1 ⵉⴼⵉⵍⵉⵙⵟⵉⵏⵉⵢⵢⴻⵏ ⵙⵙⵎⵓⵏⴻⵏ ⵎⴰⵔⵔⴰ ⵍⵄⴻⵙⴽⴰⵔ ⵏⵙⴻⵏ ⵖⴰⵔ ⴰⴼⵉⵇ ⵓⵛⴰ ⵉⵙⵔⴰⵉⵍ ⵜⵓⵖⴰ ⵉⵡⵜⴰ ⵉⵇⵉⴹⴰⵏ ⵏⵏⴻⵙ ⵖⴰⵔ ⵜⴰⵍⴰ ⵏⵏⵉ ⵉⴵⴰⵏ ⵖⴰⵔ ⵢⴰⵥⵔⴰⵄⵉⵍ. 2 ⵓⵛⴰ ⵍⴱⴰⵛⴰⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵥⵡⴰⵏ ⵖⴰⵔ ⴷⵉⵏ ⵙ ⵍⵎⵢⴰⵡⴰⵜ ⵓ ⵙ ⵍⵓⵍⵓⴼ ⵏⵙⴻⵏ ⵓⵛⴰ ⵉⵥⵡⴰ ⴷⴰⵡⵓⴷ ⴷ ⵢⴻⵔⵢⴰⵥⴻⵏ ⵏⵏⴻⵙ ⴰⴽ-ⴷ ⴰⵅⵉⵛ ⵖⴰⵔ ⵓⵖⴻⵥⴷⵉⵙ ⴰⵏⴻⴳⴳⴰⵔⵓ. 3 ⵅⴻⵏⵏⵉ ⵏⵏⴰⵏ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ: “ⵎⵉⵏ ⴷⴰ ⵜⵜⴻⴳⴳⴻⵏ ⵉⵄⵉⴱⵔⴰⵏⵉⵢⵢⴻⵏ-ⴰ?” ⵢⴰⵔⵔⴰ-ⴷⴷ ⴰⵅⵉⵛ ⵅ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ: “ⵎⴰ ⵡⴰ ⵡⴰⵔ ⵉⴵⵉ ⴷ ⴷⴰⵡⵓⴷ, ⴰⵎⵙⴻⵅⵅⴰⵔ ⵏ ⵛⴰⵡⵓⵍ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⵡⴻⵏⵏⵉ ⵜⵓⵖⴰ ⵖⴰⵔⵉ ⵉⴵⴰⵏ ⴰⵙⴻⴳⴳⵯⴰⵙ ⴷ ⵡⴰⵙⵙ? ⵣⴻⴳ ⵡⴰⵙⵙ ⵉ ⵖⴰⵔⵉ ⴷⴷ-ⵢⴻⵄⴷⵓ ⵖⴰⵔⴻⵙ ⴰⵍ ⴰⵙⵙ-ⴰ ⵏⴻⵛⵛ ⵡⴰⵔ ⴷⴰⵢⴻⵙ ⵓⴼⵉⵖ ⵓⵍⴰ ⴷ ⵉⵊⵊ ⵏ ⵍⵄⵉⴱ.”

