1 ⴷⴰⵡⵓⴷ ⵉⵏⵏⴰ: “ⵎⴰ ⵉⵇⵇⵉⵎ ⵄⴰⴷ ⵛⴰ ⵏ ⵢⵉⵊⵊⴻⵏ ⵥⵉ ⵜⴰⴷⴷⴰⵔⵜ ⵏ ⵛⴰⵡⵓⵍ, ⵃⵉⵎⴰ ⵏⴻⵛⵛ ⴰⴷ ⴰⵙ ⵙⵙⴻⵛⵏⴻⵖ ⵜⴰⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ ⴷⵉ ⵟⵟⵡⴻⵄ ⵏ ⵢⵓⵏⴰⵜⴰⵏ?” 2 ⵜⵓⵖⴰ ⴷⵉⵏ ⵉⵊⵊ ⵏ ⵓⵎⵙⴻⵅⵅⴰⵔ ⵖⴰⵔ ⵜⴰⴷⴷⴰⵔⵜ ⵏ ⵛⴰⵡⵓⵍ ⵜⵜⵍⴰⵖⴰⵏ ⴰⵙ ⵚⵉⴱⴰ. ⵍⴰⵖⴰⵏ ⴰⵙ-ⴷⴷ ⵖⴰⵔ ⴷⴰⵡⵓⴷ. ⵉⵏⵏⴰ ⴰⵙ ⵓⵊⴻⴵⵉⴷ: “ⵎⴰ ⵛⴻⴽ ⴷ ⵚⵉⴱⴰ?” ⵏⴻⵜⵜⴰ ⵉⵏⵏⴰ: “ⴷ ⴰⵎⵙⴻⵅⵅⴰⵔ ⵏⵏⴻⴽ.” ^■   3 ⴰⵊⴻⴵⵉⴷ ⵉⵏⵏⴰ: “ⵎⴰ ⵉⵇⵇⵉⵎ ⵄⴰⴷ ⵛⴰ ⵏ ⵉⵊⵊ ⵥⵉ ⵜⴰⴷⴷⴰⵔⵜ ⵏ ⵛⴰⵡⵓⵍ ⵉⴷⴷⴰⵔ, ⵃⵉⵎⴰ ⴰⴷ ⴰⵙ ⵙⵙⴻⵛⵏⴻⵖ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⴰⵔⴻⴱⴱⵉ?” ⵅⴻⵏⵏⵉ ⵉⵏⵏⴰ ⵚⵉⴱⴰ ⵉ ⵓⵊⴻⴵⵉⴷ: “ⴰⵇⴰ ⴷⵉⵏ ⵄⴰⴷ ⵉⵊⵊ ⵏ ⵎⵎⵉⵙ ⵏ ⵢⵓⵏⴰⵜⴰⵏ ⵡⴻⵏⵏⵉ ⴷ ⴰⵏⴻⵄⴹⴰⴱ ⵥⵉ ⵜⵏⴰⵢⴻⵏ ⵏ ⵉⴹⴰⵔⴻⵏ.” ^■   4 ⵉⵏⵏⴰ ⴰⵙ ⵓⵊⴻⴵⵉⴷ: “ⵎⴰⵏⵉ ⵉⴵⴰ ⵏⴻⵜⵜⴰ?” ⵚⵉⴱⴰ ⵉⵏⵏⴰ ⴰⵙ ⵉ ⵓⵊⴻⴵⵉⴷ: “ⵅⵥⴰⵔ, ⵏⴻⵜⵜⴰ ⴰⵇⴰ-ⵜ ⴷⵉ ⵜⴰⴷⴷⴰⵔⵜ ⵏ ⵎⴰⵅⵉⵔ, ⵎⵎⵉⵙ ⵏ ⵄⴰⵎⵎⵉⵢⵉⵍ ⴷⵉ ⵍⵓⴷⴰⴱⴰⵔ.”

