⵉ.” ⵓⵛⴰ ⵏⴻⵜⵜⴰ ⵉⵏⵏⴰ: “ⵙⵉⵡⴻⵍ.”

13 ⵜⴰⵎⵖⴰⵔⵜ ⵜⴻⵏⵏⴰ: “ⵎⴰⵢⴻⵎⵎⵉ ⵅⴻⵏⵏⵉ ⵜⴻⵏⵡⵉⴷ ⴰⴷ ⵜⴻⴳⴳⴻⴷ ⴰⵎⵎⵓ ⴰⴽ-ⴷ ⵍⴳⴻⵏⵙ ⵏ ⴰⵔⴻⴱⴱⵉ? ⵓⵎⵉ ⵉⵏⵏⴰ ⵓⵊⴻⴵⵉⴷ ⵍⴻⵅⵅⵓ ⴰⵡⴰⵍ-ⴰ, ⴰⵇⴰ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⴰⵎ ⵡⴻⵏⵏⵉ ⴷⵉ ⵉⴵⴰ ⵍⵄⵉⴱ, ⵎⵉⵏⵥⵉ ⴰⵊⴻⴵⵉⴷ ⵡⴰⵔ ⴷⴷ-ⵉⵜⵜⴰⵔⵔⵉ ⵖⴰⵔⴻⵙ ⵡⴻⵏⵏⵉ ⵜ ⵉⵏⴹⴰⵔⴻⵏ.

14 ⵎⴰⵖⴰⵔ ⵏⴻⵛⵛⵉⵏ ⵎⴰⵔⵔⴰ ⴰⴷ ⵏⴻⵎⵎⴻⵜ, ⴰⵇⴰ ⵏⴻⵛⵛⵉⵏ ⴰⵎ ⵡⴰⵎⴰⵏ ⵉⵜⵜⵡⴰⴼⴰⵔⵔⵖⴻⵏ ⵅ ⵜⴻⵎⵎⵓⵔⵜ, ⵡⴰⵔ ⵏⵏⵢⴰⵔⵡⴻⵏ. ⵙⵉⴷⵉ ⵎⴰⵛⴰ ⵡⴰⵔ ⵉⵜⵜⴻⴽⴽⴻⵙ ⵍⴻⵄⵎⴰⵔ, ⴰⴷ ⵉⵅⴰⵔⵔⴻⵚ ⵃⵉⵎⴰ ⵡⴻⵏⵏⵉ ⵥⵥⴰⵢⴻⵙ ⵉⵜⵜⵡⴰⵎⵎⴻⵏⴹⴰⵔ, ⵡⴰⵔ ⵉⵜⵜⵖⵉⵎⵉ ⵉⵎⵎⴻⵏⴹⴰⵔ.

15 ⵅⴻⵏⵏⵉ ⵍⴻⵅⵅⵓ, ⵏⴻⵛⵛ ⵓⵙⵉⵖ-ⴷⴷ ⴷⴰ ⵃⵉⵎⴰ ⴰⴷ ⵙⵙⵉⵡⵍⴻⵖ ⴰⵡⴰⵍ-ⴰ ⴰⴽ-ⴷ ⵓⵊⴻⴵⵉⴷ, ⵙⵉⴷⵉ ⵉⵏⵓ, ⴰⵡⴰⵍ-ⴰ, ⵎⵉⵏⵥⵉ ⵍⴳⴻⵏⵙ ⵉⵙⵙⵉⴳⴳⵯⴻⴷ ⴰⵢⵉ. ⵅⴻⵏⵏⵉ ⵜⴻⵏⵏⴰ ⵜⴻⵎⵙⴻⵅⵅⴰⵔⵜ ⵏⵏⴻⴽ: ‘ⴻⵊⵊ ⴰⵢⵉ ⴰⴷ ⵙⵙⵉⵡⵍⴻⵖ ⴰⴽ-ⴷ ⵓⵊⴻⴵⵉⴷ, ⴰⴷ ⵜⴰⵖ ⴰⴷ ⵉⴳⴳ ⵓⵊⴻⴵⵉⴷ ⵎⵉⵏ ⵖⴰ ⵜⵉⵏⵉ ⵜⴰⵢⵢⴰ ⵏⵏⴻⵙ,