4 ⴼⴼⵓⴳⴳⵎⴻⵏ ⵅⴰⵙ ⴰⵟⵟⴰⵙ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵏⵏⴰⵏ ⴰⵙ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ: “ⵙⴻⴽⴽ ⴰⵔⵢⴰⵥ ⴰⴷ ⵉⵄⵇⴻⴱ, ⵃⵉⵎⴰ ⴰⴷ ⵉⴷⵡⴻⵍ ⵖⴰⵔ ⵡⴻⵎⵛⴰⵏ ⵏⵏⴻⵙ ⵏⵏⵉ ⵉ ⴷ ⴰⵙ ⵜⴻⵙⵙⴻⵛⵏⴻⴷ. ⵡⴰⵔ ⵉⵥⴻⵎⵎⴰⵔ ⴰⴽⵉⴷⵏⴻⵖ ⵉⵀⵡⴰ ⵖⴰⵔ ⵓⵎⴻⵏⵖⵉ, ⵃⵉⵎⴰ ⵅⴻⵏⵏⵉ ⵡⴰⵔ ⵉⴷⴷⵉⴽⴽⵡⵉⵍ ⴷ ⵍⴻⵄⴷⵓ ⵏⵏⴻⵖ ⴷⴻⴳ ⵓⵎⴻⵏⵖⵉ. ⵎⴰⵖⴰⵔ ⵙ ⵎⵉⵏⵥⵉ ⵉⵥⴻⵎⵎⴰⵔ ⵡⴰⵏⵉⵜⴰ ⴰⴷ ⵉⵚⵍⴻⵃ ⴰⴽ-ⴷ ⵙⵉⴷⵉⵙ ⵏⵏⴻⵙ? ⵎⴰ ⵡⴰⵔ ⵉⴵⵉ ⴰⴽ-ⴷ ⵉⵥⴻⴵⵉⴼⴻⵏ ⵏ ⵢⴻⵔⵢⴰⵥⴻⵏ-ⴰ? ^■   5 ⵎⴰ ⵡⴰⵏⵉⵜⴰ ⵡⴰⵔ ⵉⴵⵉ ⴷ ⴷⴰⵡⵓⴷ ⵡⴻⵏⵏⵉ ⵅ ⵖⴻⵏⵏⵊⴻⵏⵜ ⴷ ⵛⴻⴹⵃⴻⵏⵜ ⵙ ⵏⵏⵓⴱⴰⵜ, ⵏⵏⴰⵏⵜ: ‘ⵛⴰⵡⵓⵍ ⵏⴻⵜⵜⴰ ⵉⵖⵍⴻⴱ ⵅ ⵍⵓⵍⵓⴼ ⵏⵏⴻⵙ, ⵎⴰⵛⴰ ⴷⴰⵡⵓⴷ ⵏⴻⵜⵜⴰ ⵅ ⵄⴻⵛⵔⴰ ⵏ ⵍⵓⵍⵓⴼ ⵏⵏⴻⵙ?’ ” ^■  

6 ⵓⵛⴰ ⵉⵍⴰⵖⴰ-ⴷⴷ ⴰⵅⵉⵛ ⵉ ⴷⴰⵡⵓⴷ ⵉⵏⵏⴰ ⴰⵙ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ, ⵛⴻⴽ ⴷ ⴰⵚⴷⵉⵇ. ⵓⴼⵓⵖ ⵏⵏⴻⴽ ⴷ ⵡⴻⵄⵇⴰⴱ ⵏⵏⴻⴽ ⴰⴽⵉⴷⵉ ⴷⵉ ⵍⵄⴻⵙⴽⴰⵔ ⴰⵇⴰ ⴰⵜⴻⵏ ⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵉⵏⵓ, ⵎⴰⵖⴰⵔ ⵏⴻⵛⵛ ⵡⴰⵔ ⴷⴰⵢⴻⴽ ⵓⴼⵉⵖ ⵇⴰⵄ ⵛⴰ ⵏ ⵍⵖⴻⵛⵛ ⵥⴻⴳ ⵡⴰⵙⵙ ⵉ ⵖⴰⵔⵉ ⴷⴷ-ⵜⵓⵙⵉⴷ ⵖⴰⵔⴻⵙ ⴰⵍ ⴰⵙⵙ-ⴰ. ⵎⴰⵛⴰ ⵛⴻⴽ ⵡⴰⵔ ⵜⴻⴵⵉⴷ ⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵏ ⵍⴱⴰⵛⴰⵜ. 