5 ⵅⴻⵏⵏⵉ ⵉⵙⵙⴻⴽⴽ ⵓⵊⴻⴵⵉⴷ ⴷⴰⵡⵓⴷ ⴷⵉⵏ ⵓ ⵢⵉⵡⵢⵉ ⵜ-ⵉ-ⴷⴷ ⵥⵉ ⵜⴰⴷⴷⴰⵔⵜ ⵏ ⵎⴰⵅⵉⵔ, ⵎⵎⵉⵙ ⵏ ⵄⴰⵎⵎⵉⵢⵉⵍ ⴷⵉ ⵍⵓⴷⴰⴱⴰⵔ. 6 ⵓⵎⵉ ⵎⴰⴼⵉⴱⵓⵛⴰⵜ, ⵎⵎⵉⵙ ⵏ ⵢⵓⵏⴰⵜⴰⵏ, ⵎⵎⵉⵙ ⵏ ⵛⴰⵡⵓⵍ, ⵢⵓⴷⴻⴼ ⵖⴰⵔ ⴷⴰⵡⵓⴷ, ⵉⵡⴹⴰ ⵅ ⵓⵖⴻⵎⴱⵓⴱ ⵏⵏⴻⵙ, ⵢⵓⴹⴰⵔ. ⴷⴰⵡⵓⴷ ⵉⵏⵏⴰ: “ⵎⴰⴼⵉⴱⵓⵛⴰⵜ!” ⵏⴻⵜⵜⴰ ⵉⵏⵏⴰ: “ⵅⵥⴰⵔ, ⴰⵇⴰ ⴷⴰ ⴰⵎⵙⴻⵅⵅⴰⵔ ⵏⵏⴻⴽ.” 7 ⴷⴰⵡⵓⴷ ⵉⵏⵏⴰ ⴰⵙ: “ⵡⴰⵔ ⵜⵜⴻⴳⴳⵯⴻⴷ, ⵎⴰⵖⴰⵔ ⵏⴻⵛⵛ ⴰⴷ ⴰⵛ ⵙⵙⴻⵛⵏⴻⵖ ⵜⴰⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ ⴷⵉ ⵟⵟⵡⴻⵄ ⵏ ⴱⴰⴱⴰⵛ ⵢⵓⵏⴰⵜⴰⵏ. ⵏⴻⵛⵛ ⴰⴷ ⴰⵛ ⴰⵔⵔⴻⵖ ⵎⴰⵔⵔⴰ ⵉⵢⵢⴰⵔⴻⵏ ⵏ ⵊⴻⴷⴷ ⵏⵏⴻⴽ ⵛⴰⵡⵓⵍ ⵓ ⵛⴻⴽ ⴰⴷ ⵜⴻⵛⵛⴻⴷ ⵍⴻⴱⴷⴰ ⵎⴰⵛⵛⴰ ⵖⴰⵔ ⵟⵟⴰⴱⵍⴰ ⵉⵏⵓ.” ^□   8 ⵅⴻⵏⵏⵉ ⵢⵓⴹⴰⵔ ⴰⵙ, ⵉⵏⵏⴰ: “ⵎⵉⵏ ⵉⵄⵏⴰ ⵓⵎⵙⴻⵅⵅⴰⵔ ⵏⵏⴻⴽ ⴰⵍⴰⵎⵉ ⵛⴻⴽ ⵜⴻⵅⵥⴰⵔⴻⴷ ⵖⴰⵔ ⵉⵊⵊ ⵏ ⵡⴻⵇⵥⵉⵏ ⵉⵎⵎⵓⵜⴻⵏ ⴰⵎ ⵎⴰⵎⵎⴻⵛ ⴵⵉⵖ ⵏⴻⵛⵛ?” 9 ⵅⴻⵏⵏⵉ ⵉⵍⴰⵖⴰ ⵓⵊⴻⴵⵉⴷ ⵅ ⵚⵉⴱⴰ, ⴰⵎⵙⴻⵅⵅⴰⵔ ⵏ ⵛⴰⵡⵓⵍ, ⵉⵏⵏⴰ ⴰⵙ: “ⵎⴰⵔⵔⴰ ⵎⵉⵏ ⵉⴵⴰⵏ ⵏ ⵛⴰⵡⵓⵍ ⴷ ⵎⴰⵔⵔⴰ ⵜⴰⴷⴷⴰⵔⵜ ⵏⵏⴻⵙ, ⵡⵛⵉⵖ ⵜ ⵉ ⵎⵎⵉⵙ ⵏ ⵙⵉⴷⵉ ⵏⵏⴻⴽ.