16 ⵎⴰⵖⴰⵔ ⴰⵊⴻⴵⵉⴷ ⴰⴷ ⵉⵙⴻⵍ ⵖⴰⵔ ⵜⴰⵢⵢⴰ ⵏⵏⴻⵙ ⵎⴰⵃⴻⵏⴷ ⴰⴷ ⵜⵜ ⵉⴼⴻⴽⴽ ⵥⴻⴳ ⵓⴼⵓⵙ ⵏ ⵡⴻⵔⵢⴰⵥ ⵏⵏⵉ ⵉⵅⵙⴻⵏ ⴰⴷ ⵉⵜⴻⵃⵃⴰ ⵏⴻⵛⵛ ⴷ ⵎⵎⵉ ⵥⵉ ⵜⴻⵙⵖⴰⵔⵜ ⵉ ⵟⵟⴼⴻⵖ ⵥⵉ ⴰⵔⴻⴱⴱⵉ.’

17 ⵜⴰⵎⵙⴻⵅⵅⴰⵔⵜ ⵏⵏⴻⴽ ⵜⴻⵏⵏⴰ ⵄⴰⵡⴻⴷ: ‘ⵉⵍⵉ ⴰⴷ ⵉⵙⵙⵢⴰⵔⴻⵢⵢⴻⵃ ⵡⴰⵡⴰⵍ ⵏ ⵙⵉⴷⵉ ⵉⵏⵓ, ⴰⵊⴻⴵⵉⴷ, ⵎⴰⵖⴰⵔ ⵙⵉⴷⵉ ⵉⵏⵓ, ⴰⵊⴻⴵⵉⴷ, ⵉⴳⴳⴰ ⴰⵎ ⵉⵊⵊ ⵏ ⵍⵎⴰⵍⴰⴽ ⵏ ⴰⵔⴻⴱⴱⵉ ⴰⵍⴰⵎⵉ ⵉⵜⵜⴻⵙⵍⴰ ⵎⵉⵏ ⵉⵚⴻⴱⵃⴻⵏ ⴷ ⵎⵉⵏ ⵡⴰⵔ ⵉⵃⵍⵉⵏ ⵓⵛⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⴷ ⵢⵉⵍⵉ ⴰⴽⵉⴷⴻⴽ.’ ”

18 ⴰⵊⴻⴵⵉⴷ ⵢⴰⵔⵔⴰ-ⴷⴷ ⵅⴰⵙ, ⵉⵏⵏⴰ ⵉ ⵜⴻⵎⵖⴰⵔⵜ: “ⵡⴰⵔ ⵅⴰⴼⵉ ⵜⴻⴼⴼⴰⵔ ⵡⴰⵍⵓ ⵥⵉ ⵜⵎⴻⵙⵍⴰⵛⵜ ⵉ ⵅ ⵛⴻⵎ ⵉ ⵖⴰ ⵙⵙⴻⵇⵙⵉⵖ.” ⵜⴰⵎⵖⴰⵔⵜ ⵜⴻⵏⵏⴰ: “ⴻⵊⵊ ⵙⵉⴷⵉ ⵉⵏⵓ, ⴰⵊⴻⴵⵉⴷ, ⴰⴷ ⵉⵙⵙⵉⵡⴻⵍ.”