7 ⵅⴻⵏⵏⵉ ⵍⴻⵅⵅⵓ, ⵄⵇⴻⴱ ⵓⵛⴰ ⵓⵢⵓⵔ ⴷⵉ ⵍⴻⵀⵏⴰ ⵃⵉⵎⴰ ⵡⴰⵔ ⵜᵉⵜⵜⴻⴳⴳⴻⴷ ⵇⴰⵄ ⵛⴰ ⵏ ⵍⵖⴻⵛⵛ ⴷⵉ ⵜⵉⵟⵟⴰⵡⵉⵏ ⵏ ⵍⴱⴰⵛⴰⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ.” 8 ⵅⴻⵏⵏⵉ ⵉⵏⵏⴰ ⴷⴰⵡⵓⴷ ⵉ ⴰⵅⵉⵛ: “ⵎⴰⵖⴰⵔ ⵎⵉⵏ ⴳⴳⵉⵖ? ⵎⵉⵏ ⵜⵓⴼⵉⴷ ⴷⴻⴳ ⵓⵎⵙⴻⵅⵅⴰⵔ ⵏⵏⴻⴽ ⵥⴻⴳ ⵡⴰⵙⵙ ⴰⵎⴻⵥⵡⴰⵔⵓ ⵉ ⴷ ⴰⵢⵉ ⵜⵓⵖⴰ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⵖⴰⵔⴻⵙ ⴰⵍ ⴰⵙⵙ-ⴰ, ⴰⵍⴰⵎⵉ ⵡⴰⵔ ⵔⵓⵃⴻⵖ ⴰⴽⵉⴷⵡⴻⵎ ⴰⴷ ⵎⴻⵏⵖⴻⵖ ⴰⴽ-ⴷ ⵍⵄⴻⴷⵢⴰⵏ ⵏ ⵙⵉⴷⵉ ⵉⵏⵓ, ⴰⵊⴻⴵⵉⴷ?” 9 ⴰⵅⵉⵛ ⵢⴰⵔⵔⴰ-ⴷⴷ, ⵉⵏⵏⴰ ⵉ ⴷⴰⵡⵓⴷ: “ⵏⴻⵛⵛ ⵙⵙⵏⴻⵖ ⵜⵜ, ⵎⵉⵏⵥⵉ ⵛⴻⴽ ⴷ ⵍⵎⵍⵉⵃ ⴷⵉ ⵜⵉⵟⵟⴰⵡⵉⵏ ⵉⵏⵓ ⴰⵎ ⵉⵊⵊ ⵏ ⵍⵎⴰⵍⴰⴽ ⵏ ⴰⵔⴻⴱⴱⵉ, ⵎⴰⵛⴰ ⵍⵃⵓⴽⴽⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵏⵏⴰⵏ: ‘ⵏⴻⵜⵜⴰ ⵡⴰⵔ ⴰⴽⵉⴷⵏⴻⵖ ⵉⵜⵜⴻⴼⴼⴻⵖ ⵖⴰⵔ ⵓⵎⴻⵏⵖⵉ.’

10 ⵙ ⵓⵢⴻⵏⵏⵉ ⴽⴽⴰⵔ ⵜⵉⵡⴻⵛⵛⴰ ⵥⵉⵛ ⵙ ⵉⵎⵙⴻⵅⵅⴰⵔⴻⵏ ⵏ ⵙⵉⴷⵉ ⵏⵏⴻⴽ, ⵉⵏⵏⵉ ⴰⴽⵉⴷⴻⴽ ⴷⴷ-ⵢⵓⵙⵉⵏ. ⵎⴰⵍⴰ ⵜⴻⴽⴽⴰⵔⴻⵎ ⵙ ⵡⴰⵙⵙ ⵥⵉⵛ ⵓⵛⴰ ⵉⵚⴱⴻⵃ ⵍⵃⴰⵍ, ⴼⴼⵖⴻⵎ ⵅⴻⵏⵏⵉ.”

11 ⴷⴰⵡⵓⴷ ⵉⴽⴽⴰⵔ ⵥⵉⵛ, ⵏⴻⵜⵜⴰ ⴷ ⵢⴻⵔⵢⴰⵥⴻⵏ ⵏⵏⴻⵙ, ⵃⵉⵎⴰ ⴰⴷ ⵓⵢⵓⵔⴻⵏ ⴷⵉ ⵚⵚⴱⴻⵃ, ⴰⴷ ⴷⴷ-ⵄⴻⵇⴱⴻⵏ ⵖⴰⵔ ⵜⴻⵎⵎⵓⵔⵜ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵉⴼⵉⵍⵉⵙⵟⵉⵏⵉⵢⵢⴻⵏ ⵎⴰⵛⴰ ⴼⴼⵖⴻⵏ ⴳⴻⵄⵄⴷⴻⵏ ⵖⴰⵔ ⵢⴰⵥⵔⴰⵄⵉⵍ.