10 ⵛⴻⴽ ⴰⴷ ⴰⵙ ⵜⵛⴰⵔⵥⴻⴷ ⵜⴰⵎⵎⵓⵔⵜ, ⵛⴻⴽ ⴷ ⵉⵃⴻⵏⵊⵉⵔⴻⵏ ⵏⵏⴻⴽ ⴷ ⵉⵎⵙⴻⵅⵅⴰⵔⴻⵏ ⵏⵏⴻⴽ, ⵃⵉⵎⴰ ⵎⵎⵉⵙ ⵏ ⵙⵉⴷⵉ ⵏⵏⴻⴽ ⴰⴷ ⵖⴰⵔⴻⵙ ⵢⵉⵍⵉ ⵡⴻⵖⵔⵓⵎ ⴰⴷ ⵢⴻⵛⵛ. ⵎⴰⴼⵉⴱⵓⵛⴰⵜ, ⵎⵎⵉⵙ ⵏ ⵙⵉⴷⵉ ⵏⵏⴻⴽ, ⴰⴷ ⵢⴻⵛⵛ ⵍⴻⴱⴷⴰ ⴰⵖⵔⵓⵎ ⵖⴰⵔ ⵟⵟⴰⴱⵍⴰ ⵉⵏⵓ.” ⵚⵉⴱⴰ ⵜⵓⵖⴰ ⵖⴰⵔⴻⵙ ⵅⴻⵎⵎⴻⵙⵟⴰⵛ ⵏ ⵉⵃⴻⵏⵊⵉⵔⴻⵏ ⴷ ⵄⵉⵛⵔⵉⵏ ⵏ ⵉⵎⵙⴻⵅⵅⴰⵔⴻⵏ.

11 ⵚⵉⴱⴰ ⵉⵏⵏⴰ ⵉ ⵓⵊⴻⴵⵉⴷ: “ⴰⵎⵙⴻⵅⵅⴰⵔ ⵏⵏⴻⴽ ⴰⴷ ⵉⴳⴳ ⵄⵍⴰⵃⵙⴰⴱ ⵎⴰⵔⵔⴰ ⵎⵉⵏ ⵢⵓⵎⵓⵔ ⵙⵉⴷⵉ ⴰⵊⴻⴵⵉⴷ ⵉ ⵓⵎⵙⴻⵅⵅⴰⵔ ⵏⵏⴻⵙ!” ⴷⴰⵡⵓⴷ ⵉⵏⵏⴰ ⵄⴰⴷ: “ⵎⴰⴼⵉⴱⵓⵛⴰⵜ ⴰⴷ ⵉⵛⵛ ⵖⴰⵔ ⵟⵟⴰⴱⵍⴰ ⵉⵏⵓ ⴰⵎ ⵉⵊⵊⴻⵏ ⵥⴻⴳ ⵉⵃⴻⵏⵊⵉⵔⴻⵏ ⵏ ⵓⵊⴻⴵⵉⴷ.”

12 ⵎⴰⴼⵉⴱⵓⵛⴰⵜ ⵜⵓⵖⴰ ⵖⴰⵔⴻⵙ ⵉⵊⵊ ⵏ ⵎⵎⵉⵙ ⵜⵜⵍⴰⵖⴰⵏ ⴰⵙ ⵎⵉⵅⴰ. ⵎⴰⵔⵔⴰ ⵉⵏⵏⵉ ⵜⵓⵖⴰ ⵉⵥⴻⴷⴷⵖⴻⵏ ⴷⵉ ⵜⴰⴷⴷⴰⵔⵜ ⵏ ⵚⵉⴱⴰ ⵜⵓⵖⴰ ⴰⵜⴻⵏ ⴷ ⵉⵎⵙⴻⵅⵅⴰⵔⴻⵏ ⵏ ⵎⴰⴼⵉⴱⵓⵛⴰⵜ.

13 ⵓ ⵎⴰⴼⵉⴱⵓⵛⴰⵜ ⵜⵓⵖⴰ ⵉⵥⴻⴷⴷⴻⵖ ⴷⵉ ⵓⵔⵛⴰⵍⵉⵎ, ⵎⴰⵖⴰⵔ ⵏⴻⵜⵜⴰ ⵉⵜⵜⴻⵜⵜ ⵍⴻⴱⴷⴰ ⵖⴰⵔ ⵟⵟⴰⴱⵍⴰ ⵏ ⵓⵊⴻⴵⵉⴷ. ⵏⴻⵜⵜⴰ ⵜⵓⵖⴰ-ⵜ ⴷ ⴰⵏⴻⵄⴹⴰⴱ ⵥⵉ ⵜⵏⴰⵢⴻⵏ ⵏ ⵉⴹⴰⵔⴻⵏ.