19 ⵉⵏⵏⴰ ⵓⵊⴻⴵⵉⴷ: “ⵎⴰ ⵢⵓⵡⴰⴱ ⵖⴰⵔⴻⵙ ⴰⴼⵓⵙ ⴷⵉ ⵎⴰⵔⵔⴰ ⵎⴰⵏ ⴰⵢⴰ?” ⵜⴰⵎⵖⴰⵔⵜ ⵜⴰⵔⵔⴰ-ⴷⴷ ⵅⴰⵙ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵍⴻⵄⵎⴰⵔ ⵉⵏⵓ, ⵙⵉⴷⵉ ⵉⵏⵓ, ⴰⵊⴻⴵⵉⴷ, ⵎⴰ ⵉⵥⴻⵎⵎⴰⵔ ⵓⵍⴰ ⴷ ⵉⵊⵊⴻⵏ ⴰⴷ ⵉⴱⴻⵄⵄⴻⴷ ⵅ ⵎⴰⵔⵔⴰ ⵎⵉⵏ ⵉⵙⵙⵉⵡⴻⵍ ⵙⵉⴷⵉ ⵉⵏⵓ ⵖⴰⵔ ⵢⴻⴼⴼⵓⵙ ⵏⵉⵖ ⵖⴰⵔ ⵓⵥⴻⵍⵎⴰⴹ, ⴰⵊⴻⴵⵉⴷ! ⵡⴰⵀ, ⴰⵎⵙⴻⵅⵅⴰⵔ ⵏⵏⴻⴽ ⵢⵓⵡⴰⴱ ⴷ ⵡⴻⵏⵏⵉ ⴷ ⴰⵢⵉ ⵢⵓⵎⵓⵔⴻⵏ. ⵏⴻⵜⵜⴰ ⵉⴳⴳⴰ ⵎⴰⵔⵔⴰ ⴰⵡⴰⵍⴻⵏ-ⴰ ⴷⴻⴳ ⵓⵇⴻⵎⵎⵓⵎ ⵏ ⵜⴻⵎⵙⴻⵅⵅⴰⵔⵜ ⵏⵏⴻⴽ. 20 ⴰⵢⴰ ⵉⴳⴳⴰ ⵉ-ⵜ ⵓⵎⵙⴻⵅⵅⴰⵔ ⵏⵏⴻⴽ ⵢⵓⵡⴰⴱ, ⵃⵉⵎⴰ ⴰⴷ ⵉⵡⵛ ⵉ ⵜⵎⴻⵙⵍⴰⵛⵜ ⵉⵊⵊ ⵏ ⵓⵖⴻⵎⴱⵓⴱ ⵏⵏⴻⵖⵏⵉ. ⵎⴰⵛⴰ ⵙⵉⴷⵉ ⵉⵏⵓ ⴷ ⴰⵎⵉⵖⵉⵙ ⴰⵎ ⵉⵊⵊ ⵏ ⵓⵎⴰⵍⴰⴽ ⵏ ⴰⵔⴻⴱⴱⵉ, ⴰⵍⴰⵎⵉ ⵉⵙⵙⴻⵏ ⵎⴰⵔⵔⴰ ⵎⵉⵏ ⵉⵜⵜⴻⵎⵙⴰⵔⴰⵏ ⴷⵉ ⵜⴻⵎⵎⵓⵔⵜ.”

21 ⵅⴰⵙ ⵓⵛⴰ ⵉⵏⵏⴰ ⵓⵊⴻⴵⵉⴷ ⵉ ⵢⵓⵡⴰⴱ: “ⵅⵥⴰⵔ ⵄⴰⴼⴰⴽ, ⵏⴻⵛⵛ ⴳⴳⵉⵖ ⵎⴰⵏ ⴰⵢⴰ. ⵓⵢⵓⵔ, ⴰⵡⵉ-ⴷⴷ ⴰⵃⵓⴷⵔⵉ ⴰⴱⵛⴰⵍⵓⵎ!” 22 ⵢⵓⵡⴰⴱ ⵉⵡⴹⴰ ⵅ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⵎⵎⵓⵔⵜ, ⵢⵓⴹⴰⵔ ⵓⵛⴰ ⵉⵇⴰⴷⴰ ⵉ ⵓⵊⴻⴵⵉⴷ. ⵓⵛⴰ ⵉⵏⵏⴰ ⵢⵓⵡⴰⴱ: “ⴰⵙⵙ-ⴰ ⵉⵙⵙⴻⵏ ⵓⵎⵙⴻⵅⵅⴰⵔ ⵏⵏⴻⴽ, ⴰⵇⴰ ⵓⴼⵉⵖ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏⵏⴻⴽ, ⵙⵉⴷⵉ ⵉⵏⵓ, ⴰⵊⴻⴵⵉⴷ, ⵎⵉⵏⵥⵉ ⴰⵊⴻⴵⵉⴷ ⵉⴳⴳⴰ ⵖⴰⵔ ⵡⴰⵡⴰⵍ ⵏ ⵓⵎⵙⴻⵅⵅⴰⵔ ⵏⵏⴻⵙ.” 23 ⵉⴽⴽⴰⵔ ⵢⵓⵡⴰⴱ ⵓⵛⴰ ⵢⵓⵢⵓⵔ ⵖⴰⵔ ⵊⴰⵛⵓⵔ ⵓ ⵢⵉⵡⵉⴹ ⵖⴰⵔ ⵓⵔⵛⴰⵍⵉⵎ ⴰⴽ-ⴷ ⴰⴱⵛⴰⵍⵓⵎ. 24 ⵉⵏⵏⴰ ⵓⵊⴻⴵⵉⴷ: “ⴻⵊⵊ ⵉ-ⵜ ⴰⴷ ⵉⵄⵇⴻⴱ ⵖⴰⵔ ⵜⴰⴷⴷⴰⵔⵜ ⵏⵏⴻⵙ. ⵓⴷⴻⵎ ⵉⵏⵓ ⵎⴰⵛⴰ ⵡⴰⵔ ⵜ ⵉⵥⵥⴰⵔ.” ⵅⴻⵏⵏⵉ ⵉⵄⵇⴻⴱ ⴰⴱⵛⴰⵍⵓⵎ ⵖⴰⵔ ⵜⴰⴷⴷⴰⵔⵜ ⵏⵏⴻⵙ, ⵡⴰⵔ ⵉⵥⵔⵉ ⵓⴷⴻⵎ ⵏ ⵓⵊⴻⴵⵉⴷ.

25 ⴷⵉ ⵎⴰⵔⵔⴰ ⵉⵙⵔⴰⵉⵍ ⵡⴰⵔ ⵉⴵⵉ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ ⵉⵛⴻⵡⵡⴰⵔ ⴰⵎⴻⵛⵏⴰⵡ ⴰⴱⵛⴰⵍⵓⵎ ⴰⵍⴰⵎⵉ ⵉⵜⵜⵡⴰⵙⵓⵄⵍⴰ ⴰⵟⵟⴰⵙ. ⵣⵉ ⵜⴰⵍⴻⵇⵇⴰ ⵏ ⵉⴹⴰⵔⴻⵏ ⵖⴰⵔⴻⵙ ⴰⵍ ⵜⵇⵉⵛⵛⵉⵜ ⵏ ⵓⵥⴻⴵⵉⴼ ⵏⵏⴻⵙ ⵡⴰⵔ ⴷⴰⵢⴻⵙ ⵓⵍⴰ ⴷ ⵉⵊⵊ ⵏ ⵍⵄⵉⴱ. 26 ⵎⴰⵍⴰ ⵏⴻⵜⵜⴰ ⵉⵃⴻⴼⴼ ⴰⵛⴻⵡⵡⴰⴼ ⵏⵏⴻⵙ - ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵏⵏⵓⵎ ⴰⴷ ⵜ ⵉⵃⴻⴼⴼ ⵖⴰⵔ ⵓⵏⴻⴳⴳⴰⵔ ⵏ ⵡⵓⵙⵙⴰⵏ ⵄⵍⴰⵃⵙⴰⴱ ⵓⵙⵙⴰⵏ ⵏ ⴽⵓⵍ ⴰⵙⵙⴻⴳⴳⵯⴰⵙ ⵎⵉⵏⵥⵉ ⵜⵓⵖⴰ ⵉⴷⴷⴻⴽⴽⵡⴰⵍ ⵉⴷⵇⴻⵍ ⵅⴰⵙ - ⵅⴻⵏⵏⵉ ⵉⵃⴻⴼⴼ ⵓ ⵉⵡⵥⴻⵏ ⴰⵛⴻⵡⵡⴰⴼ ⵏ ⵓⵥⴻⴵⵉⴼ ⵏⵏⴻⵙ. ⵜⵓⵖⴰ ⵍⴻⵡⵥⴻⵏ ⵏ ⵓⵛⴻⵡⵡⴰⴼ ⵎⵉⵜⴰⵢⴻⵏ ⵏ ⵉⵛⵉⵇⵍⴻⵏ ⵄⵍⴰⵃⵙⴰⴱ ⵍⴻⵡⵥⴻⵏ ⵏ ⵓⵊⴻⴵⵉⴷ. 27 ⵜⵜⵡⴰⵔⵡⴻⵏ-ⴷⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵉ ⴰⴱⵛⴰⵍⵓⵎ ⴷ ⵉⵛⵜ ⵏ ⵢⴻⴵⵉⵙ ⵇⵇⴰⵔⴻⵏ ⴰⵙ ⵜⴰⵎⴰⵔ. ⵏⴻⵜⵜⴰⵜ ⴷ ⵉⵛⵜ ⵏ ⵜⴻⵎⵖⴰⵔⵜ ⴷⴰⵢⴻⵙ ⴰⵥⵔⵉ.

28 ⴰⴱⵛⴰⵍⵓⵎ ⵉⵥⴷⴻⵖ ⵜⵏⴰⵢⴻⵏ ⵏ ⵉⵙⴻⴳⴳⵯⵓⵙⴰ ⴷⵉ ⵓⵔⵛⴰⵍⵉⵎ. ⵏⴻⵜⵜⴰ ⵡⴰⵔ ⵉⵥⵔⵉ ⵓⴷⴻⵎ ⵏ ⵓⵊⴻⴵⵉⴷ. 29 ⵅⴻⵏⵏⵉ ⵉⵙⵙⴻⴽⴽ ⴰⴱⵛⴰⵍⵓⵎ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵢⵓⵡⴰⴱ, ⵃⵉⵎⴰ ⴰⴷ ⵜ ⵉⵙⵙⴻⴽⴽ ⵖⴰⵔ ⵓⵊⴻⴵⵉⴷ, ⵎⴰⵛⴰ ⵏⴻⵜⵜⴰ ⵡⴰⵔ ⵉⵅⵙ ⴰⴷ ⵖⴰⵔⴻⵙ ⴷⴷ-ⵢⴰⵙ. ⵓⵛⴰ ⵉⵙⵙⴻⴽⴽ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉⵜ, ⵎⴰⵛⴰ ⵏⴻⵜⵜⴰ ⵡⴰⵔ ⵉⵅⵙ ⴰⴷ ⴷⴷ-ⵢⴰⵙ. 30 ⵅⴻⵏⵏⵉ ⵉⵏⵏⴰ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵙ: “ⵅⵥⴰⵔⴻⵎ, ⵉⵢⵢⴰⵔ ⵏ ⵢⵓⵡⴰⴱ ⵉ ⵉⴵⴰⵏ ⵅ ⵓⵖⴻⵥⴷⵉⵙ ⵏ ⵡⴻⵏⵏⵉ ⵉⵏⵓ ⵓ ⵏⴻⵜⵜⴰ ⵉⵥⵥⵓ ⴷⵉⵏⵏⵉ ⵉⵎⴻⵏⴷⵉ. ⵓⵢⵓⵔⴻⵎ ⴷⵉⵏ, ⵇⵇⴻⴷⴻⵎ ⴰⵙ ⵜⵉⵎⴻⵙⵙⵉ!” ⵓⵛⴰ ⵉⵎⵙⴻⵅⵅⴰⵔⴻⵏ ⵏ ⴰⴱⵛⴰⵍⵓⵎ ⵇⵇⴷⴻⵏ ⵜⵉⵎⴻⵙⵙⵉ ⵉ ⵉⵢⵢⴰⵔ ⵏⵏⵉ.

31 ⵅⴰⵙ ⵓⵛⴰ ⵉⴽⴽⴰⵔ ⵢⵓⵡⴰⴱ ⵓⵛⴰ ⵉⵙⵙⵉⵊⵊ ⵅ ⴰⴱⵛⴰⵍⵓⵎ ⴷⵉ ⵜⴰⴷⴷⴰⵔⵜ ⵏⵏⴻⵙ, ⵉⵏⵏⴰ ⴰⵙ: “ⵎⴰⵢⴻⵎⵎⵉ ⵇⵇⴷⴻⵏ ⵉⵎⵙⴻⵅⵅⴰⵔⴻⵏ ⵏⵏⴻⴽ ⵜⵉⵎⴻⵙⵙⵉ ⵉ ⵓⵔⴻⵇⵇⵉⵄ ⵏ ⵉⵢⵢⴰⵔ ⵉ ⵉⴵⴰⵏ ⵉⵏⵓ?” 32 ⴰⴱⵛⴰⵍⵓⵎ ⵉⵏⵏⴰ ⵉ ⵢⵓⵡⴰⴱ: “ⵅⵥⴰⵔ, ⵏⴻⵛⵛ ⵙⵙⴻⴽⴽⴻⵖ-ⴷⴷ ⵖⴰⵔⴻⴽ ⵃⵉⵎⴰ ⴰⴷ ⴰⵛ ⵉⵏⵉⵖ: ‘ⴰⵙ-ⴷⴷ ⴷⴰ, ⵃⵉⵎⴰ ⴰⴷ ⵛⴻⴽ ⵙⵙⴻⴽⴽⴻⵖ ⵖⴰⵔ ⵓⵊⴻⴵⵉⴷ ⴰⴷ ⵜⵉⵏⵉⴷ: ⵎⵉⵏ ⵖⴰⵔ ⴷⴷ-ⵓⵙⵉⵖ ⴷⴰ ⵥⵉ ⵊⴰⵛⵓⵔ? ⵎⵍⵉⵃ ⵉ ⵏⴻⵛⵛ ⵎⵍⵉ ⴷⵉⵏⵏⵉ ⵇⵇⵉⵎⴻⵖ.’ ⵅⴻⵏⵏⵉ ⵍⴻⵅⵅⵓ ⵉⵜⵜⵅⴻⵚⵚⴰ ⴰⴷ ⵥⴰⵔⴻⵖ ⵓⴷⴻⵎ ⵏ ⵓⵊⴻⴵⵉⴷ. ⵎⴰⵍⴰ ⴷⴰⵢⵉ ⵄⴰⴷ ⵍⵎⵓⵄⵚⵉⵢⵢⴻⵜ, ⴻⵊⵊ ⵉ-ⵜ ⴰⴷ ⴰⵢⵉ ⵉⵏⴻⵖ.” 33 ⵅⴻⵏⵏⵉ ⵢⵓⵢⵓⵔ ⵢⵓⵡⴰⴱ ⵖⴰⵔ ⵓⵊⴻⴵⵉⴷ, ⵉⵏⵏⴰ ⴰⵙ ⴰⵢⴰ. ⵓ ⵡⴰⵏⵉⵜⴰ ⵉⵍⴰⵖⴰ-ⴷⴷ ⵅ ⴰⴱⵛⴰⵍⵓⵎ ⵓⵛⴰ ⵢⵓⴷⴻⴼ ⵏⴻⵜⵜⴰ ⵖⴰⵔ ⵓⵊⴻⴵⵉⴷ, ⵢⵓⴹⴰⵔ ⵥⵥⴰⵜⴻⵙ ⵙ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⵎⵎⵓⵔⵜ, ⵥⵥⴰⵜ ⵉ ⵓⵖⴻⵎⴱⵓⴱ ⵏ ⵓⵊⴻⴵⵉⴷ, ⵓⵛⴰ ⴰⵊⴻⴵⵉⴷ ⵉⵙⵙⵓⴷⴻⵎ ⴰⴱⵛⴰⵍⵓⵎ.